Ezekieli 45
45
Bǎãn mɛnɛn nə n koa
1«Bɛ̀ ǹ nə́ n pã ǹ nə́ gána lɛ gii ǹ mɛn waáraa, ǹ masɛ Dɛnaa Lawa wɔ gii bɔ. Bɛ n die goɛ̃ masɛ wɔ lɛa gána lɛ nɛ, a sasabaa goã gùrù yii duu fuəwensooro (25 000), a pəməbaa goã gùrù yii duu fu (10 000). Bɛ tumaa n die goɛ̃ a gɔrɔn ma din wɔ lɛa. 2Ǹ bǎã koa a gɔ́ɔ̃ nɛ Lawa a kion kɛ wɔ lɛa, a wàã sii tumaa n gùrù yii biɛsooro (500). Ǹ bǎã kooro dɔ zɔɔ̃ gùrù yii posooro, bɛ na a lɛnpɛnɛ. 3Ǹ bɛ́ re bǎã mɛn lɛ koɛ, ǹ die ǹ na a sasabaa zɔɔ̃ gùrù yii duu fuəwensooro, a pəməbaa goã gùrù yii duu fù. Maa kion lɛ n die goɛ̃ walan, bǎã sonbore sonbore kɛ lɛ. 4Bɛa bǎã kɛ lɛ, ǹ nə́ kuru gána lɛ nɛ ǹ nə́ koa, bɛ n die doe wúlu-bɔlen kɛn ganaa, ǹ mɛnɛn bɛ́ Lawa a kion lɛ a dí nyɛɛ, ǹ nə́ n mɔrɛ Dɛnaa Lawa ganaa, ǹ nə́ dí nyɛɛ nɛ. Bɛ̀ á n baa miɛ̃, ǹ dɔn tá boe la ǹ bǎã yɛ ǹ nə ǹ kionən dɔdɔ a nɛ, bǎã dɔ yɛ Lawa wɔ lɛa, ǹ kion sonbore kɛ dɔ a nɛ. 5Ǹ bǎã kɔsɔ dɔ zɔɔ̃ a sasabaa n gùrù yii duu fuəwensooro, a pəməbaa n gùrù yii duu fù, bɛ goã *Levii tɔrɔn kɛn wɔ lɛa, ǹ mɛnɛn bɛ́ Lawa a kion lɛ a dí nyɛɛ. Ǹ tá re kionən doe walan ǹ giã a nɛ. 6Ǹ bɛ́ re bǎã mɛn lɛ zoɛ̃ Lawa wɔ lɛa, ǹ die ǹ bǎã kɔsɔ zɔɔ̃ bɛ lɛ para li, a sasabaa n gùrù yii duu fuəwensooro, a pəməbaa n gùrù yii duu sooro (5 000), ǹ kiwi goon dɔ walan, Izirayeli tɔrɔn tumaa wɔ lɛa. 7Kii nɛ ke, ǹ bǎã mɛn koa Lawa a kion lɛ wɔ lɛa, ǹ nə ǹ mɛn dɔ koa kiwi lɛ a dɔ ǹ bǎã lɛa, ǹ die ǹ bǎã kɔ bɛa kii nɛ lɛ la, bɛa bǎã màn paa lɛ wàãn paanan li. Bɛa bǎã lɛ a lɛ̀nyɛɛn gɔn la n die woe yǎa Yìsi mu gole kɛ lɛ-a, a lɛ̀giala gɔn la, a wo yǎa Izirayeli minin gána kɛ gèlè ganaa. Bɛa bǎã lɛ cccbb a sasabaa n die goɛ̃ ka Izirayeli tɔrɔn lɛn gogoonmaa wɔ bɛ́ lɔn. 8Kii lɛ a bǎã n die goɛ̃ ka bɛ nɛ, Izirayeli gána nɛ. Bɛ̀ á n baa miɛ̃, kiin kɛn ba re mɛnɛɛ maa zaman kɛ la doo wa, ǹ tá re gána lɛ toɛ Izirayeli tɔrɔn lɛn gɔn.»
Goledɛnaa doamaa bɛ́ ka màn mɛn nɛ a nya ǹ dí bɛ́ ka màn mɛn dɔ nɛ
9Dɛnaa Lawa n ke pii:
Izirayeli a goledɛnan lɛn,
kaa sii lɛ la yii ni.
