ܡܓܰܠܝܘܢ ܕܝܘܚܢܢ 4
4
ܝܶܫܽܘܥ ܘܺܗ̄ܝ ܐܰܢ̱ܬ̥ܬܳܐ ܫܳܡܪܳܝܬܳܐ: ܡܰܝ̈ܶܐ ܕܰܚّܰܝ̈ܶܐ ܕ݄ܠܥܳܠܰܡ
1ܘܰܐܕ̥݄ܥ ܝܶܫܽܘܥ ܕܰܦܪ̈ܺܝܫܶܐ ܫܰܡܺܝܥܺܝ ܕܣ݄ܡ ܠܶܗ ܓ̥ܰܠܰܒܶܐ ܬܰܠܡܺܝܕ̥̈ܶܐ، ܘ݄ܟܡܰܥܡ݄ܕ̥ ܙ݄ܕ ܡܶܢ̱ ܝܽܘܚܰܢܳܢ؛ 2ܘܝܶܫܽܘܥ ܠܳܐ ܗܺܝّܶܗ ܡܰܥܡܰܕ̥ ܗ̄ܘܰܐ، ܐܶܠܳܐ ܗ̄ܰܬّܰܠܡܺܝܕ̥̈ܰܝܕ̥ܶܗ. 3ܘ݄ܛܪܶܐ ܠܶܗ ܠܺܝܗܽܘܕ̥، ܘܕܰܥ݄ܪ ܐܰܙّܶܗ ܠܽܗ̄ܘ ܓܠܺܝܠܳܐ. 4ܘܳܐܒܰܥ ܗ̄ܘܰܝ ܠܶܗ ܕܳܐܬ̥ܶܐ ܕܥܳܒ݄ܪ ܒܽܗ̄ܘ ܐܰܬ̥ܪܳܐ ܕܰܫّܳܡܪ̈ܳܝܶܐ.
5ܘܰܐܬ̥ܺܝ ܠ݄ܡܕ̥ܺܝܢ̱ܬܳܐ ܕ݄ܟܡ݄ܩܪܳܝܳܐ ܫܳܟ̥ܰܪ ܕܟ݄ܬ ܝܳܐ ܥܰܠ ܗ̄ܽܘ ܓܰܒܳܐ ܕܺܗ̄ܝ ܩܪܺܝܬ̥ܳܐ، ܗܰܝܳܐ ܕܝܰܥܩܽܘܒ ܗܺܝܒ̥ܳܐ ܗ̄ܘܰܝ ܠܶܗ ܠܝܰܘܣܶܦ ܗ̄ܽܘ ܐܰܒܪܳܐ، 6ܘܟ݄ܬ ܗ̄ܘܰܐ ܬܰܡܳܐ ܡܥܺܝܢܳܐ ܕܡܰܝ̈ܶܐ ܕܝܰܥܩܽܘܒ. ܘܗܺܝّܶܗ ܝܶܫܽܘܥ ܒܰܛ݄ܠ ܗ̄ܘܰܐ ܡܽܗ̄ܘ ܥܰܡܠܳܐ ܕܽܗ̄ܘ ܕܰܪܒܳܐ، ܘܝܰܬܽܒ̥ ܥܰܠ ܗ̄ܽܘ ܡܥܰܝܢܳܐ، ܘܽܗ̄ܘ ܙܰܒܢܳܐ ܦܰܠܓܶܗ ܕܝܰܘܡܳܐ ܗ̄ܘܰܐ. 7ܘܰܐܬ̥ܝܳܐ ܐܰܢ̱ܬ̥ܬܳܐ ܡܶܢ̱ ܫܳܡܪܺܝܢ ܕܡܳܠܝܳܐ ܡܰܝ̈ܶܐ، ܘܐܡ݄ܪ ܠܶܗ ܠܰܗ ܝܶܫܽܘܥ: ”ܗܰܒ̥ ܠܺܝ ܡܰܝ̈ܶܐ ܕܫܳܬܶܐ ܐ̱ܢܳܐ.“ 8ܘܰܬّܰܠܡܺܝܕ̥̈ܰܝܕ̥ܶܗ ܥܰܒܺܝܪܺܝ ܗ̄ܘܰܘ̱ ܠܺܗ̄ܝ ܡܕ̥ܺܝܢ̱ܬܳܐ ܕܙܰܒ̥ܢܢّܶܗ ܡܽܐܘܟܠܳܐ.
9ܟܳܐܡّܳܪ̱ܐ ܠܶܗ ܗ̄ܺܝ ܐܰܢ̱ܬ̥ܬܰܝܳܐ ܗ̄ܺܝ ܫܳܡܪܳܝܬܳܐ: ”ܐܰܝܕܰܪܒܳܐ، ܗܰܬ ܝܽܘܕ̥ܳܝܳܐ ܗܰܬ، ܘܡܶܢܺܝ ܟܳܐܒܥܰܬ ܕܫܳܬܰܬ؟ ܘܳܐܢܳܐ ܕܟ݄ܬ ܐ̱ܢܳܐ ܐܰܢ̱ܬ̥ܬܳܐ ܫܳܡܪܳܝܬܳܐ؟“ ܡܺܐܝܕ̥ܶܗ ܕܰܝّܽܘܕ̥̈ܳܝܶܐ ܠ݄ܐ ܟܳܗ̄ܒ݄ܢ ܘܫܳܩܠܺܝ ܥܰܡ ܗ̄ܰܫّܳܡܪ̈ܳܝܶܐ. 10ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܶܗ ܠܰܗ: ”ܕܳܐܕ̥ܥܰܬ ܗ̄ܘܰܐ ܗ̄ܺܝ ܡܰܘܗܰܒܬܳܐ ܕܰܐܠܳܗܳܐ، ܘܡܰܢܝܳܐ ܗܰܢܳܐ ܕܐܡ݄ܪ ܠܶܗ ܠܰܟ̥ ܗܰܒ̥ ܠܺܝ ܕܫܳܬܶܐ ܐ̱ܢܳܐ، ܗܰܬ ܡܫܰܐܠܰܬ ܗ̄ܘܰܝ ܠܶܗ ܘܳܗ̄ܒܶܐ ܗ̄ܘܰܝ ܠܰܟ̥ ܡܰܝ̈ܶܐ ܚܰܝ̈ܶܐ.“ 11ܟܳܐܡّܳܪ̱ܐ ܠܰܗ ܗ̄ܺܝ ܐܰܢ̱ܬ̥ܬܰܝܳܐ: ”ܡܳܪܝ، ܠܳܐ ܕܰܘܠܳܐ ܟܺܝܬ ܠܳܟ̥، ܘܺܗ̄ܝ ܒܺܐܪܳܐ ܥܰܡܽܘܩܬܳܐ ܝܳܐ، ܡܰܐܝܟܳܐ ܠܳܟ̥ ܡܰܝ̈ܶܐ ܚܰܝ̈ܶܐ؟ 12ܩܰܝ ܗܰܬ ܪܰܒ ܡܽܗ̄ܘ ܒܰܒܰܢ ܝܰܥܩܽܘܒ ܗܰܬ؟ ܗܰܘܳܐ ܕܗܺܝّܶܗ ܗܽܒ̥ ܠܶܗ ܠܰܢ ܗ̄ܺܝ ܒܺܐܪܰܬ̥ܶܐ، ܘܗܺܝّܶܗ ܡܶܢܰܗ ܫܬܶܐ ܠܶܗ، ܘܰܗ̄ܢ ܐܰܒܢ̈ܰܝܕ̥ܶܗ ܘܰܥ̈ܘܳܢܰܝܕ̥ܶܗ.“
13ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܶܗ ܠܰܗ: ”ܟܽܘܠ ܕܫܳܬܶܐ ܡܰܢ̱ ܡّܰܝ̈ܰܢܺܝ ܢܰܩܠܐ ܚܪܶܬܳܐ ܓܨܳܗܶܐ. 14ܘܟܽܘܠ ܕܫܳܬܶܐ ܡܰܢ̱ ܡّܰܝ̈ܶܐ ܕܳܐܢܳܐ ܟܳܗ̄ܒܶܐ ܐ̱ܢܳܐ ܠ݄ܐ ܓܨܳܗܶܐ ܠܥܳܠܰܡ، ܐܶܠܳܐ ܗ̄ܰܡّܰܝ̈ܰܢ݄ܟ ܕܳܐܢܳܐ ܟܳܗ̄ܒܶܐ ܐ̱ܢܳܐ ܓܕܳܗ̄ܘ݄ܢ ܐܶܒܶܗ ܡܥܰܝܢܳܐ ܕܡܰܝ̈ܶܐ ܕܢܳܒܥܺܝ ܠܚܰܝ̈ܶܐ ܕܰܠܥܳܠܰܡ.“ 15ܟܳܐܡّܳܪ̱ܐ ܠܶܗ ܗ̄ܺܝ ܐܰܢ̱ܬ̥ܬܰܝܳܐ: ”ܡܳܪܝ! ܗܰܒ̥ ܠܺܝ ܡܰܢ̱ ܡّܰܝ̈ܰܢܺܝ، ܕܠܳܐ ܢܰܩܠܐ ܚܪܶܬܳܐ ܨܳܗܝܳܐ ܐ̱ܢܳܐ، ܘܠ݄ܐ ܐܬ̥ܝܳܐ ܐ̱ܢܳܐ ܓܳܪܫܳܐ ܐ̱ܢܳܐ ܡܰܝ̈ܶܐ ܡܰܗ̄ܪܟܶܐ.“
16ܐܡ݄ܪ ܠܶܗ ܠܰܗ ܝܶܫܽܘܥ: ”ܙܰܟ̥ ܩܪܰܝ ܠܽܗ̄ܘ ܓܰܒ̥ܪܰܝܕ̥ܰܟ̥، ܘܬܰܟ̥ ܠܰܗ̄ܪܟܶܐ.“ 17ܐܡ݄ܪ ܠܰܗ ܠܶܗ: ”ܠܰܝ̱ܬ ܠܺܝ ܓܰܒ̥ܪܳܐ.“ ܘܐܡ݄ܪ ܠܶܗ ܠܰܗ ܝܶܫܽܘܥ: ”ܛܳܒ̥ܳܐ ܕܐܡ݄ܪ ܠܰܟ̥ ܕܠܰܝ̱ܬ ܠܺܝ ܓܰܒ̥ܪܳܐ، 18ܥܰܠ ܕܟ݄ܬ ܗ̄ܘܰܝ ܠܰܟ̥ ܚܰܡܫܳܐ ܓܰܒ̥ܪ̈ܶܐ، ܘܗܰܢܳܐ ܕܟ݄ܬ ܠܰܟ̥ ܐܳܥܕܳܐ ܠܰܝ̱ܬ ܝܳܐ ܗ̄ܽܘ ܓܰܒ̥ܪܰܝܕ̥ܰܟ̥. ܗܰܢܳܐ ܫܪܳܪܳܐ ܐܡ݄ܪ ܠܰܟ̥.“ 19ܘܐܡ݄ܪ ܠܰܗ ܗ̄ܺܝ ܐܰܢ̱ܬ̥ܬܳܐ: ”ܡܳܪܝ! ܟܚ݄ܙܝܳܐ ܐ̱ܢܳܐ ܕ݄ܢܒܺܝܳܐ ܗܰܬ، 20ܗ̄ܰܒّܰܒܳܢ̈ܰܝܕܰܢ ܒܽܗ̄ܘ ܛܽܘܪܰܢܳܐ ܣܓ̥݄ܕّܶܗ، ܘܗܰܬܽܘ ܟ݄ܐܡّܺܪ̱ܝܬܽܘ ܒܽܐܘܪܶܫܠܶܡ ܝܳܐ ܗ̄ܽܘ ܐܰܬ̥ܪܳܐ ܕܶܐܒܶܗ ܟܳܐܒ݄ܥ ܕܣܳܓ̥ܕܺܝܢܰܐ.“ 21ܘܐܡ݄ܪ ܠܶܗ ܠܰܗ ܝܶܫܽܘܥ: ”ܐܰܢ̱ܬ̥ܬܳܐ، ܡܗܰܝܡ݄ܢ ܠܺܝ، ܓܕܳܐܬ̥ܝܳܐ ܗ̄ܺܝ ܫܳܥܬ̥ܳܐ، ܠܳܐ ܒܽܗ̄ܘ ܛܽܘܪܰܢܳܐ ܘܠܳܐ ܒܽܐܘܪܶܫܠܶܡ ܓܣܳܓ̥ܕܺܝܬܽܘ ܠܽܗ̄ܘ ܐܰܒܳܐ. 22ܗܰܬܽܘ ܟܣ݄ܓ̥ܕܺܝܬܽܘ ܠܽܗ̄ܘ ܡܶܕܶܐ ܕܠ݄ܐ ܟ݄ܐܕ̥ܥܺܝܬܽܘ، ܐܶܠܳܐ ܐܰܚܢܰܐ ܟܣ݄ܓ̥ܕܺܝܢܰܐ ܠܽܗ̄ܘ ܡܶܕܶܐ ܕܟܳܐܕ̥ܥܺܝܢܰܐ، ܥܰܠ ܕܰܚّܰܝ̈ܶܐ ܡܰܢ̱ ܝّܽܘܕ̥̈ܳܝܶܐ ܢܶܝ. 23ܐܶܠܳܐ ܓܕܳܐܬ̥ܝܳܐ ܗ̄ܺܝ ܫܳܥܬ̥ܳܐ، ܘܳܐܥܕܳܐ ܝܳܐ، ܗ̄ܰܣّܳܓ̥ܽܘܕ̈ܶܐ ܫܰܪܺܝܪ̈ܶܐ ܓܣܳܓ̥ܕܺܝ ܠܽܗ̄ܘ ܐܰܒܳܐ ܒܺܗ̄ܝ ܪܽܘܚܳܐ ܘܒܽܗ̄ܘ ܫܪܳܪܳܐ، ܘܽܗ̄ܘ ܐܰܒܳܐ ܣܬܶܝ ܗܰܘܟ̥ܰܐ ܣܳܓ̥ܽܘܕ̈ܶܐ ܟܳܐܒ݄ܥ. 24ܡܺܐܝܕ̥ܶܗ ܕܪܽܘܚܳܐ ܝܳܐ ܐܰܠܳܗܳܐ، ܘܰܐܝܢܰܐ ܕܣܳܓ̥ܕܺܝ ܠܶܗ ܒܺܗ̄ܝ ܪܽܘܚܳܐ ܘܒܽܗ̄ܘ ܫܪܳܪܳܐ ܠܳܙ݄ܡ ܕܣܳܓ̥ܕܺܝ.“ 25ܐܡ݄ܪ ܠܰܗ ܗ̄ܺܝ ܐܰܢ̱ܬ̥ܬܳܐ: ”ܟ݄ܐܕ̥ܥܳܐ ܐ̱ܢܳܐ ܕ݄ܡܫܺܝܚܳܐ ܐܰܬ̥ܳܝܳܐ ܝܳܐ، ܘܡ݄ܐ ܕܰܐܬ̥ܺܝ، ܗܺܝّܶܗ ܓܡܰܘܠܰܦ ܠܰܢ ܟܽܘܠ ܡܶܕܶܐ.“ 26ܐܡ݄ܪ ܠܶܗ ܠܰܗ ܝܶܫܽܘܥ: ”ܐܳܢܳܐ ܐ̱ܢܳܐ ܕ݄ܟܡ݄ܫܓ̥ܰܠ ܐ̱ܢܳܐ ܐܰܥܡܰܟ̥.“ 27ܘܗܺܝّܶܗ ܟܡ݄ܫܓ̥݄ܠ، ܐܰܬ̥݄ܢ ܗ̄ܰܬّܰܠܡܺܝܕ̥̈ܰܝܕ̥ܶܗ، ܘܡܺܝܕܰܘܡܪܺܝ ܗ̄ܘܰܘ̱ ܕܡ݄ܫܓ̥݄ܠ ܗ̄ܘܰܐ ܥܰܡ ܐܰܢ̱ܬ̥ܬܳܐ. ܐܶܠܳܐ ܢܳܫܳܐ ܠܳܐ ܐܡ݄ܪ ܠܶܗ ܠܶܗ ”ܡ݄ܢ ܟ݄ܐܒܥܰܬ؟“ ܐܰܘ ”ܡ݄ܢܝܳܐ ܕ݄ܟܡ݄ܫܓ̥ܳܠܰܬ ܐܰܥܡܰܗ؟“ 28ܘܺܗ̄ܝ ܐܰܢ̱ܬ̥ܬܳܐ ܛܪܶܐ ܠܰܗ ܗ̄ܽܘ ܓܕ̥ܳܢܰܝܕ̥ܰܗ ܘܰܐܙّܰܗ ܠܺܗ̄ܝ ܡܕ̥ܺܝܢ̱ܬܳܐ، ܘܐܡ݄ܪ ܠܰܗ ܠܰܗ̄ܢ ܢܳܫ̈ܶܐ: 29”ܬܳܟ̥ܽܘ ܚܙܰܝܽܘ ܓܰܒ̥ܪܳܐ ܕܐܡ݄ܪ ܠܶܗ ܠܺܝ ܟܽܘܠ ܡܶܕܶܐ ܕܣ݄ܡ ܠܺܝ. ܟܳܗ̄ܘܶܐ ܕܳܗ̄ܘܶܐ ܗܺܝّܶܗ ܡܫܺܝܚܳܐ؟“ 30ܘܢܰܦܺܝܩܺܝ ܗ̄ܰܢ ܢܳܫ̈ܶܐ ܡܺܗ̄ܝ ܡܕ̥ܺܝܢ̱ܬܳܐ ܘܰܐܬ̥݄ܢ ܠܓܰܒܶܗ.
31ܘܒܽܗ̄ܘ ܙܰܒܢܰܢܳܐ، ܗ̄ܰܬّܰܠܡܺܝܕ̥̈ܰܝܕ̥ܶܗ ܐ݄ܒܥܺܝ ܗ̄ܘܰܘ̱ ܡܶܢܶܗ ܘ݄ܐܡّܺܪ̱ܝ ܠܶܗ: ”ܡܰܠܦܳܢܳܐ، ܐܰܟ̥ܽܘܠ.“ 32ܘܗܺܝّܶܗ ܐܡ݄ܪ ܠܰܗ ܠّܶܗ: ”ܟ݄ܬ ܠܺܝ ܡܽܐܘܟܠܳܐ ܕܳܐܟ̥ܰܠ ܐ̱ܢܳܐ ܕܗܰܬܽܘ ܠ݄ܐ ܟ݄ܐܕ̥ܥܺܝܬܽܘ.“ 33ܗ̄ܰܬّܰܠܡܺܝܕ̥̈ܶܐ ܐ݄ܡّܺܪ̱ܝ ܗ̄ܘܰܘ̱ ܠ݄ܚܕ̥ܳܕ̥̈ܶܐ: ”ܟܳܗ̄ܘܶܐ ܕܢܳܫܳܐ ܡܰܝܬܶܐ ܠܶܗ ܠܶܗ ܡܶܕܶܐ ܕܳܐܟ̥݄ܠ؟“ 34ܘܐܡ݄ܪ ܠܰܗ ܠّܶܗ ܝܶܫܽܘܥ: ”ܗ̄ܽܘ ܡܽܐܘܟܠܰܝܕ̥ܺܝ ܗܰܢܳܐ ܝܳܐ ܕܣܳܝܰܡ ܐ̱ܢܳܐ ܗ̄ܽܘ ܨܶܒܝܳܢܳܐ ܕܡܰܢ ܕ݄ܡܫܰܕܰܪ ܠܶܗ ܠܺܝ، ܘ݄ܡܟܰܡܰܠ ܐ̱ܢܳܐ ܗ̄ܽܘ ܥܒ̥ܳܕܰܝܕ̥ܶܗ. 35ܠܳܐ ܗܰܬܽܘ ܟ݄ܐܡّܺܪ̱ܝܬܽܘ: ܒ݄ܬ̥݄ܪ ܐܰܪܒܥܳܐ ܝܰܪ̈ܚܶܐ ܓܕܳܐܬ̥ܶܐ ܗ̄ܽܘ ܚܨܳܕܳܐ؟ ܟܰܐܠܺܝ ܟܳܐܡܰܪ ܐ̱ܢܳܐ ܠܟ̥ܽܘ: ܚܽܘܪܽܘ ܘ݄ܚܙܰܝܽܘ ܗ̄ܰܢ ܐܰܪ̈ܥܳܬ̥ܳܐ ܚܰܘܺܝܪܺܝ، ܘܟܰܐܠܶܗ ܡܰܛ݄ܢ ܠܽܗ̄ܘ ܚܨܳܕܳܐ. 36ܘܰܐܝܢܰܐ ܕܚܳܨ݄ܕ ܟܡܳܝ݄ܕ ܗ̄ܽܘ ܐܰܓ̥ܪܰܝܕ̥ܶܗ، ܘ݄ܟܡܰܠܬ݄ܡ ܦܺܐܪ̈ܶܐ ܠܚܰܝ̈ܶܐ ܕ݄ܠܥܳܠܰܡ. ܘܗܰܘܟ̥ܰܐ ܗ̄ܽܘ ܙܰܪܳܥܳܐ ܘܽܗ̄ܘ ܚܰܨܳܕܳܐ ܟܡ݄ܦܨܳܚܺܝ ܥܰܡ ܚܕ̥ܳܕ̥̈ܶܐ. 37ܘܒܰܗ̄ܬ̥ܶܐ ܝܳܐ ܗ̄ܽܘ ܡܰܐܡܪܳܐ ܕܽܗ̄ܘ ܫܪܳܪܳܐ: ܚܰܕ̱ ܟܙܳܪ݄ܥ ܘܚܰܕ̱ ܚܪܶܢܳܐ ܟܚܳܨ݄ܕ. 38ܐܳܢܳܐ ܡܫܰܕܰܪ ܠܺܝ ܠܟ̥ܽܘ ܕܚܳܨܕܺܝܬܽܘ ܗ̄ܽܘ ܡܶܕܶܐ ܕܠܳܐ ܗܰܬܽܘ ܒܰܛܺܝܠܺܝܬܽܘ ܐܶܒܶܗ. ܚܪ̈ܶܢܶܐ ܒܰܛܺܝܠܺܝ، ܘܗܰܬܽܘ ܥܰܒܺܝܪܺܝܬܽܘ ܥܰܠ ܗ̄ܽܘ ܥܰܡܠܰܬّ̥ܶܗ، ܕܗܰܢ݄ܟ.“
ܗ̄ܰܫّܳܡܪ̈ܳܝܶܐ ܟ݄ܡܗܰܝܡܢܺܝ ܒܝܶܫܽܘܥ
39ܘܡܺܗ̄ܝ ܡܕ̥ܺܝܢ̱ܬܰܝܳܐ، ܓ̥ܰܠܰܒܶܐ ܡܰܢ̱ ܫّܳܡܪ̈ܳܝܶܐ ܡܗܰܝܡܰܢّܶܗ ܐܶܒܶܗ، ܥܰܠ ܗ̄ܽܘ ܡܰܐܡܪܳܐ ܕܺܗ̄ܝ ܐܰܢ̱ܬ̥ܬܰܝܳܐ ܕ݄ܣܗ݄ܕ ܗ̄ܘܰܝ ܠܰܗ: ”ܐܡ݄ܪ ܠܶܗ ܠܺܝ ܟܽܘܠ ܡܶܕܶܐ ܕܣ݄ܡ ܠܺܝ.“ 40ܘܺܗ̄ܝ ܢܰܩܠܐ ܕܰܐܬ̥݄ܢ ܠܓܰܒܶܗ ܗ̄ܰܫّܳܡܪ̈ܳܝܶܐ، ܐܰܒܺܝܥܺܝ ܡܶܢܶܗ ܕܦܳܝ݄ܫ ܓܰܒܰܝّܶܗ، ܘܦܰܝ݄ܫ ܓܰܒܰܝّܶܗ ܬܪܶܝ ܝܰܘܡ̈ܶܐ. 41ܘܓ̥ܰܠܰܒܶܐ ܡܗܰܝܡܰܢّܶܗ ܐܶܒܶܗ ܕܫܰܡܺܝܥܺܝ ܗ̄ܽܘ ܡܰܐܡܪܰܝܕ̥ܶܗ. 42ܘ݄ܐܡّܺܪ̱ܝ ܗ̄ܘܰܘ̱ ܠܺܗ̄ܝ ܐܰܢ̱ܬ̥ܬܰܝܳܐ: ”ܐܳܥܕܳܐ ܟ݄ܡܗܰܝܡܢܺܝܢܰܐ ܐܶܒܶܗ ܠܳܐ ܥܰܠ ܕܐܡ݄ܪ ܠܰܟ̥ ܠܰܢ، ܐܶܠܳܐ ܥܰܠ ܕܰܐܚܢܰܐ ܫܰܡܺܝܥܺܝܢܰܐ ܘܰܐܕ̥ܺܝܥܺܝܢܰܐ ܕܒ݄ܫܪܳܪܳܐ ܗܰܢܳܐ ܝܳܐ ܡܫܺܝܚܳܐ ܕܟܳܗ̄ܒܶܐ ܚܰܝ̈ܶܐ ܠܽܗ̄ܘ ܥܳܠܡܳܐ.“
ܝܶܫܽܘܥ ܟܡܰܢ݄ܚ ܗ̄ܽܘ ܐܰܒܪܳܐ ܕܽܗ̄ܘ ܓܪܶܝܥܳܐ ܕܽܗ̄ܘ ܡܰܠܟܳܐ
ܡܬܝ 8:5‐13؛ ܠܘܩܐ 7:1‐10
43ܘܒ݄ܬ̥݄ܪ ܬܪܶܝ ܝܰܘܡ̈ܶܐ، ܢܰܦ݄ܩ ܝܶܫܽܘܥ ܡܶܢ̱ ܬܰܡܳܐ ܘܰܐܙّܶܗ ܠܽܗ̄ܘ ܓܠܺܝܠܳܐ، 44ܡܺܐܝܕ̥ܶܗ ܕܗܺܝّܶܗ، ܝܶܫܽܘܥ، ܣܗ݄ܕ ܠܶܗ: ”ܢܒܺܝܳܐ ܒܽܗ̄ܘ ܐܰܬ̥ܪܰܝܕ̥ܶܗ ܠ݄ܐ ܟܳܗ̄ܘܶܐ ܠܶܗ ܐܺܝܩܳܪܳܐ.“ 45ܘܺܗ̄ܝ ܢܰܩܠܐ ܕܰܐܬ̥ܺܝ ܠܽܗ̄ܘ ܓܠܺܝܠܳܐ، ܗ̄ܰܓܠܺܝܠܳܝ̈ܶܐ ܢܰܦܺܝܩܺܝ ܠܩܰܕ̱ܡܽܘܬ̥ܶܗ ܥܰܠ ܕ݄ܚܙܰܠّܶܗ ܗ̄ܰܢ ܐܳܬ̥ܘ̈ܳܬ̥ܳܐ ܕܣ݄ܡ ܠܶܗ ܒܽܐܘܪܶܫܠܶܡ ܒܽܗ̄ܘ ܥܶܐܕ̥ܳܐ، ܗ݄ܢّܶܝ ܣܬܶܝ ܐܰܬ̥݄ܢ ܗ̄ܘܰܘ̱ ܠܽܗ̄ܘ ܥܶܐܕ̥ܳܐ. 46ܘܰܐܬ̥ܺܝ ܢܰܩܠܐ ܚܪܶܬܳܐ ܠܩܳܛܢܶܐ ܕ݄ܓܠܺܝܠܳܐ ܐܰܝܟܳܐ ܕܣ݄ܡ ܠܶܗ ܗ̄ܰܡّܰܝ̈ܶܐ ܚܰܡܪܳܐ. ܘܒ݄ܟܦܰܪܢܰܚܽܘܡ ܟ݄ܬ ܗ̄ܘܰܐ ܚܰܕ̱ ܓܪܶܝܥܳܐ ܕܽܗ̄ܘ ܡܰܠܟܳܐ ܕܽܗ̄ܘ ܐܰܒܪܰܝܕ̥ܶܗ ܟܰܐܺܝܒ̥ܳܐ ܗ̄ܘܰܐ. 47ܗܰܢܳܐ ܫܰܡ݄ܥ ܕܰܐܬ̥ܺܝ ܝܶܫܽܘܥ ܡܶܢ̱ ܝܺܗܽܘܕ̥ ܠܽܗ̄ܘ ܓܠܺܝܠܳܐ، ܘܰܐܙّܶܗ ܠܓܰܒܶܗ ܘܳܐܒܰܥ ܗ̄ܘܰܐ ܡܶܢܶܗ ܕܳܐܬ̥ܶܐ ܘܡܰܢ݄ܚ ܗ̄ܽܘ ܐܰܒܪܰܝܕ̥ܶܗ، ܡܺܐܝܕ̥ܶܗ ܕܟ݄ܬ ܗ̄ܘܰܐ ܥܰܠ ܗ̄ܽܘ ܡܰܘܬܳܐ. 48ܘܐܡ݄ܪ ܠܶܗ ܠܶܗ ܝܶܫܽܘܥ: ”ܐܶܢ ܕܠܳܐ ܚܳܙܺܝܬܽܘ ܐܳܬ̥ܘ̈ܳܬ̥ܳܐ ܘܬܶܕ݄ܡܪ̈ܳܬ̥ܳܐ ܠ݄ܐ ܓ݄ܡܗܰܝܡܢܺܝܬܽܘ؟“ 49ܐܡ݄ܪ ܠܶܗ ܠܶܗ ܗ̄ܽܘ ܓܪܶܝܥܰܘܳܐ ܕܽܗ̄ܘ ܡܰܠܟܳܐ: ”ܢܚܰܬ ܡܳܪܝ، ܡܶܩ݄ܕ̱ܡ ܕܡܳܝ݄ܬ̥ ܗ̄ܽܘ ܛܰܠܝܳܐ.“ 50ܐܡ݄ܪ ܠܶܗ ܠܶܗ ܝܶܫܽܘܥ: ”ܙܳܟ̥! ܗ̄ܽܘ ܐܰܒܪܰܝܕ̥ܳܟ̥ ܚܰܝܳܐ ܝܳܐ.“ ܘ݄ܡܗܰܝܡܰܢ ܠܶܗ ܗ̄ܽܘ ܓܰܒ̥ܪܰܘܳܐ ܒܽܗ̄ܘ ܡܰܐܡܪܳܐ ܕܐܡ݄ܪ ܠܶܗ ܝܶܫܽܘܥ ܘܰܐܙّܶܗ. 51ܘܗܺܝّܶܗ ܕܰܥܳܪܳܐ، ܗ̄ܰܓܪ̈ܶܝܥܰܝܕ̥ܶܗ ܢܰܦܺܝܩܺܝ ܠܩܰܕ̱ܡܽܘܬ̥ܶܗ ܘ݄ܡܣܰܒܰܪّܶܗ ܘܐܡ݄ܪّܰܗ ܠܶܗ: ”ܗ̄ܽܘ ܐܰܒܪܰܝܕ̥ܳܟ̥ ܚܰܝܳܐ ܝܳܐ!“ 52ܘ݄ܡܫܰܐܶܠّܶܗ: ”ܐܶܡܰܐ ܢܰܝ݄ܚ ܠܶܗ؟“ ܐܡ݄ܪّܰܗ ܠܶܗ: ”ܐܰܬ̥ܡ݄ܠ، ܗ̄ܺܝ ܫܳܥܬ̥ܳܐ ܚܕ̥ܳܐ ܒ݄ܬ̥݄ܪ ܡܶܢ̱ ܦܰܠܓܶܗ ܕܝܰܘܡܳܐ، ܗ̄ܺܝ ܚܶܡܬܳܐ ܛܪܶܐ ܠܰܗ ܡܶܢܰܗ.“ 53ܘܽܗ̄ܘ ܐܰܒܳܐ ܐܰܕ̥݄ܥ ܕܒܺܗ̄ܝ ܫܳܥܬ̥ܰܝܕ̥ܰܗ ܗ̄ܘܰܐ ܕܐܡ݄ܪ ܠܶܗ ܠܶܗ ܝܶܫܽܘܥ: ”ܗ̄ܽܘ ܐܰܒܪܰܝܕ̥ܳܟ̥ ܚܰܝܳܐ ܝܳܐ.“ ܘ݄ܡܗܰܝܡܰܢ ܠܶܗ ܗܺܝّܶܗ ܘܽܗ̄ܘ ܒܰܝܬܰܝܕ̥ܶܗ ܟܽܘܠܶܗ. 54ܘܗܰܬ̥ܶܐ ܗ̄ܺܝ ܐܳܬ̥ܳܐ ܕܰܬّܰܪܬܶܝ ܕܣ݄ܡ ܠܶܗ ܝܶܫܽܘܥ ܗ̄ܺܝ ܢܰܩܠܐ ܕܰܐܬ̥ܺܝ ܡܶܢ̱ ܝܺܗܽܘܕ̥ ܠܽܗ̄ܘ ܓܠܺܝܠܳܐ.
Valið núna:
ܡܓܰܠܝܘܢ ܕܝܘܚܢܢ 4: ܟܬܒܐ
Áherslumerki
Deildu
Afrita
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation