If you have would like a copy of this version please contact info@davarpartners.org

Text: Chambeali New Testament, CC-BY-SA-4.0, The Love Fellowship. Audio: Chambeali Standard Version New Testament Audio Bible, CC-BY-SA-4.0, Davar Partners International, Bridge Connectivity Solutions, 2022

Chambeali Standard Version New Testament

Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.

फरीसियां अते सदूकी यीशु का आये से यीशु जो परखणे चाह्‍ंदे थिये, इधेरे तांइ तिन्हा ने यीशु जो बोल्लेया, असा जो स्वर्ग री कोई चिन्ह-चमत्कार दिखाओ। पर यीशु ने जवाब दित्तेया, जां सँझ हून्दी तां तुसा बोलदे, आसमान लाल है, मौसम ठीक रैह्णा। अते भ्यागा बोलदे, अज्ज हनेरी चलणी, किजोकी आसमान लाल अते ड्रोणा है तुसा आसमान रे लक्षण दिख्खी करी तिसेरे भेद दस्सी सकदे, पर इस जुग री निशानिया रा भेद किजो नी दस्सी सकदे? इस जुग रे बुरे अते व्यभिचारी पीढ़ी चिन्ह-चमत्कार तोपदी, पर योना री चिन्ह-चमत्कार जो छड्डी तिन्हा होर कोई चिन्ह-चमत्कार नी दित्ती जाणी।
यीशु तिन्हा जो छड्डी करी चली गे।

यीशु रे चेल्‍ले झील रे पार पूज्जे, तित्ते पूजी करी तिन्हा जो पता लग्गेया कि से रोट्टी लैणा भूली गेरे हिन। यीशु ने तिन्हा जो बोल्लेया, दिख्खो, फरीसी अते सदूकियां री तराक्क का सावधान रेयो।
से अप्पु-मिते गल्ल-बात करी के बोलणा लग्गे, से इधेरे तांइ बोल्लेया करदे हिन किजोकी असी रोट्टी नी लियाये। पर यीशु ने ए जाणी लेया अते बोल्लेया, तुसा रा विश्वास छोटा है, तुसा अप्पु-मिते किजो बैह्स-बाजी करेया करदे हिन कि असा का रोट्टी नी है? कै तुसा हल्ले तांइ नी समजे? जां पंज हजार मणूआं तांइ पंज रोटियां थियां तां तुसा किन्ने टोकरे भरी के चुक्के थिये? अते ना तिन्हा चार हजार तांइ सत्त रोटियां थियां ते तुसा किन्ने टोकरे भरी के चुक्के थिये? तुसा किजो नी समजदे कि मैं तुसा जो रोटियां रे बारे नी बोल्लेया थिया पर ए कि तुसा फरीसी अते सदूकियां री तराक्क का सावधान रेयो।
तां तिन्हेरी समझ बिच आया कि तिन्हा रोट्टी री तराक्क का नी, पर फरीसियां अते सदूकियां रे उपदेस का सावधान रैह्णे तांइ बोल्लेया थिया।

जां यीशु कैसरिया फिलिप्पी रे प्रदेश जो आये, तां अपणे चेल्‍लेयां जो पूच्छणा लग्गे, मणू, मणू रे पुत्तर, जे मैं ही है जो कै बोलदे?
तिन्हा ने बोल्लेया, किच्‍छ तां यूहन्ना बपतिस्मा दैणे वाला बोलदे हिन, किच्‍छ एलिय्याह, अते होर यिर्मयाह या भविष्यद्वक्ता बिच का कोई इक्क बोलदे हिन। यीशु ने उन्हा जो बोल्लेया, पर तुसा मेरे जो कै बोलदे?
शमौन पतरस ने जवाब दित्तेया, तुसा जिंदा परमेश्वर रे पुत्तर मसीह यीशु हिन। यीशु ने उन्हा जो बोल्लेया, ओ शमौन, योना रे पुत्तर, तू धन्न है किजोकी मांस अते खून ने नी, पर मेरे पिता ने जे स्वर्ग बिच हिन, ए गल्ल तिन्हा पर जाहिर कित्ती। ते मैं भी तिज्जो बोलदा कि तू पतरस है, ते मैं इस्सी पत्थर पर अपणी कलीसिया बनाणी ते पताल रे दुआर तिस पर हावी नी होणे। मैं तिज्जो स्वर्ग रे राज री चाब्बियां दैणी, अते जे किच्‍छ तू दुनिया पर बणना, से स्वर्ग बिच बन्नी जाणा अते जे किच्‍छ तू दुनिया पर खोलगा, से स्वर्ग बिच खुलणा।
फिरी यीशु ने चेल्‍लेयां जो सख्ती कने समझाई करी बोल्लेया कि मेरे बारे बिच ए कुसकी कने मत बोलदे कि मैं मसीह यीशु है।

उस बेल्ले यीशु अपणे चेल्‍लेयां जो दस्सणा लगे, जरुरी है कि मैं यरुशलेम जो जां, ते बुजुर्ग लोक, बड्डे पुरोत्त, अते शास्त्रियां रे हत्थे बड़े दुख उठां, अते मारी दित्तेया जां, ते तिज्जे दिन जिंदा होई जां। तां पतरस तिन्हा जो अलग लै जाई करी बकणे लगेया, ओ प्रभु, परमेश्वर न करण कि तुसा रे कने इदेया कदी भी हो। तां यीशु ने मुड़ी करी पतरस जो बोल्लेया, ओ शैतान, मेरे सामणे का दुर होई जा तू मेरे तांइ इक्क अड़चन है किजोकी तू परमेश्वर री गल्लां पर नी, पर मणूआं री गल्लां पर मन लगादां।

तां यीशु ने अपणे चेल्‍लेयां जो बोल्लेया, जे कोई मेरा चेल्ला बणना चाह्‍ंदा तां अपणे आपे का इन्कार करण, ते अपणी सुली चुकी करी, मेरा चेल्ला बणी जाये। किजोकी जे कोई अपणी जिन्दगी जो बचाणे री इच्छा रखदा, तिन्ने तिसजो गवाई दैणा, पर जे कोई मेरे तांइ अपणी जिन्दगी जो गवाई दिंगा, तिन्ने तिसजो पाई लैणा। जे मणू सारी दुनिया जो पाई लेंन, ते अपणी जिन्दगी गवाई दे, तां तिसजो कै फायदा होणा? या मणू अपणे प्राण रे बाट्टे कै दिंगा? किजोकी मणू रा पुत्तर, जे मैं ही है अपणे स्वर्गदूतां कने अपणे पिता री महिमा बिच आणे वाला है तां तिन्ने हर इक्क मणू जो तिसेरे कम्मां रे हिसाब कने ईनाम दैणा।
“मैं तुसा कने सच बोलदा कि इत्ते खड़ितेरे लोक्कां बिच का किच्‍छ, इदेय भी हिन कि जां तांइ मणू रे पुत्तर, जे मैं ही है जो तिसेरे राज बिच का आन्दे नी दिख्खी लिन्दे, तां तांइ तिन्हा ने मौत नी दिखणी।”

ಆಲಿಸಿ मत्ती 16