Rom 11
11
God kokhoniza Israel
1Eume, rei kaina ke fapalu ghuhnani. Ihna, God gne nginginira noa nanoni thaigna re gnea? The'o lui! Rei gne kahe maegu Israel, eigna rei neke kahra mei ka vikegna Ebraham ni ka vikegna mae Benjemen. 2God theome tangomana te nginginira noa nanoni teke kulu fafate thaigna tifa re. Ghotolu laseza hui thuturigna mae Elaeja ka i'ini te blahi ia, magne neke di'atagnara nanonidi Israel re ne lepo eu'ani ka God, 3“Lod, hatimare la falemera nou mae profetre, ni re'o sorura hui nou oltare. Kahe rei lana te kahra te au te mala tufru sorugho ie, ni hatimare eulanauwa ngagura te falemeghau rei.”#11:3 1 Kings 19:10,14. 4Euwateuwe, God ne ho'ilepo eu'ani, “The'o, rei au fitu thogha mae au na au, te theome tufru soruza mumuzu god Bal ie.”#11:4 1 Kings 19:18. 5Jateula teuwae eu gignoa igne, keha nanonini lana te au na te au re, ihei God teke kulu fafatera ka noa kokofakasa ie. 6Magne neke theome fafatera gnadi gloku te keli teke eira hatimare re, ni ka noa kokofakasa harira lana euwa. Eigna jame fatera magne ka nodi gloku te kelire meuwe, noa kokofakasa God ie kaina the'o nafugna lana.
7Igne gaoghathogna ie, nanonidi Israel re theome deiza lana nabrau te mala au kohlo ka nathagna God ie, neubane fariuriu lui hatimare mala hiroza nabrau te mala au kohlo ie. Eigna God neke faninigrana harira te mala farogo hatimare ka goeghozegna re. Ni keha nanonidi kohlo lana Israel teke fafate God te kofudeiza nabrau te kohlo ie. 8Jateula teke kulu lepoza ka u i'ini te blahi ia,
“God ne faromo gaoghathodire mala theome ghaoghatho fakeli hatimare.
Mei dufu gignoa igne ie, nathadire theome tangomana te kokofu fakeli,
euwateuwe, khulidire theome tangomana te farogo fakeli ie.”#11:8 Diutronomi 29:4; Aesaea 29:10.
9Ni mae Devet eulanauwa neke lepo eu'ani gnadi noa mae naokare,
“God, rei ngagughaugho ghoe te sagura mae ire,
kate hokro hneahnegha te'au hatimare ka nodi ngahngamure.
Rei ngagughaugho ghoe te fa'uthura ni tapla faparira euwa.
10Faroromo nathadire mala theome kokofu hatimare,
ni fapaapara ra kate fatufrura ghoe ka hnugru te au ka phogrudi re.”#11:10 Sam 69:22,23.
11Eume te ghuhnaza rei ie, “Ihna, tela uthu fadi'a hui mae Jiure, igne gaoghathogna ie hatimare na di'a fatheve hui lana?” The'o lui! Ni eigna te eifadi'a hatimare ie, God neke fakahrira ihei te theome Jiure mala gogotu mae Jiure ka hatimare. 12Tutu'ani, eigna te eifadi'a mae Jiure, God ne gumei chuku goifata te keli ka nanonigna nauthoglu gne. Ni eigna te jifla kokoza hui hatimare puhigna God ie, God ne gulao fablahi te keli ka ihei te theome Jiure. Eume, kate pulo mei ka God te hui nanonidi Jiure, chuku goifata te keli tulao kaina mei dufighita tati te hui ka nauthoglu gne.
God fakahrira ihei te theome Jiu
13Gignoa igne ie, rei lepo ka ghotolu ihei te theome Jiura. Rei ghatho boheza nogu gloku ie, eigna God ne fafateghau ni kurighau eu rei mala loku ka ghotolu ihei te theome Jiure. 14Rei toghoghamu, eigna rei ngagughaura mae kheragu Jiure te gogotu ka ghotolu, mala tangomana keha nanoni ka hatimare te mei ka God mala fakahrira. 15Eigna kate figri famanga God ka gheati mae Jiure, keha nanoni ka nauthoglu gne tangomana te mei kheragna God ie. Kaina jateula hna eu kate keli tagna God ka mae Jiure? Hatimare kaina jateula teke kahra fapulo ka gleme ia euwa! 16Jame te kulu faafara lao tati khata naphile bereti ka God ie, u bereti thaudolugna teuwae la noa hui God. Jame glathigna kahe gazu ie noa God, gratagnare kaina eulanauwa noa hui magne.
