ܡܓܰܠܝܘܢ ܕܠܘܩܐ 21
21
ܬܪܶܝ ܦܶܠܣ̈ܶܐ ܕܺܗ̄ܝ ܐܰܪܡܰܠܬܳܐ
ܡܪܩܘܣ 12:41‐44
1ܘܚ݄ܪ ܠܶܗ ܝܶܫܽܘܥ ܒܰܥّܰܬܺܝܪ̈ܶܐ ܕܡܰܚܬܺܝ ܗ̄ܘܰܘ̱ ܗ̄ܰܩّܽܘܪ̈ܒܳܢܰܬّ̥ܶܗ ܒܽܗ̄ܘ ܒܶܝܬ̥ ܓܰܙܳܐ (ܨܰܢܕܽܘܩܳܐ ܕܽܗ̄ܘ ܗܰܝܟܠܳܐ). 2ܘ݄ܚܙܶܐ ܠܶܗ ܣܬܶܝ ܚܕ̥ܳܐ ܐܰܪܡܰܠܬܳܐ ܡܶܣܟܶܢ̱ܬܳܐ ܕ݄ܡܚܰܠܰܩ ܠܰܗ ܬܪܶܝ ܦܶܠܣ̈ܶܐ، 3ܘܐܡ݄ܪ ܠܶܗ: ”ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܗ̄ܺܝ ܐܰܪܡܰܠܬܰܬ̥ܶܐ ܗ̄ܺܝ ܡܶܣܟܶܢ̱ܬܳܐ ܡܰܚܰܬ ܠܰܗ ܙ݄ܕ ܡܶܢ̱ ܟܽܘܠ ܢܳܫܳܐ، 4ܥܰܠ ܕܰܗ̄ܢܺܝ ܟܽܘܠّܶܗ ܡܽܗ̄ܘ ܡܶܕܶܐ ܙܳܝܽܘܕܳܐ ܕܟ݄ܬّܶܗ ܡܰܚܰܬّܶܗ ܒܽܗ̄ܘ ܒܶܝܬ̥ ܩܽܘܪܒܳܢܳܐ ܕܰܐܠܳܗܳܐ، ܐܶܠܳܐ ܗܰܬ̥ܶܐ ܡܺܗ̄ܝ ܣܢܺܝܩܽܘܬ̥ܰܝܕܰܗ، ܟܽܘܠ ܡܶܕܶܐ ܕܟ݄ܬ ܗ̄ܘܰܝ ܠܰܗ ܡܰܚܰܬ ܠܰܗ.“
ܗ̄ܽܘ ܚܪܳܒ̥ܳܐ ܕܽܗ̄ܘ ܗܰܝܟܠܳܐ
ܡܬܝ 24:1‐2؛ ܡܪܩܘܣ 13:1‐2
5ܘܺܗ̄ܝ ܢܰܩܠܐ ܕܢܳܫ̈ܶܐ ܐ݄ܡّܺܪ̱ܝ ܗ̄ܘܰܘ̱ ܥܰܠ ܗ̄ܽܘ ܗܰܝܟܠܳܐ ܕ݄ܒܟܶܐܦ̈ܶܐ ܫܰܦܺܝܪ̈ܶܐ ܘ݄ܒܩܽܘܪ̈ܒܳܢܶܐ ܡܫܰܦܪܳܐ ܝܳܐ، ܝܶܫܽܘܥ ܐܡ݄ܪ ܠܰܗ ܠّܶܗ: 6”ܗܰܢܺܝ ܕ݄ܟܚܳܙܺܝܬܽܘ، ܓܕܳܐܬ̥݄ܢ ܝܰܘܡ̈ܶܐ ܕܠ݄ܐ ܓܦܰܝܫܳܐ ܟܶܐܦܳܐ ܥܰܠ ܟܶܐܦܳܐ ܕܠܳܐ ܢܳܦܠܳܐ.“
