प्रेरित 2
2
पवित्र आत्मा राहाच
1जब पेन्तिकोस#2:1 पेन्तिकोस: पेन्तिकोसो अर्थ पचासौ दिन छान्ने टेच यहूदीकुङ पर्व राहा तब प्रभु येशूवाङ विश्वास जाट्च #लेवी २३:१५-२१; व्यव १६:९-११जम्मै भर्मीको काट्ठाङ जम्मा छाना। 2होस बेला नमीङ काखीनी कराहाङ्च नम्सु सुनाङो ढीन्च आवाज राहामो होसोको मुच इम पुरै होस आवाजे पीङा। 3हटै होसोकोइ म्हेयो मील्हाप्का (ज्वाला) ढीन्च डाङा। होस म्हेयो मील्हाप्का म्हेयो फीलीङ्गा लख भाग-भाग छान्मो होसोको पट्टकुङ मीलुवाङ मुवा। 4हटै होसोको पट्टको पवित्र आत्मै भरीसा र होस्कोइ ज होसोकोके अरु-अरु ढुटाङ ङाक्के ह्योक्च जाट्काङ।
5होस बेला यरुशलेमाङ पट्ट देशाङो परमेश्वरके डुट्के जाक्च यहूदीको मुमोलेया। 6हटै होस आवाज सेमो होलाङ ढलीङ भर्मीको राहा। हटै होसोको छक्क परीसा हीकेटेहाङ होसोकोइ मेनो-मेनो ढुटाङ ङाक्च सेया। 7होसोकोइ बेहेरी अचम्म सेया हटै, “इसै ङाक्च भर्मीको पट्टको गालीलीको माला र? 8कानकोइ कुट इसोकोइ कान मे-मेल्लाकुङ ढुटाङ ङाक्च कासेयास? 9कान चहीन्या इलाङ पार्थीको, मादीको, एलामीको। मेसोपोटामिया, यहुदिया, कापाडोकिया, पोन्टस, एशियाङो भर्मीको, 10फ्रिगिया, पामफिलिया, मिश्र, कुरेनीयाङ परीस्स लिबियाङो क्षेत्रकोइङ हटै रोम सहरीङ राहाच भर्मीको लेनीङ। 11कानको क्रेटाङो हटै अरब देशाङो भर्मीको लेनीङ, कानको चहीन्या यहूदीको हटै यहूदी धर्म लाच माइस्राएलीको लेनीङ बाकी र होसोकोइ कानुङ मे-म्हेल्लौ ढुटाङ परमेश्वरो कराहाङ्च कामो बारेयाङ ङाक्मज लेच सेमोनीङ!” टेया। 12होस भर्मीको बेहेरी अचम्म छान्मो अलमल्ल छाना हटै मेक्को-मेक्को, “इच्यौ अर्थ ही आला?” टेमो गीना।
13हटै अरुकोइ होसोकुङ गिल्ला जाट्मो, “इसको ढलीङ अंगुरो हान गामो म्होर्चको आला” टेया।
पत्रुस भर्मीको कठा ङाक्च
14हटै पत्रुस अरु ११ जना प्रेरितकोर कठा टोरोसा र कराहाङ्च मेस्वराङ होसोकोके इट टेया, “ए ङौ इस्राएली भर्मीको हटै यरुशलेमाङ मुचको, ङौ कुरा सेनीस हटै नाक्कोके इसै कुराको थाहा अटछाने। 15इसको नाक्कोइ सोच्डीनाङ लख म्होर्च माला हीकेटेहाङ इन्नाङ गोराकाङो नौ मात्रै ङाक्मोले। 16छीनीङ इलाङ योएल अगमवक्तै टेच कुराको छान्मोज ले,
17‘अन्तिम याककोवाङ परमेश्वरे इट छान्ने टेमोलेको,
ङै पट्ट भर्मीकोटाक ङौ आत्मा ह्वामो याहालाङ,
हटै नाक्कुङ मीजाकोइ अगमवाणी ङाक्ले,
हटै नाक्कुङ रेन्झा मीजाकोइ दर्शन डाङ्ले, हटै बुढास्सकोइ #योए २:२८-३२सपना डाङ्ले।
18होस बेलाङ ङै ङौ सेवा जाट्च लेन्जा हटै माझाकोटाक ङौ आत्मा ह्वामो याहालाङ।
