1 A-KORINDU 12
12
1Achi, ha kutwala ku yawana ya uspiritu, mandumbu, chazangile yenu kwalajala. 2Nunanyingika muze nwapwile akwa mavungu, anutwalile ku mahamba tumama mu jila yeswayo anutwalile. 3Kashika ngunanunyingikisa ngwami, Niumwe anahanjika muli Spiritu ya Zambi mamba ngwenyi, Yesu kashingiwa; mba niumwe mahasa kwamba ngwenyi, Mwene Yesu, shina muli Spiritu Musandu.
4Achi, kuchili kulipalikila cha yawana ya vumbi, alioze Spiritu umuwika. 5Kuchili kulipalikila cha uvumbiko, alioze Mwene umuwika. 6Kuchili kulipalikila cha kulinga, alioze Zambi umuwika, yoze wakulingisa yuma yeswe muli eswe. 7Alioze mahana usolwelo wa Spiritu kuli eswe mukufumbuka. 8Mumu muli Spiritu mahana kuli umwe, liji lia mana; kuli mukwo, liji lia chinyingi; nikulita ni Spiritu umuwika; 9kuli mukwo, Ufulielo, muli Spiritu umuwika; kuli mukwo, yawana ya vumbi ya kuhindwisa, muli Spiritu umuwika: 10kuli mukwo, kulinga cha yipupu; kuli mukwo, uprofeto: kuli mukwo, kusa chinyingi hakachi ka maspiritu; kuli mukwo, malimi eka ni eka; kuli mukwo, ulumbunwiso wa malimi: 11alioze Spiritu umuwika kakulingisa yino yuma yeswe, nikwanyina kuli mutu ni mutu, chizechene ngwe mapala.
12Mumu chizechene ngwe mujimba unapu umuwika, ni yihanda yinji ukwete, ni yihanda yeswe ya mujimba nikupwa yinji yinapu mujimba umuwika; chocho nawa Kristu. 13Mumu muli Spiritu umuwika hanatupapachisa yetu eswe mu mujimba umuwika, chipwe A-Yunda, chipwe A-Ngresia, chipwe ndungo, chipwe enya chifuchi, hanatunwisa muli Spiritu umuwika.
14Mumu mujimba hi chihanda chimuwika ko, alioze yinji. 15Kachi kulu muliamba ngwenyi, Mumu yami hi nguli kwoko ko, hi nguli chihanda cha ku mujimba ko; kashika hi lia ku mujimba ko, nyi? 16Nyi kachi twitwi muliamba ngwenyi, Mumu yami hi nguli liso ko, hi nguli lia ku mujimba ko; kashika hi lia ku mujimba ko, nyi? 17Kachi mujimba weswe lukombo wapwa liso, kwivwa Chilihicho? Kachi weswe lukombo wapwa kwivwa, kuhumbika Chilihicho? 18Alioze haliapwila Zambi hanase yihanda, chimwe ni chimwe, mu mujimba, chizechene ngwe wapalile. 19Nyi kachi yeswe yapwa chihanda chimuwika, mujimba ulihiwo? 20Haliapwila kuyili yihanda yinji hindu mujimba umuwika. 21Liso kuliahashile kwamba ku kwoko ngwenyi, Chakufupile, hanji cheka nawa mutwe kuwahashile kwamba ku molu ngwenyi, Chanufupile. 22Ka, alioze Shinaho chikolo, yihanda yize ya ku mujimba yakusoloka ngwe yilelu yahiana, kachi yakuhi, kachi kuhona pundu: 23ni yize ya ku mujimba twakushinginyeka kupwa ni ulemu ukepe, yino twakuyilemesa kuhiana; ni yihanda yetu yize kuyishi upeme, upeme Wahiana yikwete; 24se yihanda yetu yipema kuyishi kuhona: alioze Zambi watesele mujimba hamuwika, nikuhana ulemu Wahiana ku chihanda chize chahonene; 25hanga kukuchi kapwa kulihandununa mu mujimba; alioze hanga yihanda yikapwe nikufunga chimuwika chimwe ha chikwo ni chikwo. 26Chipwe chihanda chimwe muchivwa lamba, yihanda yeswe muyivwa lamba hamuwika nacho; hanji kachi malemesa chihanda chimwe, yihanda yeswe muyiwahilila hamuwika nacho.
27Achi, yenu nunapu mujimba wa Kristu, mutu ni mutu chihanda ni chihanda chawo. 28Zambi hanase amwe mu chikungulwila, chitangu apostolo, chamuchiali aprofeta, chamuchitatu alongeshi, kulutwe lia wano tachi ja yipupu, mba kulutwe yawana ya vumbi ya kuhindwisa, kukwasa, kutondekeza, malimi eka ni eka. 29Eswe kanapu apostolo, nyi? Eswe kanapu aprofeta, nyi? Eswe kanapu alongeshi, nyi? Eswe kali ni tachi ja yipupu, nyi? 30Eswe kali ni yawana ya vumbi ya kuhindwisa, nyi? Eswe kanahanjika mu malimi, nyi? Eswe kanalumbununa, nyi? 31Alioze fupenu chikolo ha yawana ya vumbi yahiana, hindu mungunulweza jila yahiana chikolo.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
1 A-KORINDU 12: Csa
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Chokwe Bible © Bible Society in Angola, 1975.