ܡܓܰܠܝܘܢ ܕܝܘܚܢܢ 6
6
ܝܶܫܽܘܥ ܟܡܰܣܒ̥݄ܥ ܚܰܡܫܰܐܠܦܳܐ ܓܰܒܪ̈ܶܐ
ܡܬܝ 14:13‐21؛ ܡܪܩܘܣ 6:30‐44؛ ܠܘܩܐ 9:10‐17
1ܒ݄ܬ̥݄ܪ ܡܰܗ̄ܢܺܝ، ܐܰܙّܶܗ ܝܶܫܽܘܥ ܠܽܗ̄ܘ ܓܰܒܳܐ ܚܪܶܢܳܐ ܕܽܗ̄ܘ ܝܰܡܳܐ ܕ݄ܓܠܺܝܠܳܐ ܕܛܺܒܶܪܺܝܳܘܣ. 2ܘܓ̥ܰܠܰܒܶܐ ܢܳܫ̈ܶܐ ܐܰܙّ݄ܢ ܒ݄ܬ̥ܪܶܗ، ܥܰܠ ܕܚܳܙ݄ܢ ܗ̄ܘܰܘ̱ ܗ̄ܰܢ ܐܳܬ̥ܘ̈ܳܬ̥ܳܐ ܕܣܳܝܰܡ ܗ̄ܘܰܐ ܒܰܟّܰܐܺܝܒ̥̈ܶܐ. 3ܘܣܰܠ݄ܩ ܝܶܫܽܘܥ ܠܽܗ̄ܘ ܛܽܘܪܳܐ، ܘܬܰܡܳܐ ܝܰܬܽܒ̥ ܥܰܡ ܗ̄ܰܬّܰܠܡܺܝܕ̥̈ܰܝܕ̥ܶܗ. 4ܘܽܗ̄ܘ ܥܶܐܕ̥ܳܐ ܕܽܗ̄ܘ ܦܶܨܚܳܐ ܕܰܝّܽܘܕ̥̈ܳܝܶܐ ܡܩܰܪܰܒ̥ ܗ̄ܘܰܝ ܠܶܗ. 5ܘܝܶܫܽܘܥ ܡܰܥܠܶܐ ܠܶܗ ܥܰܝܢ̈ܳܬ̥ܶܗ، ܘ݄ܚܙܶܐ ܠܶܗ ܢܳܫ̈ܶܐ ܓ̥ܰܠܰܒܶܐ ܐܰܬ̥ܳܝ̈ܶܐ ܠܣܺܝܕܶܗ، ܘܐܡ݄ܪ ܠܶܗ ܠܦܺܝܠܺܝܦܳܘܣ: ”ܡܰܐܝܟܳܐ ܓ݄ܕܙܳܒ̥ܢܺܝܢܰܐ ܠܰܚܡܳܐ ܠܰܗ̄ܢܺܝ ܕܳܐܟ̥ܠܺܝ؟“ 6ܗܺܝّܶܗ ܐܡ݄ܪ ܠܶܗ ܗܰܘܟ̥ܰܐ ܠܰܫܰܢ ܕܚܳܙܶܐ ܡܶܢ̱ ܓܕܳܐܡ݄ܪ. ܘܝܶܫܽܘܥ ܐܳܕ̥ܰܥ ܗ̄ܘܰܐ ܡ݄ܢ ܓ݄ܕܣܳܝ݄ܡ. 7ܐܡ݄ܪ ܠܶܗ ܦܺܝܠܺܝܦܳܘܣ: ”ܒܡܰܐܬ̥ܶܝ ܕܺܝܢܳܪ̈ܶܐ ܠܰܚܡܳܐ ܠ݄ܐ ܟܡܰܟܦܰܠّܶܗ ܕܟܽܘܠ ܚܰܕ̱ ܡ݄ܢّܶܗ ܕܡܳܝ݄ܕ ܦܰܠܩܳܐ ܢܰܥܺܝܡܳܐ.“ 8ܘܚܰܕ̱ ܡܰܢ̱ ܬّܰܠܡܺܝܕ̥̈ܰܝܕ̥ܶܗ ܕܟ݄ܬ ܝܳܐ ܐܰܢܕܪܶܐܘܳܣ ܗ̄ܽܘ ܐܰܚܽܘܢܳܐ ܕܫܶܡܥܽܘܢ ܟܶܐܦܳܐ ܐܡ݄ܪ ܠܶܗ ܠܶܗ: 9”ܟܺܝܬ ܗܰܪܟܶܐ ܚܰܕ̱ ܛܰܠܝܳܐ ܕܟܺܝܬ ܐܰܥܡܶܗ ܚܰܡّ݄ܫ ܛܰܠܡ̈ܶܐ ܕܠܰܚܡܳܐ ܕ݄ܣܥܳܪ̈ܶܐ ܘ݄ܬܪܶܝ ܢܽܘܢ̈ܶܐ. ܐܶܠܳܐ ܡ݄ܢ ܢܶܝ ܗܰܢܺܝ (ܕܡܰܣܽܒ̥ܥܺܝ) ܠܰܗ̄ܢܺܝ ܟܽܘܠّܶܗ؟