ܡܓܰܠܝܘܢ ܕܠܘܩܐ 19
19
ܝܶܫܽܘܥ ܘܙܰܟܰܝ ܗ̄ܽܘ ܡܳܟ̥ܣܳܐ
1ܘܺܗ̄ܝ ܢܰܩܠܐ ܕܥܰܒ݄ܪ ܝܶܫܽܘܥ ܘ݄ܡܗܰܠܰܟ̥ ܠܶܗ ܒܺܐܝܪܺܝܚܽܘ، 2ܚܰܕ̱ ܓܰܒ̥ܪܳܐ، ܐ݄ܫܡܶܗ ܙܰܟܰܝ، ܥܰܬܺܝܪܳܐ ܗ̄ܘܰܐ ܘܽܗ̄ܘ ܪܺܝܫܳܢܳܐ ܕܰܡّܳܟ̥ܣ̈ܶܐ، 3ܐܳܒܰܥ ܗ̄ܘܰܐ ܕܚܳܙܶܐ ܕܡܰܢܝܳܐ ܝܶܫܽܘܥ، ܘܠܳܐ ܩܳܕܰܪ ܗ̄ܘܰܐ ܡܰܗ̄ܢ ܢܳܫ̈ܶܐ، ܡܺܐܝܕ̥ܶܗ ܕܟܰܪܝܳܐ ܗ̄ܘܰܐ ܙܰܟܰܝ. 4ܘܪܰܗ݄ܛ ܩܰܕ̱ܡܽܘܬ̥ܶܗ ܕܝܶܫܽܘܥ ܘܣܰܠ݄ܩ ܥܰܠ ܐܺܝܠܳܢܳܐ ܦܰܟܺܝܗܳܐ ܕܬܶܐܢ̈ܶܐ ܠܰܫܰܢ ܕܚܳܙܶܐ ܠܶܗ، ܡܺܐܝܕ̥ܶܗ ܕܡܶܢ̱ ܬܰܡܳܐ ܓܫܳܦ̊ܰܥ ܗ̄ܘܰܐ. 5ܘܺܗ̄ܝ ܢܰܩܠܐ ܕܰܐܬ̥ܺܝ ܝܶܫܽܘܥ ܠܺܗ̄ܝ ܕܽܘܟܬ̥ܰܝܳܐ، ܚܙܶܐ ܠܶܗ ܘܐܡ݄ܪ ܠܶܗ ܠܶܗ: ”ܡܰܠ݄ܙ ܢܚܰܬ، ܙܰܟܰܝ، ܥܰܠ ܕܰܐܕܝܰܘܡܰܐ ܒܽܗ̄ܘ ܒܰܝܬܰܝܕ̥ܳܟ̥ ܟܠܳܙ݄ܡ ܗܳܘܶܐ ܐ̱ܢܳܐ.“ 6ܘܡܰܠܺܝܙܳܐ ܢܰܚ݄ܬ، ܘܡܰܩܒܶܠ ܠܶܗ ܒܽܗ̄ܘ ܒܰܝܬܰܝܕ̥ܶܗ، ܘܗܺܝّܶܗ ܦܨܺܝܚܳܝܳܐ. 7ܘܺܗ̄ܝ ܢܰܩܠܐ ܕ݄ܚܙܰܠّܶܗ، ܟܽܘܠّܶܗ ܡܛܰܪܛܡܺܝ ܗ̄ܘܰܘ̱ ܘ݄ܐܡّܺܪ̱ܝ ܗ̄ܘܰܘ̱: ”ܓܰܒ ܓܰܒ̥ܪܳܐ ܚܰܛܳܝܳܐ ܥܰܒ݄ܪ ܢܰܚ݄ܬ؟“ 8ܘܩܰܝ݄ܡ ܙܰܟܰܝ ܘܐܡ݄ܪ ܠܶܗ ܠܝܶܫܽܘܥ: ”ܡܳܪܝ، ܟܰܐܠܶܗ ܦܰܠܓܶܗ ܕܰܙّܽܘܙ̈ܰܝܕ̥ܺܝ ܓܕܳܗ̄ܒܶܐ ܐ̱ܢܳܐ ܠܰܡّܶܣܟܶܢ̈ܶܐ، ܘ݄ܠܟܽܘܠ ܢܳܫܳܐ ܕ݄ܛܠ݄ܡ ܠܺܝ، ܐܰܪܒܰܥ ܟܳܪ̈ܶܐ ܙ݄ܕ ܓܡܰܕܥܰܪܢܶܗ.