If you have would like a copy of this version please contact info@davarpartners.org

Text: Chambeali New Testament, CC-BY-SA-4.0, The Love Fellowship. Audio: Chambeali Standard Version New Testament Audio Bible, CC-BY-SA-4.0, Davar Partners International, Bridge Connectivity Solutions, 2022

Chambeali Standard Version New Testament

Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.

तां यरुशलेम सहर का किच्‍छ फरीसी अते शास्त्रि मणू यीशु का आई करी बोलणा लग्गे, तेरे चेल्‍ले बुजुर्ग मणू रे रीवाजां जो किजो नी मन्दे? से रोट्टी खाणे का पैह्ल्ले हात्थ-पैर किजो नी धोन्दे? यीशु ने उन्हा जो जवाब दित्तेया, तुसा भी अपणे रीवाजां री वजह कने किजो परमेश्वर रे हुकमा जो नी मन्दे? किजोकी परमेश्वर ने बोल्लेया है, अपणे मां-प्यो री बड़ाई करो, अते, जे कोई मां-प्यो जो बुरा बोल्ले, तिसजो मारी दैणा चाएदा। पर तुसा बोलदे कि जे कोई अपणे मां-प्यो जो बोल्ले, किजोकी मैं अपणा सब किच्‍छ परमेश्वर जो अर्पित करी बैठ्ठे रा है, इधेरे तांइ तुसा री मदत नी करी सकदा। तां तिसजो अपणे मां-प्यो री बड़ाई करणे री जरुरत नी है, इस्सी तरिक्के कने तुसा परमेश्वर रे हुकमां जो टालदे हिन। ओ ढोंगियों! यशायाह ने तुसा रे बारे बिच ए भविष्यवाणी ठीक ही कित्ती थी।
ए मणू सिर्फ होंठाँ कने मेरी बड़ाई करदे हिन,
पर इन्हेरे मन मेरे का दुर हिन।
ए बेकार अंदर ही मेरी भक्ति करदे, अते मणूआं रे उपदेस जो धर्म रे सिद्धान्त करी के सिखान्दे।

तां यीशु ने मणूआं जो अपणे का सद्दी करी तिन्हा जो बोल्लेया, सुणो अते समझो। मणू रे मुँह अन्दर जे जान्दा, से मणू जो भिठ्ठा नी करदा, पर उसेरे मुँह का निकलेरी गल्ल तिसजो भिठ्ठा करदी।
तां चेल्‍लेयां ने आई करी तिन्हा जो बोल्लेया, कै तुसा जाणदे हिन कि फरीसी तुसा री गल्ल रा बड़ा बुरा मन्नी गेरे हिन? पर यीशु ने जवाब दित्तेया, हर इक्क पौधा जे मेरे स्वर्गीय पिता ने नी लाए रा है, से पुट्टी दित्ता जाणा। तिन्हा जो छड्डो से तां अप्पु अन्ने होई करी दूज्जे अन्ने जो रस्ता दसणे वाले हिन, इन्हा दोनां ने ही गत्ता बिच पेई जाणा।
पतरस ने बोल्लेया, ए उदारण असा जो समझाई देयो। यीशु ने बोल्लेया, कै तुसा हल्ले तांइ भी नी समजे? कै तुसा नी जाणदे कि जे किच्‍छ भी मुँह बिच जान्दा से पेट्टा बिच जान्दा, अते संडास का निकली जान्दा? पर जे किच्‍छ मुँह का निकलदा, से दिल का निकलदा, ते सेह्ई मणू जो भिठ्ठा करदा। किजोकी बुरी गल्लां, खून करणा, बगैर ब्याहतिरी जनानी कने व्यभिचार, पराई जनानी नाजायज़ रिस्ता, व्यभिचार, चोरी, झूठ्ठी गुवाई, बेजती करणा जदेई बुराईयां दिल का ही निकलदी। ए ही गल्लां हिन जे मणू जो भिठ्ठा करदी, बगैर हात्थ-पैर धोये रे रोट्टी खाणे कने कोई भिठ्ठा नी हुन्दा।

