Iŋɛ́nínɛ yi Isáaŋ 3
3
Ɔmbɔp ú kutúmɛn Ɔlɔŋ ú peétépí pé Yésus, Sálatɛs
1Ɔ́ŋɛ́n Éŋele u Ɔlɔŋ u peétépí pé Yésus, Sálatɛs; ɛɛlɛ́ kɛ́ɛ́yɛ́ ɛ́ɛ́: ewú upianɛ́ piliínditíe pítíndátɔ́neémue pí Támbák no muótíótio múnyɛɛ́ mútíndátɔ́neémue ɛ́ɛ́pí ɛ́ɛ́: yeémenyen puóli púáwɔ; pɛɛnd ɛ́ɛ́kɛlɛ ɛ́ɛ́ anyɛ ɔkɔ́si, aŋúɛ kɔk ekúén. 2Ɛnyɔk, lúndésí epú púmanyɛɛ́ pukɔ́si kááwɔ, emenyí púkúu. Á kiákí ɛ́ɛ́ yeépílínsíkényí ɛ́ɛ́ puóli púáwɔ tɛ púpúmoómí tipá kitɛ́fɛk ké eŋís yá Támbákɛ́ɛ waamɛ. 3Pítáákɛ́t epú pómoókúónyónyí na aná ɔmɔɔ́p pɔ. Nɛkɛ́n pú óond énúki kusɔ́t kúáwɔ. Éen kupá ɛŋɛnyɔ́, yoókólon ɛlɛɛ́ eŋépi tɛ ɛ́ɛ́ émenyi kisikɛl yaányíkuáminɛ́ɛ. 4Tɛ anakáánɛ́ kitáám kí peétépí pé Yésus kímotí akáánɛ́ Sálatɛs tiényúkusit pilaá píɔ́p nɛ kuɛlɛ pilɔk pí maandá. Pɔ́ páányípíákan pilaá piifúmfɛ́ɛ póond pɛ́ɛndɛ ɔlɔŋ naamɛ, ó pusíó ɛ́ɛ́ pɛ́ɛ́kɛsikɛnɛn nɔ. 5kúúkɔ́ epé páányínyíinɛ́ɛ áányípíákan pilaá piifúmfɛ́ɛ; tɛ puɔ́s indiényeélí pisiɛ́n píɔ́p á kálatɛ u kusɔ́t, yoónyóond yɔɔyitɛn Taatɛ́ɛ nɛ Peéŋele pɛ́ɛ́yɛ́ ɛ́ɛ́: «Epe ɔ́ɔ́kiŋɔ́pɔnɛn.» 6Ewú upianɛ́ɛ itú ɛ́ɛ́kɛsikɛnɛn ɛ́ɛ́ úpítɔ́likɛn epú Emfúnukufúúmɛ ɔ́ɔ́yɔɔnɛ́ɛ Ilɔŋ sí peétépí pé Yésus.
Ɔmbɔp ú kutúmɛn Ɔlɔŋ ú peétépí pé Yésus Filatɛlɛfí
7Ɔ́ŋɛ́n Éŋele u ɔlɔŋ ú peétépí pé Yésus pɛ́nyɛɛ́ Filatɛlɛfí; ɛɛlɛ kɛ́ɛ́yɛ́ ɛ́ɛ́: Ewú unyɛɛ́ Kifúmak, wɔɔyɔnɛ́ɛ kémuémue, unyɛɛ́ ne kitipek kí efuŋ Tafíit, ewú unyɛɛ́ uméfúun, mɔɔnd tipá ukufuuk, ufuuk mɔɔnd tipá ukufuun. 8Yeémenyen masɔ́m mááwɔ meem emé ɛɛlɛnɛ́ɛ; yeémenyen ɛ́ɛ́ atipá ni imbekí puólíkóoli, tɛ nɔ, aápíkányikan ó kuwóónyosi nukál núámɛ, andíkɛ́k etiíndúm kélém. Índɛ́ kɔk niít ní kiansi enie íményifuún kááwɔ ó pusíó, mɔɔnd tipá ukufuuk nɛ́ɛ. 9Índɛ́ aná iŋɛɛ́nyɛ́ɛl nɛ pɛɛnd pɛ́nyɛɛ́ kɔ́ ɔlɔŋ ú Sáátan, pasupúsɔp pɛɛ́tɛ pɛ́ɛlɛnɛ́ ɛ́ɛ́ pɔ́ pányɛ Pɛyúútɛn, pɔ́ kɔk kati Pɛyúútɛnɛ: iŋakúta pɔ́ ɛ́ɛ́ péesikusukénín tunúú é kukuekenyi nuúmu, póond pémenyi ɛ́ɛ́ yɔɔ́kuɔyɔ. 10Aná ɛ́nyínɛkɛ́n óond owóónyosi nukál núámɛ kati kipalalá, niŋúɛ kákáam iŋɔkuɔsɛk ɛ́ɛ́ muyú múkuanɛ́ nɛ pɛɛnd pé kúúsí kitikit ɔ́ kuɔ́pitɔn pɔ́ tikupíkíík. 11Yoókólon, indipá imbiéle. Samán na pukaaka epú apianɛ́ɛ, ɛ́ɛ́ mɔɔnd tiɔsíkɔ́l kááwɔ pinamá píáwɔ. 12Ewú waányípíányinɛ́ɛ yeényééyi wɔ́ ɛtɛ́n ú kitamb kí Támbákɛ́ɛ waamɛ, tɛ puɔ́s utiányaánd kuám á kɛ́ɛ. Yɔɔ́nyɔ́ŋ kɛ́ɛ́yɛ́ kisiɛ́n kí Támbákɛ́ɛ waamɛ nɛ kisiɛ́n kí pálɛ́k u Támbákɛ́ɛ waamɛ: Yelúsalɛm wɔɔkɔ́si woólinoné mɛnɛ́mɛnɛ́ɛ á masiá má Támbák. Yɔɔ́níɔ́ŋ kɛ́ɛ́yɛ́ andíkɛ́k kisiɛ́n kíámɛ kiikɔ́si. 13Ewú upianɛ́ɛ itú, ɛ́nyɛɛ́ úpítɔ́likɛn peseékése epú Emfúnukufúúmɛ ɔ́ɔyɔnɛ́ Ilɔŋ sí peétépí pé Yésus.