हटै होसोकोइ अगमवाणी ङाक्ले।
19नमाङ ङै अचम्मावो चिन्हको टनाक्लाङ,
हटै म्हाकाङ पृथ्वीयाङ अचम्मावो कामको जाट्लाङ।
मीही, म्हे, मीखुको डाङ्ले।
20प्रभुवो कराहाङ्च हटै अचम्मावो न्यायो याक राहाके टेनाङ पहीला
नम्खान चुमो छान्ने हटै ग्याहोट मीही लख ग्यामो छान्ने।
21बाकी र होस बेलाङ जसे प्रभुवो म्यार्मीन पुकार्डीले होस चहीन्या बचडीस्ले।’
22ए इस्राएलाङो भर्मीको, ङौ कुरा सेनीस। परमेश्वरे येशूद्वारा शक्तिशाली कामको जाट्मो अचम्म-अचम्मावो चिन्हको टनाक्च च नाक्कोइ नाक्कोलै वार्म नाल्नीस। होस चिन्हकोइ परमेश्वरे नासरताङो येशूके मेकोइ ज बीरीन्च आला टेमो प्रमाणित जाट्काङ। 23परमेश्वरे मेकुङ निश्चित योजना हटै पूर्वज्ञान अनुसार येशूके नाक्कुङ मीहुटाङ याहाकाङ हटै नाक्कोइ दुष्ट भर्मीकुङ मीहुटाङ याहामो क्रुसाङ साट्के #मत्ती २७:३५; मर्कू १५:२४; लूक २३:३३; यूह १९:१८ नाबीरीनास। 24बाकी र परमेश्वरे येशूके सीठइङ जीवाट्काङ। परमेश्वरे येशूके सीचवो शक्तिइङ छुटकारा याहाकाङ हीकेटेहाङ होस्को सीच्यौ सीमो लेके असम्भव लेया। 25दाऊद राजै येशूवो बारेयाङ इट टेमोलेया:
‘ङै परमप्रभुके जहिले ड ङौ अघेर ङाडाङाङ। होस्को ङौ डोरलाक लेको होट छान्नाङ ङा बीरीके मापरीस्ले।#भजन १६:८-११
26होट छान्नाङ ङा ङौ गीनीङ होडा ज मराङ्मोन। हटै ङा मराङ्म ङाक्लाङ। ङा सीमो आन्के परीस्ढ्याङ र ङा आशाङ ज जीवालाङ।
27हीके टेहाङ नाकोइ ङाके सीचकोके डाच ठावाङ माडास्डनी।
न ट नाकोइ नाकुङ पवित्र जनके चिहानाङ ज घेरेल्के याहाढनी।
28नाकोइ ङाके पवित्र जीबन जीवाके लामको नाटनाकास,
हटै नाको ङा कठा लेच कारणे ङा बेहेरी मराङ्मोन।’”
29हटै पत्रुसे फेरी टेया, “ए ङौ इस्राएली भर्मीको, कानुङ पुर्खा दाऊद राजौ बारेयाङ ङै नाक्कोके ढुक्क कठा टेके हेक्लाङ। दाऊद सीया हटै होस्के ठाका। होच्यौ चिहान अझै र कान कठा ज ले। 30बाकी र दाऊद काट अगमवक्ता लेया हटै होचे परमेश्वरे टेच कुराको वारोला। परमेश्वरे दाऊदके बाचा जाट्मो लेकाङ की होच्यौ सन्तानीङ ज काट #भजन १३२:११; २ शमू ७:१२,१३ दाऊद ढीन्च ज राजा खास्लेको। 31हटै दाऊदे पहीला ज पापीङ बचडीच ख्रीष्ट सीनीसीङ फेरी ज जीवालेको टेच कुरा वार्मो लेया। हटै ख्रीष्टौ बारेयाङ इट टेया,
‘परमेश्वरे होस्कोके सीचकोके डाच ठावाङ माडास्काङ,
हटै होस्कुङ सीच शरीर ड माघेरेला।’