“ 9ܝܶܫܽܘܥ ܐܡ݄ܪ ܠܶܗ: ”ܐܰܕܝܰܘܡܰܐ ܚܰܝ̈ܶܐ ܗܰܘ݄ܢ ܠܽܗ̄ܘ ܒܰܝܬܰܢܳܐ، ܥܰܠ ܕܰܗ̄ܢܳܐ ܣܬܶܝ ܗ̄ܽܘ ܐܰܒܪܳܐ ܕܰܐܒܪܳܗܳܡ ܝܳܐ. 10ܥܰܠ ܕܰܐܒܪܶܗ ܕܢܳܫܳܐ ܐܰܬ̥ܺܝ ܕܟܳܪ݄ܟ̥ ܥܰܠ ܗ̄ܰܡܣܰܟܪ̈ܶܐ، ܘܳܗ̄ܒܰܠّܶܗ ܚܰܝ̈ܶܐ.“
ܗ̄ܽܘ ܡܰܬ̥ܠܳܐ ܕܰܟّܰܟܪ̈ܶܐ
ܡܬܝ 25:14‐30
11ܘܗ݄ܢّܶܝ ܫ݄ܡܥܺܝ ܗ̄ܘܰܘ̱، ܡܰܙ݄ܕ ܠܶܗ ܐܡ݄ܪ ܠܶܗ ܗ̄ܽܘ ܡܰܬ̥ܠܰܢܳܐ ܡܺܐܝܕ̥ܶܗ ܕܩܰܪܺܝܒ̥ܳܐ ܗ̄ܘܰܐ ܠܽܐܘܪܶܫܠܶܡ، ܘܚܳܫܒ̥ܺܝ ܗ̄ܘܰܘ̱ ܕܒܺܗ̄ܝ ܫܳܥܬ̥ܰܝܕ̥ܰܗ ܓܡ݄ܓܠܳܝܳܐ ܗ̄ܺܝ ܡܰܠܟܽܘܬ̥ܳܐ ܕܰܐܠܳܗܳܐ، 12ܘܐܡ݄ܪ ܠܶܗ: ”ܚܰܕ̱ ܡܰܗ̄ܢ ܐܰܡܺܝܪ̈ܶܐ ܐܰܙّܶܗ ܠܰܐܬ̥ܪܳܐ ܪܰܚܽܘܩܳܐ ܕܡܳܝܰܕ ܠܶܗ ܡܰܠܟܽܘܬ̥ܳܐ ܘܕܳܥ݄ܪ. 13ܘ݄ܩܪܶܐ ܠܶܗ ܥܰܣܪܳܐ ܡܰܢ̱ ܓܪ̈ܶܝܥܰܝܕ̥ܶܗ ܘܗܽܒ̥ ܠܰܗ ܠّܶܗ ܥܰܣܪܳܐ ܙܽܘܙ̈ܶܐ ܘܐܡ݄ܪ ܠܰܗ ܠّܶܗ: ’ܣܽܘܡܽܘ ܬܰܓܳܪܽܘܬܳܐ ܗܳܠ ܕܳܐܬ̥ܶܐ ܐ̱ܢܳܐ.‘ 14ܘܰܗ̄ܢ ܢܳܫ̈ܶܐ ܕܺܗ̄ܝ ܡܕ̥ܺܝܢ̱ܬܰܝܕ̥ܶܗ ܥܳܝܰܩّܶܗ ܗ̄ܘܰܘ̱ ܡܶܢܶܗ، ܘ݄ܡܫܰܕܰܪّܶܗ ܢܳܫ̈ܶܐ (ܡܫܰܕܪ̈ܶܐ) ܒ݄ܬ̥ܪܶܗ ܘܐܡ݄ܪّܶܗ: ’ܠ݄ܐ ܟ݄ܐܒܥܺܝܢܰܐ ܠܰܗ̄ܢܳܐ ܕܳܗ̄ܘܶܐ ܡܰܠܟܳܐ ܐܰܥܠܰܢ.