Matié 17
17
Yésus mépínúkún
(Mál 9.2-9; Lúk 9.28-36)
1Metúk mátíndátɔ mɛɛlɛ́ na kutápɔk, Yésuse wɔɔkɔ́l Piɛ́lɛ na Sáak ni Isáaŋ andimán Sáak, waapínyáŋɛt nɔɔpɔ́ kɔ́ ɔ́kɛ́l mɛnɛ́mɛnɛ́ɛ. 2Yésuse weepínúkunin pɔ́ɔ akáánɛ́ nɔ niɔ́kɔ́tɔ́n, pusíó púɛ́yɛ́ púáfɔ́ɔm ɛlɛɛ́ ɔɔ́nyí, insunú síɛ́yí síond é kukelimine ɛlɛɛ́ kisie. 3Nɔ niɔ́kɔ́tɔ́n, pɛ́ɛ́n no Moyíis ne Éli waasi! pɔ́ɔyɔ maayɔ́ ne Yésus. 4Píɛl kanyi é Yésus ɛ́ɛ́: «Ɔkɔ́n, púnyɛ peseé ɛ́ɛ́ tupá akɛ; índɛ ɔɔ́kɔyɔ, íwáak musúŋ mútát, yááwɔ ímoómí, í Moyíis ímoómí yí Éli ímoómí.» 5Umɛɛlɛ́ umaákála anakáánɛ́, kipunyak kí kilɔndɔ́ kíekindikin pɔ́ɔ. Ekelú ááminan ɔ́ kilɔndɔ́ kikáánɛ́, wɔ́ɔ́yɔ ɛ́ɛ́: «Ewe nyɛ muɔ́nɔ́ áámɛ u iŋɔyɔ fió! ewú imaáyɔ́ɔ́n na anyamɔ́. Ɔ́nupítɔ́líkɔ́n wɔ!» 6Popíónyí pakáánɛ́ pátátɔ́ ɔ́ɔ́pɔn nɔ́ɔ, páákua iŋɔlɔpɛ pilɔŋiɛ́, tupɔl é kúúsí, na pumbíla táásɛ. 7Yésuse weepísíít, weekíik pɔ́ɔ, wɔ́ kɔ́ɔ́p ɛ́ɛ́: «Ánuatukɛn, nutipíá puwaá!» 8Pápípúluminɛ, pɛ́ɛ́nin é Yésus wééŋényí. 9Pɛ́mɛɛlɛ́ peketúnúkén ɔkɛ́l, Yésuse kɔ́ɔ́p ɛ́ɛ́: «Nutitíán mɔɔnd puandá numɛ́nyɛɛ́n, kuám aná niiŋú Muɔ́nɔ́ u mɔɔnd yɛɛ́nyɛ́ɛ́nyukɛnɛ́ á pilɔ́ŋ.»
Moónyi móyoosóne Élie
(Mál 9.11-13)
10Popíónyi pɛ́ɛ́tɛ pátátɔ́ póond ó kuówon wɔ́ ɛ́ɛ́: «Kiákí kɔk pemenyí pikotí ɔ́ɔ́yɔɔnɛ́ɛ ɛ́ɛ́ Élie ukaányítúan kuól?» 11Yésuse woondinyi ɛ́ɛ́: «Kémuémue Éli koól ɔ́ kuɔsipɔ́kɔ́ maandá aná kúɛ́sikɛnɛnɛ́ɛ; 12yɔɔ́núɔ́yɔn kɔk ɛ́ɛ́ Éli moól, pɛ́ɛlɛ nɛɛyɛ́ aná pɔ́mɔɔ́yɔ́ kuɛlɛ, tɛ ɛ́ɛ́ páand emenyi wúɛ. Yá aná pékeényíséésenyi Muɔ́nɔ́ u mɔɔnd.» 13Káákáánɛ́ popíónyí mɔɔ́síɔ́p kɔk ɛ́ɛ́ umɔɔyɔ́n pɔ́ epú púmóóyóósón Isáaŋ Etuúsíe.
