Matié 19
19
Yésus áásáŋuna kiémie kí akáandɔ́
(Mál 10.1-12; Lúk 16.18)
1Aká Yésus mɛɛ́lɛ́ úmááman akála anakáánɛ́, waatɔk á Kalilée waayɔɔk é kiénsi kí kúúsí kí Yúte nakúnɛ u Sulutɛ́ɛŋ. 2Pitɔɔt pí pɛɛnd piɔ́ŋ kɛ́ɛ́yɛ́, weéŋukesi epé pámaánúmá kɔ́ɔkɔ. 3Pafalisiɛ́ŋ péépísíítin wu ɛ́ɛ́ pɔ́tɔ́lɛk wɔ, póokoówun wɔ́ ɛ́ɛ́: «púnyɛ akɛ ɛ́ɛ́ mɔɔnd nyɛ ukuémi akányí tɛ kí iŋál iníní á?» 4Yésuse woondinyi pɔ́ ɛ́ɛ́: «Nutimaláaŋ ɛ́ɛ́ é nitúmín Eluŋí mɛɛlɛ́ na akáandɔ́ nɛ ɛnúmɛndɔ́» 5Támbák kanyi andíkɛ́k ɛ́ɛ́: «Puátákáánɛ́ puandá ɛnúmɛndɔ́ ányáatukanɛ́ ku sí no yóótí waapílatá akányí wɛɛyɛ́, ɛ́ɛ́ peem páandɛ́ papá ɛlɛɛ́ mɔɔnd omoómí. 6Anakáánɛ́ pátíákandá apá pɛɛnd páandɛ́ maná pákanyi mɔɔnd omoómí. Mɔɔnd kɔk tipá wɛsikɛnɛn kuátɔn epú Támbák maálatá.» 7Pafalisiɛ́ŋ kɛ́ɛ́yɛ́ ɛ́ɛ́: «Ó pusíó pú kiákí kɔk Moyíis mɔɔ́ŋ ɛ́ɛ́ akanyɛɛ́ éémi akányí ááwɔ ɛɛlɛ ɔmbɔp ú kiémie?» 8Ukanyi kɔ́ɔ́p ɛ́ɛ́: «Ɛ́ kuɛlɛɛ́ itɛ́m síánɔ́ nyɛ ilúndán kúúkɔ́ Moyíis maánúfá pukaaka pú kuémenyi pakányí páánɔ́, maná é nitúmín pútimapá anakáánɛ́. 9Maná iŋúɛ yɔɔ́núɔ́yɔn ɛ́ɛ́: Índɛ mɔɔnd siémi akányi kɔ́ɔk utimɛ́ɛ́ndɛ́t isɔm woondo upítikɛn olotí, unyi eŋendí isɔm.»
Na Nupítíkɛ́n na pulɛmb
10Popíónyí kanyi kɛ́ɛ́yɛ́ ɛ́ɛ́: «Índɛ yá anakáánɛ́ kupá kú nupítíkɛ́n nú ɛnúmɛndɔ́ na akáandɔ́ nyɛɛ́, púnyi peseé ɛ́ɛ́ ɔ́lɔp ilɛmb.» 11Woondinyi pɔ́ ɛ́ɛ́: «Pɛɛnd Peem tipá kuɔ́p nukál nukáánɛ́, ɛsiɛ́ epé Támbák éékenyé pɔ́ pukaaka pú kuɔ́p nɔ́ɔ. 12Maná kɔk pómotí nyɛ kɔ́ɔk pémeépiéné pɔ́ anakáánɛ́ ɛ́ɛ́ pátipá kupítɛm na akáandɔ́; pómotí nyɛ pɛɛnd pémeéyí pɔ́ anakáánɛ́; pómotí páasáŋɔn nuɔ́ndɔ́n ó pusíó pú puólí pú Pufuŋ pú mɛnɛ́mɛnɛ́ɛ. Mɔɔnd unyɛɛ́ kuɔ́p wɔ́ɔp!»
