Miqueas 6
6
Israel runakuna defiendikärinanpaq Tayta Dios nishqan
1 Tayta Dios nishqanta mayapäkuy.
Paymi kayno nin:
<<Jirkakuna mayaykäshuptiki sharkurkur nawpächo defiendikäriy.
Fuertipa parlapäkamuy jirkakuna mayashunaykipaq.
2Jirkakuna, kuyashqä runakunata careaptï mayapäkamay.
Patsata tuknaraq cimientukunapis, Israel runakunata cuentata manaptï mayapäkuy.#Isa. 3.13; Ose. 4.1.
3<<Kuyashqä runakuna, ¿imachötaq qamkunata achäquita ashipashqä?
¿Imachötaq qamkunata rabyanätsishqä?
Imacho ajayätsishqätapis mä nipäkamay.
4Egiptucho ashmay kaykashqaykipita qamkunata salvashpämi jorqamurqä.#Éxo. 12.50-51.
Noqami kachamurqä Moisésta, Aarónta#Éxo. 4.10-16. y Maríata#Éxo. 15.20. pushamushunaykipaq.
5Kuyashqä runakuna, yarpapäkuy Moab nacionpa mandaqnin rey Balac qamkunapa contrayki sharkushqanta.
Tsayno sharkuptinpis yarpapäkuy Beorpa tsurin Balaam maldicionashunaykipa trukan bendicionta qoshushqaykita.#Núm. 22—24.
Yarpapäkuy Sitimpita Gilgalyaq Jordán mayuta imano pasashqaykitapis.#Jos. 3.1—4.19.
Tsaykunata yarparmi tantiyakärinki noqa Tayta Diosniki qamkunata imaypis salvashqäta>>.
Tayta Dios imata munashqanpis
6¿Imata aparkurtaq Tayta Diospa nawpanman chayashun?
¿Imataraq munayniyuq Tayta Diosta adoranantsipaq apashun?
¿Sacrificiuta rupatsinantsipaq watayuq turitukunatatsuraq apapashwan?
7Waranqa (1,000) carnikunata pishtarkur paypaq rupatsiptintsi ¿kushikunqatsuraq?
Chunka waranqa (10,000) mayukuna aywaykaqtano tsaytsika aceitita altarman jichapaptintsi ¿kushikunqatsuraq?
Jutsata rurashqantsipita qechpa tsurintsita wanurkatsir rupatsipaptintsi ¿kushikunqatsuraq?
8 Tayta Dios imata munashqantapis nimashqantsinami.
Payqa munaykan ali kaqlata ruranantsita, runa mayintsita kuyapänantsita y mana runa tukuypa pay nishqanta cäsukunantsitami.#1Sam. 15.22; Prov. 21.3; Ose. 2.19-20; 6.6; Amós 5.22-24; Zac. 7.9-10.
Jerusalén runakunata Tayta Dios castigananpaq nishqan
9Jerusalén runakuna, Tayta Diosmi qayaykäshunki.
Tantiyakuq runa karqa payta mantsakäriy.
Qayakurmi kayno nin:
<<Markacho kaqkuna y mayor runakuna, lapayki wiyakäriy.
10Wayikikunachöpis suwakushqalaykimi kaykan.
Tsaynöpis wayikikunacho kaykan runa mayikita engañanaykipaq pësakunami.
11¿Imanöpataq perdonäman runa mayinta pësuwan engañaqtaqa?#Lev. 19.35-36; Deut. 25.13-16; Amós 8.5.
12Kay markacho kaq rïcu runakunaqa runa mayinta nakatsiq, runa mayinta engañaq y lulakuqlami karkaykan.
13<<Tsayno kashqaykipitami castigashaykipaq.
Jutsata rurashqaykipitami ushakätsishaykipaq.
14Mikurpis ukushnikita watarkunalaykipaq tarirmi yarqanaykar kawankipaq.
Cosëchata shuntashqaykipis manami aypanqatsu pirwanaykipaq.
Pirwakushqaykitapis guërracho vincishushpaykimi apakärinqapaq.
15Mururpis manami cosechankipaqtsu.
Aceitünasta aqaptikipis lushikunaykipaq aceiti manami kanqatsu.
Üvata jaruptikipis vïnuta upunaykipaq manami kanqatsu.
16<<Qamkunaqa rey Omri yachatsishqan costumbrinkunata rurar jutsayuqmi karkaykanki.
Rey Acab jutsata rurar kawashqannömi kawarkaykanki.#1Rey. 16.29-30; 21.25-26.
Tsayno kashqaykipitami qamkunata castigaptï desgracia pasashunkipaq.
Pasaypa nakashqaykita rikarmi runakuna asipäshushpayki manakaqman churashunkipaq>>.
Currently Selected:
Miqueas 6: qvmB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.