1 Piɛl 2
2
1Ónuombó epú kitikit punyɛɛ́ kilɔk, nutipúlít mɔɔnd, nutiɛlɛ́ muák, nunɛ́m, núyapan imbásia. 2Ɔ́nupilɔ́ɔ́ŋɔ́ pinɔ́k pí mɛpɛ́ɛ́nɛ pí nukál nú Tambák ɛlɛɛ́ paán pɔɔtɔmbɔ́. Mányɛ mɛpɛ́ɛ́nɛ mɛ́nyɛɛ́ tɛ kupueŋitenye, núpúwáan mɔ́ nukakɔm núond núpia kisótio, 3á kiákí ɛ́ɛ́ nuɛ́n ɛ́ Ɔkɔ́n nyɛ peseé.
Indín i pusɔ́m pú ɔlɔŋ ú peétépí
4Énupísííténín Ɔkɔ́n, nitányí niikɔ́si, pɛɛnd moómbó, maná Támbákɛ́ɛ waayɔ́ɔn nɛ́ɛ, nínyɛ ɔ́ puɔ́kɔ kɛ́ɛ́yɛ́ ké eŋis. 5Panɔ́ muɛ́t, ɛlɛɛ́ atányí yɔɔkɔ́si, énupíkín á nuwáák nú kitamb efunukufúúmɛ nyɔ́mbitɔnɛ́ɛ á kɛ́ɛ, nútɛ́k embúl ú pafunɔ́fɔn á pusɔ́m pú Támbák, á kupífunan wɔ́ pifunɔ́ piitɛ́fítɛ́n, píkaányípá kupɔ́t kɛ́ɛ́yɛ́ ké eŋis á nipílat ne Yésus Kilíis. 6Á kiákí púnyɛ puɔ́ŋɔ́ kí infíɔ́ŋ ɛ́ɛ́: Índɛ́, imáák é Siyon nitányí ní puɔ́kɔ ní ɛtɛn, niyúúnán. éwú waákanɛ́ pipióndínyí ɔtɛ́m píɛ́yɛ́ á nɛ́ɛ tiɔ́nyɔ́ɔ́pɔ́ ɛtɔ́ kunua. 7Nitányí nikáánɛ́ áápian kiandákáand kí piɔŋúnɔ́ á panɔ́ peétépí; Maná é péépé pátiányípá peétépí, nitányí ení pɛɛnd pámaáwáká moómbó ɛ́ɛ́yɛ́ nitányí ní ɛtɛn, 8nɛ́ɛ andíkɛ́k ní imbúpén, nitányí níkuusenyée. Péépúpénén, á kiákí péékeenen kuátap nukál nú Támbák, púúpú kɔk pámaátɛ́ɛ́n pɔ́ɔ á pɔ. 9Maná panúɛ, nunyɛɛ́ nisíp niiyúúnán, pafunɔ́fɔn pé efuŋ, kifúúmak kí kitɔŋ, nikúli níɔ́pinɔnɛ́ɛ Támbákɛ́ɛ. Waánúpílíkɛ́n kí imbíne á kuam kɛ́ɛ́yɛ́ kí infaŋá i kisie, ɛ́ɛ́ núkéme pinɔ́k píɛ́yɛ́ pí meelíe. 10Insúá nutimapá kitɔŋ kí Támbák, maná ninúan nukanyɛ nikúli níɛ́yɛ́; Panɔ́ numɛɛ́lɛ́ nutipián niɛ́nɔsúkɛ ní Támbák, nínúan nukanyɛ na nɛ́ɛ.
Pekilístɛn ɛ́ kikɛtɛ́kɛtɛ́ɛ kí epé pátiányípá páátapan
11Pekúl páámɛ pí iŋɔyɔ, yaánúsúŋa ɛlɛɛ́ pɛɛnd pɛ́nyɛɛ́ kí inɛmbɛ pɔ́ɔ peenyí: Ánupínyáŋá pilɔ́ɔ́ŋɛ́t pí imekú pínuenesíé pumundɛ. 12Ánupíán pinɔ́k pí pinɛm ɛ́ kikɛtɛ́kɛtɛ́ɛ kí peépi pátiányípá páátapan, ɛ́ kuɛ́nyɛɛ́lɛɛ́ tɛ pɛ́ɛlɛ imbásia ɛ́ɛ́ nunyɛ pilɔk, pɛ́ɛ́nɛn pinɔ́k píánɔ́ pí meelíe póond pékúmesi Támbákɛ́ɛ puɔ́s woónyóólonée.