“ 10ܝܶܫܽܘܥ ܐܡ݄ܪ ܠܰܗ ܠّܶܗ: ”ܡܰܘܬܶܒ̥ܽܘ ܗ̄ܰܢ ܢܳܫ̈ܶܐ.“ ܘܟ݄ܬ ܗ̄ܘܰܐ ܓܶܠܳܐ ܓ̥ܰܠܰܒܶܐ ܒܺܗ̄ܝ ܕܽܘܟܬ̥ܰܝܳܐ. ܘܰܓّܰܒ̥ܪ̈ܶܐ ܕܝܰܬܺܝܒ̥ܺܝ ܢ݄ܦܩܺܝ ܗ̄ܘܰܘ̱ ܠܰܐܦ ܚܰܡܫܰܐܠܦܳܐ. 11ܘܝܶܫܽܘܥ ܡ݄ܕ ܠܶܗ ܗ̄ܽܘ ܠܰܚܡܳܐ ܘ݄ܡܒܰܪܰܟ̥ ܠܶܗ ܘ݄ܡܦܰܠܰܓ̥ ܠܶܗ ܥܰܠ ܗܰܢ݄ܟ ܕܝܰܬܺܝܒ̥ܺܝ. ܘܗܰܘܟ̥ܰܐ ܣܬܶܝ ܡܰܗ̄ܢ ܢܽܘܢ̈ܶܐ ܡ݄ܩܰܐ ܕܰܐܒܺܝܥܺܝ. 12ܘܺܗ̄ܝ ܢܰܩܠܐ ܕܣܰܒ̥ܺܝܥܺܝ، ܐܡ݄ܪ ܠܶܗ ܠܰܬّܰܠܡܺܝܕ̥̈ܰܝܕ̥ܶܗ: ”ܡܰܠܬܶܡܽܘ ܗ̄ܰܩّܰܨܝ̈ܶܐ ܕܦܰܝܺܝܫܺܝ ܕܠܳܐ ܡܺܝܣܰܟ݄ܪ ܡܶܕܶܐ.“ 13ܘܡܰܠܬܰܡّܶܗ ܘ݄ܡܠܰܠّܶܗ ܬܪܰܥܣܰܪ ܣ̈ܰܠܶܐ ܡܰܢ̱ ܩّܰܨܝ̈ܶܐ ܕܦܰܝܺܝܫܺܝ ܡܰܢ̱ ܚّܰܡّ݄ܫ ܛܰܠܡ̈ܶܐ ܕܰܣܥܳܪ̈ܶܐ. 14ܘܰܗ̄ܢ ܢܳܫ̈ܰܢ݄ܟ ܕ݄ܚܙܰܠّܶܗ ܗ̄ܺܝ ܐܳܬ̥ܳܐ ܕܣ݄ܡ ܠܶܗ ܝܶܫܽܘܥ ܐܡ݄ܪّܶܗ: ”ܒ݄ܫܪܳܪܳܐ ܗܰܢܳܐ ܝܳܐ ܗ̄ܽܘ ܢܒܺܝܳܐ ܕܳܐܬ̥ܶܐ ܠܽܗ̄ܘ ܥܳܠܡܳܐ!“ 15ܘܝܶܫܽܘܥ ܐܰܕ̥݄ܥ ܓܕܳܐܬ̥݄ܢ ܢ݄ܬܫܺܝ ܠܶܗ ܘܣܰܝܡܺܝ ܠܶܗ ܡܰܠܟܳܐ، ܘܰܐܙّܶܗ ܠܽܗ̄ܘ ܛܽܘܪܳܐ ܒܶܠܚܽܘܕ̥ܶܗ.
ܡܫܺܝܚܳܐ ܟ݄ܡܗܰܠ݄ܟ̥ ܥܰܠ ܗ̄ܰܡّܰܝ̈ܶܐ
ܡܬܝ 14:22‐27؛ ܡܪܩܘܣ 6:45‐52
16ܘܠܰܐܦ ܛܒ̥ܳܥܶܗ ܕܝܰܘܡܳܐ، ܢܰܚܺܝܬܺܝ ܗ̄ܰܬّܰܠܡܺܝܕ̥̈ܰܝܕ̥ܶܗ ܠܽܗ̄ܘ ܝܰܡܳܐ. 17ܘܝܰܬܺܝܒ̥ܺܝ ܒܺܗ̄ܝ ܣܦܺܝܢ̱ܬܳܐ، ܘܰܐܬ̥݄ܢ ܕܩܳܛܥܺܝ ܠܽܗ̄ܘ ܓܰܒܳܐ ܚܪܶܢܳܐ، ܠ݄ܟܦܰܪܢܰܚܽܘܡ. ܘܗܰܘܺܝ ܠܰܠܝܳܐ ܐܰܥܠܰܝّܶܗ ܘܗܶܫ ܝܶܫܽܘܥ ܠܰܐ ܐܬ̥ܺܝ ܗ̄ܘܰܐ ܠܓܰܒܰܝّܶܗ. 