MATEO 6
6
Yesu Ɔte Ara I Kayiribielea Ibara Iso.
1“Minyɔ so kukaakɔ sɔ miibabara mi kasumu kubarara i ɔgbami sɔ maturi aanya. Alasɔ si mibara ngbɔ ne, mi Ɔse Ɣaa gɔ i kato siina kukuso ɔ̃atã mi. 2Ne ɔso si atã wɛrɛba ira ne, daapɛ ne imomo sɔ maturi aanɔ. Ngbɔ i mma nsɛ mabara ara si mabo maturi anɔ sɛ mabara i kasɔrɛkɔ̃ gu kuɣa ame sɔ maturi aanya fiɛ maale ma ne. Lobie sɔ lotã mi itsue sɔ maɔfɔ ma kuso koko! 3Ne ɔso si abuai wɛrɛba ne, daatã nane fɔ ɔlaa gɔ lomatã-ɔ si ɔtsue nnɛ abara, 4iɖe iwɛrɛra, iyɔ mi Ɔse Ɣaa gɔ nsɛ ɔnya awɛrɛra ɔɖuɖu wa i maturi sɛ mabara to ɔ̃atã-ɔ kuso.
Yesu Ɔte Ara I Kayi Ikparama Iso.
5“Fiɛ si mito mikparama kayi ne, midaase lɛ mma nsɛ mabara ara si mabo maturi anɔ. Masɛ mabie sɔ maata maya makparama kayi i kasɔrɛkɔ̃ gu kuɣa ame sɔ maturi si manya ma. Lobie sɔ lotã mi itsue sɔ ma kuso ame maɔfɔ mmɔ ne. 6Ɣɛɛ fɔ si ato akparama kayi ne, kɛlɛ fɔ iyo kame si asɛ̃ iyo apia so fiɛ aakpere fɔ Ɔse gɔ maisɛ manya ala anɔmi, iyɔ gɔ ɔ̃ ɔsɛ ɔnya ta awɛrɛra ne, ɔto ɔ̃atã-ɔ kuso.
7“Fiɛ si ato akparama kayi ne, daaɣɛ atɔ̃me gbodzoo wa nna karɔ̃ ala ngbɔ i maɣɔsɔrɛdze sɛ mabara ku adzuni sɔ mmɔ i ma aɣɔ aakã ma atsue ne. 8Midaase lɛ ma, ala mi Ɔse ka ɔɣe ara wa lonya mi koko fiɛ miakarɛ wũ. 9Ne ɔso si mito mikparama kayi ne, miɣɛ sɔ,
‘Bo Ɔse gɔ i kato,
tã marɔ fɔ iyere sɛɛ.
10Fɔ sigara iɖe si siba i bo ndɛ̃.
Maabara fɔ kuɖɔɛ
i kayiiso lɛ kumɛgɔ masɛ mabara i kato.
11Tã bo nɔme ikpɛnɛ aɖera.
12Su bo akpi tsɛ bo
lɛ kumɛgɔ bosɛ bosu botsɛ mma loɣɛrɛ bo.
13Daatã sɔ boabo i kalakanyɔ ame,
ɣɛɛ ɖi bo bɔrɛgu i ikpi ame.
Ala fɔ ɔkpɛ nɖe sigara iɖe gu ɔle
gu ikpawaĩ ɔwi ɔɖuɖu ame.’
14“Si misu maturi akpi mitsɛ ma ne, mi Ɔse gɔ i kato ana to ɔ̃asu mi are ɔtsɛ mi. 15Ɣɛɛ si miisu maturi akpi mitsɛ ma ne, mi Ɔse ana iibasu mi are ɔtsɛ mi.”
Yesu Ɔte Ara I Kanya Inyi Iso.
16Yesu ɔledza iɣɛ sɔ, “Si mito minyi kanya ne, midaanyi katɔ̃ mila lɛ mma nsɛ mabara ara si mabo maturi anɔ awe. Ala masɛ manyi katɔ̃ mala sɔ maturi si matsue sɔ mato manyi kanya, fiɛ gbaã loto loɣere mi sɔ maɔfɔ ma kuso koko. 17Si mito minyi kanya ne, mifore anɔmi si mitara mi ati kukaakɔ miledza so. 18Ne loatã sɔ maturi iibatsue sɔ ato anyi kanya, ɣɛɛ fɔ Ɔse gɔ maisɛ manya, fiɛ ɔsɛ ɔnya ara wɛrɛa aatã-ɔ kuso.
Kato Nɖe Ara Ka Kɔlakɔ̃ Sɛɛ.
19“Midaakɔla karana mitã so i kayi gagbe ame ala ngbe ne, makorokpɛ to maanina kã ɣee kapɛ matɔ, fiɛ mayukukpe ana to maawo kukui ɔbiɛ mabo iyo mayu kã. 20Ɣɛɛ ne, mikɔla karana misɛ so i kato. Ala mmɔ ne, makorokpɛ iisɛ manina ara, kaisɛ kapɛ matɔ fiɛ mayukukpe ana iisɛ mabo i mmɔ mayu ara. 21Alasɔ ngbegɔ i fɔ karana se ne, mmɔ i fɔ ɔtu ana aawe ne.
Yesu Ɔte Sɔ Anɔmi Nɖe Kuturidziri Ikpawaĩ.
22“Anɔmi se lɛ ɔkaniɛ atã kuturidziri. Si fɔ anɔmi ɔkpa ne, Fɔ kuturidziri ɔɖuɖu ame to kuakpa waĩ. 23Ɣɛɛ si fɔ anɔmi iikpa ne, fɔ kuturidziri ɔɖuɖu to kuase guduu. Ne ɔso si fɔ ikpawaĩ ɔgudu ne, fɔ idududu ɔwodoro gbaã!
Yesu Ɔte Ara I Ɣaa Gu Karana Isiai Iso.
24“Kuwɛ̃ iibawo makɔse inyɔ ɔsumu. Si iiɖe ngbɔ ne, ɔto ɔ̃aɖɔɛ ɔwɛ̃ ɔtsiri ɔwɛ̃. Ɣee ɔ̃awarɛ ɔwɛ̃ ɔta ɔya ɔwɛ̃ iso. Miibawo Ɣaa gu karana ɔsɔrɛ. 25Ne ɔso nto loɣere mi sɔ midaamararã so i mi ngbã, nnɛ miaɖe gu nnɛ mianɛ, ɣee mi sosina gu nnɛ miapia iso. Ɛɛbɛrɛ ngbã iifɔ kuɣa miɖo aɖera fiɛ kuturidziri iifɔ kuɣa kuɖo arapia? 26Minyɔ kato kurodzai gɔ loisɛ kukpɛ̃ fiɛ kuisɛ kusɔrɛ̃ ɔraɖui, kuna siwu ɣɛɛ mi Ɔse gɔ i kato sɛ ɔkararã kɔ̃! Miifɔ kuɣa miɖo kurodzai? 27Mi nna loawo ikpɛnɛ iwɛ̃ ɔsu ɔbua i ɔ̃ agbanayi iso iki i imararãso ame?
28“Be ɔso mito mimararã so i nnɛ miapia iso? Minyɔ ipo ame adziri kumɛgɔ asɛ amɔ. Aisɛ ata ɖɔti ɣee awe sikati. 29Ɣɛɛ nto loɣere mi sɔ Igara Salomo kɔra si ɔkɛrɛ so ne, ɔ̃isɛ ɔlɛ ɔnyɔ lɛ kudziri gɔ lofere aɣɔ̃la. 30Ɣaa nsɛ ɔkɛrɛ sikua ngbɔ. Sikua dzɛ mpia nɔme kɔrãkaɖe maɔkpɛ̃ sɛ̃ mafere i ɔtɔ ame matsuedza. Si Ɣaa to ɔnyɔ sikua iso ngbɔ ne, ɔ̃ibabara ɔtã mi ma loɖo sikua? Be ɔso i mi kafɔkaɖe ɔfoforo ngbɔ?
31“Ne ɔso midaasɛ mimararã so sɔ ‘Be boaɖe? Be boanɛ? Be boapia?’ 32Ara wagbe i maɣɔsɔrɛdze sɛ mabie ne, ɣɛɛ mi Ɔse gɔ i kato ɣe sɔ nwagbe ɔɖuɖu ɔnya mi. 33Ɣɛɛ nnɛ iso i mi anɔ si arɛtɛ nɖe sɔ Ɣaa si ɔɖe sigara i mi iso gu si mibara sibɔlɔlɔ ara iyɔ ɔto ɔ̃asu ara wagbe ɔɖuɖu ɔtã mi. 34Ne ɔso midaamararã so i kɔrãkaɖe ga loisɛ̃ iso. Kɔrãkaɖe amɔrɛ̃ si ase ise ala nɔme are ɔɔfe isi.
Currently Selected:
MATEO 6: akp
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.