32इसै येशूके ज परमेश्वरे सीठइङ फेरी जीवाट्काङ टेच कुरौ कान पट्टको साक्षी लेमोनीङ। 33परमेश्वर बाबैये येशूके उच्च जाट्मो मेकुङ डोर हुटलाक डामोलेको हटै मेकोइ जाट्च बाचा अनुसार होस्कोके पवित्र आत्मा याहाकाङ। होसै पवित्र आत्मा ज येशूये इन्नाङ कानटाक याहामोलेको हटै जुन कुरा चहीन्या नाक्कोइ सेमो हटै डाङ्मोज नाल्नीस। 34-35दाऊद स्वर्गाङ मानुङा, टेहाङ ड होचे इट टेया,
‘परमप्रभुये ङौ प्रभुके इट टेकाङ,
“जब सम्म ङै नोङो शत्रुकोके माजुट्लाङ
हटै नोङो अधिनाङ माडालाङ,
तब सम्म ङौ डोर मीहुटलाक मुन।”’#भजन ११०:१
36होट छान्नाङ अब इस्राएलाङो भर्मीकोइ इसै कुरा वार्के परीस्ले, नाक्कोइ क्रुसाङ चेलोक्मो साट्च येशूके ज परमेश्वरे प्रभु हटै पापीङ बचडीच ख्रीष्ट खास्काङ।”
37पत्रुसे टेच इसै कुरा सेनीसीङ होसोकुङ गीन छिया-छिया छाना। हटै होसोकोइ पत्रुसके र अरु प्रेरितकोके, “ए डाजी-भयाको, होट टेहाङ काने अब ही जाटीङ ट?” टेमो गीना।
38हटै पत्रुसे, “नाक्को पट्टकोइ नाक्कुङ पापो क्षमा डीहीन्के लागी पाप जाट्के डास्मो परमेश्वरलाक ल्हेस्मो येशू पापीङ बचडीच ख्रीष्टौ म्यार्मीनाङ बप्तिस्मा लानीस। हटै नाक्कोइ परमेश्वरो दान— पवित्र आत्मा डीहीन्डनीस। 39इसै बाचा नाक्कुङ लागी, नाक्कुङ सन्तानकुङ लागी हटै लोस-लोस लेचकुङ लागी आला हटै ज-जसके कानुङ परमेश्वरे एट्लेको होसोकुङ लागी आला” टेया।
40पत्रुसे अरु ढलीङ कुराको टेमो चेतावनी याहा हटै होसोकोके सम्झडीमो, “इसै दुष्ट पुस्ताकोटाक परीस्स दण्डइङ नाक्कोइ मे-मेल्लाके जोगडीनीस” टेया। 41हटै ज-जसे पत्रुसे टेच कुराङ विश्वास जाटा होसोकोइ बप्तिस्मा ला हटै होसै दिनाङ ज येशूवाङ विश्वास जाट्च सोम हजार भर्मीको थप्डीसा। 42होसोकोइ लगातार प्रेरितकोटुइङ पाहाके, संगति जाट्के, कठै ज्याके हटै प्रार्थना जाट्के जाटाला।
प्रभु येशूवाङ विश्वास जाट्चकुङ जीबन
43हटै प्रेरितकोइ शक्तिशाली र अचम्मावो ढलीङ काम जाट्मो चिन्हको टनाक्नाङ पट्ट भर्मीको अचम्म छाना। 44प्रभुके विश्वास जाट्चको सधैँ कठा ज डुपोला। हटै होसोकुङ पट्ट कुराको साझा लेया।#प्रे ४:३२-३५ 45हटै होसोकोइ मेक्कुङ सम्पत्तिको आर्लामो जसके अभाव छानाला होसोकोके पुङ्मो याहाला। 46होसोको दिन-दिनै मन्दिरो आर्भाङ जम्मा छानाला। हटै मराङ्मो खाट्मो काटै गीनाङो छान्म पट्ट इम-इमाङ कठै जेवला। 47हटै होसोकोइ सधैँ परमेश्वरो प्रशंसा जाटाला। अरु भर्मीकोइ र होसोकोके जाकाला। होसोकुङ समूहाङ प्रभुये उद्धार डीहीन्चकुङ सङ्ख्या दिन-दिनै थप्डीमो याहाल्काङ।
© 2024 (Active), Mother Tongue Translators Society and Wycliffe Bible Translators, Inc. All rights reserved.