18ܘܽܗ̄ܘ ܝܰܡܳܐ ܩܰܝ݄ܡ ܐܰܥܠܰܝّܶܗ ܡܺܐܝܕ̥ܶܗ ܕܗܰܘܰܐ ܚܺܝܨܬܳܐ ܩܰܝܺܝܡܳܐ ܗ̄ܘܰܐ. 19ܘ݄ܡܗܰܠܰܟّ̥ܶܗ ܡܶܕܶܐ ܐܰܪܒܥܳܐ‐ܚܰܡܫܳܐ ܡܺܝ̈ܠܶܐ ܘ݄ܚܙܰܠّܶܗ ܝܶܫܽܘܥ ܡܗܰܠܟ̥ܳܢܳܐ ܥܰܠ ܗ̄ܺܝ ܝܰܡܬ̥ܳܐ. ܘܺܗ̄ܝ ܢܰܩܠܐ ܕ݄ܡܩܰܪܰܒ̥ ܠܶܗ ܡܺܗ̄ܝ ܣܦܺܝܢ̱ܬܰܬّ̥ܶܗ، ܙܰܝܺܝܥܺܝ. 20ܘܗܺܝّܶܗ ܝܶܫܽܘܥ ܐܡ݄ܪ ܠܰܗ ܠّܶܗ: ”ܐܳܢܳܐ ܐ̱ܢܳܐ، ܠܳܐ ܙܰܝܥܺܝܬܽܘ!“ 21ܘܰܐܒܺܝܥܺܝ ܕܳܗ̄ܘܶܐ ܐܰܥܡܰܝّܶܗ ܒܺܗ̄ܝ ܣܦܺܝܢ̱ܬܳܐ. ܘܒܺܗ̄ܝ ܫܳܥܬ̥ܰܝܕ̥ܰܗ، ܗ̄ܺܝ ܣܦܺܝܢ̱ܬܳܐ ܡܰܛܝܳܐ ܠܺܗ̄ܝ ܐܰܪܥܳܐ، ܗܰܝܳܐ ܕ݄ܐܙّ݄ܢ ܗ̄ܘܰܘ̱ ܐܶܠܰܗ.
ܗ̄ܰܢ ܢܳܫ̈ܶܐ ܟ݄ܐܒܥܺܝ ܝܶܫܽܘܥ
22ܘܒܽܗ̄ܘ ܝܰܘܡܳܐ ܕܒ݄ܬ̥ܪܶܗ، ܗ̄ܰܢ ܢܳܫ̈ܶܐ ܕܦܰܝܺܝܫܺܝ ܗ̄ܘܰܘ̱ ܒܽܗ̄ܘ ܓܰܒܳܐ ܚܪܶܢܳܐ ܕܽܗ̄ܘ ܝܰܡܳܐ ܚܙܰܠّܶܗ ܕܠܰܝܬ ܣܦܺܝܢ̱ܬܳܐ ܚܪܶܬܳܐ ܬܰܡܳܐ، ܐܶܠܳܐ ܗܰܝܳܐ ܕܪܰܒ̥ܺܝܟ̥ܺܝ ܐܶܒܰܗ ܗ̄ܰܬّܰܠܡܺܝܕ̥̈ܰܝܕ̥ܶܗ، ܘܝܶܫܽܘܥ ܠܳܐ ܪܰܒ̥݄ܟ̥ ܗ̄ܘܰܐ ܐܰܥܡܰܝّܶܗ ܒܺܗ̄ܝ ܣܦܺܝܢ̱ܬܳܐ. 23ܘܰܐܬ̥݄ܢ ܗ̄ܘܰܘ̱ ܣܦܺܝܢ̈ܳܬ̥ܳܐ ܚܪ̈ܶܢܶܐ ܡܶܢ̱ ܛܺܒܶܪܺܝܳܘܣ (ܘܟܰܠ݄ܢ) ܥܰܠ ܗ̄ܽܘ ܓܰܒܳܐ ܕܺܗ̄ܝ ܕܽܘܟܬ̥ܰܝܳܐ ܕܰܐܟ̥݄ܠّܶܗ ܐܶܒܰܗ ܠܰܚܡܳܐ ܕ݄ܡܒܰܪܰܟ̥ ܠܶܗ ܝܶܫܽܘܥ. 24ܘܺܗ̄ܝ ܢܰܩܠܐ ܕ݄ܚܙܰܠّܶܗ ܗ̄ܰܢ ܢܳܫ̈ܰܢ݄ܟ ܕܠܰܝ̱ܬ ܝܳܐ ܬܰܡܳܐ ܝܶܫܽܘܥ ܘܠܳܐ ܗ̄ܰܬّܰܠܡܺܝܕ̥̈ܰܝܕ̥ܶܗ، ܪܰܒ̥ܺܝܟ̥ܺܝ ܒ݄ܣܦܺܝܢ̈ܳܬ̥ܳܐ ܘܰܐܬ̥݄ܢ ܠ݄ܟܦܰܪܢܰܚܽܘܡ، ܘܟܳܪܟ̥ܺܝ ܗ̄ܘܰܘ̱ ܥܰܠ ܝܶܫܽܘܥ.
ܝܶܫܽܘܥ ܗ̄ܽܘ ܠܰܚܡܳܐ ܕܰܚّܰܝ̈ܶܐ ܝܳܐ
25ܘܺܗ̄ܝ ܢܰܩܠܐ ܕ݄ܚܙܰܠّܶܗ ܥܰܠ ܗ̄ܽܘ ܓܰܒܳܐ ܚܪܶܢܳܐ ܕܽܗ̄ܘ ܝܰܡܳܐ ܐܡ݄ܪّܰܗ ܠܶܗ: ”ܡܰܠܦܳܢܳܐ، ܐܶܡܰܐ ܐܰܬ̥ܰܬ ܠܰܗ̄ܪܟܶܐ؟“ 26ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܰܗ ܠّܶܗ: ”ܫܪܳܪܳܐ ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܟܟ݄ܪܟ̥ܺܝܬܽܘ ܐܰܥܠܺܝ ܠܳܐ ܥܰܠ ܕ݄ܚܙܰܠܟ̥ܽܘ ܐܳܬ̥ܘ̈ܳܬ̥ܳܐ، ܐܶܠܳܐ ܥܰܠ ܕܰܐܟ̥݄ܠܟ̥ܽܘ ܠܰܚܡܳܐ ܘܣܰܒ̥ܺܝܥܺܝܬܽܘ 27ܠܳܐ ܦܳܠܚܺܝܬܽܘ ܠܽܗ̄ܘ ܡܽܐܘܟܠܳܐ ܕ݄ܟܚܳܪܽܒ̥، ܐܶܠܳܐ ܠܽܗ̄ܘ ܡܽܐܘܟܠܳܐ ܕ݄ܟܦܳܝ݄ܫ ܠܚܰܝ̈ܶܐ ܕ݄ܠܥܳܠܰܡ، ܗܰܢܳܐ ܕܟܳܗ̄ܒܶܐ ܠܶܗ ܐܰܒܪܶܗ ܕܢܳܫܳܐ، ܥܰܠ ܕܰܐܠܳܗܳܐ ܗ̄ܽܘ ܐܰܒܳܐ ܚܬ̥݄ܡ ܠܶܗ.“ 28ܘܐܡ݄ܪّܰܗ ܠܶܗ: ”ܡ݄ܢ ܣܰܝܡܺܝܢܰܐ ܠܰܫܰܢ ܕ݄ܡܫܰܡܫܺܝܢܰܐ ܗ̄ܰܥܒܳܕ̥̈ܶܐ ܕܰܐܠܳܗܳܐ؟“ 29ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܰܗ ܠّܶܗ: ”ܗܰܢܳܐ ܝܳܐ ܗ̄ܽܘ ܥܒ̥ܳܕ̥ܳܐ ܕܰܐܠܳܗܳܐ ܕ݄ܡܗܰܝܡܢܺܝܬܽܘ ܒܰܗ̄ܘܳܐ ܕܗܺܝّܶܗ ܡܫܰܕܰܪ ܠܶܗ.“ 30ܘܐܡ݄ܪّܰܗ ܠܶܗ: ”ܡ݄ܢ ܐܳܬ̥ܳܐ (ܬܶܕܡܽܘܪܬܳܐ) ܟܣܰܝܡܰܬ ܕܚܳܙܺܝܢܰܐ ܘ݄ܡܗܰܝܡܢܺܝܢܰܐ ܐܶܒܳܟ̥؟ ܡ݄ܢ ܟܣܰܝܡܰܬ؟“ 31ܗ̄ܰܒّܰܒܳܢ̈ܰܝܕ̥ܰܢ ܐܰܟ̥݄ܠّܶܗ ܡܰܢܢܳܐ ܒܽܗ̄ܘ ܡܰܕ̥ܒܪܳܐ، ܐܟ̥ ܕ݄ܟܬ̥ܺܝܒ̥: ”ܠܰܚܡܳܐ ܡܺܗ̄ܝ ܫܡܰܝܳܐ ܗܽܒ̥ ܠܰܗ ܠّܶܗ ܕܳܐܟ̥ܠܺܝ.“ 32ܐܡ݄ܪ ܠܰܗ ܠّܶܗ ܝܶܫܽܘܥ: ”ܫܪܳܪܳܐ ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܠܰܝ̱ܬ ܗ̄ܘܰܐ ܡܽܘܫܶܐ ܕܗܽܒ̥ ܠܶܗ ܠܟ̥ܽܘ ܠܰܚܡܳܐ ܡܺܗ̄ܝ ܫܡܰܝܳܐ، ܐܶܠܳܐ ܗ̄ܽܘ ܐܰܒܰܝܕ̥ܺܝ ܟܳܗ̄ܒܰܠܟ̥ܽܘ ܠܰܚܡܳܐ ܕܽܗ̄ܘ ܫܪܳܪܳܐ ܡܺܗ̄ܝ ܫܡܰܝܳܐ. 33ܡܺܐܝܕ̥ܶܗ ܕܽܗ̄ܘ ܠܰܚܡܳܐ ܕܰܐܠܳܗܳܐ ܗܰܘܳܐ ܝܳܐ ܕܢܰܚ݄ܬ ܡܺܗ̄ܝ ܫܡܰܝܳܐ ܘܟܳܗ̄ܒܶܐ ܚܰܝ̈ܶܐ ܠܽܗ̄ܘ ܥܳܠܡܳܐ.