Потон 15
15
15-тӥ ЛЮКЕТ
1«Кузё-Инмарлы данъян гуръёс кырӟасько, уго Со вылӥ данэн ӝутскемын. Валэз но, борӟемен мынӥсез но зарезе куштӥз. 2Кузё-Инмар – юнматскон интые, мынам данъяськонэ, Со мынам утиськон сётӥсе. Со мынам Инмаре, мон Сое данъяло; Со мынам атаелэн Инмарез, мон Сое вылӥ каро. 3Кузё-Инмар ожмаськонъёсын вормись, Кузё-Инмар Солэн нимыз. 4Фараонлэсь ожмаськон уробооссэ, солэсь ожгарчиоссэ вуэ куштӥз. Ожен кивалтыны быръемъёс Горд Кам зарезь вуэ выйизы. 5Мур вуос соосты ӝокатӥзы, из кадь ву пыдсы кошкизы. 6Бур киыд, Кузё-Инмаре, кужымен дано луэмын. Бур киыд, Кузё-Инмаре, тушмонэз сузмытӥз. 7Быдӟым данлыкеныд Тыныд пумитъяськисьёсты погыртӥд. Вождэ поттӥд но, йыркуред соосты куроез кадь сутӥз. 8Пельтӥд но, вуос вайяськыса кошкизы, ву борддор кадь султӥз, зарезь шорын мур вуос напчыса юнмазы. 9Тушмон шуиз: ”Уйиськыса мыно но суто сое, ваньбурзэ люко; соосын кӧты тыроз, мечме кыре потто, киы соосты виылоз”. 10Тон духеныд пельтӥд но, соосты зарезь ву шобыртӥз – туж бадӟым вуэ соос узвесь кадь выйизы. 11Инмаръёс пӧлын кин вань Тон кадез, Кузё-Инмаре? Кин вань Тон кадь дун-сьӧлыктэмез, быдӟымлыкоез, ушъяны ярамонэз, паймымон ужъёс лэсьтӥсез? 12Бур кидэ Тон вӧлъяд но, соосты му ньылӥз. 13Мозмытэм калыктэ Тон гажаса-жаляса валтӥськод, та калыкез Аслад святой улон интыяд Ас кужыменыд келяса нуиськод. 14Калыкъёс кылӥзы но куалекъяло: Филистим музъемын улӥсьёс доры кышкан-куалекъян вуиз. 15Соку Едомлэн кивалтӥсьёсыз паймытскизы, Моав калыклэн азьвалтӥсьёсыз куалекъяны кутскизы, Ханаанын вань улӥсьёс ӝоже усизы. 16Кышкан, куалекъян соос вылэ мед урдскозы; суйбыгытэдлэн быдӟым кужмызлы чидатэк, из кадь соос мед пумозы, Аслад калыкед ортчытозь, Кузё-Инмаре, Аслыд басьтэм калыкед ортчытозь. 17Ас калыктэ нуыса Аслад гурезяд, Аслыд улон интылы быръем азяд мертты, Кузё-Инмаре, Ас киыныд кылдытэм вӧсяськон интыяд пукты сое, Кузё-Атае! 18Кузё-Инмар пумтэм дауръёс ӵоже, вапумъёсысь вапумъёсы Эксэй луоз». 19Фараонлэн валъёсыз ожмаськон уробоосын, борӟемен мынӥсьёсын ӵош зарезе пырем бере Кузё-Инмар соос вылэ зарезь вуосты лэзиз. Нош израиль пиос сюй вылтӥ зарезь вамен выжизы.
20Соку Ааронлэн апаез, азьпалзэ тодытыса верась Мариам, кияз тимпан кутӥз, соин ӵош, киязы тимпанъёс кутыса, вань кышномуртъёс шулдыръяськыны потӥзы. 21Соос азьын Мариам тазьы кырӟаны кутскиз: «Кузё-Инмарлы данъян гуръёс кырӟалэ, уго Со вылӥ данэн ӝутскемын. Валэз но, борӟемен мынӥсез но зарезе куштӥз».
22Моисей израиль калыкез Горд Кам зарезь дорысь палэнэ нуиз; отӥяз соос Сур шуон луоё кыр дуннее пыризы. Куинь нунал ӵоже луоё кыр дуннетӥ мынӥзы но ву ӧз шедьтэ. 23Вуизы Меррае, но Мерраын вуэз юэмзы ӧз луы, со курыт вал, соин ик со [интылэн] нимыз но: Мерра.#15:23 Мерра – «курыт» шуэм луэ 24Соку калык Моисей вылэ йыркуръяськыны кутскиз, солэсь тазьы юаз: «Мае юомы?» 25[Моисей] Кузё-Инмарлы тэльмырыса вазиськиз. Кузё-Инмар солы писпуэз возьматӥз. Моисей сое вуэ куштӥз но, ву ческыт луиз. Отысен Инмар калыклы пуктон-косон но закон сётӥз, отысен соосты Со чаклаз-эскериз. 26Со шуиз: «Инмаредлэсь Кузё-Инмарлэсь верамзэ кылзӥд ке, Солэн азяз ярамон уж лэсьтӥд ке, Солэсь курон-косонъёссэ санэ поныса улӥд ке, Солэсь вань пуктон-косонъёссэ быдэсъяса улӥд ке, Египет вылэ лэзем одӥг висёнэз но тон вылэ уг лэзьы; уго Мон – Кузё-Инмар [тынад Инмаред], тонэ эмъясь».
27Собере Елиме вуизы; отын дас кык ошмесъёсысь ву потыса улӥз, сизьымдон финикпуос будӥзы; израиль пиос ошмес вуос дуре станэн интыяськизы.
Currently Selected:
Потон 15: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016