ܗ̄ܺܝ ܚܰܪܰܝܬܳܐ ܕܽܗ̄ܘ ܥܳܠܡܳܐ
ܐܰܝܢܰܐ ܢܶܝ ܗ̄ܰܢ ܐܳܬ̥ܘ̈ܳܬ̥ܳܐ ܕܽܗ̄ܘ ܚܪܳܒ̥ܳܐ
ܡܬܝ 24:3‐14؛ ܡܪܩܘܣ 13:3‐13
7ܘ݄ܡܫܰܐܺܠܺܝ ܗ̄ܘܰܝ ܠܶܗ ܘ݄ܐܡّܺܪ̱ܝ ܗ̄ܘܰܘ̱: ”ܡܰܠܦܳܢܳܐ، ܐܶܡܰܐ ܗܰܢܺܝ ܓܕܳܗ̄ܘ݄ܢ؟ ܘܡ݄ܢܝܳܐ ܝܳܐ ܗ̄ܺܝ ܐܳܬ̥ܳܐ ܕܺܗ̄ܝ ܢܰܩܠܐ ܕܩܳܪܒ̥ܺܝ ܗܰܢܺܝ ܕܳܗ̄ܘ݄ܢ؟“ 8ܘܗܺܝّܶܗ ܐܡ݄ܪ ܠܰܗ ܠّܶܗ: ”ܦܬܰܚܽܘ ܥܰܝܢ̈ܳܬ̥ܰܝܟ̥ܽܘ ܕܢܳܫܳܐ ܠܳܐ ܡܰܛܥܰܠܟ̥ܽܘ، ܥܰܠ ܕܓ̥ܰܠܰܒܶܐ ܓܕܳܐܬ̥݄ܢ ܒ݄ܐܫܡܺܝ ܘ݄ܐܡّܺܪ̱ܝ: ’ܐܳܢܳܐ ܐ̱ܢܳܐ ܡܫܺܝܚܳܐ، ܘܩܰܪܽܒ̥ ܗ̄ܽܘ ܙܰܒܢܳܐ،‘ ܠ݄ܐ ܐܙّܳܟ̥ܽܘ ܒ݄ܬ̥ܪܰܝّܶܗ. 9ܘܡ݄ܐ ܕܫܳܡܥܺܝܬܽܘ ܚܰܪ̈ܒܶܐ ܘ݄ܫܓ̥ܽܘܫܝ̈ܶܐ ܠܳܐ ܙܰܝܥܺܝܬܽܘ، ܡܺܐܝܕ̥ܶܗ ܕ݄ܓܕܳܗ̄ܘ݄ܢ ܗܰܢܺܝ ܒܺܗ̄ܝ ܩܰܕ̱ܡܰܝܬܳܐ، ܐܶܠܳܐ ܗܶܫ ܠܳܐ ܡܰܛܝܳܐ ܗ̄ܺܝ ܚܰܪܰܝܬܳܐ. 10ܡܺܐܝܕ̥ܶܗ ܕܥܰܡܳܐ ܓ݄ܕܩܳܝ݄ܡ ܥܰܠ ܥܰܡܳܐ، ܘܡܰܡܠܰܟ̥ܬܳܐ ܥܰܠ ܡܰܡܠܰܟ̥ܬܳܐ، 11ܘܙܽܘ̈ܠܙܳܠܶܐ ܪ̈ܰܒܶܐ ܓܕܳܗ̄ܘ݄ܢ ܒܕ̈ܽܘܟܳܬ̥ܳܐ ܕܽܘ̈ܟܳܬ̥ܳܐ، ܘܟܰܦܢ̈ܶܐ ܘܟܶܐܒ̥̈ܶܐ ܕܽܗ̄ܘ ܡܰܘܬܳܐ، ܘܙܽܘܥܬ̥ܳܐ ܘܬܶܪܥܺܝܠܳܐ، ܘܳܐܬ̥ܘ̈ܳܬ̥ܳܐ ܪ̈ܰܒܶܐ ܡܺܗ̄ܝ ܫܡܰܝܳܐ ܓܡ݄ܚܙ݄ܢ، ܘܣܰܬ̥ܘ̈ܶܐ ܩܰܫܝ̈ܶܐ ܓܕܳܗ̄ܘ݄ܢ.