Ɔ́nuɔ́pínɔ́n pɔkɔ́n pɔ́ kitɔŋ
13Ɔ́nuɔ́pínɔ́n pɔkɔ́n kitikit pɔ́ kitɔŋ ó pusíó pú Ɔkɔ́n, tɛ efuŋ unyɛɛ́ kí indáŋa, á kiákí waápian numíánsina 14tɛ pɔɔŋgɔ́munɛ umɛɛ́tɛ́k ɛ́ɛ́ péséésenyi polokí, epé pɛ́ɛlɛnɛ́ peseé páákan pɔ́ɔ ilúndɛ. 15Á kiákí, kilɔ́ɔ́ŋɛ́t kí Támbák nyɛɛ́ núɛlɛ peseé é kufuuken eŋít yɛ pɛɛnd péleemenée póond pápítambala. 16Ɔ́nusɔ́tɔ́n ɛlɛɛ́ pɛɛnd pɛ́nyɛɛ́ weéŋelí, maná kɔk weéŋelí waanɔ́ tiyuukán naanɔ́ ɔ́ kilɔk. Ɛ́nuɛndɛ́ ɛlɛɛ́ peelímoólí pá Támbák. 17Énuekényí mɔɔnd kitikit nukum, ɔ́nuɔyɔ́ paandimán páánɔ́ pá kuátap, énutííné Támbákɛ́ɛ, nukúmesi efuŋ.
Peelímoólí pá kí iŋɔ́pinɔ
18Peelímoólí ɔ́nuɔ́pínɔ́n pɔkɔ́n páánɔ́ nɛ nutɛɛtinɛ, kútipá kɔ́ɔ́m ké epé pɛ́nyɛɛ́ peseé ne epé pɛ́nyɛɛ́ itɛ́m iwoókón, maná tɛ epé pénúénesíé iŋɛ́n. 19Á kiákí púnyɛ peseé á kiákí nuákamba ɛ́ɛ́ núlɔp nulátát á Támbák é kuésepenyi muyú tutáŋapanɛ́ kati á kipínanúɛ. 20Kayí nukúme nunyɛɛ́ kutáŋap índɛ numapiá muyú panɔ́ pɛɛlɛ́n kilɔk? Maná índɛ nuápian inséésítényí panɔ́ pɛɛlɛ́n peseé nuond nuésepenyi yɛ́ɛ, púnyɛ sol peseé ké eŋis yá Támbák. 21Púúpú waányínúpílíkɛ́n á pɔ, á kiákí Kilíise wɔ́ muɛ́t mɔɔ́pɛ́k á pɔ́ káánɔ́ ó pusíó, waanúyapɛn pulinsí ɛ́ɛ́ núɔ́ŋɔn kɛ́ɛ́yɛ́ ká ambaná. 22wɔ́ umɛɛ́lɛ́ utiɛlɛ́ kifal, tɛ kisupɔ́ kítimaám kɛ́ɛ́yɛ́ é niít. 23wɔ́ pámaásikán wɔ́, tɛ kuondinyi kí insikɛ́, péséésenyi wɔ́, tɛ kupilɛt eŋis, maná waapíyap ké esúmbí maayɔ́ u indɛ́ndɛ́nɛ; 24wɔ́ umɛɛ́sɛmbɛ́ kɛ́ɛ́yɛ́ ɔ́ nuɔ́l pifal píásɔ́ ó kolóse, ɛ́ɛ́ túkú á kifal túond túsɔ́tɔn kusɔ́t kú indɛ́ndɛ́nɛ. Á kiákí infɔ́t síɛ́yɛ́ énúéŋúki. 25Á kiákí numapá ɛlɛɛ́ pitúmbɛ́ɛ piitamán, maná nínúan nuóndó ku ekííkí pitúmbɛ́ɛ waanɔ́ ne ekííkí pumuundɛ púánɔ́.
Attualmente Selezionati:
1 Piɛl 2: yav
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2026, CABTAL