Yésus mééŋúkí asundúsɔnd
(Mál 9.14-29; Lúk 9.37-43)
14Pɛ́mɛɛlɛ́ na kuasiám mekúyekúye ne embúl, mɔɔnd weepísíítini Yésuse, ukuan iŋɔlɔpɛ, wɔ́ kɛ́ɛ́yɛ́ ɛ́ɛ́: 15«Ɔkɔ́n, ɛ́ɛ́n muɔ́nɔ́ áámɛ ɔsɔk: waákuan isundɔ́, wɛɛ́kɛɛ́nɛn muyú tɛ pɔ́kuɔyɔ; á kisikɛl kitikit waákuanin é yiik kúnyaánɛ ó moomb. 16Yoólín popíónyí pááwɔ nɛɛyɛ́, tɛ́ ɛ́ɛ́ pɔ́ɔ́tɔ kuéŋuki wɔ.» 17Yésuse kɔ́ɔ́p ɛ́ɛ́: «Nindaanda ní kati pipíóndínyí ɔtɛ́m, pápínyáŋanɛ́ Támbákɛ́ɛ, kuám nííkí imbáánɛ́ naanɔ́? Ínúésepenyi kuám níík? Ónuŋólín nɛɛyɛ́ akɛ.» 18Yésuse waasán kilɔk kí kiliínditíe, kíakaám ɔ́ nuɔ́l nú muúŋayɔ́, weéŋuk kɔ́ɔk nɔ kɔ́ɔk. 19Popíónyí mɛɛlɛ́ pésíénen pɔ́ pééŋényí ne Yésuse, pɔ́ kɛ́ɛ́yɛ́ ni insunse ɛ́ɛ́: «Kiákí túmɛ́nyɛɛlɛ́ tutiɔ́t kukúúŋɛt kíí ée?» 20wɔ́ kɔ́ɔ́p ɛ́ɛ́: «Pipíóndínyí ɔtɛ́m píánɔ́ nyɛ piayɔ́. Kémuémue yɔɔ́núɔ́yɔn ɛ́ɛ́ nusákápián pipíóndínyí ɔtɛ́m ɛlɛɛ́ niínsi ní andásia, tɛ nuɛl kɔ́ ɔkɛ́l ewe ɛ́ɛ́: Koondó ekénée, wáányáátɔk wóóndó kɔ́ɔk. Puandá pú kunúpíányɛn tipá. 21Maná pilɔŋ pí kilɔk kí kiliínditíe epie áákaáman yá kí imbísókólí no kipíkotio kí múkunya.»
Yésus máandá etééki niku níɛ́yí nɛ kuɛnyɔk kúɛ́yí á pilɔ́ŋ
(Mál 9.30-32; Lúk 9.43-45)
22Epue puɔ́sɛ aná pámaápá papíkúsá Kalilée, Yésuse kɔ́ɔ́p ɛ́ɛ́: «Pɛ́kinsɛm niiŋú Muɔ́nɔ́ u mɔɔnd kí imbɔ́k sí pɛɛnd; 23pííŋɔn, puɔ́s púkátátúɛ́ yɛ́ɛ́nyɔk.» Púɛl pɔ́ insíkíl tɛ pɔ́kuɔyɔ.
Nɛ Píɛl ne Yésus mápikatá lemfúé
24Pɛ́mɛɛlɛ́ páámán Kafalanawúum, petúúsí lemfúé péépísíítin Píɛlɛ, pɔ́ kɛ́ɛ́yɛ́ ɛ́ɛ́: «Másɛ waanɔ́ tipá upíkata lemfúé u kitamb kí Támbák á?» 25Píɛlɛ kɔ́ɔ́p ɛ́ɛ́ waápíkata. Piɛl ósiondón á nuyá, Yésuse wɛɛpɛkɛtɛt ó kuówun wɔ́ ɛ́ɛ́: «Índíán nuawɛ Símun? Ɛ́nyɛ́ upásiɛ́ upíkata lemfúé é pefuŋ pé kúúsí? Paán pɔ́ɔ́pɔ́ éyí peenyí é?» 26Umɛɛlɛ́ no kuondinyi ɛ́ɛ́: «Peenyí,» Yésuse kɛ́ɛ́yɛ́ ɛ́ɛ́: «paán pɔ́ kitɔŋ tipá na makúta ɛ́ɛ́ pápíkata. 27Ɛ́ɛ́ pɔ́titúɔ́pɛ́n kutɛɛ, apá kɔ́ ɔlɔk, yɔɔpɔ́ akaná atúánɛ́ kuɛtikɛn, áálun niít ní yɛ́ɛ: akaná okóóki kikɔ́ŋ kɔ́ɔk. Kɔ́l kíí ekí pɔ́ ó pusíó púásɔ́ naami naawu.»
Valið núna:
Matié 17: yav
Áherslumerki
Deildu
Afrita
Want to have your highlights saved across all your devices? Sign up or sign in
© 2026, CABTAL