Isaías 60
60
Jerusalén Kuben
1Bias Jerusalén, bseni,
le ba bra beni ko'on
na yelwak ke Xanllon llsenin ko'o rwe'.
2Da xchulen nasjen yell-li'on,
tllelen nllelguyen latj yell-liw ka',
axha Xanllon wsenie lloarawon
na kone rwe' re akre yelwak ke'en.
3Latj yell-liw ka' yed ake' raw beni ko'on,
be'nn wnebia ka' yed ake' raw beni tsir ko'on.
4Blis yejrawo ka', na bayechjte bwia:
yoy akte lladup ake', na zak ake' rawo.
Xhi'nno ka' yed akbe zit kwis,
zanielakteze xhi'nno bi nor ka' yedsan akebe.
5Rwe', keten rero le akben llebraz yewero,
raxhdaon yeweren kwis,
gun ake' rwe' da ka' zak ke latj yell-liw ka' lla' llwa nista'on,
wayun ake' rwe' yel wnia ke latj yell-liw ka'.
6Zan ba ka' nzi kamellos chechj rwe'
ba zak gan nzi Madián, na gan nzi Efa,
yed yoyte be'nn ka' lla' Sabá,
noa akte yaj cha'on nzi oro, na yen yar,
na we ake' diꞌll ke da ka' llun Xanllon da nak daxhen kwis.
7Yoyte xhir ka' nbane gan nzi Quedar gak akba ko'o,
xhir yay ka' nbanle Nebaiot gak akba ba gune'no llin,
nench'na guto le akba, na werao Xanllon raw bkuy ke'en
ke be'nn nox da llazaralle da nak wen da we Xanllon,
na le'en gunee nbarazlle yodao ke'en.
8¿Nuxha da ka' da raw lla, da ka' llun ke bej ka',
na zaj aken ka prum zaj lo xonba cha?
9Nak aken barkw ake' da zak txhen,
konen barkw xhen ke Tarsis na llira'on,
nsa akte xhi'nno ka' zit kwis,
konen ya chao ke akbe ka' dan nzi oro na plat,
dan llap ake' baran Xanon, Dios Xhirall ke Israelen,
nun ben rwe' xhen.
10Be'nn zit wayun ake' ze war ko'o ka',
na be'nn wnebia ke ake' ka' gak ake' be'nn wen llin ko'o,
lakse gan llaklla Xanllon bsakzie'e rwe',
na na' raw yel wen ke'en, ba bayachralle rwe'.
11Reij ko'o ka' du tiemp yiarj aken,
bi wayeyjen ni tella ni tllele,
nench'na yedsan ake' yel wnia ke yell xhen ka' yela
na cho be'nn ka llnebian konen be'nn ke'e ka'.
12Yell xhen'nan bi gun llin ko'on, kweyi aken,
du ka' nak yell xhen ka' kweyi aken.
13Xanllon lle'e Jerusalén'na:
Yel wnia ke Líbanon aken ko rwe':
yay dud, na yay ka' nzi abetos na cipres,
nench'na gun aken nbaraz yodao kian,
nench'na gun xhen ake' gan llxoa nia ka'.
14Xhi'nn be'nn ka' bsakzi rwen
yed ake' nexj rall gan ze'on,
na yoyte be'nn ka' bi llazrall rwen
wchekw xhib ake' xnia'on,
na ye ake' rwe': Yell xhen ke Xanllon,
Sión ke Dios Xhirall ke Israel.
15Bill gako be'nn bsanlall ake',
be'nn llwie akre, na be'nn zu tuze,
axha nada' guna rwe' xhen ke chnare,
to yel llawe ke chnare.
16Yell xhen ka' gu'n ake' rwe' da wen da llaw ake',
na be'nn wnebia ka' gu'n ake' rwe' yel wnia ke ake' ka',
na wayumbiero nadan, Xano, naka wasra ko'o,
ke nadan, be'nn yelwak ke Jacoben naka wasra ko'o.
17Loraz yan nzi bronce guna rwe' ya cha'on nzi oro,
loraz yan nzi hierro, plat,
loraz yay, yan nzi bronce,
na loraz yaj, yan nzi hierro.
Guna nench dan llzoa wen'na wnebian rwe',
na dalixhajen kon rwe' nez.
18Yell ko'on bill yen akre
yel llakia ke damaren,
na nullno wlleyi, na nullno wachinj latj gan zuon,
axha wzoaw ra ze war ko'o ka': Wasra,
na reij ko'o ka': Da lloeraw.
19Bill wtien willen wsenin ko'o tella,
ni be'on wsenin ko'o tchele,
le nada', Xano, gaka beni, ko'o rwe' ke chnare,
nada', Dios ko'on gaka beni ko'o.
20Will ko'on bi yegachen chras,
ni be'o ko'on bi wniten beni ke'en,
le nada', Xano, gaka beni ko'o ke chnare,
lla ka' zuyachon wagan.
21Yoyte be'nn yell ko'o ka' gak ake' be'nn de baran,
gak ake' xan yell xhen ke ake' ka' ke chnare,
xlip to yay da guzksa nada',
da benksa konen taka ka'
nench'na wruera yelwak kian.
22Txhonj be'nn ki wayak ake' mire,
ratze be'nn ki wayak ake' to lat yell-liw xhen.
Nada' Xanle,
nada' guna nench'na gaken to sete,
ket llayal aken.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Isaías 60: ZPUPAT
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Bible Society of Mexico
Be'nnka'be Xti'll Dios ಬಗ್ಗೆ ಇನ್ನಷ್ಟು ತಿಳಿಯಿರಿ