Matayo 8
8
Yesu akalamaya omuhaga
(Mk 1.40-45; Lk 5.12-16)
1Neryo Yesu mwandagala akalũa oko kitwa, nʼesyondeko nene mosyamukwama. 2Neryo lebaya, omuhaga mwamũhĩkako, neryo mũnama embere siwe erĩmũramya ati, Mukama, wamabya ũnanzĩre, wangatoka erĩnyĩlamya. 3Yesu mwakakya ebyala biwe mwamũtũlako ati, Nyĩnanzĩre, ũlamĩbawe! Neryo-neryo ebihaga biwe mobyalamĩbwa. 4Neryo Yesu mwamubwira ati, Subwire mundu, nĩkwa ugende ũyĩkanganaye oko mũhererĩ, kandi uhere obuhere obo Musa ahamula, busana nʼerĩmĩnyĩsyabo ko wabirilama.
Yesu akalamaya omugombe wʼAbaroma
(Lk 7.1-10)
5Neryo omugulu ingira eKapernaũmũ, omukulu wʼabasĩrĩkanĩ wʼAbaroma mwahĩndana naye, mwamulemba-lemba ati, 6Mukama, omugombe wage ali eka alwere obũkonĩ bwʼeribasa, kandi akagalawa kutsibu. 7Yesu mwamubwira ati, Ngandiyayo nʼerĩyamũlamya. 8Nĩkwa omukulu wʼabasĩrĩkanĩ mwamũsũbĩrya ati, Mukama, sinyitolere ũkahĩka omwage, nĩkwa ũbũge ekĩnywa kisa, nʼomugombe wage akandĩlamĩbwa. 9Nage nibya indi mundu oyuwite abakanyihamula, kandi ngwite abasĩrĩkanĩ bage; ngabwira oyũ nyiti, Ugende, iniagenda; kandi ngabwira ogundi nyiti, Wase, iniasa; kandi ngabwira omugombe wage nyiti, Ukole ekĩ, iniakoiakyo! 10Neryo omugulu Yesu owa ekĩ, mwasweka, neryo mwabwira abandu abamukwama ati, Kwenene ngabũga nenyũ nyiti, Sinditabana erĩkĩrĩrya ĩnene ngʼerĩ omo Baĩsraelĩ. 11Kandi ngababwira nyiti, abangi basyalũa eyo eryuba likahulukira nʼeyo eryuba likalengera, basyĩkala oko mesa haguma na Abrahamũ, na Ĩsaka, na Yakobo, omo Bwami bwʼelubula. 12Nĩkwa abana bʼobwami basyaguswa omo mwĩrĩmya wʼeyĩhya; eyo hasyabya eririra nʼerikeregeta ameno. 13Neryo Yesu mwabwira omukulu wʼabasĩrĩkanĩ oyo ati, Ugende, ukolerawe ngoko wabĩrĩkĩrĩrya. Nʼomugombe wuwe mwalamĩbwa oko ndambĩ eyo.
Yesu akalamaya bandu bangi
(Mk 1.29-34; Lk 4.38-41)
14Yesu abere ahĩka ewa Petero, neryo mwalangira nyĩnyĩ-byala wa Petero iniali omo ngingo inialwere erĩhũhana lyʼomubiri. 15Neryo Yesu mwatũla oko byala biwe, nʼerĩhũhana eryo molyamũlũako, neryo mwahangana mwatsũka erimukolera.
16Neryo bwabere bwabya ĩgolo-golo, abandu mobaletera Yesu yʼabandi abali kwʼesyombĩnga Nĩkwa Yesu mwahiga ebĩrĩmũ bibi ebyo omo kĩnywa kisa, mwalamya abosĩ ababya balwere. 17Mwakola ebĩ erĩberererya ebyabũgawa nʼomũmĩnyererĩ Ĩsaya, ati, Iye ĩyowene mwĩmya amagalĩ wetu, kandi mwaheka esyondwala syetu.
Abasonda erikwama Yesu
(Lk 9.57-62)
18Neryo omugulu Yesu alangira endeko iyabirimũtĩmbako, mwahamula erisokera eyisirya wʼengetsi. 19Neryo omũkangĩrĩrya muguma wʼEmigambo mwamũhĩkako, mwamubwira ati, Mũkangĩrĩrya, nasyakukwama ehosĩ eyo ukandisyagenda. 20Nĩkwa Yesu mwamubwira ati, Esyoboha siwite ebyũna, nʼesyonyonyũ syʼomo kyanya siwite esyonyutu, nĩkwa Omugala wʼomundu siawite aho angagotserya omutwe wuwe. 21Nʼogundi mwiga mwamubwira ati, Mukama, uleke ngatsũka eriyata tata wage. 22Nĩkwa Yesu mwamubwira ati, Unyikwame. Uleke abaholĩ bate abaholĩ babo.
Yesu akahũneraya ekihunga
(Mk 4.35-41; Lk 8.22-25)
23Neryo Yesu abere ingira omo bwato, abiga buwe mobamukwama. 24Neryo ekihunga kinene mokyahuluka omo ngetsi, kyaleka ebisunda ĩbyakũnĩnga obwato. Nĩkwa Yesu abya agotsere. 25Neryo abiga mobahĩka uku Yesu, mobamũbũkya bati, Mukama, ũtũlamaye! Tukahwa! 26Neryo Yesu mwabwirabo ati, Busana nakĩ mukubaha kwehĩ? ĩnywe bandu bʼerĩkĩrya ĩke! Neryo Yesu mwahangana, mwakunga ekihunga nʼengetsi, neryo mohahita esĩsyerere. 27Neryo abandu mobasweka bati, Omundu oyũ ni wa mũsĩndokĩ kwehĩ? Ekihunga nʼengetsi bikamukenga!
Yesu akalamaya oko bandu babiri kwʼesyombĩnga
(Mk 5.1-20; Lk 8.26-39)
28Neryo Yesu mwahĩka eyisirya wʼengetsi omo kihugo kyʼAbagerase. Nĩkwa abandu babiri abali kwʼesyombĩnga mobahĩndana na Yesu ĩbakalũa eyiri amasinda. Babya kakalĩre kutsibu isihali mundu oyukatoka erilaba omo nzira eyo. 29Neryo lebaya, abandu abo mobalaka bati, Tuli na mwatsi wahi nawe, uwe Mugala wa Nyamuhanga, kwehĩ? Ũkahĩka hano erĩtwagalya embere wʼomugulu kwehĩ? 30Neryo hakũhĩ nʼaho habya ekihangulo kyʼesyongulube nyingi isikalya ebiti. 31Esyombĩnga esyo mosyalemba-lemba Yesu siti, Wamabya ukandituhigira eyĩhya, ututume omo kihangulo kyʼesyongulube. 32Neryo Yesu mwabũga nasyo ati, Mugende! Nasyo mosyalũa kubo, mosyaya omo syongulube, neryo ekihangulo kyosĩ mokyatibita ahasenzere omo ngetsi mosyaholera omo magetsi.
33Neryo abalĩsya mobatibita, mobaya oko mũyĩ, mobatũla omwatsi gosĩ, nʼomwatsi wʼabandu ababya kwʼesyombĩnga. 34Neryo abandu bosĩ bʼoko mũyĩ oyo mobayahĩndana na Yesu; nʼomugulu bamulolako mobamulemba-lemba bati, alũe omo kihugo kyabo.
Attualmente Selezionati:
Matayo 8: KB80
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Bible in Kinandi © Bible Society of the Democratic Republic of Congo, and Bible Society of Uganda, 1980.