‘ 15ܘܺܗ̄ܝ ܢܰܩܠܐ ܕܡ݄ܕ ܠܶܗ ܗ̄ܺܝ ܡܰܠܟܽܘܬ̥ܳܐ ܘܕܰܥ݄ܪ، ܐܡ݄ܪ ܠܶܗ ܕܩܳܪ݄ܢ ܠܶܗ ܠܰܓܪ̈ܶܝܥܰܢ݄ܟ ܕܗܽܒ̥ ܠܰܗ ܠّܶܗ ܙܽܘܙ̈ܶܐ ܕܚܳܙܶܐ ܟܽܘܠ ܚܰܕ̱ ܚܰܕ̱ ܡ݄ܢّܶܗ ܡ݄ܢ ܬܰܓܳܪܽܘܬܳܐ ܣ݄ܡ ܠܶܗ. 16ܘܰܐܬ̥ܺܝ ܗ̄ܽܘ ܩܰܕ̱ܡܳܝܳܐ ܘܐܡ݄ܪ ܠܶܗ: ’ܡܳܪܝ، ܗ̄ܽܘ ܙܽܘܙܰܝܕ̥ܳܟ̥ ܥܰܣܪܳܐ ܙܽܘܙ̈ܶܐ ܣ݄ܡ ܠܶܗ.‘ 17ܘܐܡ݄ܪ ܠܶܗ ܠܶܗ: ’ܛܳܒ̥ܳܐ ܣ݄ܡ ܠܳܟ̥، ܝܰܐ ܓܪܶܝܥܳܐ ܛܳܒ̥ܳܐ، ܕܥܰܠ ܡܶܕܶܐ ܐ݄ܫܡܳܐ ܡܰܚܘܶܐ ܕܟ݄ܬ ܗ̄ܰܬ ܡܗܰܝܡܢܳܐ، ܓܕܳܗ̄ܘܰܬ ܫܰܠܺܝܛܳܐ ܥܰܠ ܥܣܰܪ ܡܕ̥ܺܝ̈ܢܳܬ̥ܳܐ.‘ 18ܘܰܐܬ̥ܺܝ ܕܰܬܪܶܝ ܘܐܡ݄ܪ ܠܶܗ: ’ܡܳܪܝ، ܗ̄ܽܘ ܙܽܘܙܰܝܕ̥ܳܟ̥ ܚܰܡܫܳܐ ܙܽܘܙ̈ܶܐ ܣ݄ܡ ܠܶܗ.‘ 19ܘܐܡ݄ܪ ܠܶܗ ܠܰܗ̄ܢܳܐ ܣܬܶܝ: ’ܘܗܰܬ ܣܬܶܝ ܓܕܳܗ̄ܘܰܬ ܫܰܠܺܝܛܳܐ ܥܰܠ ܚܰܡّ݄ܫ ܡܕ̥ܺܝ̈ܢܳܬ̥ܳܐ.‘ 20ܘܰܐܬ̥ܺܝ ܗ̄ܽܘ ܚܪܶܢܳܐ ܘܐܡ݄ܪ ܠܶܗ: ’ܡܳܪܝ، ܟܰܐܠܶܗ ܗ̄ܽܘ ܙܽܘܙܰܝܕ̥ܳܟ̥، ܗܰܘܳܐ ܕܟ݄ܬ ܗ̄ܘܰܐ ܣܺܝܕ̥ܺܝ ܡܰܚܬܳܐ ܒܺܗ̄ܝ ܦ̊ܰܣܬܳܐ، 21ܥܰܠ ܕܙܰܝ݄ܥ ܐ̱ܢܳܐ ܡܶܢܳܟ̥، ܕܟ݄ܬ ܗ̄ܰܬ ܓܰܒ̥ܪܳܐ ܩܰܫܝܳܐ، ܘ݄ܟܫ݄ܩܠܰܬ ܗ̄ܽܘ ܡܶܕܶܐ ܕܠܳܐ ܡܰܚ݄ܬ ܠܳܟ̥، ܘ݄ܟܚ݄ܨܕܰܬ ܗ̄ܽܘ ܡܶܕܶܐ ܕܠ݄ܐ ܙܪ݄ܥ ܠܳܟ̥.