Потон 14
14
14-тӥ ЛЮКЕТ
1Кузё-Инмар Моисейлы тазьы шуиз: 2«Израиль пиослы вера, соос берытскыса Ваал-Цефон азе, Мигдол карен зарезь вискы, Пи-Гахироф доры станэн мед интыяськозы; Ваал-Цефонэн ваче беринэ, зарезь дуре, стан пуктэ. 3Соку израиль пиос сярысь фараон [ас калыкезлы] шуоз: ”Соос та музъеме йыромизы, луоё кыр дунне соосты котыртыса пытсаз”. 4Нош Мон фараонлэсь сюлэмзэ лекомыто но, со соос сьӧры уйиськыса мыноз; фараон вылын, солэн вань ожгарчиосыз вылын Аслэсьтым данлыкме возьмато, соку [вань] египет калык тодоз, Мон Кузё-Инмар луисько шуыса». Озьы каризы.
5Египетлэн эксэезлы ивортэмын вал, израиль калык пегӟиз шуыса. Соку фараонлэн, солэн ляльчиосызлэн но сюлэмзы та калыклы пумит луыса кошкиз, соос шуизы: «Мар лэсьтӥмы асьмеос? Малы израиль калыкез кошкыны лэзимы, асьмелы медаз ни ужалэ шуыса-а». 6[Фараон] ожмаськон уробозэ кыткиз, бӧрсяз калыксэ кутӥз; 7тужгес но умоесьёссэ куать сю ожмаськон уробоосты басьтӥз, Египетысь вань мукет ожмаськон уробоосты но басьтӥз, та ожмаськон уробоосын кивалтыны нимысьтыз адямиосты пуктӥз. 8Кузё-Инмар фараонлэсь, Египетлэн эксэезлэсь, [солэн ляльчиосызлэсь но] сюлэмзэс лекомытӥз, – израиль пиос сьӧры со уйиськыса мыныны кутскиз. Нош израиль пиос вылӥ килэн валтэм улсаз мынӥзы. 9Египет ожгарчиос соос сьӧры уйиськыса мынӥзы, фараонлэн ожмаськон уробоосаз кыткем вань валъёсыз но борӟемен мынӥсьёс, солэн вань ожгарчиосыз но. Израиль калыкез соос Ваал-Цефон азьысь Пи-Гахироф вӧзысь зарезь дуре дугдэм дыръязы сутӥзы. 10Фараон матэ вуыны кутскыку, израиль пиос берзэс учкизы но, тани, египет пиос соослэн бӧрсязы лыкто: израиль пиос туж кышкатскизы но Кузё-Инмарлы тэльмырыса вазиськизы, 11нош Моисейлы шуизы: «Египетын шайгуос ӧвӧл шат, малы тон милемыз луоё кыр дуннее кулыны вайид? Мар тон милемын лэсьтӥд, малы милемыз Египетысь поттӥд? 12Египетысен но ми тыныд тазьы ик ӧм вералэ-а: ”Эн йӧтылы милемыз, египет калыклы ик ужаса мед уломы”? Луоё кыр дуннее кулытозь, эсьмаса, египет калык дорын ляльчиын улод». 13Моисей калыклы шуиз: «Эн кышкалэ, сылэ – адӟоды Кузё-Инмарлэсь туннэ тӥледлы утиськон сётэмзэ: али адӟем египет пиосты пумтэм вапумъёс ӵоже уд ни адӟе. 14Тӥ понна Кузё-Инмар ожмаськоз, нош тӥ куалекъятэк, каньылэн улэ».
15Кузё-Инмар Моисейлы шуиз: «Малы тон тэльмырыса Мыным кесяськиськод? Израиль пиослы вера, азьлане мед мынозы; 16нош тон, бодыдэ ӝутыса, кидэ зарезь вылэ вӧлъя, вуэз шори люк, соку израиль калык зарезь шортӥ, сюй вылтӥ выжоз. 17Нош Мон [фараонлэсь но вань] египет калыклэсь сюлэмзэс лекомыто, соос израиль калыклэн пытьы кузяз мынозы. Соку Мон Аслэсьтым данлыкме фараон вылын, солэн вань ожгарчиосыз вылын, ожмаськон уробоосыз вылын, борӟемен мынӥсьёсыз вылын возьмато. 18Аслэсьтым данлыкме фараон вылын, ожмаськон уробоосыз вылын, борӟемен мынӥсьёсыз вылын возьматӥ ке, [вань] египет калык тодоз, Мон Кузё-Инмар шуыса».