“ 34ܐܡ݄ܪّܰܗ ܠܶܗ: ”ܡܳܪܰܢ، ܒܟܽܘܠ ܙܰܒܢܳܐ ܗܰܒ̥ ܠܰܢ ܗ̄ܽܘ ܠܰܚܡܰܢܳܐ.“
35ܐܡ݄ܪ ܠܰܗ ܠّܶܗ ܝܶܫܽܘܥ: ”ܐܳܢܳܐ ܐ̱ܢܳܐ ܗ̄ܽܘ ܠܰܚܡܳܐ ܕܰܚّܰܝ̈ܶܐ، ܡܰܢ ܕܳܐܬ̥ܶܐ ܠܓܰܒܺܝ ܠ݄ܐ ܓܟܳܦ݄ܢ، ܘܡܰܢ ܕ݄ܡܗܰܝܡ݄ܢ ܐܶܒܺܝ ܠ݄ܐ ܓܨܳܗܶܐ ܠܥܳܠܰܡ. 36ܐܶܠܳܐ ܐܡ݄ܪ ܠܺܝ ܠܟ̥ܽܘ: ܚܙܰܠܟ̥ܽܘ ܠܺܝ ܘܠ݄ܐ ܟ݄ܡܗܰܝܡܢܺܝܬܽܘ. 37ܟܽܘܠ ܕܗܽܒ̥ ܠܶܗ ܠܺܝ ܝܳܐ ܗ̄ܽܘ ܐܰܒܰܝܕ̥ܺܝ ܓܕܳܐܬ̥ܶܐ ܠܓܰܒܺܝ، ܘܡܰܢ ܕܳܐܬ̥ܶܐ ܠܓܰܒܺܝ ܠ݄ܐ ܟܡܰܘܦܰܩܢܶܗ ܠܰܪܒ̥ܰܠ. 38ܕܢܰܚ݄ܬ ܐ̱ܢܳܐ ܡܺܗ̄ܝ ܫܡܰܝܳܐ ܠܳܐ ܠܰܫܰܢ ܕܣܳܝܰܡ ܐ̱ܢܳܐ ܗ̄ܽܘ ܨܶܒܝܳܢܰܝܕ̥ܺܝ، ܐܶܠܳܐ ܕܣܳܝܰܡ ܐ̱ܢܳܐ ܗ̄ܽܘ ܨܶܒܝܳܢܳܐ ܕܡܰܢ ܕ݄ܡܫܰܕܰܪ ܠܶܗ ܠܺܝ. 39ܘܗܰܢܳܐ ܝܳܐ ܗ̄ܽܘ ܨܶܒܝܳܢܳܐ ܕܡܰܢ ܕ݄ܡܫܰܕܰܪ ܠܶܗ ܠܺܝ: ܟܽܘܠ ܕܗܽܒ̥ ܠܶܗ ܠܺܝ ܠ݄ܐ ܟ݄ܡܣܰܟܰܪܢܶܗ، ܐܶܠܳܐ ܟܡܰܩ݄ܡܢܶܗ ܒܽܗ̄ܘ ܝܰܘܡܳܐ ܚܰܪܳܝܳܐ. 40ܡܺܐܝܕ̥ܶܗ ܕܰܗ̄ܢܳܐ ܝܳܐ ܗ̄ܽܘ ܨܶܒܝܳܢܳܐ ܕܽܗ̄ܘ ܐܰܒܰܝܕ̥ܺܝ: ܗ̄ܽܘ ܚܰܕ̱ ܕܚܳܙܶܐ ܗ̄ܽܘ ܐܰܒܪܳܐ ܘ݄ܡܗܰܝܡ݄ܢ ܐܶܒܶܗ ܓܕܳܗ̄ܘ݄ܢ ܠܶܗ ܚܰܝ̈ܶܐ ܕ݄ܠܥܳܠܰܡ، ܘܳܐܢܳܐ ܓܡܰܩ݄ܡܢܶܗ ܒܽܗ̄ܘ ܝܰܘܡܳܐ ܚܰܪܳܝܳܐ.“
41ܘܰܝّܽܘܕ̥̈ܳܝܶܐ ܡܛܰܪܛܡܺܝ ܗ̄ܘܰܘ̱ ܐܰܥܠܶܗ ܥܰܠ ܕܐܡ݄ܪ ܠܶܗ: ”ܐܳܢܳܐ ܐ̱ܢܳܐ ܗ̄ܽܘ ܠܰܚܡܳܐ ܕܢܰܚ݄ܬ ܐ̱ܢܳܐ ܡܺܗ̄ܝ ܫܡܰܝܳܐ.“ 42ܘ݄ܐܡّܺܪ̱ܝ ܗ̄ܘܰܘ̱: ”ܠܰܝ̱ܬ ܝܳܐ ܗܰܢܳܐ ܝܶܫܽܘܥ ܗ̄ܽܘ ܐܰܒܪܳܐ ܕܝܰܘܣܶܦ، ܗܰܘܳܐ ܕܟܳܐܕ̥ܥܺܝܢܰܐ ܗ̄ܽܘ ܒܰܒܳܐ ܘܺܗ̄ܝ ܐܶܡܳܐ؟ ܐܰܝܕܰܪܒܳܐ ܗܰܢܳܐ ܟܳܐܡ݄ܪ ܕܢܰܚ݄ܬ ܐ̱ܢܳܐ ܡܺܗ̄ܝ ܫܡܰܝܳܐ؟“ 43ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܰܗ ܠّܶܗ: ”ܠܳܐ ܡܛܰܪܛܡܺܝܬܽܘ ܚܰܕ̱ ܥܰܡ ܚܰܕ̱. 44ܢܳܫܳܐ ܠܰܝܒܶܗ ܕܳܐܬ̥ܶܐ ܠܓܰܒܺܝ ܕܠܳܐ ܓܳܪܰܫ ܠܶܗ ܗ̄ܽܘ ܐܰܒܳܐ ܕ݄ܡܫܰܕܰܪ ܠܶܗ ܠܺܝ، ܘܳܐܢܳܐ ܓܡܰܩ݄ܡܢܶܗ ܒܽܗ̄ܘ ܝܰܘܡܳܐ ܚܰܪܳܝܳܐ. 45ܥܰܠ ܕܟ݄ܬ ܝܳܐ ܟܬ̥ܺܝܒ̥ܳܐ ܒܰܗ̄ܢ ܢܒܺܝ̈ܶܐ: ܐܰܠܳܗܳܐ ܟܡܰܘܠ݄ܦ ܠܟܘ̇ܠّܶܗ. ܗܰܢ ܢܰܩܠܐ، ܡܰܢ ܕܫܳܡ݄ܥ ܡܽܗ̄ܘ ܐܰܒܳܐ، ܘܝܳܠ݄ܦ ܡܶܢܶܗ، ܓܕܳܐܬ̥ܶܐ ܠܓܰܒܺܝ. 46ܘܢܳܫܳܐ ܠ݄ܐ ܟܚܳܙܶܐ ܗ̄ܽܘ ܐܰܒܳܐ، ܐܶܠܳܐ ܗܰܘܳܐ ܕܟ݄ܬ ܝܳܐ ܡܰܢ̱ ܐܠܳܗܳܐ، ܗܰܘܳܐ ܝܳܐ ܕ݄ܟܚܳܙܶܐ ܗ̄ܽܘ ܐܰܒܳܐ. 47ܫܪܳܪܳܐ ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܡܰܢ ܕ݄ܡܗܰܝܡ݄ܢ ܐܶܒܺܝ ܟ݄ܬ ܠܶܗ ܚܰܝ̈ܶܐ ܕ݄ܠܥܳܠܰܡ. 48ܐܳܢܳܐ ܐ̱ܢܳܐ ܗ̄ܽܘ ܠܰܚܡܳܐ ܕܰܚّܰܝ̈ܶܐ. 49ܗ̄ܰܒّܰܒܳܢ̈ܰܬ̥ܟ̥ܽܘ ܐܰܟ̥݄ܠّܶܗ ܡܰܢܢܳܐ ܒܽܗ̄ܘ ܡܰܕ̥ܒܪܳܐ ܐܶܠܳܐ ܡܰܝܺܝܬ̥ܺܝ، 50ܐܶܠܳܐ ܗܰܢܳܐ ܝܳܐ ܗ̄ܽܘ ܠܰܚܡܳܐ ܕܢܰܚ݄ܬ ܡܺܗ̄ܝ ܫܡܰܝܳܐ، ܕܢܳܫܳܐ ܐܳܟ̥݄ܠ ܡܶܢܶܗ ܠ݄ܐ ܓܡܳܝ݄ܬ̥. 51ܐܳܢܳܐ ܐ̱ܢܳܐ ܗ̄ܽܘ ܠܰܚܡܳܐ ܚܰܝܳܐ ܕܢܰܚ݄ܬ ܐ̱ܢܳܐ ܡܺܗ̄ܝ ܫܡܰܝܳܐ. ܘܶܐܢ ܢܳܫܳܐ ܐܳܟ̥݄ܠ ܡܽܗ̄ܘ ܠܰܚܡܰܢܳܐ ܓܚܳܝܶܐ ܗܳܠ ܥܳܠܰܡ. ܘܽܗ̄ܘ ܠܰܚܡܳܐ ܕܳܐܢܳܐ ܟܳܗ̄ܒܶܐ ܐ̱ܢܳܐ ܗ̄ܽܘ ܦܰܓ̥ܪܰܝܕ̥ܺܝ ܝܳܐ، ܠܰܫܰܢ ܗ̄ܰܚّܰܝ̈ܶܐ ܕܽܗ̄ܘ ܥܳܠܡܳܐ ܟܳܗ̄ܒܶܐ ܐ̱ܢܳܐ ܠܶܗ.“
52ܘܗܰܘܺܝ ܗ̄ܘܰܐ ܡܰܐܡܪܳܐ ܘܬܶܢܳܝܳܐ ܒܰܝܢ ܗ̄ܰܝّܽܘܕ̥̈ܳܝܶܐ ܘ݄ܐܡّܺܪ̱ܝ ܗ̄ܘܰܘ̱: ”ܗܰܢܳܐ ܐܰܝܕܰܪܒܳܐ ܟܺܝܒܶܗ ܕܳܗ̄ܒܶܐ ܠܰܢ ܗ̄ܽܘ ܦܰܓ̥ܪܰܝܕ̥ܶܗ ܕܳܐܟ̥ܠܺܝܢܰܐ؟“ 53ܘܝܶܫܽܘܥ ܐܡ݄ܪ ܠܰܗ ܠّܶܗ: ”ܫܪܳܪܳܐ ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܕܠ݄ܐ ܐܟ̥ܠܺܝܬܽܘ ܗ̄ܽܘ ܦܰܓ̥ܪܳܐ ܕܰܐܒܪܶܗ ܕܢܳܫܳܐ ܘ݄ܕܠ݄ܐ ܫܳܬܺܝܬܽܘ ܗ̄ܽܘ ܐܰܕܡܰܝܕ̥ܶܗ، ܠܰܝ̱ܬܟ̥ܽܘ ܚܰܝ̈ܶܐ ܒܢܰܦܫ̈ܰܝܟ̥ܽܘ. 54ܡܰܢ ܕܳܐܟ̥݄ܠ ܡܽܗ̄ܘ ܦܰܓ̥ܪܰܝܕ̥ܺܝ ܘܫܳܬܶܐ ܡܽܗ̄ܘ ܐܰܕܡܰܝܕ̥ܺܝ ܟ݄ܬ ܠܶܗ ܚܰܝ̈ܶܐ ܕ݄ܠܥܳܠܰܡ، ܘܳܐܢܳܐ ܓܡܰܩ݄ܡܢܶܗ ܒܽܗ̄ܘ ܝܰܘܡܳܐ ܚܰܪܳܝܳܐ. 55ܡܺܐܝܕ̥ܶܗ ܕܽܗ̄ܘ ܦܰܓ̥ܪܰܝܕ̥ܺܝ ܒ݄ܫܪܳܪܳܐ ܡܽܐܘܟܠܳܐ ܝܳܐ، ܘܽܗ̄ܘ ܐܰܕܡܰܝܕ̥ܺܝ ܒ݄ܫܪܳܪܳܐ ܫܬܳܝܳܐ ܝܳܐ. 56ܡܰܢ ܕܳܐܟ̥݄ܠ ܗ̄ܽܘ ܦܰܓ̥ܪܰܝܕ̥ܺܝ ܘܫܳܬܶܐ ܗ̄ܽܘ ܐܰܕܡܰܝܕ̥ܺܝ ܟܦܳܝ݄ܫ ܐܶܒܺܝ ܘܳܐܢܳܐ ܐܶܒܶܗ. 57ܘܒܶܗ ܐܰܝܕܰܪܒܳܐ ܡܫܰܕܰܪ ܠܶܗ ܠܺܝ ܗ̄ܽܘ ܐܰܒܳܐ ܚܰܝܳܐ، ܚܰܝܳܐ ܐ̱ܢܳܐ ܠܰܫܰܢ ܗ̄ܽܘ ܐܰܒܳܐ، ܘܡܰܢ ܕܳܐܟ̥ܶܠ ܠܺܝ ܣܬܶܝ ܓܚܳܝܶܐ ܠܰܫܰܢܺܝ. 58ܗܰܢܳܐ ܝܳܐ ܗ̄ܽܘ ܠܰܚܡܳܐ ܕܢܰܚ݄ܬ ܡܺܗ̄ܝ ܫܡܰܝܳܐ، ܠܰܝ̱ܬܝܳܐ ܐܟ̥ ܕܽܗ̄ܘ ܡܰܢܢܳܐ ܕܰܐܟ̥݄ܠّܶܗ ܗ̄ܰܒّܰܒܳܢ̈ܰܬ̥ܟ̥ܽܘ ܘܡܰܝܺܝܬ̥ܺܝ. ܡܰܢ ܕܳܐܟ̥݄ܠ ܗ̄ܽܘ ܠܰܚܡܰܢܳܐ ܓܚܳܝܶܐ ܠܥܳܠܰܡ.“
59ܐܡ݄ܪ ܠܶܗ ܗܰܢܺܝ ܒܺܗ̄ܝ ܟ̥ܢܽܘܫܬܳܐ ܗ̄ܺܝ ܢܰܩܠܐ ܕܡܰܘܠܰܦ ܗ̄ܘܰܐ ܒ݄ܟܦܰܪܢܰܚܽܘܡ.
ܗ̄ܰܡّܰܐܡܪ̈ܶܐ ܕܟ݄ܬܢܶܝ ܚܰܝ̈ܶܐ ܕ݄ܠܥܳܠܰܡ
60ܘܓ̥ܰܠܰܒܶܐ ܡܰܢ̱ ܬّܰܠܡܺܝܕ̥̈ܰܝܕ̥ܶܗ ܕܫܰܡܺܝܥܺܝ ܐܡ݄ܪّܶܗ: ”ܩܰܫܝܳܐ ܝܳܐ ܗ̄ܽܘ ܡܰܐܡܪܰܢܳܐ، ܡܰܢ ܟܺܝܒܶܗ ܕܫܳܡܰܥ ܠܶܗ؟“
61ܘܝܶܫܽܘܥ ܠܪܽܘܚܶܗ ܐܰܕ̥݄ܥ ܕܰܬّܰܠܡܺܝܕ̥̈ܰܝܕ̥ܶܗ ܡܛܰܪܛܰܡّܶܗ ܥܰܠ ܗ̄ܽܘ ܡܰܐܡܪܰܝܕ̥ܶܗ، ܘܐܡ݄ܪ ܠܰܗ ܠّܶܗ: ”ܗ̄ܽܘ ܡܰܐܡܪܰܢܳܐ ܛܪܶܐ ܠܰܗ ܠܟ̥ܽܘ ܕܡ݄ܦܠܳܓ̥ܺܝܬܽܘ؟ 62ܐܰܝܕܰܪܒܳܐ ܗ̄ܺܝ ܢܰܩܠܐ ܕܚܳܙܺܝܬܽܘ ܐܰܒܪܶܗ ܕܢܳܫܳܐ ܟܣܳܠ݄ܩ ܠܽܗ̄ܘ ܐܰܬ̥ܪܳܐ ܕܟ݄ܬ ܗ̄ܘܰܐ ܐܶܒܶܗ ܡܶܢ̱ ܡܶܩ݄ܕ̱ܡ؟ 63ܗ̄ܺܝ ܪܽܘܚܳܐ ܝܳܐ ܕܟܳܗ̄ܒܳܐ ܚܰܝ̈ܶܐ، ܗ̄ܽܘ ܦܰܓ̥ܪܳܐ ܠ݄ܐ ܟ݄ܡܗܰܢܶܐ ܒܡܶܕܶܐ. ܘܽܗ̄ܘ ܡܰܐܡܪܳܐ ܕܐܡ݄ܪ ܠܺܝ ܠܟ̥ܽܘ ܪܽܘܚܳܐ ܘܚܰܝ̈ܶܐ ܝܳܐ. 64ܐܶܠܳܐ ܟܺܝܬ ܢܳܫ̈ܶܐ ܡ݄ܢܟ̥ܽܘ ܕܠ݄ܐ ܟ݄ܡܗܰܝܡܢܺܝ.“ ܡܺܐܝܕ̥ܶܗ ܕܝܶܫܽܘܥ ܡܶܢ̱ ܡܶܩ݄ܕ̱ܡ ܐܳܕ̥ܰܥ ܗ̄ܘܰܐ ܡܰܢ ܢܶܝ ܗܰܢ݄ܟ ܕܠ݄ܐ ܟ݄ܡܗܰܝܡܢܺܝ، ܘܡܰܢܝܳܐ ܗܰܘܳܐ ܕܡܰܫܠܰܡ ܠܶܗ. 65ܘܐܡ݄ܪ ܠܰܗ ܠّܶܗ: ”ܡܰܗ̄ܘܟ̥ܰܐ ܐܡ݄ܪ ܠܺܝ ܠܟ̥ܽܘ: ܢܳܫܳܐ ܠܰܝܒܶܗ ܕܳܐܬ̥ܶܐ ܠܓܰܒܺܝ ܕܠܳܐ ܡܺܝܬܰܗܒ̥ܶܐ ܠܶܗ ܡܽܗ̄ܘ ܐܰܒܰܝܕ̥ܺܝ.“ 66ܥܰܠ ܗ̄ܽܘ ܡܰܐܡܪܰܢܳܐ، ܓ̥ܰܠܰܒܶܐ ܡܰܢ̱ ܬّܰܠܡܺܝܕ̥̈ܰܝܕ̥ܶܗ ܛܪܰܠّܶܗ ܡܶܢܶܗ ܘܠܳܐ ܦܰܝ݄ܫ ܡܗܰܠܟ̥ܺܝ ܐܰܥܡܶܗ. 67ܘܐܡ݄ܪ ܠܶܗ ܝܶܫܽܘܥ ܠܰܬܪܰܥܣܰܪܰܝܕ̥ܶܗ: ”ܘܗܰܬܽܘ ܣܬܶܝ ܠ݄ܐ ܟ݄ܐܒܥܺܝܬܽܘ ܕ݄ܐܙّܳܟ̥ܽܘ؟“ 68ܡܰܕܥܰܪ ܠܶܗ ܫܶܡܥܽܘܢ ܟܶܐܦܳܐ ܘܐܡ݄ܪ ܠܶܗ: ”ܡܳܪܝ، ܓܰܒ ܡܰܢ ܓܕ݄ܐܙّܰܢ، ܘܰܡّܰܐܡܪ̈ܶܐ ܕܰܚّܰܝ̈ܶܐ ܕ݄ܠܥܳܠܰܡ ܟ݄ܬ ܠܳܟ̥. 69ܘܰܐܚܢܰܐ ܡܗܰܝܡܰܢ ܠܰܢ ܘܰܐܕ̥ܺܝܥܺܝܢܰܐ ܕܗܰܬ ܗ̄ܰܬ ܡܫܺܝܚܳܐ ܗ̄ܽܘ ܐܰܒܪܳܐ ܕܰܐܠܳܗܳܐ ܚܰܝܳܐ.“ 70ܝܶܫܽܘܥ ܐܡ݄ܪ ܠܰܗ ܠّܶܗ: ”ܠܳܐ ܐܳܢܳܐ ܬܪܰܥܣܰܪ ܓܒܶܐ ܠܺܝ ܠܟ̥ܽܘ؟ ܘܚܰܕ̱ ܡ݄ܢܟ̥ܽܘ ܣܳܛܳܢܳܐ ܝܳܐ؟“ 71ܘܳܐܡܰܪ ܗ̄ܘܰܐ ܥܰܠ ܝܺܗܽܘܕ̥ܳܐ ܐܰܒܪܶܗ ܕܫܶܡܥܽܘܢ ܣܟ̥ܰܪܝܽܘܛܳܐ، ܡܺܐܝܕ̥ܶܗ ܕܗܺܝّܶܗ ܗ̄ܘܰܐ ܕܓ݄ܕܡܰܫܠܰܡ ܠܶܗ، ܘܗܺܝّܶܗ ܚܰܕ̱ ܡܰܢ̱ ܬܪܰܥܣܰܪ ܗ̄ܘܰܐ.
Valið núna:
ܡܓܰܠܝܘܢ ܕܝܘܚܢܢ 6: ܟܬܒܐ
Áherslumerki
Deildu
Afrita
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation