ATŨMWO 18
18
1THUTHA ũcio Paulo agĩkiuma Athene agĩthiĩ Korintho. 2Agĩkora Mũyahudi ũmwe kuo wetagwo Akula warĩ wa bũrũri wa Ponto, nake erĩgĩte gũũka akoima Italia, marĩ na mũtumia wake Pirisila, nĩ gũkorũo Kilaudio nĩaathanĩte akoiga atĩ Ayahudi othe mathame moime Roma. Nake Paulo agĩthiĩ kũmaceerera, 3na tondũ wĩra wao warĩ wa mũthemba o ro ũmwe, magĩikarania, makarutithanagia wĩra; naguo wĩra ũcio wao warĩ wa gũtuma mahema. 4Na nĩaaheanaga ihooto, agĩciraga thunagogi-inĩ mĩthenya yothe ya thabatũ, akaringagĩrĩria Ayahudi o na Ayunani metĩkie.
5Na rĩrĩa Sila na Timotheo moimire Makedonia, magĩkora Paulo ahatĩkĩtwo mũno nĩ ũhoro ũcio aahunjagia, akoimbũragĩra Ayahudi atĩ Jesu nĩwe Kristo. 6Nao maarega gwĩtĩkĩra ũrĩa oigaga na makĩruma Ngai-rĩ, akĩribariba nguo ciake, akĩmera atĩrĩ, Thakame yanyu ĩromũcokerera arĩ inyuĩ; niĩ ndĩ mũtheru ũhoro-inĩ wayo: kuuma rĩu, ngũcoka gũthiĩ kũrĩ andũ arĩa a Ndũrĩrĩ. 7Agĩkiuma hau, agĩthiĩ gũikara kwa mũndũ wetagwo Tito Jusito, warĩ mũhoi Ngai, nayo nyũmba yake yariganĩtie na thunagogi. 8Nake Kirisipo, mũnene wa thunagogi ĩo, agĩĩtĩkia Mwathani, me na andũ othe a nyũmba yake: na Akorintho aingĩ, maaigua Ũhoro, makĩwĩtĩkia na makĩbatithio. 9Nake Mwathani akĩĩra Paulo na kĩoneki kĩrĩa onire ũtukũ atĩrĩ, Tiga gwĩtigĩra; aria ũhoro, na ndũgakire: 10amu niĩ ndĩ hamwe nawe, na gũtirĩ mũndũ ũrĩkũguthũkĩra agwĩke ũũru: nĩ gũkorũo ndĩ na andũ aingĩ itũũra-inĩ rĩrĩ. 11Nake agĩgĩikara kuo mwaka ũmwe na mĩeri ĩtandatũ akĩmarutaga Ũhoro wa Ngai.
12No rĩrĩ, rĩrĩa Galio aarĩ barũthi wa Akaia, Ayahudi magĩũkĩrĩra Paulo marĩ na ngoro o ro ĩmwe, makĩmũrehithie handũ harĩa haaciragĩrũo, 13makiuga atĩrĩ, Mũndũ ũyũ nĩahatagĩrĩria andũ mahoe Ngai na mĩhoere ĩrĩa ĩtaringaine na watho. 14No rĩrĩa Paulo aakorirũo agĩitĩka kwaria, Galio akĩĩra Ayahudi atĩrĩ, Ayahudi aya, ũhoro ũyũ ũngĩgĩtuĩka nĩ wa ũũru wĩkĩtwo, kana wa ngero ĩgeretwo-rĩ, ndaagĩrĩrũo nĩ gũkirĩrĩria ndĩmũigue: 15no rĩrĩ, kũngĩtuĩka nĩ ciũria mũũranganagia ũhoro wa ciugo, kana wa marĩĩtwa, o na kana wa kĩrĩra kĩanyu inyuene-rĩ, menyai arĩ inyuĩ ũrĩa mũgwĩka: niĩ ndikwenda gũtuĩka mũtui-cira wa maũndũ ta macio. 16Agĩkĩmaingata moime handũ harĩa haaciragĩrũo. 17Nao othe makĩnyita Sosithene, mũnene wa thunagogi, makĩmũhũrĩra o hau haaciragĩrũo. Nake Galio ndaigana kũrũmbũiya maũndũ macio.
18 #
Ndar 6.18. Nake Paulo aanina matukũ maingĩ thutha ũcio aikarĩte kuo, akiugĩra ariũ a Ithe witũ ũhoro, agĩthiĩ ahaicĩte marikabu arorete Suriata, me na Pirisila na Akula. Nake agĩkorũo enjetwo mũtwe kũu Kenkirea, nĩ gũkorũo aarĩ na mwĩhĩtwa ehĩtĩte. 19Nao maakinya Efeso, akĩmatiga kuo: nake we mwene agĩtonya thunagogi akĩaranĩria na Ayahudi. 20Na rĩrĩa maamũhoire aikarange nao, ndaigana gwĩtĩkĩra, 21no akĩmoigĩra ũhoro akĩmera atĩrĩ, Ngai enda-rĩ, ndaya kũmũcokerera rĩngĩ; agĩgĩthiĩ ahaicĩte marikabu akiuma Efeso. 22Na aakinya Kaisarea akiumĩra marikabu kuo, akĩambata agĩthiĩ kũgeithia kanitha; agĩcoka agĩtherera agĩthiĩ Antiokia. 23Na aarĩkia gũikaranga kuo matukũ maigana ũna, akiuma kuo, agĩthiĩ agĩtuĩkanĩria bũrũri wa Galatia na Ferugia o itũũra o itũũra, agĩĩkagĩra arutwo othe hinya.
24Na rĩrĩ, Mũyahudi ũmwe wetagwo Apolo, waciarĩirũo Isikanderia, agĩkinya Efeso; nake aarĩ mũthomu mũno akahota wega gũtaũranĩra Maandĩko. 25Mũndũ ũcio nĩaarutĩtwo ũhoro wa Njĩra ya Mwathani: na nĩ ũndũ wa ũrĩa ngoro yake yahĩahĩaga, akĩheana ũhoro wa Jesu, akaũrutanaga atekũhĩtia; no rĩrĩ, ũbatithio ũrĩa oĩ no ũrĩa wa Johana wiki. 26Nake agĩitĩka kwaria thunagogi-inĩ omĩrĩirie. No rĩrĩa Pirisila na Akula maamũiguire akĩaria, magĩthiĩ nake kwao, makĩmũtaũrĩra ũhoro wa Njĩra ya Ngai wega makĩria. 27Na rĩrĩa endaga kũringa iria athiĩ Akaia, ariũ a Ithe witũ makĩmwĩkĩra hinya, magĩkĩandĩkĩra arutwo marũa ma kũmahoya mamũgwate ũgeni. Nake aakinya kũu agĩteithĩrĩria mũno andũ arĩa metĩkĩtie Ngai nĩ ũndũ wa Wega wake. 28Nĩ gũkorũo nĩaahootire Ayahudi o kũmahoota, andũ othe marĩ ho, akĩonanagia wega na Maandĩko atĩ Jesu nĩwe Kristo.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
ATŨMWO 18: OGKBIBLE
ಹೈಲೈಟ್ ಮಾಡಿ
ಹಂಚಿಕೊಳ್ಳಿ
ಕಾಪಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
©Bible Society of Kenya, 2019
