Matié 14
14
Nikú ní Isáaŋ Etuúsí
(Mál 6.14-29; Lúk 9.7-9; 3.19-20)
1Á kiátakáánɛ́ kisikɛl, Elóote umaápá efuŋ u kitɔŋ kí Kalilée wɔɔ́pɔ nukúmu nú Yésus. 2Ukanyi kɔk é peelímoólí pɛ́ɛ́yɛ́ ɛ́ɛ́: «Mɔɔnd owúnóo, Isáaŋ Etuúsíe wɛɛ́nyɛ́nyɔ́k á pilɔ́ŋ. Puátakáánɛ́ puandá upianɛ́ pukaaka pú kuɛlɛ piseye.» 3Á kiákí ɛ́ɛ́ Elóot meekí pukaaka ɛ́ɛ́ pɛ́ɛtikɛn Isáaŋɛ, pááka wɔ́ é kilu, pátúútɔ wɔ́ á kiansi kí imbíne ó pusíó pú Elóotiát, akányí andimán wɛɛyɛ́ Filip; 4ɛ́ kuɛlɛɛ́ Isáaŋ matíánán wɔ́ ɛ́ɛ́: «Kikotí tipá kíkufáan pukaaka pú kupítikɛn akányí andimán ááwɔ.» 5Tɛ aná Elóot mɔɔ́pílɔ́ŋɔ́ kuɔ́n Isáaŋɛ, umapíán puwaá ne nikúli ní Pɛyúútɛn nímeémenyén ɛ́ɛ́ Isáaŋ nyɛ eŋémímekélíe má Támbák. 6Puɔ́sí kɔk Elóot mɔɔ́tɔyɔ́ putɔ́mbí pú nupién núɛ́yɛ́, ɔmbúl u Elóotíat weepíne ké eŋis yɛ pɛɛnd pámaápá kɛ́ɛ́yɛ́ ɔ́ putɔ́mbí, púɛlɛ Elóote peseé. 7Waapília ke eŋis yɛ́ pɛɛnd ɛ́ɛ́ ukeeki ɔmbúl ukáání epú kitikit ukoónyóówun wɔ. 8Ni insúŋɛ i yóótí, muúŋayɔ́ ɔmbúl kanyi kɛ́ɛ́yɛ́ ɛ́ɛ́: «Ímfá akɛ nínúan ɛ́ mɛtɛ́ŋɛl ɛtɔ́ ú Isáaŋ Etuúsí.» 9Púɛ́kɛɛl efuŋ muyú; maná aná umaápá umámaná apília ké eŋís yɛ́ pɛɛnd, waátap. 10Waatɔ́m melúse mɛ́ɛ́yɛ́ á kiansi kí imbíne é kuekéndún Isáaŋɛ ɛtɔ́. 11Póól na wɔ́ atálán ɛ́ mɛtɛ́ŋɛ́l, péékeeki muúŋayɔ́ ɔmbɔ́l, wɔɔkɔ́l weenyekí yóótíe. 12Popíónyí pí Isáaŋ pɔ́ɔsikɔ́l kimbuŋbuŋ kíɛ́yɛ́ pónyonyoó. É kélém akáánɛ́ páányatíán Yésuse epú púmaápitápɔ́k.
Yésus móoyi kiɔŋɔnyi kí pɛɛnd
(Mál 6.30-44; Lúk 9.10-17; Isŋ 6.1-15)
13Yésus ɔ́ɔ́pɔn nikú ní Isáaŋ, wɔɔkɔ́l kitóóŋ, waatɔk ɔ́ kɔɔ́mɔ akáánɛ́ waayɔɔk ɔ́ kiɔ́sɔ́kɔlíɔ́ wééŋényí. Pɛɛnd ɛ́ɛ́nɛn anakáánɛ́, kiɔŋɔnyi kí pɛɛnd kíɔ́ŋ kɛ́ɛ́yɛ́ nɔ pikɔ́nd. Póólinon siki mɔɔndɛ kɛ́ɛ́yɛ́ á pálɛ́k. 14Yésus áámán kɔɔ́mɔ u máayuúkán á, uméselé ó kitóóŋ. Umɛ́ɛ́n kiɔŋɔnyi kí pɛɛnd, waapia niɛ́nɔsúkɛ kɔ́ɔ́p ó pusíó, weéŋukesi epé pámaánumá. 15Kisɛ́ndɛ áasiámán á, popíónyí pɛ́ɛ́yɛ́ péépísíítin wɔ́. Pɔ́ kɛ́ɛ́yɛ́ ɛ́ɛ́: «Kɔɔ́mɔ akɛ nyɛ kiɔ́sɔ́kɔlíɔ, andíkɛ́k kisikɛl mámaná atápɔk. Tɔ́m pɛɛnd epe á tuyá túnyɛɛ́ ɛ́ mɛŋɛ́l ɔ́ kuɔpíɔ́ndɔ́n múkunya.» 16Yésus kanyí kɔ́ɔ́p ɛ́ɛ́: «Aákóo! Pátipá páyuukan ɔ́ kuɔpíɔ́ndɔ́n múkunya. Ánutááŋ pɔ́ panɔ́ muɛ́t.» 17Pákanyi kɔk kɛ́ɛ́yɛ́ ɛ́ɛ́: «Tuápian akɛ yá pilɛ́ɛt pítáan nɔ muɔpɔ́ múandɛ́.» 18wɔ́ kɔ́ɔ́p ɛ́ɛ́: «Ónuŋólín na mɔ́ akɛ.» 19Waatíán pɔ́ ɛ́ɛ́: «Ónunyómbítósí pɔ́.» Pɛɛnd pɛ́ɛyɛtɛ pikuti pɔ́ɔ́nyɔmbitɔn. Wɔɔkɔ́l pilɛ́ɛt pikáánɛ́ pitáan nɔ muɔpɔ́ mukáánɛ́ múandɛ́, wɛɛmɛlimɛt. Weelémbi Támbákɛ́ɛ; wɛɛ́nsi pilɛ́ɛt, weeki popíónyí pɛ́ɛ́yɛ́ póond á kuapan pɛɛnd. 20Pɛɛnd peem páánya, póokooy; popíónyí póond á kupáta piénsí pímeésíén: píówóon á musááŋ múát na múandɛ́! 21Epé pámaányáán maapá pákuáman tukɔ́n tútáan, kati kuan pakáandɔ́ na paápayɔ́.
