Luka 2
2
1HABA hnyi je bong e, ame he but hnanyibu ûnyi ga Kaisara Auguso he ka sihnalimen aten hmeledrany hia. 2Wale hna sihnalimen a bân hnyi ûen Kurenio ame musi hnyi Suria. 3Me adre me he hia but he ka sihnalimidru adre ve he ka idrin bi je taun. 4Me ame he minya but Josefa ûheny hnyi taun Nazareta hnyi Galilaia, ame he Juda ai, ka hnyi taun anyi Davita, Betheleema ien, anyin a e hanen lap me mâtrâni Davita; 5me me sihnalimen e me Maria, wale a ûköcö mē, kʼ ame erkin dut. 6Ke tiga ödru ling, me ame o but bong ame he ka hnokoâ hnyin. 7Me e ame hnokoâ nokon da a atö; ke e ame wâdrâ e ge mano, me omokulec ju hnyi taben jeû an meno, anyin ae ba hnödrin hna mokut hnyi uma umen je atkanyaua.
8E hu tavat tuö mamoe hnyi hnyei eling, ödrin e hmâkâ hnyi hnyinghet haledrin ta je mamoe. 9Ke ame tot unyidrin angela anyin Than, me ame umumelam igigili ödrin melaminy Than, me ödrin e ot gan hmâ. 10Ke haba angela ame ha ködrin, ka habe, Ca ot bi; anyin a wâ bi, inya oge me ha köbun ûthumetu ae so hnân senyin gan hmâ hobi kâu tavat hia thithö: 11anyin adre hnokoâ hobi köbun hnyi bong ang hnyi taun anyi Davita, At ûhomeli, wale Keriso a Than. 12Ke walang haten köbun; Öbun e he ka wâ mendreng adre wâdrâ ge mano, ame mokut hnyi taben jeû an meno. 13Me ame ie tha e me angela tavat ae se hia ûnyi hnyi drany, adre me ogânâ Khong me ha, ka habe, 14Ogânâ thö Khong ae nua ethö görany;
Ke haba hnyi hmeledrany hnahic unyin tavat wale e ame betenge gadra.
15Ke ame he but gadrin je angela hnyi dranyai, me ame ûhaköuâ hnyat tuö mamoe, ka habe, otin a he walang ang Bethleema ai, me wâ ûnyi eang adre ânyâ, wale ame omanenâ köta hnen Than. 16Me ödrin e he logot me ō Maria me Josefa, me inma minya ame mokut hnyi taben jeû an meno. 17Ke ödrin e wâ but, me ödrin e omanenâ hna thumetu ödrin ge wanakat e. 18Ke haba tavat hia adre me long me adre me lâiâ ta je hofuc ame ha kodra hnen hnyat tuö mamoe. 19Ke haba Maria ame ip hmâ ta je hofuc eling hia, me ûnykûme eû hnyi hnyekon. 20Me ame hmetu but hnyat tuö mamoe, ödrin e ole me ogânâ Khong ge ta je ûnyi hia ödrin e long me wâ, helâji me hna ha ködrin.
21Ke ame o but bong a eitiny hnân peritomonâ wanakat, me ame hwenyi ien me, Iesu, wale a ha angela ke tiga ca erkin bi hinyen. 22Ke ame um dö je bonginy obosoi ödru helâ me hnanyibu anyi Mose, me adre me hom but e Jerusalema ai, he ka ip e hnyi hnyimakan Than, 23(helâji me hna sihnalimen hnyi hnanyibu anyin Than, ka habe, Adre me he ka ha me kap ka Than ta je atö baga hia), 24me ham ke hut helâ me hna ha hnyi hnanyibu anyin Than, ka habe, Lo li biny, ame ne li lakon meköta. 25Ke wâ bi, wale ke at hnyi Jerusalema Simeona ien; e at ae wisa hwakecin me outen Khong, ame halubahingen hna otubwelâ at Isaraela: ke e Hanu Kap hnyi hon. 26Ke adre hia but omanenâ kâu a deny Hanu Kap, a gʼ ame ca he ka wâ mok, kʼ ame he ka mē wâ thö Keriso anyin Than. 27Ke e ame didro ka hnyi uma kap hnen. Hanu: haba kamen me hinyen ödru me hom wanakat a Iesu he ka mâdrâ kâu hoton hnanyibu, 28ke e ame kap e hnyi li benyen, me ogânâ Khong, me ha, ka habe,
29Than lö, u ma hna but walang ang athnyabaem he ka he hnyi hnahic,
Helâji me hwâm hofuc;
30Anyin oge me wâ ge li emakök ûhomeli ûnyi gam,
31Wale u je penapena hnyi hnyimakan tavat hia thithö;
32Wale melam hnân omelamâ Aten ta je hnyei,
Ke hnân hmanenanginy lakem a Isaraela.