ܣܰܝܦܳܐ ܘܥܺܝܩܽܘܬ̥ܳܐ
12”ܘܡܶܩ݄ܕ̱ܡ ܡܰܗ̄ܢܺܝ ܟܽܘܠّܶܗ، ܓܨܰܝܕ݄ܢܟ̥ܽܘ، ܘܪ݄ܕ̥ܦ݄ܢܟ̥ܽܘ، ܘܡܰܫܠܡ݄ܢܟ̥ܽܘ ܠܰܟܢܽܘܫ̈ܳܬ̥ܳܐ ܘܠܰܚܒܽܘܫܝ̈ܶܐ، ܘ݄ܡܩܰܕܡ݄ܢܟ̥ܽܘ ܩ݄ܕ̱ܡ ܗ̄ܰܡّܰܠܟ̈ܶܐ ܘܰܫّܰܠܺܝ̈ܛܶܐ ܠܰܫܰܢ ܐ݄ܫܡܺܝ. 13ܘܟܳܗ̄ܘܝܰܠܟ̥ܽܘ (ܦܽܘܪܣܳܐ) ܠܺܗ̄ܝ ܣܳܗܕܽܘܬ̥ܳܐ. 14ܘܡܰܚܶܬܽܘ ܒܠܶܒܰܝܟ̥ܽܘ ܕܠܳܐ ܒܺܗ̄ܝ ܩܰܕ̱ܡܰܝܬܳܐ ܝ݄ܠܦܺܝܬܽܘ ܡܰܦܬܰܚ ܦܶܡܳܐ، 15ܡܺܐܝܕ̥ܶܗ ܕܳܐܢܳܐ ܓܕܳܗ̄ܒܶܐ ܐ̱ܢܳܐ ܠܟ̥ܽܘ ܦܶܡܳܐ ܘܚܶܟ̥ܡܬ̥ܳܐ ܐܰܝܢܰܐ ܕܟܽܘܠّܶܗ ܗ̄ܰܒܥܶܠܕ̈ܒܳܒܰܬ̥ܟ̥ܽܘ ܠ݄ܐ ܓܩܳܕܪܺܝ ܕܩܰܝܡܺܝ ܡܩܰܒ݄ܠ ܕܺܝܕ̥ܰܗ. 16ܓܡܰܫܠܡ݄ܢܟ̥ܽܘ ܗ̄ܰܒّܰܒܳܢ̈ܰܬ̥ܟ̥ܽܘ ܘܰܗ̄ܢ ܐܰܚ̈ܽܘܢܳܢܰܬ̥ܟ̥ܽܘ ܘܰܩّܰܪ̈ܺܝܒ̥ܰܬ̥ܟ̥ܽܘ ܘܰܪّܳܚ̈ܡܰܬ̥ܟ̥ܽܘ ܘ݄ܓܡܰܡܺܝܬ̥ܺܝ ܡ݄ܢܟ̥ܽܘ. 17ܘܓ݄ܕܡ݄ܟܪܳܗܺܝܬܽܘ ܡܶܢ ܟܽܘܠ ܢܳܫܳܐ ܠܰܫܰܢ ܐ݄ܫܡܺܝ. 18ܐܶܠܳܐ ܡܰܢܬ̥ܳܐ ܡܶܢ̱ ܪ̈ܺܝܫܰܝܟ̥ܽܘ ܠ݄ܐ ܓܡܺܝܣܰܟܪܳܐ. 19ܘܒܺܗ̄ܝ ܡܣܰܝܒܪܳܢܽܘܬ̥ܰܬ̥ܟ̥ܽܘ ܓܪ݄ܒܚܺܝܬܽܘ ܢܰܦܫ̈ܰܝܟ̥ܽܘ.