Ɔmbɔp ú kutúmɛn Ɔlɔŋ ú peétépí pé Yésus Lawotisé
14Ɔ́ŋɛ́n Éŋele u Ɔlɔŋ ú peétépí pé Yésus pɛ́nyɛɛ́ Lawotisé, ɛɛlɛ́ kɛ́ɛ́yɛ́ ɛ́ɛ́: Ewú unyɛɛ́ kisiɛ́n ɛ́ɛ́ Amɛnɛ, Etétúnyí u nulátát, wɔɔyɔnɛ́ɛ kémuémue, unyɛɛ́ niólín ní puum epú Támbák maáluŋá, ɛ́ɛ́pí ɛ́ɛ́: 15Yeémenyen masɔ́m mááwɔ; yeémenyen ɛ́ɛ́ atipá tɛ kusíin tɛ kupál. Asákápá kusíin kúnyáanɛ kupál! 16Maná kɔk atipá kusíin atipá kupál, anyɛ ombóŋombóŋe, púúpɔ́ iŋaná akunutanɛ́ɛ. 17Ɛɛ́kɛɛlɛ ɛ́ɛ́: inyɛ inɛ́m, yeéliné punɛ́m táásɛ, indipá imbaŋa puandá. É kémuémue atipá emenyen aná ɛnyɛɛ́ ɔsɔ́k! Anyɛ pusé, aŋúɛ ne pipúte, aŋúɛ nuɔ́l kutɔɔ́. 18Insúŋɛ yaamɛ eye: óló ɔsíɔ́nd kuam kóol ewú yiik ɛ́nyítɛ́fɛt, káákáánɛ́ akaányípá inɛ́m i pí muɛ́t, óond ɔ́ɔnd pilaá piifúmfɛ́ɛ ápiák ɛ́ɛ́ épíéŋi ɛtɔ́ kunuá ú kuáman inúú kutɔɔ́, etipíélítí kuɔ́nd puanyɛ́ pú eŋís ɛ́ɛ́ yééfuunik etúm ɛ́ kuɛ́nɛn peseé. 19Yaákánsan epé yɔɔyɔnɛ́ɛ yoond iŋite pɔ́ no nusoó. Píékí na pukaaka á masɔ́m má Támbák óond éséndi kusɔ́t kúáwɔ! 20Ɛ́ɛ́nɛ́, niŋúɛ ewe etényí é niít ní kiansi, yɔɔ́tɔndɔn. Índɛ mɔɔnd siɔ́p ekelú wáámɛ woond ufuun niít níɛ́yɛ́ ní kiansi, yeépíken kuɛyɛ́, pátútáaŋ, naamɛ nɛɛyɛ́ tunyáan ɔlɔŋ. 21Iŋeeki siki mɔɔndɛ úmányinyɛ́ɛ́n, pukaaka pú kuɔsinyɔ́mbɛ́t káámɛ kí inyɛ́ŋ kí indáŋa yaamɛ i pufuŋ; yá aná imaányɛ́ɛ́n kákáámɛ yɛ́ɛp kuɔnyɔ́mbɛ́t kí inyɛ́ŋ i Taatá kɛ́ɛ́yɛ́ kí indáŋa i pufuŋ. 22Ewú upianɛ́ɛ itú, ɛ́nyɛɛ́ úpítɔ́likɛn epú Emfúnukufúúmɛ ɔ́ɔ́yɔɔnɛ́ɛ Ilɔŋ sí peétépí pé Yésus.
Attualmente Selezionati:
Iŋɛ́nínɛ yi Isáaŋ 3: yav
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2026, CABTAL