Isaías 58
58
Was dan nak dogarj
1Xanllon gulle'e nada':
besia zillj kwis, bi llebo,
blis chion ka' to trompet,
benre yell kian snia nike dol ke ka',
yell ke Jacoben nike daxhinj ke ka'.
2Yew lla llayirj ake' nada'
na zu ake' nbaraz numbie akre nez kia ka',
llun ake' ka' to yell llun da wen,
na llap baran ley kia ka',
llnab ake' nada' sre da sjanak dalixhaj,
na llun llwarao aken ka be'nn zu nbaraz katen lladbiy ake' kwitan,
3axha ne ake':
¿Bixhchen gunsllo was, le Diozen bi llrere?
¿Bixhchen wsakzize kwinllo, le le'en nike llakbezere?
Llan keten llak wazen re' lljewre na llotre,
na llsakzire be'nn wen llin kere ka',
4llan llunre wazen llare llchachre na lldilre
na llgore pnet le loelljre,
cha llunre ki keten llak wazen, bi gak
wzenaya xtillre ka'.
5¿Llakere llazralla wazen
dan llzoayiach kwinren,
na llxhexj yichjren ka to yaxtir,
na llakre rall zech keten lltasre raw den cha?
¿Danan nsire was
na lla da llazrall Xanllon cha?
6Axha bi naken ka'.
Was dan llazrallan ki llayal gaken:
wabajre be'nn ka' lla' lo rill yan, be'nn ka' bibi dol nap,
be'nn ka nllaj gden na bitbi dol nap ake',
wasanle be'nn ka' llzakzin,
na chuy ke yel korchis dan bi nak wen'na,
7weo pan ko'on be'nnen dun
na wzeninao lo yo' ko'on be'nnen bi zu yo' ken,
na wako xha be'nnen bide xharan,
na bi llajchiero gakreno be'nn loelljo ka'.
8Na beni ko'on wsenin kan llseni tziren
na we ko'o ka' wayaken to sete.
Yel wen dalixhaj ko'on kwiara'on gan zajze'on
na yel wak kian na'on rwe'.
9Chetka rwe' wneo nada', nada' wallia ko'on,
chetka gusiao wnabo yel gukre, nada' yepa rwe': gani' zia.
Chetka walano yoyte da llsakzi,
na bi gadyiw be'nn yub akre
na bi chirjo di'll ke ake',
10chetka rwe' llweo da llaw be'nn llbildun,
na llakreno be'nnen ket llalleyrawe,
beni ko'on gaktiten raw da xchulen,
bxhen ko'o ka' wayaken to beni ka' dan llra' wawill.
11Nadan kwa rwe' nez kuen kuenze,
guna daxhen yel wao ko'o latj dach yu billen,
wayundiprallla rwe'
na gako ka' to latj ga naz ake' yay xhix da llir ake' ke llayal,
ka to ga llra nis, na bi llayojen.
12Be'nn yell ko'o ka' wayunchaw ake' da ka' nyinjen
na yegoltip ake' rane da ka' ben ake' batnate.
Na ye ake' yell ko'on:
nun llayun ze da ba bial,
nun llayonchaw yo' ka' ba bayinj.
Ke lla sabden
13Bdap baran lla sabden,
bi guno llin ga guno gan mell lla xhirall kian.
Bzoa yichjo lla ni ka' to lla nbaraz,
ka' to lla da nak xhirall ke Xanllon da llayal gapllo baran,
bdapen baran bi guno bi ko ka',
na bi goto na bi gawo, na bi wayirjo da gun rwe' mell.
14Chetka guno dani wallelro yel nbaraz konen nada',
na nada' guna nench'na wnebiao raw latj yell-liw ko'on.
Na guna nench'na siw banez dan bkoan xao Jacoben.
Xanllo naksen ba bnee ka'
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Isaías 58: ZPUPAT
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Bible Society of Mexico
Be'nnka'be Xti'll Dios ಬಗ್ಗೆ ಇನ್ನಷ್ಟು ತಿಳಿಯಿರಿ