1 A-KORINDU 11
11
1Pwenu akwa kungwimbulula, chizechene ngwe ni yami nawa nguli mukwa kwimbulula Kristu.
2Achi, ngunanuhalisa, mandumbu, nwakungwiwuluka ha yuma yeswe; nwakukakaminya ku je ndongo, chizechene ngwe nanukunjikilejo. 3Alioze ngunazange yenu nunyingike we mutwe wa lunga ni lunga, Kristu; ni we mutwe wa pwo, lunga; ni mutwe wa Kristu, Zambi. 4Lunga ni lunga malemba, hanji maprofeteza, kali ni chuma chimwe ha mutwe wenyi malelesa mutwe wenyi. 5Alioze pwo ni pwo malemba, hanji maprofeteza ni mutwe wenyi kaufukile, malelesa mutwe wenyi: mumu chinapu chuma chimuwika ngwe iye wapwa wa kutewula. 6Alioze kachi pwo keshi kufuka mutwe, kachi akamukambejo, mumu kachi sonyi hali pwo kumukambajo chipwe kumutewula, kachi akafuke mutwe. 7Mumu lunga chamwenemwene kuchamutambile kufuka mutwe, se iye Chizulie ni uhenya wa Zambi; alioze pwo kanapu uhenya wa lunga. 8Mumu lunga hi wa kuli pwo ko, alioze pwo wa kuli lunga: 9mumu chipwe lunga kamutangile hali pwo; alioze atangile pwo hali lunga. 10Ha chikuma chino chatamba pwo kupwa ni chinyingi cha kuzeyela ha mutwe wenyi, mumu hali angelo. 11Hindu chipwe chocho, muli Mwene chipwe pwo keshi kupwa ukawenyi lunga keshiko, chipwe lunga keshi kupwa ukawenyi pwo keshiko. 12Mumu chizechene ngwe pwo wa kuli lunga, chocho nawa lunga wa kuli pwo; alioze yeswe ya kuli Zambi. 13Chipatulenu hakachi kenu ngwami, Chinate hali pwo kulemba kuli Zambi ni mutwe kaufukile, nyi? 14Chipwe chisemewa chene kuchanulongesele nyi, kachi lunga mapwa ni kambu jisuku jinapu kaleleso kuli iye? 15Alioze kachi pwo mapwa ni kambu jisuku jinapu uhenya kuli iye: mumu kambu jenyi hanamwehejo ha kulifuka. 16Alioze kachi umwe masoloka ngwe mukwa pami, yetu kutushi ndako niyimwe ngwe yino, chipwe yikungulwila ya Zambi.
17Achi, ha kunwaha shimbi yino, chanuhalishile. Kukunguluka chenu hi chipema ko, chipi. 18Mumu chitangu, muze munukunguluka, ngunevu ngwo, Kulihandununa kuchili hakachi kenu; mba ngunachifuliela hakehe. 19Mumu chatamba kupwa kulihandununa nawa hakachi kenu, hanga waze maasela Shindakenyo yipema akasoloke hakachi kenu. 20Muze kashika munukunguluka muma mumuwika, hi mukulia ko seya ya Mwene: 21mumu ha kulia chenu, mutu ni mutu matambula kulia chenyi mwene Shimbu-kanda; mba umwe mevwa zala, ni mukwo mazengewa. 22Kuma, kunushi mazuwo a kulitamo, a kunwinamo, nyi? Shina nunalelesa chikungulwila cha Zambi, nikukolesa sonyi waze keshi nacho? Kuchi mungwamba kuli yenu? Mungunuhalisa, nyi? Ka, ha chino chanuhalishile.
23Mumu natambwile kuli Mwene, chize yami nawa nanukunjikilecho, ngwe Mwene Yesu ha ufuku uze amukunjikile, wanjile mbolo; 24ni muze te hasakwila, wayipalwile, wambile ngwenyi, Yino, mujimba wami hali yenu: chino lingenu nikungwiwuluka. 25Chizechene nawa musenge kulutwe lia kulia, ngwenyi, Musenge uno we usendo waha mu manyinga jami: chino lingenu yisuho yeswe munuunwa nikungwiwuluka. 26Mumu yisuho yeswe munulia mbolo yino, mununwa musenge uno, munwambujola kufwa cha Mwene ndo meza.
27Kashika mweswe malia mbolo, hanji manwa musenge wa Mwene ngwe kuchatele, kumahila mujimba ni manyinga ja Mwene. 28Alioze mutu akalieseke, chocho akalie mbolo, akanwe musenge. 29Mumu yoze malia hanji manwa, malia hanji manwa uhiso hali iye mwene se kamwene mujimba wa Mwene. 30Ha chikuma chino anji a kuli yenu nunalele, nunasalwoka, ni hi akehe ko mu tulo ali. 31Alioze kachi mutulipatwila yetwene, kachi keshi kutupatwila. 32Alioze muze matupatwila matulamba ha kufumba kuli Mwene, hanga kechi katuhisa hamwe ni akwa hashi.
33Kashika, mandumbu jami, muze munukungama mukulia, litatenu umwe ni mukwo ni mukwo. 34Kachi umwe mevwa zala, kachi akalie ku zuwo lienyi: hanga kunuchi kukunguluka ha uhiso. Ni yuma yikwo mungululika muze mungwiza.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
1 A-KORINDU 11: Csa
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Chokwe Bible © Bible Society in Angola, 1975.