फिरी यीशु तित्ते का निकली करी, सूर अते सैदा रे सहर रे पास्से चली गे। अते दिख्खो, तिस प्रदेश का इक्क कनानी जनानी आई अते चिंडा मारी के बोलणा लग्गी, ओ प्रभु, दाऊद री संतान, मेरे पर दया करो! मेरी कुड़ी जो दुष्टात्मा बड़ी तंग है करेया करदी। पर तिन्हा ने तिसजो कोई जवाब नी दित्तेया तां यीशु रे चेल्‍लेयां ने आई करी तिन्हेरे छन्दे कित्ते कि, इसजो भेजी देंन, किजोकी ए लेरां मारदे-मारदे असां रे पीच्छे है आया करदी। पर यीशु ने उन्हा जो बोल्लेया, इस्राएल रे ‍खानदान री गुअच्चे री भेड़ां जो छड्डी मैं होर कुसकी का नी भेजेया गे रा है।
पर से आई अते यीशु री प्रणाम करी के बोलणा लग्गी, ओ प्रभु, मेरी मदत करो।
यीशु ने तिसजो बोल्लेया, मुन्डेयाँ री रोट्टी लेई करी कुतेंयाँ रे मुहाग्गर पाणा ठीक नी है।
तिनिये बोल्लेया, सच है प्रभु, पर कुते भी से चुरा चारा खान्दे जे तिन्हेरे मालका रे मेज का पैन्दा। तां यीशु ने बोल्लेया, ओ जनानी, तेरा विश्वास बड्डा है, जिय्यां तू चाह्दीं, तिय्यां ही तेरे तांइ हो।
तिसेरी कुड़ी तिस्सी बेल्ले ठीक होई गई।

यीशु तित्ते का गलील री झील रे कनारे पूज्जे से इक्क पहाड़ पर चढ़ी करी तित्ते बेई गे। अते मणूआं री बड़ी बड्डी भीड़ तिन्हा का आई अते से अपणे कने लंगड़े, लूले, अन्ने, जल्ले अते होर भी बड़े जणेया जो तिन्हेरे का लियाये अते तिन्हा जो यीशु रे पैरा का रख्खी दित्तेया अते यीशु ने उन्हा जो खरा करी दित्तेया। जां मणूआं ने दिख्खेया कि जल्ले बोलदे हिन ते टुण्डे ठीक होई गे, लट्टे चलदे अते अन्ने दिखदे तां से हैरान होई गे अते से इस्राएल रे परमेश्वर री बड़ाई करणा लग्गे।

यीशु ने अपणे चेल्‍लेयां जो अपणे का सद्देया अते बोल्लेया, मेरे जो इस भीड़ पर तरस आन्दा किजोकी ए मणू तीन्न रोज्ज का मेरे कने हिन अते इन्हा का किच्‍छ भी खाणे जो नी है, मैं इन्हा जो भूखा भेजणा नी चाह्‍ंदा, कुदखी इय्यां नी हो कि रस्ते बिच ही अद्ध-मरे होई जाओ।
चेल्‍लेयां ने उन्हा जो बोल्लेया, असा जो इस बंजर जगाह् बिच कुते का इन्नी रोट्टी मिलणी कि असी इन्नी बड्डी भीड़ जो रजाई सकण? यीशु ने तिन्हा जो पूच्छेया, तुसा रे का किन्नी रोट्टी हिन?
तिन्हा ने बोल्लेया, सत्त रोटियां, अते थोड़ी करी हल्कियां मछियां भी हिन। तां तिन्हा ने मणूआं जो जमीन पर बैणे रा हुकम दित्तेया। ते तिन्हा सत्त रोटियां अते मच्छियाँ जो लेया अते शुकर करी के तोड़ेया, ते अपणे चेल्‍लेयां जो दिदें गे ते चेल्‍ले मणूआं जो। से सब खाई करी रजी गे अते चेल्‍लेयां ने बचे रे टुकड़ेयां कने भरितेरे सत्त टोकरे चुक्के। खाणे वाले जनानियां अते निक्केयां रे अलावा चार हजार मड़द थिये। तां से भीड़ जो भेजी करी किस्ती पर चढ़ी गे, अते मगदन देस री सीमा बिच आये।

ಆಲಿಸಿ मत्ती 15