Yésus épínúúne paápayɔ́
(Mál 10.13-16; Lúk 18.15-17)
13Kúúkɔ́ pɛɛnd moólínón Yésuse na paápayɔ́, ɛ́ɛ́ útála pɔ́ imbɔ́k wóond úpísókolonyi. Popíónyí pé Yésus póond á kukúúŋa pɔ́. 14Yésus kanyi ɛ́ɛ́: «Ánuyapá pɔ́ póólon kuamɛ, nutikányíkányi nɔɔpɔ́, á kiákí ɛ́ɛ́ Pufuŋ pú mɛnɛ́mɛnɛ́ɛ nyɛ ó pusíó pú péépé pɛ́nyɛɛ́ niaŋ níɔ́p.» 15É kélém kú kuman atála pɔ́ imbɔk, Yésuse waatɔk akáánɛ́.
Inɛ́m i kiɔmfɔ́ kí mɔɔnd
(Mál 10.17-31; Lúk 18.18-30; 13.30)
16Índí kɔk, mɔɔnd weepísíítin Yésuse ukanyi kɛ́ɛ́yɛ́ ɛ́ɛ́: «Oŋónyóonyi, kiákí kiitámb yɛɛsikɛnɛnɛ́ kuɛl ɛ́ɛ́ imbia kusɔ́t kú teeníík é?» 17Yésuse wondinyi wɔ́ ɛ́ɛ́: «Kiákí iŋówonée é púúpú púnyɛɛ́ puutámb? Táŋ omoómí nyɛ waatámb, Támbákɛ́ɛ. Índɛ aákamba kupíkin ɔ́ kusɔ́t kú teeníík nɛkɛ́n pikotí.» 18Ukanyi kɛ́ɛ́yɛ́ ɛ́ɛ́: «Pínín?» Yésuse wondinyi ɛ́ɛ́: «Ɔtiɔ́n mɔɔnd. Ɛtiɛndɛ́t isɔm. Etiép. Atisúmbɛ́n sɔ́k puónyi. 19Kúmésí tiɔ́ no nikóótí. Ɔyɔ́ waakúán ɛlɛɛ́ aŋúɛ muɛ́t.» 20Kiɔmfɔ́ kí mɔɔnd kanyi kɛ́ɛ́yɛ́ ɛ́ɛ́: «Yaámán ɛnɛkɛn pikáánɛ́ piim. Kiákí kímaákambanɛ́ɛ andíkɛ́k ɛ́ɛ́ yɛ́ɛl?» 21Yésuse kɛ́ɛ́yɛ́ ɛ́ɛ́: «Índɛ aákamba kukíndimenyi, apá, túú maandá kitikit apianɛ́ɛ, aápan insé muenyi mukáánɛ́, akáánɛ́ aányípianɛ́ punɛ́m puutámb mɛnɛ́mɛnɛ́ɛ, é kélém kúɛ́yí, óóló ɔŋɔ́ káámɛ!» 22Á nukál nukáánɛ́, kiɔmfɔ́ kí mɔɔnd kíayɔɔk kisumbén kusumben, á kiákí ɛ́ɛ́ kímapián punɛ́m puólíkóoli.
23Yésus kanyi ó popíónyí pɛ́ɛ́yɛ́ ɛ́ɛ́: «Kémuémue, yɔɔ́núɔ́yɔn ɛ́ɛ́, púányípá imfɛ́l ni inɛ́m i mɔɔndɛ ípíkin é Pufuŋ pú mɛnɛ́mɛnɛ́ɛ. 24Imáand onúónditonyi ɛ́ɛ́, púányípá laákulaákɔ á kinúm kí inyam pápílánɛ́ ɛ́ɛ́ samó ɛ́ɛ́ utápukɛn é kiési kí indɔndɔ kukányɛn inɛ́m i mɔɔndɛ ípíkin é Pufuŋ pú Támbák.» 25Á tukál tukáánɛ́, popíónyí pé Yésus péésímile tɛ pɔ́kuɔyɔ, pákanyi ɛ́ɛ́: «Ɛ́nyɛ́ kɔk unyɛɛ́ kupá etúkúnén?» 26Yésuse weetémbi pɔ́ eŋíis, wɔ́ kɔ́ɔ́p ɛ́ɛ́: «Ɛ́ pɛɛnd pútipá kupíɛl, maná, á Támbák puum ɛ́píɛ́lɛ.»
27Akáánɛ́ kɔk Píɛlɛ wɔɔkɔ́l nukál, ukanyi ɛ́ɛ́: «Índí pasuɛ́ tuámán ayapan puandá kitikit tuɔkɔɔŋ kááwɔ, púkapá tiɛkíɛ́ naasú é?» 28Yésuse kɔ́ɔ́p ɛ́ɛ́: «Kémuémue, yɔɔ́núɔ́yɔn ɛ́ɛ́ á kisikɛl kí kuand ɔpɔ́kɔ maandá kuukɔ́sikɔ́siɛ, aká iŋúɛ Muɔ́nɔ́ u mɔɔnd yaányípáánɛ́ ɔnyɔ́l káámɛ kí indáŋa i nuúmu, panɔ́ epé numɔɔ́ŋ káámɛ, nuányípá pɔnyɔ́l kákáánɔ́ kí indáŋa siát ní iyáandɛ́ ó kusóósosi ekúli yí Ísilayɛl yeem áát ná áandɛ́. 29Maná ewú ne ewú waányíyapanɛ́ piansi píɛ́yɛ́, paandimán, sí, yóótíe, paán kúnyaánɛ pisíén píɛ́yɛ́ ó pusíó pú kisiɛ́n kíámɛ, áányítáŋap kutápɔk, woond utáŋap kusɔ́t kú teeníík ne nííké. 30Pakutúan puólíkóoli áányípáan pékusúkin, pékusúkin páan pákutúan.»
Valið núna:
Matié 19: yav
Áherslumerki
Deildu
Afrita
Want to have your highlights saved across all your devices? Sign up or sign in
© 2026, CABTAL
Matié 19
19
Yésus áásáŋuna kiémie kí akáandɔ́
(Mál 10.1-12; Lúk 16.18)
1Aká Yésus mɛɛ́lɛ́ úmááman akála anakáánɛ́, waatɔk á Kalilée waayɔɔk é kiénsi kí kúúsí kí Yúte nakúnɛ u Sulutɛ́ɛŋ. 2Pitɔɔt pí pɛɛnd piɔ́ŋ kɛ́ɛ́yɛ́, weéŋukesi epé pámaánúmá kɔ́ɔkɔ. 3Pafalisiɛ́ŋ péépísíítin wu ɛ́ɛ́ pɔ́tɔ́lɛk wɔ, póokoówun wɔ́ ɛ́ɛ́: «púnyɛ akɛ ɛ́ɛ́ mɔɔnd nyɛ ukuémi akányí tɛ kí iŋál iníní á?» 4Yésuse woondinyi pɔ́ ɛ́ɛ́: «Nutimaláaŋ ɛ́ɛ́ é nitúmín Eluŋí mɛɛlɛ́ na akáandɔ́ nɛ ɛnúmɛndɔ́» 5Támbák kanyi andíkɛ́k ɛ́ɛ́: «Puátákáánɛ́ puandá ɛnúmɛndɔ́ ányáatukanɛ́ ku sí no yóótí waapílatá akányí wɛɛyɛ́, ɛ́ɛ́ peem páandɛ́ papá ɛlɛɛ́ mɔɔnd omoómí. 6Anakáánɛ́ pátíákandá apá pɛɛnd páandɛ́ maná pákanyi mɔɔnd omoómí. Mɔɔnd kɔk tipá wɛsikɛnɛn kuátɔn epú Támbák maálatá.» 7Pafalisiɛ́ŋ kɛ́ɛ́yɛ́ ɛ́ɛ́: «Ó pusíó pú kiákí kɔk Moyíis mɔɔ́ŋ ɛ́ɛ́ akanyɛɛ́ éémi akányí ááwɔ ɛɛlɛ ɔmbɔp ú kiémie?» 8Ukanyi kɔ́ɔ́p ɛ́ɛ́: «Ɛ́ kuɛlɛɛ́ itɛ́m síánɔ́ nyɛ ilúndán kúúkɔ́ Moyíis maánúfá pukaaka pú kuémenyi pakányí páánɔ́, maná é nitúmín pútimapá anakáánɛ́. 9Maná iŋúɛ yɔɔ́núɔ́yɔn ɛ́ɛ́: Índɛ mɔɔnd siémi akányi kɔ́ɔk utimɛ́ɛ́ndɛ́t isɔm woondo upítikɛn olotí, unyi eŋendí isɔm.»
Na Nupítíkɛ́n na pulɛmb
10Popíónyí kanyi kɛ́ɛ́yɛ́ ɛ́ɛ́: «Índɛ yá anakáánɛ́ kupá kú nupítíkɛ́n nú ɛnúmɛndɔ́ na akáandɔ́ nyɛɛ́, púnyi peseé ɛ́ɛ́ ɔ́lɔp ilɛmb.» 11Woondinyi pɔ́ ɛ́ɛ́: «Pɛɛnd Peem tipá kuɔ́p nukál nukáánɛ́, ɛsiɛ́ epé Támbák éékenyé pɔ́ pukaaka pú kuɔ́p nɔ́ɔ. 12Maná kɔk pómotí nyɛ kɔ́ɔk pémeépiéné pɔ́ anakáánɛ́ ɛ́ɛ́ pátipá kupítɛm na akáandɔ́; pómotí nyɛ pɛɛnd pémeéyí pɔ́ anakáánɛ́; pómotí páasáŋɔn nuɔ́ndɔ́n ó pusíó pú puólí pú Pufuŋ pú mɛnɛ́mɛnɛ́ɛ. Mɔɔnd unyɛɛ́ kuɔ́p wɔ́ɔp!»
Yésus épínúúne paápayɔ́
(Mál 10.13-16; Lúk 18.15-17)
13Kúúkɔ́ pɛɛnd moólínón Yésuse na paápayɔ́, ɛ́ɛ́ útála pɔ́ imbɔ́k wóond úpísókolonyi. Popíónyí pé Yésus póond á kukúúŋa pɔ́. 14Yésus kanyi ɛ́ɛ́: «Ánuyapá pɔ́ póólon kuamɛ, nutikányíkányi nɔɔpɔ́, á kiákí ɛ́ɛ́ Pufuŋ pú mɛnɛ́mɛnɛ́ɛ nyɛ ó pusíó pú péépé pɛ́nyɛɛ́ niaŋ níɔ́p.» 15É kélém kú kuman atála pɔ́ imbɔk, Yésuse waatɔk akáánɛ́.
Inɛ́m i kiɔmfɔ́ kí mɔɔnd
(Mál 10.17-31; Lúk 18.18-30; 13.30)
16Índí kɔk, mɔɔnd weepísíítin Yésuse ukanyi kɛ́ɛ́yɛ́ ɛ́ɛ́: «Oŋónyóonyi, kiákí kiitámb yɛɛsikɛnɛnɛ́ kuɛl ɛ́ɛ́ imbia kusɔ́t kú teeníík é?» 17Yésuse wondinyi wɔ́ ɛ́ɛ́: «Kiákí iŋówonée é púúpú púnyɛɛ́ puutámb? Táŋ omoómí nyɛ waatámb, Támbákɛ́ɛ. Índɛ aákamba kupíkin ɔ́ kusɔ́t kú teeníík nɛkɛ́n pikotí.» 18Ukanyi kɛ́ɛ́yɛ́ ɛ́ɛ́: «Pínín?» Yésuse wondinyi ɛ́ɛ́: «Ɔtiɔ́n mɔɔnd. Ɛtiɛndɛ́t isɔm. Etiép. Atisúmbɛ́n sɔ́k puónyi. 19Kúmésí tiɔ́ no nikóótí. Ɔyɔ́ waakúán ɛlɛɛ́ aŋúɛ muɛ́t.» 20Kiɔmfɔ́ kí mɔɔnd kanyi kɛ́ɛ́yɛ́ ɛ́ɛ́: «Yaámán ɛnɛkɛn pikáánɛ́ piim. Kiákí kímaákambanɛ́ɛ andíkɛ́k ɛ́ɛ́ yɛ́ɛl?» 21Yésuse kɛ́ɛ́yɛ́ ɛ́ɛ́: «Índɛ aákamba kukíndimenyi, apá, túú maandá kitikit apianɛ́ɛ, aápan insé muenyi mukáánɛ́, akáánɛ́ aányípianɛ́ punɛ́m puutámb mɛnɛ́mɛnɛ́ɛ, é kélém kúɛ́yí, óóló ɔŋɔ́ káámɛ!» 22Á nukál nukáánɛ́, kiɔmfɔ́ kí mɔɔnd kíayɔɔk kisumbén kusumben, á kiákí ɛ́ɛ́ kímapián punɛ́m puólíkóoli.
23Yésus kanyi ó popíónyí pɛ́ɛ́yɛ́ ɛ́ɛ́: «Kémuémue, yɔɔ́núɔ́yɔn ɛ́ɛ́, púányípá imfɛ́l ni inɛ́m i mɔɔndɛ ípíkin é Pufuŋ pú mɛnɛ́mɛnɛ́ɛ. 24Imáand onúónditonyi ɛ́ɛ́, púányípá laákulaákɔ á kinúm kí inyam pápílánɛ́ ɛ́ɛ́ samó ɛ́ɛ́ utápukɛn é kiési kí indɔndɔ kukányɛn inɛ́m i mɔɔndɛ ípíkin é Pufuŋ pú Támbák.» 25Á tukál tukáánɛ́, popíónyí pé Yésus péésímile tɛ pɔ́kuɔyɔ, pákanyi ɛ́ɛ́: «Ɛ́nyɛ́ kɔk unyɛɛ́ kupá etúkúnén?» 26Yésuse weetémbi pɔ́ eŋíis, wɔ́ kɔ́ɔ́p ɛ́ɛ́: «Ɛ́ pɛɛnd pútipá kupíɛl, maná, á Támbák puum ɛ́píɛ́lɛ.»
27Akáánɛ́ kɔk Píɛlɛ wɔɔkɔ́l nukál, ukanyi ɛ́ɛ́: «Índí pasuɛ́ tuámán ayapan puandá kitikit tuɔkɔɔŋ kááwɔ, púkapá tiɛkíɛ́ naasú é?» 28Yésuse kɔ́ɔ́p ɛ́ɛ́: «Kémuémue, yɔɔ́núɔ́yɔn ɛ́ɛ́ á kisikɛl kí kuand ɔpɔ́kɔ maandá kuukɔ́sikɔ́siɛ, aká iŋúɛ Muɔ́nɔ́ u mɔɔnd yaányípáánɛ́ ɔnyɔ́l káámɛ kí indáŋa i nuúmu, panɔ́ epé numɔɔ́ŋ káámɛ, nuányípá pɔnyɔ́l kákáánɔ́ kí indáŋa siát ní iyáandɛ́ ó kusóósosi ekúli yí Ísilayɛl yeem áát ná áandɛ́. 29Maná ewú ne ewú waányíyapanɛ́ piansi píɛ́yɛ́, paandimán, sí, yóótíe, paán kúnyaánɛ pisíén píɛ́yɛ́ ó pusíó pú kisiɛ́n kíámɛ, áányítáŋap kutápɔk, woond utáŋap kusɔ́t kú teeníík ne nííké. 30Pakutúan puólíkóoli áányípáan pékusúkin, pékusúkin páan pákutúan.»
Valið núna:
:
Áherslumerki
Deildu
Afrita
Want to have your highlights saved across all your devices? Sign up or sign in
© 2026, CABTAL