Ka n bɔ kakaarɛbaa laanka
wurumubaa kɛ wɔlɔ li!
Ka kɔ sonborebaa laanka
peperebaa lɛ!
Ka maa zaman lɛ a bɔ ma yii-n
kɛ lɛ da!
Ma din Dɛnaa Lawa a da ǹ boo ne.
10 #
LWS 19.36. Ka toa kaa màn zɔɔ̃ ǹ mànan nə goã a taãnan lɛa. Ta *belee nàn zɔɔ̃ ǹ wɔ nɛ, ta màn mudɛnaa zɔɔ̃ ǹ wɔ nɛ. 11Màn nàn zɔɔ̃ ǹ màn ke a tɔ n "efa", ka màn mudɛnaa zɔɔ̃ ǹ màn kɛ nɛ a tɔ n "bati", bɛn tumaa doamaa nɛ ǹ goã goon. Maǹ zɔɔ̃ ǹ màn gole ke a tɔ n "omɛrɛ", ǹ gogoonmaa n bɛa a talɛɛ fùbaa ǹ wɔ lɛa#45.11 Omɛrɛ lɛ n kɔnpii litərə 450 hinlaa kilo 300, màn zɔɔ̃ ǹ màn gole ne. Efa lɛ n kilo 30. Bati lɛ n litərə 45.. 12Wɔrɔ we lɛ n kɔnpii wɔrɔ bisin fuə ne. Wɔrɔ we pɔsɔrɔ n kɔnpii "mini" goon#45.12 Mini goon a gugurubaa n garamu 680..
13Ka bɛ́ re belee laanka *ɔrzi mɛn yii, ka doamaa nɛ ka Lawa gɔ ka a talakɔn pɔsɔrɔbaa ǹ wɔ nɛ. 14Landa mɛn nə n koa nyɔɔ wɔ paǹ li, bɛ n ka kɛ nɛ: Litiri paabiɛ (100) gɔ́ɔ̃ nɛ, ka litiri goon kɔ Lawa la. Ka nyɔɔ lɛ zɔɔ̃ ka màn mudɛnaa zɔɔ̃ ǹ màn kɛ nɛ a tɔ n "bati". Màn zɔɔ̃ ǹ màn gole "omɛrɛ" kɛa talɛɛ fùbaa ǹ wɔ nɛ. A n kɔnpii ka màn zɔɔ̃ ǹ màn "kɔɔrɔ" kɛa talɛɛ fùbaa ǹ wɔ nɛ. 15Izirayeli tɔrɔn lɛn tɔɔn bii, sère hinlaa bòe biɛpaa (200) bii, ka goon bɔ, ka bɛ baa Lawa gɔ ǹ màn lɛa, hinlaa *wúlu màn tiɛ̃ lɛa, hinlaa zɔ́ɔ da Lawa nɛ ǹ wúlu màn lɛa, màn mɛn bɛ́ toɛ, Lawa zaman lɛ a sii baraan toa ǹ nɛ. Ma din Dɛnaa Lawa a da ǹ boo ne.
16Gána lɛ a zaman tumaa doamaa nɛ, ǹ bɛa boboe lɛ wɔ, ǹ kɔ Izirayeli minin goledɛnaa lɛ la. 17Sonbore, wúlu màn tiɛ̃n kɛn nɛ, Lawa gɔ ǹ mànan laanka a gɔ ǹ duvɛ̃ kɛ nɛ, ǹ bɛ́ ǹ mɛnɛn koe la zɔ́nɔn biikoo li, mui dii zɔ́nɔn nɛ, *susu ǹ pii pinaan nɛ, Izirayeli tɔrɔn lɛn zɔ́nɔn tumaa a biikoo li. Goledɛnaa lɛ din doamaa nɛ a sii baraa sawaa ǹ wúlu kɛ a màn bɔ, Lawa gɔ ǹ wɔ nɛ, wúlu màn tiɛ̃ wɔ nɛ, zɔ́ɔ da Lawa nɛ ǹ wúlu wɔn nɛ, a Izirayeli tɔrɔn lɛn sii baraa sawaa ǹ wúlu bɔ ǹ nɛ.
18Dɛnaa Lawa wusoo á màn mɛn pɛ, bɛ n ka kɛ nɛ: «Lɛ̀ a giala kɔ ǹ mui a lɛawaa bibinaa pinaa, ka die ka dii gɔ̀lɔ̀ goon kũ wɔ̀lɔ̀ ná a ba a ganaa wa, ka bɛ dɛ, ka *gɔ̀ bɔ Lawa a kion lɛ ganaa nɛ. 19Ka bɛ́ re tɔɔ mɛn lɛ dii sii baraa sawaa ǹ wɔ lɛa, Lawa a wúlu-bɔle bɛ lɛ a mà saa, a ǹ kɔn lɔ Lawa a kion lɛ a kiɛnlɛn ganaa, a ǹ kɔn lɔ *wúlu bɔ ǹ bǎã kɛa giala wɔ ǹ bǎã gùrù sii ganaa, a ǹ kɔn lɔ sumu gɔ́ɔ̃ a kiɛnlɛ kɛ dɔ ganaa. 20Bɛ̀ min mɛn sii baraa zɛnaa, sã lɛa a na a zɛnaa woon ma, hinlaa a na a dɔ̃ wa, mui lɛ a lɛawaa sɔbaabaa ǹ wɔ pinaa, ka zɛnaa miɛ̃ bɛ dɔ wɔ paǹ li. Bɛ̀ ka bɛ zɛnaa, ka á re gɔ̀ boe ka bɔ Lawa a kion lɛ dɔ ganaa.
21 #
BBN 12.1-20; MNS 28.16-25. «Mui bibinaa a lɛawaa fulusiibaa ǹ wɔ pinaa, bɛ nə n biɛ *kiɛ̃mala ǹ zɔ́n lɛa. Ka zɔ́n lɛ zɛnaa yǎa lɛawaa sɔbaa. Buuru mɛn bɛ́ yɔ bù ná a ba li wa, ka bɛ sɔ̃ bɛa lɛawaan lɛn gɔ́ɔ̃ nɛ. 22Zɔ́n lɛ a giala-kɔ pinaa, goledɛnaa lɛ dii gɔ̀lɔ̀ goon dɛ, a dinmaa a sii baraa sawaa ǹ wúlu màn lɛa ka zaman lɛ dɔ wɔ nɛ. 23Zɔ́n lɛ a lɛawaa sɔbaa lɛ gɔ́ɔ̃ nɛ, a die a wúlu màn tã Dɛnaa Lawa wɔ lɛa, baraabaraa: Dii gɔ̀lɔ̀ sɔbaa ka sère gɔ̀lɔ̀ sɔbaa wɔ̀lɔ̀ na a ba ǹ ganaa wa. Ka die ka sii baraa sawaa ǹ wúlu kɛ dɔ bɔ baraabaraa butumu goon. 24A die a belee kilo pɔsɔɔ bɔ Lawa gɔ ǹ wɔ lɛa, a nyɔɔ litərə sɔrɔ kaa bɛ li, bɛ nə n da kun ka dii gɔ̀lɔ̀ lɛ a gogoonmaa laanka sère gɔ̀lɔ̀ lɛ a gogoonmaa nɛ, ǹ nə ǹ mɛnɛn dɛ wúlu màn lɛa.
25 #
LWS 23.33-36; MNS 29.12-38. «Zɔ́n lɛ a mɛn dɔ bɛ́ n giala koe mui sɔbaabaa ǹ wɔ lɛ a lɛawaa fulusoorobaa ǹ wɔ pinaa, goledɛnaa lɛ bɛa siin lɛn miã zɛnaa lɛawaa sɔbaa lɛ gɔ́ɔ̃ nɛ: A din sii baraa sawaa ǹ wúlu lɛ, wúlu màn tiɛ̃ lɛ nɛ, Lawa gɔ ǹ màn lɛ nɛ, ka a din nyɔɔ goon lɛ nɛ, Lawa wɔ lɛa.»
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Ezekieli 45: SCE2013
ಹೈಲೈಟ್ ಮಾಡಿ
ಹಂಚಿಕೊಳ್ಳಿ
ಕಾಪಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
San Catholic Edition Bible © Bible Society of Burkina Faso, 2013.