19Вань израиль калыклэн азьпалаз мынӥсь Инмарлэн Кылчинэз табере соослэн бӧрсязы мынӥз. Син азьысьтызы пилем юбо но вырӟиз, со соослэн мышкытӥзы мынӥз. 20Египет пиосын израиль пиос вискы пыриз, одӥгъёсыз понна со пилем пеймыт карись вал, нош мукетъёсызлы – уез югдытӥсь. Быдэс уй ӵоже мыныса, соос валче ӧз луэ. 21Моисей кизэ зарезь вылэ вӧлъяз, соку Кузё-Инмар зарезез кужмо шундыӝужанпал тӧлэн уйбыт пельтыса возиз, озьы зарезез сюй выллы пӧрмытӥз, соку вуос мыд-мыд пала вайяськизы. 22Израиль пиос сюй вылтӥ зарезь вамен мынӥзы: соос понна бурпал ласянь но, паллян пал ласянь но вуос борддор кадь сылӥзы. 23Египетысь ожгарчиос соос бӧрсьы уйиськыса мынӥзы; фараонлэн вань валъёсыз, ожмаськон уробоосыз но, борӟемен мынӥсьёсыз но зарезь шоры пыризы.
24Ӵукна возьмаськисьёслэн воштӥськон дырзы вуэм бере тылын ӝуаса улӥсь пилем юбо пушкысен Кузё-Инмар египет ожгарчиос шоры учкиз но египет пиослэсь люкаськонзэс куалектытӥз; 25ожмаськон уробооссылэсь поглянъёссэс басьтӥз но, соос гыж кыстӥськыса секытэн мыныны кутскизы. Соку египет пиос шуизы: «Ойдолэ израиль калыклэсь бызьыса пегӟоме, уго соос понна Кузё-Инмар египет пиослы пумит ожмаське». 26Кузё-Инмар Моисейлы шуиз: «Кидэ зарезь вылэ вӧлъя, вуос египет пиос вылэ, ожмаськон уробооссы вылэ, борӟемен мынӥсьёссы вылэ мед берытскозы». 27Моисей кизэ зарезь вылэ вӧлъяз, ӵукна пал зарезь ву ас интыяз берытскиз, нош египет ожгарчиос [вулэн] пумитаз бызьыса мынӥзы. Тазьы Кузё-Инмар египет ожгарчиосты зарезь шоры выйытӥз. 28Ву ас интыяз берытскиз но, израиль пиослэн бӧрсязы мыныса, зарезе пырем фараонлэн армиысьтыз ваньзэс борӟемен мынӥсьёсты, ожмаськон уробоосты вуэн ӝокатӥз; соос пӧлысь одӥгез но улэп ӧз кыльы. 29Нош израиль пиос сюй вылтӥ, зарезь шортӥ потӥзы: бурпалтӥзы но, паллян палтӥзы но соос понна ву борддор кадь сылӥз. 30Со нуналэ Кузё-Инмар израиль калыкез египет калыклэн киулысьтыз мозмытӥз. Израиль [пиос] адӟизы зарезь дурын кыллись египет пиослэсь кулэм мугоръёссэс. 31Израиль калык быдӟым киез-кужымез адӟиз, сое Кузё-Инмар египет пиос вылысен возьматӥз, соку калык Кузё-Инмарлэсь кышканэн улӥз, Кузё-Инмарлы, Солэн Моисей ляльчиезлы оскиз. Соку Моисей, израиль пиос но Кузё-Инмарез данъяса кырӟаны кутскизы, соос шуизы:
Currently Selected:
Потон 14: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016