Matayo 3
3
Erĩkangĩrĩrya lya Yoane Mũbatĩsya
(Mk 1.1-8; Lk 3.1-18; Yn 1.19-28)
1Oko biro ebyo Yoane Mũbatĩsya mwahĩka, iniakatũlaganaya omwatsi omo mbwarara yʼeYũdea, ati, 2Mubindule emitima yenyũ erireka ebibi, kusangwa obwami bwʼelubula buli hakũhĩ! 3Yoane yo mundu oyo mũmĩnyererĩ Ĩsaya ahula ati,
Omulenge wʼoyukabirikirira omo mbwarara ati,
Mowanaye enzira yʼomukama,
Mũtũngananaye esyombalu siwe!
4Esyongimba sya Yoane syabya syʼobweya bwʼengamia, kandi mwambala omukoba wʼekihu omo mbindi yiwe, kandi iniakalya esyongĩke nʼobuki bwʼomolĩ. 5Abandu mobahĩka uku Yoane ĩbakalũa eYerũsalema, nʼeYũdea hosĩ, nʼebihugo bĩhererenĩe nʼeYorodanĩ. 6Mobakangya ebibi byabo, neryo Yoane mwabatĩsyabo omo lũsĩ lwʼeYorodanĩ.
7Neryo Yoane abere alangira Abafarĩsayo nʼAbasadũkayo bangi bakahĩka busana nʼerĩbatĩsĩbwa, mwabwirabo ati, Ĩnywe bana bʼesyonzoka, nindi wabahana erisaga erikarama erĩkandĩsyahĩka kwehĩ? 8Mukole emĩbĩrĩ eyikaleka abandu ibaminya ko mwabiribindula emitima erireka ebibi byenyũ. 9Sĩmũganĩraye mukayibwira muti, Abrahamũ ni tata wetu. Ngababwira nyiti, Nyamuhanga angatoka erĩhanganĩa amabwe aya mo bana busana na Abrahamũ. 10Kandi embasa ĩnĩkĩrye oko mĩrĩhĩ yʼomuti. Obuli muti owatehetaya ebĩgũma byowene akakondawa nʼeriguswa omo muliro. 11Nĩkwa ĩngye ngababatĩsaya omo magetsi erĩkangya ngoko mwabiribindula emitima yenyũ erireka ebibi; nĩkwa oyukandisyasa enyũma kwĩngye asyababatĩsya omo Mũlĩmũ Abũyĩrĩre nʼomo muliro. Kandi anyĩrengĩrye maka, nage sinyitolere erimuhekera esyongendero siwe. 12Omũhũmbo wuwe ali omo byala biwe erĩhũmbĩra engano omo kibuga kiwe nʼerĩhĩra engano yiwe omo kigona, nĩkwa asyahĩsya omusunga omo muliro owatehumbera.
Erĩbatĩsĩbwa lya Yesu
(Mk 1.9-11; Lk 3.21-22)
13Neryo Yesu mwalũa eGalĩlaya mwahĩka oko Yorodanĩ, mwasa uku Yoane erĩbatĩsĩbwa. 14Nĩkwa Yoane mwalenga erĩmũganĩa, ati, Ĩngye nyitolere erĩbatĩsĩbwa nawe, kandi ũkanyĩhĩkako kwehĩ? 15Nĩkwa Yesu mwamũsũbĩrya ati, Ũnyĩrĩgĩre lino. Kusangwa omo nzira eyĩ litolere ĩtwaberererya ebitunganene byosĩ bya Nyamuhanga. Neryo Yoane mwalĩga.
16Neryo Yesu abere abĩbatĩsĩbwa, mwalũa omo magetsi. Neryo olubula molwakingukala busana naye, neryo mwalangira Omũlĩmũ wa Nyamuhanga akandagala ngʼakalĩkũkũ, nʼerĩmwĩkĩrako. 17Neryo omulenge mwalũa elubula ati, Oyũ ni Mugala wage mwanze, namamutsemera ndeke.
Attualmente Selezionati:
Matayo 3: KB80
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Bible in Kinandi © Bible Society of the Democratic Republic of Congo, and Bible Society of Uganda, 1980.