33Ke haba kamen me hinyen, me ödru me lâiâ ta je ûnyi adre me ha gan; 34ke haba Simeona ame hahnahici ödru, me ha kö Maria a hinyen, ka habe, Wâ bi, adre me ip wanakat ang hnân okolo me otilâ tavat ae se hia hnyi Isaraela; ke hnân haten minya adre me he ka haikongoâ; 35eke adre me he ka dâoâ minya hnyekom ge hele vat; me me manen dut je ûnykûmen hnyok ae se hia. 36Ke wale ko perofeta momo jia Ana, nöku Fanuela, hanen tribu Asera (ae se hia hmonyin je hunainy, kʼ ame tha laba me âiân ehac hnyi ta je huna a seven hwân ke tiga hlu, 37ke e safac hnyi ta je huna a eite foa), e ame ca hnyi bia hnyin uma kap, kʼ ame bi athnyaba hnyi lit me lany, me ânyâ ca han, me labö khöû. 38Ke e ame o thö hnyi awa eling, ame hnyi ole ka Khong, me e ame hâiâ e kodra hia hnyat adre me halubahingen hwaban möt hnyi Jerusalema. 39Ke ödru me umo ta je ûnyi hia hoton hnanyibu anyin Than, me ödrin e hmetu Galilaia ai ka hnyi anyidrin taun wale Nazareta.
40Ke ame gan dut wanakat, me ame hwege me metâ tot: ke e unyin ibetengiö anyin Khong.
41Ame labö he kamen me hinyen Jerusalema ai hnyi je huna ka hnyi bijeû paseka. 42Ke twelv but ta je hunainy ödrin e he Jerusalema ai helâ me hwakecin bijeû; 43ke a um dö je bongudrin, me ödru me he hmetu, ke ame laba biju wanakat a Iesu hnyi Jerusalema; ke ca khana kamen me hinyen; 44ke ödru me ûnykûme a e eû hnyi wanben bunyen, ke ödru me he khaca bong; me ödru me elâm e unyin je liamekeiny mödru me lahanödru: 45ke ödru me ca wâ bala, me ödru me hmetu but Jerusalema ai he ka elâm. 46Ke hwaban kun ta bong ödru me wâ e hnyi uma kap, ame laba hnyi wanben tavat ûne, ame ling ödrin me hnei ödrin: 47haba tavat hia adre me long, me adre me lâiâ gan hmâ anyin metâ me hnen hna thu. 48Ke Ödru me wâ e, me ödru me lâiâ: ke haba hinyen ame ha kâu, ka habe, Nokuk lö, ieû gam u je helâe köhmu? wâ bi, inya me kâmâm ohmu me elöm u, kʼ ohmu tenge. 49E ame ha ködru, ka habe, Ieû gabu öbu me elöm nya, e ca khanʼ öbu a hamök he ka vheno ta je ûnyi anyi cica? 50Ke ödru me ca wâ ûnykûme hnen hna ha ködru. 51Ke e ame tha he mödru, me o hnyi Nazareta; ke e ame long hotudru: haba hinyen ame ip hmâ hnyi hnyekon ta je ûnyi hia thithö eling.
52Haba Iesu ame kû tot hnyi metâ me je huna, ke ame betenge gan Khong me at.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luka 2: IAAI
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
maintained by the British and Foreign Bible Society
