ܣܶܦܪܳܐ ܕ݄ܒܪܺܝܬ̥ܳܐ 16

1ܘܣܰܪܰܝ ܗ̄ܺܝ ܐܰܢ̱ܬ̥ܬܳܐ ܕܰܐܒܪܳܡ ܠܳܐ ܡܰܘܠܰܕ ܠܰܗ ܠܶܗ. ܘܟ݄ܬ ܗ̄ܘܰܝ ܠܰܗ ܓܪܰܥܬܳܐ ܡܶܨܪܰܝܬܳܐ ܘ݄ܐܫܡܰܗ ܗܳܓܳܪ. 2ܘܐܡ݄ܪ ܠܰܗ ܣܰܪܰܝ ܠܰܐܒܪܳܡ: ”ܟܰܐܠܶܗ ܡܳܪܝܳܐ ܡܰܟܠܶܐ ܠܶܗ ܠܺܝ ܡܽܗ̄ܘ ܝܰܠܕܳܐ، ܥܒܰܪ ܥܰܠ ܗ̄ܺܝ ܓܪܰܥܬܰܝܕ̥ܺܝ، ܟܺܝܬ ܕܡܺܝܗܰܢܝܳܐ ܐ̱ܢܳܐ ܡܶܢܰܗ ܒܰܗ̄ܢ ܐܰܒܢ̈ܶܐ.“ ܘܫܰܡ݄ܥ ܐܰܒܪܳܡ ܗ̄ܽܘ ܡܰܐܡܪܳܐ ܕܣܰܪܰܝ. 3ܘܣܰܪܰܝ، ܗ̄ܺܝ ܐܰܢ̱ܬ̥ܬܳܐ ܕܰܐܒܪܳܡ، ܡ݄ܕ ܠܰܗ ܗ̄ܺܝ ܓܪܰܥܬܰܝܕ̥ܰܗ ܗܳܓܳܪ ܗ̄ܺܝ ܡܶܨܪܰܝܬܳܐ، ܡܶܢ̱ ܒ݄ܬ̥݄ܪ ܥܣܰܪ ܐ݄ܫܢ̈ܶܐ ܕܝܰܬܽܒ̥ ܐܰܒܪܳܡ ܒܺܗ̄ܝ ܐܰܪܥܳܐ ܕ݄ܟܢܰܥܢ، ܘܗܺܝܒ̥ܳܐ ܠܰܗ ܐܰܢ̱ܬ̥ܬܳܐ ܠܰܐܒܪܳܡ، ܗ̄ܽܘ ܓܰܒ̥ܪܰܝܕ̥ܰܗ. 4ܘܥܰܒ݄ܪ ܥܰܠ ܗܳܓܳܪ ܘ݄ܛܥܺܝܢܳܐ. ܘܺܗ̄ܝ ܢܰܩܠܐ ܕ݄ܚܙܶܐ ܠܰܗ ܕ݄ܛܥܺܝܢܳܐ، ܢܰܦܺܝܩܳܐ ܗ̄ܺܝ ܡܳܪܬܰܝܕ̥ܰܗ ܡܶܢ̱ ܥܰܝܢ̈ܳܬ̥ܰܗ. 5ܘܐܡ݄ܪ ܠܰܗ ܣܰܪܰܝ ܠܰܐܒܪܳܡ: ”ܗ̄ܺܝ ܚܛܺܝܬ̥ܰܝܕ̥ܺܝ ܒ݄ܩܕ̥ܳܠܳܟ̥. ܐܳܢܳܐ ܗܽܒ̥ ܠܺܝ ܗ̄ܺܝ ܓܪܰܥܬܰܝܕ̥ܺܝ ܒܥܶܒܳܟ̥، ܘܺܗ̄ܝ ܢܰܩܠܐ ܕ݄ܚܙܶܐ ܠܰܗ ܕ݄ܒܛܺܝܢܳܐ، ܢܰܦܺܝܩܳܐ ܐ̱ܢܳܐ ܡܶܢ̱ ܥܰܝܢ̈ܳܬ̥ܰܗ. ܛܪܳܐ ܡܳܪܝܳܐ ܕܳܝ݄ܢ ܒܰܝܢ ܐܶ‌ܠܺܝ ܘܶܐ‌ܠܳܟ̥.“ 6ܘܐܡ݄ܪ ܠܶܗ ܐܰܒܪܳܡ ܠܣܰܪܰܝ ܗ̄ܺܝ ܐܰܢ̱ܬ̥ܬܰܝܕ̥ܶܗ: ”ܟܰܐܠܰܗ ܗ̄ܺܝ ܓܪܰܥܬܰܝܕ̥ܰܟ̥ ܒܰܝܢ ܐܺܝܕ̥̈ܳܬ̥ܰܟ̥. ܣܘ̇ܡ ܐܶܒܰܗ ܗ̄ܽܘ ܡܶܕܶܐ ܕܫܳܦ݄ܪ ܒܥܰܝܢ̈ܳܬ̥ܰܟ̥.“ ܘܣܰܪܰܝ ܗ̄ܺܝ ܡܳܪܬܰܝܕ̥ܰܗ ܡܚܰܩܪܳܐ ܠܰܗ، ܘܗܺܝّܰܗ (ܗܳܓܳܪ) ܥܰܪܺܝܩܳܐ ܡܶܢ̱ ܦܳܬ̥ܰܗ.