ܝܶܫܽܘܥ ܟܡ݄ܬ̥ܢܰܒܶܐ ܥܰܠ ܗ̄ܽܘ ܬܶܚܪܺܝܒ̥ܳܐ ܕܽܐܘܪܶܫܠܶܡ
20”ܘܡ݄ܐ ܕ݄ܚܙܰܠܟ̥ܽܘ ܠܽܐܘܪܶܫܠܶܡ ܕܠܺܝܦ ܚܶܕ̥ܳܪܰܗ ܚܰܝܠܳܐ (ܡܰܢ̱ ܕّܰܚܫ̈ܶܐ)، ܗ̄ܺܝ ܢܰܩܠܝܳܐ ܝܕ̥ܰܥܽܘ ܕ݄ܡܩܰܪܰܒ̥ ܠܶܗ ܗ̄ܽܘ ܚܪܳܒ̥ܰܝܕ̥ܰܗ. 21ܗ̄ܺܝ ܢܰܩܠܝܳܐ، ܐܰܝܢܰܐ ܕܒܺܝܗܽܘܕ̥ ܢܶܝ ܛܪܳܐ ܥܳܪܩܺܝ ܠܽܗ̄ܘ ܛܽܘܪܳܐ، ܘܰܐܝܢܰܐ ܕܟ݄ܬܢܶܝ ܠܰܘܓ̥݄ܠ (ܒܺܗ̄ܝ ܡܕ̥ܺܝܢ̱ܬܳܐ) ܛܪܳܐ ܥܳܪܩܺܝ، ܘ݄ܕܟ݄ܬܢܶܝ ܒܰܩّ݄ܪ̈ܝܰܘܳܬ̥ܳܐ ܛܪܳܐ ܠܳܐ ܥ݄ܒܪܺܝ ܠܰܗ، 22ܥܰܠ ܕܰܝّܰܘܡ̈ܳܬ̥ܰܢܺܝ ܕܺܗ̄ܝ ܢܩܰܡܬܳܐ ܢܶܝ، ܠܰܫܰܢ ܕܟܳܡ݄ܠ ܟܽܘܠ ܡܶܕܶܐ ܕ݄ܟܬ̥ܺܝܒ̥. 23ܘܘܳܝܳܐ ܠܰܐܝܢܰܐ ܕܟ݄ܬܢܶܝ ܛܥܺܝܢ̈ܶܐ ܘܠܰܐܝܢܰܐ ܕܡܰܘܢܩܺܝ ܒܰܝّܰܘܡ̈ܳܬ̥ܰܢ݄ܟ، ܡܺܐܝܕ̥ܶܗ ܕ݄ܓܕܳܗ̄ܘܶܐ ܥܺܝܩܽܘܬ̥ܳܐ ܪܰܒܬ̥ܳܐ ܒܺܗ̄ܝ ܐܰܪܥܳܐ، ܘܪܽܘܓ̥ܙܳܐ ܥܰܠ ܗ̄ܽܘ ܥܰܡܰܢܳܐ. 24ܘ݄ܓܡ݄ܩܛܳܠܺܝ ܒܽܗ̄ܘ ܣܰܝܦܳܐ، ܘ݄ܓܡܰܘܒܠ݄ܢّܶܗ ܝܰܣܺܝܪ̈ܶܐ ܠܟܽܘܠ ܕܽܘܟܬ̥ܳܐ. ܘܽܐܘܪܶܫܠܶܡ ܓܡܺܝܕܳܫܳܐ ܡܰܢ̱ ܥّܰܡ̈ܶܐ ܗܳܠ ܕܬܰܝܡܺܝ ܗ̄ܰܙّܰܒܢ̈ܶܐ ܕܰܥّܰܡ̈ܶܐ.
ܗ̄ܽܘ ܡܰܐܬ̥ܝܳܐ ܕܰܐܒܪܶܗ ܕܢܳܫܳܐ
ܡܬܝ 24:29‐31؛ ܡܪܩܘܣ 13:24‐27
25”ܘ݄ܓܕܳܗ̄ܘ݄ܢ ܐܳܬ̥ܘ̈ܳܬ̥ܳܐ ܒܺܗ̄ܝ ܫܶܡܫܳܐ ܘܒܽܗ̄ܘ ܣܰܗܪܳܐ ܘܒܰܟّܽܘܟܒ̥̈ܶܐ. ܘ݄ܓܕܽܗ̄ܘܝܳܐ ܥܺܝܩܽܘܬ̥ܳܐ ܕܰܥّܰܡ̈ܶܐ ܘ݄ܪܥܳܠܳܐ ܕܺܐܝܕ̥̈ܳܬ̥ܳܐ ܡܽܗ̄ܘ ܫܓ̥ܽܘܫܝܳܐ ܕܽܗ̄ܘ ܩܳܠܳܐ ܕܽܗ̄ܘ ܝܰܡܳܐ. 26ܘ݄ܪܥܳܠܳܐ ܕ݄ܟܡܰܘܦ݄ܩ ܢܰܦܫ̈ܳܬ̥ܳܐ ܢܰܦܫܳܐ ܕܰܗ̄ܢ ܢܳܫ̈ܶܐ ܡܺܗ̄ܝ ܙܽܘܥܬ̥ܳܐ ܕܽܗ̄ܘ ܡܶܕܶܐ ܕ݄ܓܕܳܐܬ̥ܶܐ ܥܰܠ ܗ̄ܺܝ ܐܰܪܥܳܐ. ܘ݄ܓܡܺܝܙܰܥܙܥܺܝ ܗ̄ܰܚّܰܝ̈ܠܶܐ ܕܺܗ̄ܝ ܫܡܰܝܳܐ. 27ܘܺܗ̄ܝ ܢܰܩܠܝܳܐ ܓ݄ܕܚܳܙ݄ܢ ܐܰܒܪܶܗ ܕܢܳܫܳܐ ܐܰܬ̥ܳܝܳܐ ܒܰܥّܰܝܡ̈ܶܐ ܥܰܡ ܚܰܝܠܳܐ ܓ̥ܰܠܰܒܶܐ ܘܫܽܘܒܚܳܐ ܪܰܒܳܐ. 28ܘܡ݄ܐ ܕ݄ܡܫܰܪܰܠّܶܗ ܗܰܢܺܝ ܕܳܗ̄ܘ݄ܢ، ܚܽܘܨܽܘ ܪ̈ܡܰܩܘܰܝܽܘ ܠܶܒܰܝܟ̥ܽܘ ܘܡܰܥܠܰܝܽܘ ܪ̈ܺܝܫܰܝܟ̥ܽܘ، ܥܰܠ ܕ݄ܡܩܰܪܰܒ̥ ܠܶܗ ܗ̄ܽܘ ܦܽܘܪܩܳܢܰܬ̥ܟ̥ܽܘ.“
ܩܰܪܽܒ̥ܬܳܐ ܝܳܐ ܗ̄ܺܝ ܡܰܠܟܽܘܬ̥ܳܐ ܕܰܐܠܳܗܳܐ
ܡܬܝ 24:32‐35؛ ܡܪܩܘܣ 13:28‐31
29ܘܐܡ݄ܪ ܠܰܗ ܠّܶܗ ܡܰܬ̥ܠܳܐ: ”ܚܽܘܪܽܘ ܒܺܗ̄ܝ ܬܶܐܢܳܐ ܘ݄ܒܟܽܘܠّܶܗ ܗ̄ܰܢ ܐܺܝܠܳܢ̈ܶܐ. 30ܗ̄ܺܝ ܢܰܩܠܐ ܕܦܳܪܥܺܝ (ܗ̄ܰܛّܰܪ̈ܦܰܝܕ̥ܶܗ)، ܡܶܚܕ̥ܳܐ ܟܝܳܠܦܺܝܬܽܘ ܡ݄ܢّܶܗ ܕ݄ܡܩܰܪܰܒ̥ ܠܶܗ ܗ̄ܽܘ ܩܰܝܛܳܐ. 31ܘܗܰܘܟ̥ܰܐ ܣܬܶܝ ܗܰܬܽܘ، ܗ̄ܺܝ ܢܰܩܠܐ ܕ݄ܚܙܰܠܟ̥ܽܘ ܗܰܢܺܝ ܕܟܳܗ̄ܘ݄ܢ، ܝܕ̥ܰܥܽܘ ܕ݄ܡܩܰܪܰܒ̥ ܠܰܗ ܗ̄ܺܝ ܡܰܠܟܽܘܬ̥ܳܐ ܕܰܐܠܳܗܳܐ. 32ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܗ̄ܽܘ ܕܳܪܰܢܳܐ ܠ݄ܐ ܟܫܳܦ݄̊ܥ ܗܳܠ ܕܟܽܘܠّܶܗ ܗܰܢܺܝ ܓܕܳܗ̄ܘ݄ܢ. 33ܗ̄ܺܝ ܫܡܰܝܳܐ ܘܺܗ̄ܝ ܐܰܪܥܳܐ ܓܫܳܦ̊ܥܺܝ ܘܰܡّܶܠܰܝܕ̥̈ܺܝ ܠ݄ܐ ܓܫܳܦ̊ܥܺܝ.
ܫܗܰܪܽܘ ܘ݄ܡܨܰܠܰܝܽܘ ܒܟܽܘܠ ܙܰܒܢܳܐ
34”ܡܰܒܶܗܽܘ ܥܰܠ ܢܰܦܫ̈ܰܝܟ̥ܽܘ ܕܠܳܐ ܝ݄ܩܪܺܝ ܗ̄ܰܠّܶܒ̈ܰܬ̥ܟ̥ܽܘ ܒܺܗ̄ܝ ܓܳܗܽܘܠܽܘܬ̥ܳܐ ܘܒܺܗ̄ܝ ܪܰܘܝܽܘܬ̥ܳܐ ܘܒܰܡّܶܕ̈ܳܢܶܐ ܕܽܗ̄ܘ ܥܳܠܡܳܐ، ܘܡܶܚܕ̥ܳܐ ܓܕܳܐܬ̥ܶܐ ܐܰܥܠܰܝܟ̥ܽܘ ܗ̄ܽܘ ܝܰܘܡܰܘܳܐ، 35ܘ݄ܐܟ̥ ܕ݄ܒܠܳܩܳܐ ܓ݄ܕܒܳܠ݄ܩ ܥܰܠ ܟܽܘܠّܶܗ ܗ̄ܰܝّܰܬܺܝܒ̥̈ܶܐ ܥܰܠ ܦܳܬ̥ܰܗ ܕܺܗ̄ܝ ܐܰܪܥܳܐ ܟܽܘܠܰܗ. 36ܗܰܢ ܢܰܩܠܐ ܫܗܰܪܽܘ ܒܟܽܘܠ ܙܰܒܢܳܐ ܘ݄ܡܨܰܠܰܝܽܘ ܠܰܫܰܢ ܕܫܳܘܺܝܬܽܘ ܕܥܳܪܩܺܝܬܽܘ ܡܰܗ̄ܢܺܝ ܕ݄ܓܕܳܗ̄ܘ݄ܢ، ܘ݄ܓܩܰܝܡܺܝܬܽܘ ܩ݄ܕ̱ܡ ܐܰܒܪܶܗ ܕܢܳܫܳܐ.“ 37ܘܒܺܐܝܡܳܡܳܐ ܡܰܘܠܰܦ ܗ̄ܘܰܐ ܒܽܗ̄ܘ ܗܰܝܟܠܳܐ، ܘ݄ܒܠܰܠܝܳܐ، ܢܳܦܰܩ ܗ̄ܘܰܐ ܘܦܳܝܰܫ ܗ̄ܘܰܐ ܒܛܽܘܪܳܐ ܕ݄ܟܡ݄ܩܪܶܐ ”ܒܶܝܬ̥ ܙܰܝ̈ܬܶܐ.“ 38ܘܟܽܘܠܶܗ ܗ̄ܽܘ ܥܰܡܳܐ ܡܶܢ̱ ܩܶܕܰܡܬܳܐ ܐܳܬ̥݄ܢ ܗ̄ܘܰܘ̱ ܠܣܺܝܕ̥ܶܗ ܠܽܗ̄ܘ ܗܰܝܟܠܳܐ ܕܫ݄ܡܥܺܝ ܗ̄ܽܘ ܡܰܐܡܪܰܝܕ̥ܶܗ.
Valið núna:
ܡܓܰܠܝܘܢ ܕܠܘܩܐ 21: ܟܬܒܐ
Áherslumerki
Deildu
Afrita
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation