1 Korenti 9
9
O tondo bali leni o tuonli
1Mii die n yuli ka? Mii tie Jesu tondo ka yo? Mii den laa ti Diedo Jesu ka? Yii tie min den soani o Diedo po ki baa yaaba ka yo? 2Ba nitoaba yàá nua ke n tie o Diedo tondo, yinba wani nua ke n tie o, kelima yinba n tie yaa maalima n doagidi ke n tie o Diedo tondo. 3Line n tie min baa yedi yaala ki gaa n yuli leni yaaba n kuliti nni: 4Naani mii pia u sanu ki yaa di ki go ñu n tuonli po? 5Naani mini wani ki pia u sanu ki taa yaa pua n daani Jesu, nani Jesu tondiba yaaba n sieni, o Diedo waamu leni Pieli n tieni maama? 6Bi mini leni Barnabasi bebe n baa yaa tuuni li tuonli tiladi? 7Ŋme n baa kua minteeli leni o yuceli piama? Ŋme n baa ŋuu i tilondi, ki nan kan ŋmani li bonluonkaala? Ŋme n baa yaa kpaa u yankulu ki nan kan ño mi naaŋanma? 8Min maadi yaa maama yeni, naani n maadi nani bi nisaaliba n nua maama bebe yo? Naani li bali maama wani ki yedi yeni ka? 9Li diani Musa bali maama nni, ki yedi: «Ŋan da yilini o nua ñoabu taakunkumi#9.9 Taakunkumi, yaa ka, yilingu. Diidi Mi Tiadima 25.4. wan ŋmaadi ti disiandi yaa yogunu.» Naani U Tienu den yagini o yama i ne po yo? #Tia 25.4; 1Tim 5.18. 10Bi o maadi tinba bebe yaa po yo? Li diani yeni tinba yaa po saa. Li pundi ke yua n ko bu kpaabu leni yua n ŋmaadi ti siandi kuli, n yaa daani ke bi baa baa bi biinu lienni. 11Ti yaa den buli yi kani yaa bonbii n tie U Tienu Fuoma bonla, naani li baa yaa bia ti yaa yendi yi kani yi bonpiakaala? #Lom 15.27. 12Nitoaba yaa pia u sanu ki baa gaa yi kani ŋanduna bonla, tinba kaa pia ki cie yo? Ama tii den gaa yi kani nani tin pia u sanu ki baa gaa maama. Ti den tuo ki gaa fala buolu kuli ki juuni li po, ke bonliba kuli n da pigini Kilisiti Laabaaliŋamo.
13Yii bani ke yaaba n tuuni U Tienu diegu tuonli baa yaa baadi bi jiema U Tienu diegu nni ka? Yaaba n tuuni li padibinbinli kani baadi bi biinu ban padi yaala nne. #Tia 18.1. 14Likuli yenma, o Diedo bili ke yaaba n tuuni o Laabaaliŋamo tuonli n yaa baadi yaala n dagidi bi yema po o Laabaaliŋamo tuonli nni. #Mat 10.10; Luk 10.7.
15Ama mii tieni nani n bali n puni nni u sanu maama ba waamu. Min diani yi po yaa maama moala ne mo, laa tie ke min baa liba ka. N yaa kpe, lani n mani n po ki cie min tieni yeni. Niloba kan fie nni min kpiagidi n yuli yaala yaa po. 16Min wangi o Laabaaliŋamo yeni, n kan kpiagi n yuli li po, kelima li tie n po tilade. Fala n baa n po n yàá wangi o Laabaaliŋamo. 17N yaa bi wangi o Laabaaliŋamo n yama po, n bi baa gaa i panpaani, ama min wangi o Laabaaliŋamo tiladi, ke laa tie n yama po yeni, n tuuni U Tienu n puogi nni yaa tuonle. 18Lanwani, n panpaani tie be? Li tie ke n wangi o Laabaaliŋamo, ki naa lingi panpaaniba kuli, ki naa go baa go Laabaaliŋamo tondo n pia u sanu ki yaa baadi yaala.
19Ba ke n die n yuli kaa tie oba kuli naacemo, n puni n yuli ki tua bi niba kuli naacemo, ki baa dadi niba boncianla, ki cuani o Diedo kani. 20Lani yaa po, n yaa ye Jufinba siiga, n tie nani n tie Jufi yeni, ki baa dadi ba. N yaa ye bani li bali maama n die yaaba siiga, n tie nani li bali maama n die yua, ba ke maa die nni, ki baa dadi ki cuani li bali maama n die yaaba. 21Li bali maama n kaa die yaaba mo yaa siiga, n tie nani maa die nni yeni, ba ke mi die nni, kelima Kilisiti bali maama die nni, ki baa dadi li bali maama n kaa die yaaba. 22N yaa ye yaaba n tadi U Tienu sanŋoadima nni siiga, n tie nani yua n tadi yeni, ki baa gobidi ki cuani ba o Diedo kani. N moandi ki tiendi yeni li bonla kuli nni, ki baa faabi bi nitianba. 23N tiendi lani kuli o Laabaaliŋamo po, ki baa baa nmo yaa biinu o Laabaaliŋamo ŋalimano nni.
24Yi bani ke yaaba n boagini mi nuama po kuli yen sani. Ama, naani niyendo bebe ka yen baa i panpaani? Sani mani maama, ke yimo baa baa i panpaani. 25Yua n bua ki tua liiga yua jelibuolu kuli nni, yen kubi li kuali o gbanandi po li bonla boncianla nni. O tiendi yeni, kelima o bua ki baa yaa panpaani n baa pendi.#9.25 Lanyogunu yua n sani mi nuama ki kua liiga, bi yen piani ti faadi ki yilini o, ki kpiagi o yeni. Ama tinba wani tiendi yeni, ki bua ki baa yaa panpaani n kan pendi abada. 26Lani n teni ke n tiini mi nuama, ama mii tiini yaali ka, n go tie nani yua n tiendi yaa jeligu n tie ki kudi a nikula, mii kudi mi fawaama ka. 27N wangi n gbanandi fala, ki paadi ti cain, kelima mii bua ki waani nitoaba o Laabaaliŋamo, ki yuandi ki sua ke bi yedi ke mini n ba ki dagidi, ki ñani nni.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
1 Korenti 9: BGP
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Gulmancema Protestant Bible © Bible Society of Burkina Faso, 2013.