7ܘܚ݄ܙܝܳܐ ܠܶܗ ܗ̄ܽܘ ܡܰܠܰܐܟ̥ܳܐ ܕܡܳܪܝܳܐ ܥܰܠ ܗ̄ܺܝ ܥܰܝܢܳܐ ܕܰܡّܰܝ̈ܶܐ ܒܽܗ̄ܘ ܡܰܕ̥݄ܒܪܳܐ ܒܽܗ̄ܘ ܕܰܪܒܳܐ ܕܓܳܕܳܪ. 8ܘܐܡ݄ܪ ܠܶܗ ܠܰܗ: ”ܗܳܓܳܪ، ܝܰܐ ܓܪܰܥܬܳܐ ܕܣܰܪܰܝ، ܡܰܐܝܟܳܐ ܟܳܐܬ̥ܝܰܬ؟ ܘܠܰܐܝܟܳܐ ܐܰܙܳܠܬܳܐ ܗܰܬ؟“ ܘܐܡ݄ܪ ܠܰܗ: ”ܡܶܢ̱ ܦܳܬ̥ܰܗ ܕܣܰܪܰܝ، ܗ̄ܺܝ ܡܳܪܬܰܝܕ̥ܺܝ ܟܥܳܪܩܳܐ ܐ̱ܢܳܐ.“ 9ܘܐܡ݄ܪ ܠܶܗ ܠܰܗ ܗ̄ܽܘ ܡܰܠܰܐܟ̥ܳܐ ܕܡܳܪܝܳܐ: ”ܕܥܰܪ ܓܰܒ ܗ̄ܺܝ ܡܳܪܬܰܝܕ̥ܰܟ̥، ܘ݄ܡܫܰܡܰܫ ܬܰܚܬ ܐܺܝܕ̥ܰܗ.“ 10ܘܐܡ݄ܪ ܠܶܗ ܠܰܗ ܗ̄ܽܘ ܡܰܠܰܐܟ̥ܳܐ ܕܡܳܪܝܳܐ: ”ܬܶܙܺܝܕܳܐ ܓܡܰܙ݄ܕ ܐ̱ܢܳܐ ܗ̄ܽܘ ܙܰܪܥܰܝܕ̥ܰܟ̥، ܘܠ݄ܐ ܓܡ݄ܒܢܶܐ ܡܽܗ̄ܘ ܙܝܳܕܳܐ ܕܙܳܝ݄ܕ.“ 11ܘܐܡ݄ܪ ܠܶܗ ܠܰܗ ܗ̄ܽܘ ܡܰܠܰܐܟ̥ܳܐ ܕܡܳܪܝܳܐ: ”ܟܰܐ‌ܠܰܟ̥ ܒܛܺܝܢܰܬ ܘ݄ܓܡܰܘܠܕܰܬ ܐܰܒܪܳܐ ܘ݄ܓܩܳܪܝܰܬ ܐ݄ܫܡܶܗ ܐܺܝܫܡܳܥܶܝܠ ܥܰܠ ܕܫܰܡ݄ܥ ܡܳܪܝܳܐ ܗ̄ܺܝ ܬܒ̥ܺܝܪܽܘܬ̥ܰܝܕ̥ܰܟ̥. 12ܘܗܺܝّܶܗ ܓܕܳܗ̄ܘܶܐ ܒܰܥܪܺܝܪܳܝܳܐ ܕܰܗ̄ܢ ܢܳܫ̈ܶܐ، ܐܺܝܕ̥ܶܗ ܥܰܠ ܟܘ̇ܠ، ܘܺܐܝܕ̥ܶܗ ܕܟܘ̇ܠ ܐܰܥܠܶܗ. ܘܥܰܠ ܗ̄ܽܘ ܬܚܽܘܡܳܐ ܕܰܗ̄ܢ ܐܰܚ̈ܽܘܢܳܢܰܝܕ̥ܶܗ ܟܽܘܠّܶܗ ܓܝܳܬܽܒ̥.“ 13ܘ݄ܩܪܶܐ ܠܰܗ ܐ݄ܫܡܶܗ ܕܡܳܪܝܳܐ ܕ݄ܫܓ̥ܺܝܠ ܐܰܥܡܰܗ، ܘܐܡ݄ܪ ܠܰܗ: ”ܗܰܬ ܗ̄ܰܬ ܐܰ‌ܠܳܗܳܐ ܒܽܗ̄ܘ ܚܶܙܘܳܐ.“ ܡܺܐܝܕ̥ܶܗ ܕܐܡ݄ܪ ܠܰܗ: ”ܟܰܐܠܶܗ ܚܶܙܘܳܐ ܚܙܶܐ ܠܺܝ ܡܶܢ̱ ܒ݄ܬ̥݄ܪ ܕ݄ܚܙܶܐ ܠܶܗ ܠܺܝ.“ 14ܡܰܗ̄ܘܟ̥ܰܐ ܩܪܶܐ ܠܰܗ ܠܺܗ̄ܝ ܒܺܐܪܰܝܳܐ: ”ܚܰܝܳܐ ܚܙܶܐ ܠܶܗ ܠܺܝ.“ ܗܰܬ̥ܶܐ ܕܟ݄ܬ ܝܳܐ ܒܰܝܢܶܗ ܕ݄ܪܩܶܡ ܘ݄ܠܒܶܝܬ̥ ܓܳܕ̥ܳܪ.

15ܘܡܰܘܠܰܕ ܠܰܗ ܗܳܓܳܪ ܐܰܒܪܳܐ ܠܰܐܒܪܳܡ. ܘ݄ܩܪܶܐ ܠܶܗ ܐܰܒܪܳܡ ܐ݄ܫܡܶܗ ܕܽܗ̄ܘ ܐܰܒܪܰܝܕ̥ܶܗ ܕܡܰܘܠ݄ܕ̥ ܐܶ‌ܠܶܗ، ܕܡܰܘܠܰܕ ܠܰܗ ܠܶܗ ܗܳܓܳܪ، ”ܐܺܝܫܡܳܥܶܝܠ.“ 16ܘܰܐܒܪܳܡ ܐܰܒܪܶܗ ܕܫܶܬ̥ ܘ݄ܬܡܳܢܺܝ ܐ݄ܫܢ̈ܶܐ ܗ̄ܘܰܐ ܗ̄ܺܝ ܢܰܩܠܐ ܕܡܰܘܠܰܕ ܠܰܗ ܗܳܓܳܪ ܐܺܝܫܡܳܥܶܝܠ ܠܰܐܒܪܳܡ.

Valið núna:

ܣܶܦܪܳܐ ܕ݄ܒܪܺܝܬ̥ܳܐ 16: ܟܬܒܐ

Áherslumerki

Deildu

Afrita

Want to have your highlights saved across all your devices? Sign up or sign in

Lærðu meira um ܗ̄ܘ ܟܬܒܐ ܩܕܝܫܐ

ܣܶܦܪܳܐ ܕ݄ܒܪܺܝܬ̥ܳܐ 16

Popular Bible Verses from
ܣܶܦܪܳܐ ܕ݄ܒܪܺܝܬ̥ܳܐ 16

Biblía:

Turoyo

Útgáfa: ܗ̄ܘ ܟܬܒܐ ܩܕܝܫܐ - ܟܬܒܐ