Kalinlinima 34
34
Tiŋgbɔŋ maa tintarisi
1Ka Yawɛ daa yɛli Musa: 2Zalim’ Izraɛlnim’ zaligu. Yɛlim’ ba, yi yi ti paai Keenan tiŋgbɔŋ maa ni, Keenan tiŋgbɔn shɛli n ni yɛn zaŋ tin ya maa tintarisi n-yɛn bɔŋɔ, 3Nudirigu polo tintariga yɛn zaŋla Zin mɔɣu ni m-baɣisi Ɛdom tintariga chaŋ, ka yi tintariga piligu shee yɛn nyɛla Teeku Kpiŋ wulimpuhili polo. 4Ka yi tintariga maa ni ŋmaligi nudirigu polo n-zaŋ ti paai Akirabim kunkuni n-zaŋ ti gari Zin, ka di tariga ni nyɛla Kadɛshibarinia nudirigu polo; ka zaŋ nimaani hal ni Hazarada n-gari hal ni Azimɔn. 5Ka di tintariga maa lan ŋmaligi Azimɔn maa n-zaŋ hal ni Ijipti kulibɔŋ ni m-mali lala hal ni teeku ni.
6Wulinluhili polo tintariga yɛn nyɛla Mɛditirɛniɛn Teeku duli. Yi wulinluhili polo tintariga n-yɛn bala.
7Yi nuzaa polo tintariga vulo yɛn zaŋla Mɛditirɛniɛn Teeku duli hal ni Hɔr Zoli gbini. 8Ka yi lan zaŋ di vulo maa yi Hɔr Zoli maa gbini hal ni Lɛbohamat samban’ ni, ka di tintariga naabu shee yɛn nyɛla Zɛdad. 9Di nyaaŋa di tintariga maa ni lan zaŋ hal ti paai Zifurɔn, ka di tariga ni nyɛla Hazarɛnan; yi nuzaa polo tintariga n-yɛn bala.
10Yi wulimpuhili polo tintariga vulo yɛn zaŋla Hazarɛnan hal ni Shɛfam. 11Ka tintariga maa ni yi Shɛfam maa n-zaŋ hal ni Ribila din be Ain wulimpuhili polo la, ka tintariga maa ni lan zaŋ chaŋ hal ti paai Kinɛrɛt#34.11 KINƐRƐT: Dimbɔŋɔ mini Galili nyɛla zaɣ’ yini. Teeku din be wulimpuhili polo la naɣiliŋga ni. 12Ka tintariga maa ni lan kpuɣi ni n-zaŋ hal ni Jɔɔdɛn Mɔɣili ni, di tariga yɛn nyɛla Teeku Kpiŋ ni. Yi tiŋgbɔŋ maa mini di tintarisi din gil’ li m-bala.
13 #
Kal 26.52-56
Ka Musa daa yɛli Izraɛlnima, “Tiŋgbɔn shɛli yi ni yɛn pihi kuɣa sɔŋ lihi nya ka piri ti tab’ maa m-bɔŋɔ. Dina ka Yawɛ daa yɛli ni o ni zaŋ li ti zuliya awɛi ni pirigili la. 14Dama Rubin zuliya mini Gaad zuliya ni Manaasa zuliya pirigili la niriba daa pun deei bɛ tarili. 15#Jɔsh 14.1-5 Zuliya ayi ni pirigili maa daa pun deei bɛ tarili ka di be Jɔɔdɛn Mɔɣili duli zaŋ lab’ Jɛriko wulimpuhili polo.”
Toondaannim’ shɛb’ bɛn yɛn piri tiŋgbɔŋ maa tari
16Ka Yawɛ daa yɛli Musa, 17“Ninvuɣ’ shɛb’ bɛn yɛn piri tiŋgbɔŋ ŋɔ tin ya ka yi su li yuya m-bɔŋɔ: Maligumaana Ɛliɛza mini Nan bia Jɔshua. 18Piimiya zuliya kam ni toondaan’ yino ka bɛ pahi piri tiŋgbɔŋ maa ti ba ka bɛ su li. 19Niriba maa yuya m-bɔŋɔ: Juda zuliya ni toondana n-nyɛ Jɛfune bia Kalɛb. 20Simiɔn zuliya ni toondana n-nyɛ Ammihul bia Shɛmuɛl. 21Bɛnjamin zuliya ni toondana n-nyɛ Chisilɔn bia Ɛlidad. 22Dan zuliya ni toondana n-nyɛ Jɔgili bia Buki. 23Yisifu zuliya ni, Manaasa zuliya ni toondana n-nyɛ Ɛfɔd bia Hanniɛl. 24Ifriim zuliya ni toondana n-nyɛ Shifitan bia Kɛmuɛl. 25Zɛbulɔn zuliya ni toondana n-nyɛ Parinak bia Ɛlizafan. 26Isaka zuliya ni toondana n-nyɛ Azan bia Palitiɛl. 27Asha zuliya ni toondana n-nyɛ Shalomi bia Ahihud. 28Naftali zuliya ni toondana n-nyɛ Ammihud bia Pɛdahɛl.” 29Niriba ŋɔ ka Yawɛ daa zali Keenan tiŋgbɔŋ ni ni bɛ piri tiŋgbana maa tari Izraɛlnima ka bɛ su li.
Red Letter Dagbani Bible © Bible Society of Ghana, 2011