‘ 22ܐܡ݄ܪ ܠܶܗ ܠܶܗ: ’ܡܶܢ̱ ܦܶܡܳܟ̥ ܓܕܳܝܰܢ ܐ̱ܢܳܐ ܠܳܟ̥، ܝܰܐ ܓܪܶܝܥܳܐ ܒܺܝܫܳܐ. ܐ݄ܕ̥ܥܰܬ ܗ̄ܘܰܝ ܠܺܝ ܕܟ݄ܬ ܐ̱ܢܳܐ ܓܰܒ̥ܪܳܐ ܩܰܫܝܳܐ، ܘ݄ܟܫܳܩܰܠ ܐ̱ܢܳܐ ܗ̄ܽܘ ܡܶܕܶܐ ܕܠܳܐ ܡܰܚ݄ܬ ܠܺܝ، ܘ݄ܟܚܳܨܰܕ ܐ̱ܢܳܐ ܗ̄ܽܘ ܡܶܕܶܐ ܕܠ݄ܐ ܙܪ݄ܥ ܠܺܝ، 23ܩܰܝ ܠܳܐ ܗܽܒ̥ ܠܳܟ̥ ܗ̄ܽܘ ܙܽܘܙܰܝܕ̥ܺܝ ܥܰܠ ܗ̄ܽܘ ܦܳܬܽܘܪܳܐ (ܕܰܡܨܰܪ̈ܦܳܢܶܐ)، ܘܳܐܢܳܐ ܐܳܬ̥ܶܐ ܗ̄ܘܰܝ ܐ̱ܢܳܐ ܘܳܐܒܰܥܢܶܗ ܥܰܡ ܗ̄ܰܪّܶܒܝ̈ܳܬ̥ܰܝܕ̥ܶܗ.‘ 24ܘܠܰܗ̄ܢ݄ܟ ܕܩܰܝܡܺܝ ܗ̄ܘܰܘ̱ ܩܽܘܕ̱ܡܶܗ ܐܡ݄ܪ ܠܶܗ: ’ܡܽܘܕܽܘ ܡܶܢܶܗ ܗ̄ܽܘ ܙܽܘܙܳܐ، ܘܗܰܒ̥ܽܘ ܠܶܗ ܠܰܗ̄ܘܳܐ ܕܟܺܝܬ ܓܰܒܶܗ ܥܰܣܪܳܐ ܙܽܘܙ̈ܶܐ.‘ 25ܘܐܡ݄ܪّܰܗ ܠܶܗ: ’ܝܰܐ ܡܳܪܰܝܕ̥ܰܢ، ܟܺܝܬ ܓܰܒܶܗ ܥܰܣܪܳܐ ܙܽܘܙ̈ܶܐ.‘ 26ܐܡ݄ܪ ܠܰܗ ܠّܶܗ: ’ܟܳܐܡܰܪ ܐ̱ܢܳܐ ܠܟ̥ܽܘ، ܠܟܽܘܠ ܡܰܢ ܕܟ݄ܬ ܠܶܗ ܓܡܺܝܬܰܗܒ̥ܶܐ ܠܶܗ، ܘܗܰܘܳܐ ܕܠܰܝ̱ܬ ܠܶܗ، ܗ̄ܽܘ ܡܶܕܶܐ ܕܟ݄ܬ ܠܶܗ ܣܬܶܝ ܓܡܺܝܡ݄ܕ ܡܶܢܶܗ. 27ܐܶܠܳܐ ܠܰܗ̄ܢ݄ܟ ܗ̄ܰܒܥܶܠܕ̈ܒܳܒܰܝܕ̥ܺܝ، ܗܰܢ݄ܟ ܕܠܰܐ ܐܒܺܝܥܺܝ ܕܳܗ̄ܘܶܐ ܐ̱ܢܳܐ ܡܰܠܟܳܐ ܐܰܥܠܰܝّܶܗ، ܡܰܝܬܰܝܽܘܢّܶܗ ܘ݄ܩܛܰܠܽܘܢّܶܗ ܩܽܘܕ̱ܡܺܝ.‘“
ܗ̄ܺܝ ܡܕܰܒܪܳܢܽܘܬ̥ܳܐ ܕܡܳܪܰܢ ܒܽܐܘܪܶܫܠܶܡ
ܝܶܫܽܘܥ ܟܥܳܒ݄ܪ ܠܽܐܘܪܶܫܠܶܡ ܒܙܽܘܝܳܚܳܐ
ܡܬܝ 21:1‐11؛ ܡܪܩܘܣ 11:1‐11؛ ܝܘܚܢܢ 12:12‐19