Yésus ɛ́ɛ́kɛndɛ ó moomb mɛnɛ́mɛnɛ́ɛ
(Mál 6.45-52; Isŋ 6.16-21)
22Nɔ niɔ́kɔ́tɔ́n Yésuse waatían popíónyí pɛ́ɛ́yɛ́ ɛ́ɛ́ pámákat ó kitóóŋ pófook asaá nakúnɛ, akáání ɛ́ɛ́ wɔ́ úsíén úkúúkí pɛɛnd. 23Umanan ekúúkesi pɛɛnd, waamákat kɔ́ ɔkɛ́l ó kuopísókólónyi. Kuɔ́mɔ kúɛ́sɛnd, wɔ́ akáánɛ́ wééŋényí. 24Kitóóŋ mapá kíkanyi kaáyɛ́ na kiŋindiŋɛnd kí asaá. Emfún mapá úfúke pukaaka, wóólinon popíónyí ó pusíó, moombó áatukan, mányuŋan kitóóŋ. 25Ne emfúnupálɛ, Yésuse woólin popíónyí pɛ́ɛ́yɛ́ wɛɛndɛ ó moomb mɛnɛ́mɛnɛ́ɛ. 26Pɛ́ɛ́nɛn wɔ́ wɛɛndɛ ó moomb mɛnɛ́mɛnɛ́ɛ, popíónyí pɛ́ɛ́yɛ́ páápia kiandákáand kí puwaá. Pakanyi ɛ́ɛ́: inyɔli yɛ́ɛ. Na puwaá kitikit póond ákuákana tukokóo. 27Maná, nɔ niɔ́kɔ́tɔ́n Yésuse waakálitɛn pɔ́: «Énulúŋ, niiŋúɛ́ wɔ, nutipiá puwaá!» 28Píɛl kanyi kɛ́ɛ́yɛ́ ɛ́ɛ́: «Ɔkɔ́n, kémuémue índɛ aŋúɛ wɔ́ ímfá pukaaka ɛ́ɛ́ yɛ́ɛ́ndɛ ó moomb mɛnɛ́mɛnɛ́ɛ yóól akáánɛ́ ɛnyɛɛ́.» 29Yésuse kɛ́ɛ́yɛ́ ɛ́ɛ́: «Óló.» Piɛ́lɛ kɔk weesel ó kitóóŋ, woond ɛ́ kuɛndɛ ó moomb mɛnɛ́mɛnɛ́ɛ, uyuukan kɔɔ́mɔ Yésus nyɛɛ́. 30Maná, wɛɛ́nɛn emfún fúke, puwaá púɛ́tikɛn wɔ́. Woond é kunyímen ó moomb, waánsɛt: «Ɔkɔ́n, íŋɔkɔ́!» 31Nɔ niɔ́kɔ́tɔ́nɔ Yésuse waakaanunɔ ɔmbɔk, wɛɛtikɛn wɔ. wɔ́ kɛ́ɛ́yɛ́ ɛ́ɛ́: «Mɔɔnd ukuátap kuayɔ́, kiákí amányaák imfɛ́lɔ́?» 32Akáání kɔk pányamákát ó kitóóŋ. Pɛ́mɛɛlɛ́ pámákatan, emfúnu wééluŋ. 33Epé pámaápá ó kitóóŋ péesukin Yésuse tunuu, pákanyi kɛ́ɛ́yɛ́ ɛ́ɛ́: «Kémuémue, anyi Muɔ́nɔ́ u Támbák!»
Kiéŋukie Sinisalɛ́t
(Mál 6.53-56)
34Pásaapan asaá, páányaám Sinisalɛ́t. 35Pɛɛnd pɔ́ kɔɔ́mɔ kakáánɛ́ péemenyi Yésuse. Pɔ́ɔyitɛn kitɔŋ kitikit ɛ́ɛ́ Yésus móól. Póólinon wɔ́ ne epé kitikit pámaánuma. 36Póópísókoliti wɔ́ ɛ́ɛ́ úyap pɔ́ pékíik kukíik etú wɛ́ɛ́yɛ́ ú kilaá; epé kitikit pémeékíikén tɛ etú ne etú wɛ́ɛ́yɛ́ ú kilaá pééŋuken.
Valið núna:
Matié 14: yav
Áherslumerki
Deildu
Afrita
Want to have your highlights saved across all your devices? Sign up or sign in
© 2026, CABTAL