17Ghathoza lepo naba igne. Mae Jiu re jateula tufuni gazu oliv euwa. Euwateuwe, ghotolu mae ihei te theome Jiure jateula gratagna gazu oliv ka nathu'a ia euwa. God la kulu rave koko hui keha grata ka tufuni gazu oliv ie, mala salofaudughamu hui ke kaheni ka tufuni gazu oliv ie. Eume, gignoa igne ie ghotolu keli nomi la athiza hui fablahi te jifla mei ka hatimare mae Jiure. 18Eume, tovi kofu faparira mae Jiure jateula grata tela rave koko huira euwa. Eigna ghotolu grata neke salofaudu mei ke leghu, theome thokagna te gulao kahra ka glathigna gazu ie, ni glathi gne nate gu'ari nakahra ka ghotolu ie. 19Ghotolu kaina lepo eu'ani, “Uve, ni God neke rave koko grata teuware mala au nomi chogho gheati ka tufuni gazu oliv ie.” 20Teuwae tutu'ani lui. Ni God neke rave koko grata teuware, eigna hatimare neke theome fatutu'aniza Jisas. Euwateuwe, ghotolu gignoa igne mei la kahe hnimotogna tufuni gazu oliv gne, eigna ghotolu ne fatutu'ani. Eume, ghotolu tovi fahaehagheghamu gna igne, ni koikofighamuni euwa. 21Eigna neubane hatimare tufuni gratagna gazu oliv gne, God theome sakrera mala kaheni balumi ghotolu, eigna hatimare theome fatutu'ani. Ihna, gaoghathomi ghotolu ie God kaina sakreghamu au lana ghotolu maku ka tufuni gazu ie eume theome fatutu'ani ghotolu ie? The'o!
22Ghathoza sonighotolu, God gne tufuni mae keli lui, ni magne tangomana te fateghita lanauwa tati. Magne fatera ihei te theome leghuza puhignare, ni magne keli lui ka ghotolu, eigna ghotolu ne leghuza puhigna magne ie. Ni jame theome leghuza ghotolu igne ie, magne kaina eulanauwa rave kokoghamu ghotolu. 23Euwateuwe, jame funu fatutu'ani mae Jiure, God kaina salofaudura mala kaheni ka gazu oliv gne ka teke kulu au hatimare re. Eigna God au noilaghi te mala ke salofaudu fapulora mae Jiure mala ke kaheni fapulo ka tufuni gazu oliv ie. 24Meuba ghotolu neke jifla mei ka gazu oliv gna nathu'a, God la salofaudughamu hui la mei philegna tufuni gazu oliv gne. Tutu'ani, tufuni ninigrana lui grata gazu nathu'a ie te mala salofaudu mei te kaheni balugna tufuni grata gazu ie. Ni tufuni bluse lui hariza God te mala salofaudu fapulora mae Jiure ka tufuni gazu oliv ie, eigna hatimare tufuni gratagna tutu'ani gazu oliv ie.
God kokhonira nanoni te hui re
25Uve kheragura, rei ngagughau te tufuni laseza ghotolu puhi bi'o te polo igne, eigna puhi te polo igne kaina toghoghamu mala theome fahaehaghe ghotolu. Puhi teugne eu'ani, God kaina fapatugama ra gnagnafadi mae Jiure ghile dufiza miolo pulodi te hui ka God ihei te theome Jiu teke kulu fafate hui magne re. 26Ni ka teuwae, God kaina fakahrira hui nanonidi Israel re, jateula te lepoza ka u i'ini te blahi ie.
“Mae fakahra te mala fakahrira nanonire kaina jifla mei Zaeon.
Magne kaina atha koko u puhi di'a te hui ka vikegna mae Jekop re.
27Ka teuwae, rei kaina e'ei kahe na'alepo baludi hatimare,
te rei kaina atha koko nakhibodi hatimare re.”#11:27 Aesaea 59:20,21; 27:9; Jeremaea 31:33,34.
28Eigna mae Jiure ne tho'anodiza u Grorogo te Keli ie, hatimare noa naoka God. Euwateuwe, igne toghoghamu ghotolu ihei te theome Jiure. Ni eigna noa na'alepo teke ulu eiza magne ka mae ku'edi mae Israel ra, God ne nahmara lui ihei magne teke fafatera re. 29Eigna God theome tangomana te ho'i gnagnafagna ie ka ihei teke fafatera ni fablahira teure. 30Tifa ie, ghotolu neke theome leghuza God, ni gignoa igne ie God kokhonighamu ghotolu, eigna mae Jiure tho'anodi leghuza magne. 31Neubane theome leghuza God mae Jiure gignoa igne, God kaina ke kokhonira ni nahmara jateula te eiza magne ka ghotolu gignoa igne. 32Eigna God gne neke sakrera nanoni te hui re mala huhughuza fatheve mala tangomana magne te kokhonira ke leghu ie.
Lepo fakeliza God
33Tutu'ani lui, God gne keli harira nanoni te hui re!
Noa glalase magne ie fua bi'o lui ni gaoghatho gna magne ie behra lui!
Tati theome tangomana te kofu falaseza gaoghathogna God ie,
tati theome tangomana te ghatho dufira puhigna magne re!
34Jateula te lepoza ka i'ini te blahi ie,
“Ihei te laseza gaoghathogna Lod ie?
Ihei te tangomana fagriuza magne ie?
The'o kahe nanoni.”#11:34 Aesaea 40:13.
35“The'o kahe nanoni te gulao kahe goifata ka God ie,
malani ke tusu fapulo God ka magne teuwe.”#11:35 Job 41:11.
36Uve, God teke vuavuha gobigna goifatare,
ni gobigna goifatare ne kegra ka noa noilaghi magne,
euwateuwe, gobigna goifatare noa lanauwa magne.
Tati kilo uluza God, tifa e tifa! Amen.
© 2025 SIL Solomon Islands