28ܘܝܶܫܽܘܥ ܗ̄ܺܝ ܢܰܩܠܐ ܕܐܡ݄ܪ ܠܶܗ ܗܰܢܺܝ، ܢܰܦ݄ܩ ܒܺܗ̄ܝ ܩܰܕ̱ܡܰܝܬܳܐ ܕ݄ܐܙّܶܗ ܠܽܐܘܪܶܫܠܶܡ. 29ܘܺܗ̄ܝ ܢܰܩܠܐ ܕܡܰܛܺܝ ܠܒܶܝܬ̥ ܦܳܓ̈ܶܐ ܘܒܶܝܬ̥ ܥܰܢܝܳܐ، ܥܰܠ ܓܰܒܳܐ ܕܽܗ̄ܘ ܛܽܘܪܳܐ ܕ݄ܟܡ݄ܩܪܶܐ ܒܶܝܬ̥ ܙܰܝ̈ܬܶܐ، ܡܫܰܕܰܪ ܠܶܗ ܬܪܶܝ ܡܰܢ̱ ܬّܰܠܡܺܝܕ̥̈ܰܝܕ̥ܶܗ، 30ܘܐܡ݄ܪ ܠܰܗ ܠّܶܗ: ”ܙܳܟ̥ܽܘ ܠܺܗ̄ܝ ܩܪܺܝܬ̥ܰܝܳܐ ܕܟ݄ܬ ܝܳܐ ܩܽܘܕ̱ܡܰܢ، ܘܺܗ̄ܝ ܢܰܩܠܐ ܕܥܳܒܪܺܝܬܽܘ ܠܰܗ ܓ݄ܕܚܳܙܺܝܬܽܘ ܥܺܝܠܳܐ ܡܰܐܣܪܳܐ ܕܗܶܫ ܢܳܫܳܐ ܠܳܐ ܪܰܒ̥݄ܟ̥ ܐܰܥܠܶܗ، ܫܪܰܝܽܘ ܠܶܗ ܘܡܰܝܬܰܝܽܘ ܠܶܗ. 31ܘ݄ܕܢܳܫܳܐ ܡܫܰܐܶܠ ܠܶܗ ܠܟ̥ܽܘ ܠܡ݄ܢ ܟܫܳܪܺܝܬܽܘ ܠܶܗ؟ ܗܰܘܟ̥ܰܐ ܐܡܰܪܽܘ ܠܶܗ: ܟܠܳܙ݄ܡ ܠܡܳܪܰܢ.“ 32ܘܰܐܙّ݄ܢ ܗܰܢ݄ܟ ܕ݄ܡܫܰܕܪܺܝ، ܘ݄ܚܙܰܠّܶܗ ܐܟ̥ ܕܐܡ݄ܪ ܠܰܗ ܠّܶܗ. 33ܘܗ݄ܢّܶܝ ܟܫܳܪ݄ܢ ܗ̄ܽܘ ܥܺܝܠܳܐ، ܗ̄ܰܡّܳܪ̈ܰܝܕ̥ܶܗ ܐܡ݄ܪّܰܢّܶܗ: ܡ݄ܢܝܳܐ ܕ݄ܟܫܳܪܺܝܬܽܘ ܗ̄ܽܘ ܥܺܝܠܰܘܳܐ؟ 34ܘܐܡ݄ܪّܰܢّܶܗ: ”ܟܠܳܙ݄ܡ ܠܡܳܪܰܢ.“ 35ܘܡܰܝܬܰܠّܶܗ ܠܓܰܒ ܝܶܫܽܘܥ، ܘܡܰܚ݄ܬّܶܗ ܥܰܠ ܗ̄ܽܘ ܥܺܝܠܳܐ ܗ̄ܰܠܒܽܘܫ̈ܰܬّ̥ܶܗ، ܘܡܰܪܒ̥ܰܟّ̥ܶܗ ܝܶܫܽܘܥ. 36ܘܗܺܝّܶܗ ܐܰܙܳܠܳܐ، ܦܳܪܣܺܝ ܗ̄ܘܰܘ̱ ܗ̄ܰܠܒܽܘܫ̈ܰܬّ̥ܶܗ ܒܽܗ̄ܘ ܕܰܪܒܳܐ. 37ܘܺܗ̄ܝ ܢܰܩܠܐ ܕ݄ܡܩܰܪܰܒ̥ ܠܶܗ ܠܺܗ̄ܝ ܢܚܰܬܬܳܐ ܕܽܗ̄ܘ ܛܽܘܪܳܐ ܕܒܶܝܬ̥ ܙܰܝ̈ܬܶܐ، ܟܽܘܠܶܗ ܗ̄ܽܘ ܟܶܢܫܳܐ ܕܰܬّܰܠܡܺܝܕ̥̈ܶܐ ܡܫܰܪܰܠّܶܗ ܕܡ݄ܦܨܳܚܺܝ ܘ݄ܡܫܰܒܚܺܝ ܠܰܐܠܳܗܳܐ ܒܩܳܠܳܐ ܥܶܠܳܝܳܐ ܥܰܠ ܟܽܘܠّܶܗ ܗ̄ܰܚّܰܝ̈ܠܶܐ ܕ݄ܚܙܰܠّܶܗ. 38ܘ݄ܐܡّܺܪ̱ܝ ܗ̄ܘܰܘ̱: ”ܒܪܺܝܟ̥ܳܐ ܝܳܐ ܗ̄ܽܘ ܡܰܠܟܳܐ ܕܟܳܐܬ̥ܶܐ ܒ݄ܐܫܡܶܗ ܕܡܳܪܝܳܐ، ܫܠܳܡܳܐ ܒܺܗ̄ܝ ܫܡܰܝܳܐ ܘܫܽܘܒܚܳܐ ܒܰܡܪ̈ܰܘܡܶܐ.“ 39ܘܢܳܫ̈ܶܐ ܡܰܢ̱ ܦܪ̈ܺܝܫܶܐ ܡܒܰܝܢ ܗ̄ܰܢ ܢܳܫ̈ܶܐ ܐܡ݄ܪّܰܗ ܠܶܗ: ”ܡܰܠܦܳܢܳܐ، ܡܥܰܝ݄ܛ ܥܰܠ ܗ̄ܰܬّܰܠܡܺܝܕ̥̈ܰܝܕ̥ܳܟ̥.“ 40ܐܡ݄ܪ ܠܰܗ ܠّܶܗ: ”ܟܳܐܡܰܪ ܐ̱ܢܳܐ ܠܟ̥ܽܘ، ܕܶܐܢ ܗܰܢܺܝ ܫܳܠ݄ܢ (ܘܫ݄ܬܩܺܝ)، ܗ̄ܰܟّܶܐܦ̈ܶܐ ܓܡܰܙܥܩܺܝ.“
ܝܶܫܽܘܥ ܟܡܰܪܦܶܐ ܕ̈ܰܡܥܶܐ ܥܰܠ ܐܽܘܪܶܫܠܶܡ
41ܘܺܗ̄ܝ ܢܰܩܠܐ ܕ݄ܡܩܰܪܰܒ̥ ܠܶܗ ܘ݄ܚܙܶܐ ܠܶܗ ܠܺܗ̄ܝ ܡܕ̥ܺܝܢ̱ܬܳܐ ܒܰܟ̥ܺܝ ܐܰܥܠܰܗ، 42ܘܐܡ݄ܪ ܠܶܗ: ”ܟܚ݄ܙܝܳܐ ܥܰܝܢܺܝ ܕ݄ܐܕ̥ܥܰܬ ܗ̄ܘܰܐ ܗܰܢܺܝ ܕܟ݄ܬܢܶܝ ܕܽܗ̄ܘ ܫܠܳܡܰܝܕ̥ܰܟ̥، ܘܶܐܢ ܒܽܗ̄ܘ ܝܰܘܡܰܢܳܐ ܕܺܝܕ̥ܰܟ̥، ܐܶܠܳܐ ܐܳܥܕܳܐ ܗܰܘ݄ܢ ܡܟܰܣ̈ܝܶܐ ܡܶܢ̱ ܥܰܝ̈ܢܳܬ̥ܰܟ̥. 43ܓܕܳܐܬ̥݄ܢ ܠܰܟ̥ ܝܰܘܡ̈ܶܐ ܕܰܒܥܶܠܕܒܳܒ̈ܰܝܕ̥ܰܟ̥ ܟܠܰܝܦܺܝ ܚܶܕ̥ܳܪܰܟ̥، ܘ݄ܟܡܰܥܺܝܩܺܝ ܐܰܥܠܰܟ̥ ܡܶܢ̱ ܟܽܘܠ ܕܽܘܟܬ̥ܳܐ، 44ܘܡܰܚܪܒ̥ܺܝ ܠܰܟ̥ ܘܗ݄ܕܡܺܝ ܠܰܟ̥ ܘܰܗ̄ܢ ܐܰܒܢ̈ܰܝܕ̥ܰܟ̥ ܐܶܒܰܟ̥، ܘܠ݄ܐ ܟܛܳܪ݄ܢ ܐܶܒܰܟ̥ ܟܶܐܦܳܐ ܥܰܠ ܟܶܐܦܳܐ، ܥܰܠ ܕܠܰܐ ܐܕ̥ܺܝܥܰܬ ܗ̄ܽܘ ܙܰܒܢܳܐ ܕܽܗ̄ܘ ܡܰܐܬ̥ܝܳܐ (ܕܰܐܠܳܗܳܐ) ܣܺܝܕ̥ܰܟ̥.“
ܝܶܫܽܘܥ ܟܡܰܘܦ݄ܩ ܗ̄ܰܡܙܰܒܢܳܢ̈ܶܐ ܡܽܗ̄ܘ ܗܰܝܟܠܳܐ
ܡܬܝ 21:12‐17؛ ܡܪܩܘܣ 11:15‐19؛ ܝܘܚܢܢ 2:13‐22
45ܘܺܗ̄ܝ ܢܰܩܠܐ ܕܥܰܒ݄ܪ ܠܽܗ̄ܘ ܗܰܝܟܠܳܐ ܡܫܰܪܶܐ ܠܶܗ ܕܡܰܘܦ݄ܩ ܠܰܐܝܢܰܐ ܕܙܳܒ̥ܢܺܝ ܘ݄ܡܙܰܒܢܺܝ ܐܶܒܶܗ، 46ܘܐܡ݄ܪ ܠܰܗ ܠّܶܗ: ”ܟܬ̥ܺܝܒ̥ܳܐ ܝܳܐ: ’ܗ̄ܽܘ ܒܰܝܬܰܝܕ̥ܺܝ ܒܰܝܬܳܐ ܕܺܗ̄ܝ ܨܠܽܘܬ̥ܳܐ ܝܳܐ،‘ ܘܗܰܬܽܘ ܣ݄ܡܟ̥ܽܘ ܡܥܰܪܬ̥ܳܐ ܕܰܓّܰܢܳܒ̥̈ܶܐ!“ 47ܘܗܺܝّܶܗ ܡܰܘܠܰܦ ܗ̄ܘܰܐ ܟܽܘܠ ܝܰܘܡܳܐ ܒܽܗ̄ܘ ܗܰܝܟܠܳܐ. ܐܶܠܳܐ ܗ̄ܰܪّܰܒ̈ܶܐ ܕܰܟّܳܗ̈ܢܶܐ ܘܰܣّܳܦܪ̈ܶܐ ܘܰܩّܰܫ̈ܶܐ ܕܽܗ̄ܘ ܥܰܡܳܐ ܐ݄ܒܥܺܝ ܗ̄ܘܰܘ̱ ܕ݄ܡܣܰܟܪܺܝ ܠܶܗ. 48ܘܠ݄ܐ ܐܕ̥ܥܺܝ ܗ̄ܘܰܘ̱ ܡ݄ܢ ܓ݄ܕܣܰܝܡܺܝ ܐܶܒܶܗ، ܡܺܐܝܕ̥ܶܗ ܕܽܗ̄ܘ ܥܰܡܳܐ ܟܽܘܠܶܗ ܡܰܐܣܪܳܐ ܗ̄ܘܰܐ ܐܶܒܶܗ ܕܫ݄ܡܥܺܝ ܠܶܗ.
Valið núna:
ܡܓܰܠܝܘܢ ܕܠܘܩܐ 19: ܟܬܒܐ
Áherslumerki
Deildu
Afrita
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation