Mata 26
26
Ma taŋtəv tə aska Yesu a mbəla
(Mrk 14.1-2; Luk 22.1-2; Yhw 11.45-53)
1Ndə Yesu a kəɗaŋ sərək ma tə bəza tiwtiw, zlap a zlapatana a magəli tə aagi, iŋgaya: 2«Huni kasənə, a finha vah gbak a gwaygwaya Paska a ɗal. Azha, Mbə həji ma dəgnak a vəla ka a ra həji aagi, a adar ka ata mpi ma gəzlaŋgarak, aska a dza ka a mci,» iy. 3Azha, magulakwakw maɗal kwakus aagi abə həji ma shif shif ma ndza aha Yahuda aagi, aa tadzam aka a wata ataa Kayafas, Madagal maɗal kwakus. 4Dəba aagi aji a gas wirwir abə ŋkwaɓ aska a mbəla Yesu a dzə ka a mci. 5A tsutsa, aa kazlap, aagi iŋgaya: «Həji ɗiw a mbələ vah gwaygwaya Paska səku, ara ndə, a kaadaaha həɗəw ha aka a taba həji aagi,» aagiy.
Wala minja taɗalanə mali a ha Yesu
(Mrk 14.3-9; Yhw 12.1-8)
6Ndə, Yesu a hayak Baytaniya a wata Simun ala fagwalakw, 7wala minja kərəɗ a kərəɗha abəra abə gambaram mali ma kanji fiŋfiŋ ndə dala dagala a heɗe, tiɗa ndə Yesu ata la zəm səkən, dəba a abəzanə mali watsa a ha Yesu. 8Ndə magəli tə aagi gəra ya, tikush a ghuɗek ta, azha, dəba aagi azlap: «A gəy mali watsə ara veme? 9Kadək aagi aberɓa mali watsə dala dagala, azha həji tsa kavəlatana dala tə a həji titikw aagi.» 10Ndə Yesu a sən bəza, dəba a azlapatana, iŋgaya: «Huni wərəzlanə zləm a wala watsə ara veme? Səkən ndə a ɗal mavəy sa, a ɗa zlən ma təwah ara sa. 11Ara ndə a ɗa, həji titikw aagi ndza abə kwa vepiy ara huni, ama sa, sa kaandza pal abə huni akas. 12A bəzaka mali watsə ata zlikusəm naka meni, aska nda naka a jiɓ. 13Sa zlapahuni, a ɗa ŋter: Kwa a vatəy, la ndə aa kaaghal Ma wiyə ma təwah watsə ata manahayak tiwtiw, aagi aghal zlən ndə wala watsə a ɗalə, azha, həji asənakənə a wala watsə.»
Yahuda a kamay a vəlatana Yesu aka aska ra a magulakwakw maɗal kwakus aagi
(Mrk 14.10-11; Luk 22.3-6)
14Azha, ala minja ŋtaguleŋ a taba magəli Yesu ma wam aha gbak aagi, ala ndə həji kayə Yahuda Iskariyut, tsaw a nda ara magulakwakw maɗal kwakus aagi. 15Azha, zlap a zlapatana, iŋgaya: «Səkən ndə huni kaavəlaka veme andza sa tavəlahuni Yesu?» iy. Həji watsa aagi, ŋgəɗ aa ŋgəɗ dala ramahkaɗ, pa aa vəlanə. 16ꞌWa aka a tsutsa azha, Yahuda a kaləm a gas təf avaŋgəy abə a beratana Yesu.
Tiw Yesu aa kazəm wəda gwaygwaya Paska abə magəli tə aagi
(Mrk 14.12-16; Luk 22.7-13)
17Vah mampər, diw gwaygwaya wəda ndə həji ŋkula ɗalə abə faŋtər a mən, magəli aagi tsaw aa ndaha aska a zlapanə a Yesu: «Hwa may a vata abə ni lamahu la ta zəm wəda gwaygwaya Paska?» aagiy. 18Yesu zlap a zlapatana, iŋgaya: «Huni nda a ŋge a hayak ma dzamadzam, kwa vaye ndə huni lima abə sha, huni zlapanə: “Madagal ma zlap: Wan naka huk, a wata kwa abə ni aɗal gwaygwaya Paska abə magəli naka aagi.”» 19Magəli tə aagi, aa tsaa nda a ɗalə andza ndə Yesu a ghalatana, azha, dəba aagi ada wəda gwaygwaya Paska.
Yesu a kazlap ata ala ma kaaberi
(Mrk 14.17-21; Luk 22.14; Yhw 13.21-30)
20Ndə ŋtsəɓahw a ɗal tə, Yesu abə magəli tə ma wam aha gbak watsa aagi kazəm səkən. 21Tiɗa ndə, aa kazəm səkən azha, dəba a azlap, iŋgaya: «Sa zlapahuni, a ɗa ŋter: ala minja ŋtaguleŋ a taba kuni a aɓin a beraka bəza.» 22Magəli tə aagi tiwtiw tadzatana zlikusəm aka ana ma watsə, kwa vaye a kaɗiwzə, ŋtaguleŋ, ŋtaguleŋ, aagi iŋgaya: «A ɗa sa vəw, sa Bay Madagal? A ɗa sa vəw, sa Bay Madagal?» 23Yesu zhin a zhinatana, iŋgaya: «Ala ndə ni katsa ra a tizhimzla abə sha watsə, sha ana ma kaaberaka. 24Mbə həji ma dəgnak a amca, andza zlap ma ŋtir ka a heɗe. Ama, dadawər tə azha me ata ala ma kaber Mbə həji ma dəgnak! Ataa ala watsa ya, galaɓa ndə a ŋkula mbəwha!» 25Yahuda, ala ma kaanda ber watsa, dəba a aɗiwzə, iŋgaya: «Sa vəw, Masərək?» iy. Yesu zhin a zhinanə, iŋgaya: «Andza ndə hwa zlap,» iy.
Wəda Bizlaf
(Mrk 14.22-25; Luk 22.15-20; 1Kr 11.23-26)
26Tiɗa ndə aa kazəm səkən, leŋ Yesu a ji wəda, a diwzha ndə a ɗalanə wasiy bəza a Bizlaf, teŋ a teŋ ka a mən, azha pa a vəlatana a magəli tə aagi, iŋgaya: «Huni ji, huni zəmə, watsə ana zlikusəm naka.» 27Zhana leŋ a ji zlərkuɗ mavə, a diwzha ndə a ɗalanə wasiy bəza a Bizlaf, pa a vəlatana a magəli tə aagi, iŋgaya: «Huni sə tiwtiw. 28Ara ndə a ɗa, watsə ana ampəs naka, ampəs ta dzəv ha, ma zahha aska həji aagi vərəm, aska pəl mpət ta aagi. 29Sa kazlapahuni: Sa kaazhin a sa mavə watsə abə huni zhana akas, a ɗa maɗ, a gwar ata vah ndə sa kaanda, a zhin a sa wiyə mavə zhana abə huni a wəzəm a la ndza bay Vana.»
Meɗ Piyer
(Mrk 14.26-31; Luk 22.33-34, 39; Yhw 13.37-38)
30A diwzha ndə aa ya dərəf gwaygwaya Jabura bəza azha, aa tsaa kanda ta a ha wəzəm Jaytun. 31Azha, Yesu zlap a zlapatana a magəli tə aagi, iŋgaya: «Akacihwa abə zaɗə watsə, huni tiwtiw, huni ambaslaka ka, ara ndə a ɗa, taŋtiraya andza watsə: Sa adza mbə njin bəza azha, ŋcimi ma ndza a biri aagi awiɗ kwa a vatəy.» 32Ama Yesu zhana, iŋgaya: «Ndə sa kaazhina naka a bəza a jiɓ, sa anda a tehahuni a Galili,» iy. 33Piyer leŋ a ji zlap, dəba a azlapanə, iŋgaya: «Kwa andza həji ndiɓi aagi tiwtiw tambaslahu ka, sa, sa kaambaslahu tep səku,» iy. 34Yesu zhin a zhinanə, iŋgaya: «Sa zlapahu, a ɗa ŋter: Abə zaɗə watsə, gədəkəs, gwamzakw a nda dza wəla, hwa tazlap bəza, zhin mahkaɗ, hwa kasənaka tep səku,» hwiy. 35Piyer zlap a zlapanə, iŋgaya: «Kwa, andza sa nda mca hwa, sa kaazlap tep, sa kasənahu səku, siy akas!» Azha, magəli tə ndiɓi aagi tiwtiw, a zlap andza sha.
Yesu a katarha a Gecemane
(Mrk 14.32-42; Luk 22.40-46)
36Azha, Yesu peteŋ taa tə abə magəli tə aagi ata la ndə həji kayə Gecemane, zlap a zlapatana, iŋgaya: «Huni ndza ka a ɗi, tiɗa ndə, sa kaanda naka tarha, a ŋge a ɗi,» iy. 37A diwzha tə, daŋ a ya Piyer aara abəra abə wəzhi Zebede ma gbak aagi, a tsutsa a kaghuɗek zhana, ꞌunəf tə a kazla. 38Zlap a zlapatana, iŋgaya: «ꞌunəf naka taghuɗek tə a kagas a dzaka ka, huni ndza ka a ɗi abəra sa, azha huni ɗiw a wan kuni səku.» 39Azha, a nda kajik ikwa atama ya, fak a fak ha tə ka ata hayak, wənək tə a hayak, dəba a atarha iŋgaya: «Vana, andza a kaɗal ci, kərəɗ zlərkuɗ yaka watsə bəza abəra sa. Ama abə may naka səku, maɗal andza may kwa,» iy. 40A diwzha, Yesu a zhinha ara magəli tə mahkaɗ watsa aagi, a ndaha a gərata aa tawan ta. Zlap a zlapanə a Piyer azha, iŋgaya: «Ikwa ya, huni kula a ndza abə nja kwa ler ŋtaguleŋ abə sa səku azha vəw? 41Huni ɗiw a wan kunis, huni tar Bizlaf ara ndə huni kandəv kuni ata vah təl həji aagi, huni may a ɗal zlən ma təwah ama ŋgalaŋ kuni akas.» 42Kərəɗ a kərəɗ tə bəza zhana a magbak tə, azha dəba a atarha andza watsə, iŋgaya: «Vana, andza zlərkuɗ yaka watsə, a kaakərəɗ bəza abəra sa səku, səy sa asə ci, maɗal andza may kwa,» iy. 43Zhana, a zhinha abəra magəli tə watsa aagi, a ndaha aa tawan ta wəruk, aa kula a wan abə nja səku. 44Yesu tsaw a nda tə bəza zhana abəra təmta, dəba a atarha a mamahkaɗ, a zlap andza ma ma ndza amcana aagi wəruk. 45Zhana, zhin a zhinha ara magəli tə aagi azha, zlap a zlapatana, iŋgaya: «Huni kawan kwagwa zhana, huni kanəp vəw? Anawatsə, vah tə taɗal tə, azha Mbə həji ma dəgnak a avəla tə aska ra a həji mpət aagi. 46Huni gar a wəzəm, kiyzaŋkwa! Tsakwa! Ala ma kaberaka taa tə,» iy.
Mbəla Yesu
(Mrk 14.43-52; Luk 22.47-53; Yhw 18.2-11)
47Tiɗa ndə Yesu a kazlap ndza tə kwagwa, peteŋ Yahuda taa tə, ma ŋtaguleŋ a taba magəli tə ma wam aha gbak aagi. Aagi abə ŋgaɓa həji aagi, aagi abə səkən ghəm aagi, ŋgezle ma dagal abə dambəy aagi. Magulakwakw maɗal kwakus aagi abə mashifshif ma ndza a hayak aagi ma zlənata. 48Yahuda, ala ma kaber Yesu, a kaghalatana a həji watsa aagi, iŋgaya: «Ala ndə sa kaazlapzanə katkadək andza ŋgwanambə naka ya, sha, huni mbələ,» iy. 49A tsutsa a tsutsa, kərəɗ a kərəɗ abəra Yesu, i kəsha iŋgaya: «Aŋkwa Masərək,» azha dəba a azlapzanə katkadək. 50Yesu zhin a zhinanə, iŋgaya: «Ŋgwanambə naka, səkən ma daahu a ɗalə, vas a ɗalə bəza kahkah.» Azha, ŋgaɓa həji aagi kərəɗakənə, dəba aagi ambələ. 51Azha, tsakwa ŋtaguleŋ a taba magəli ataa Yesu aagi, fəh a dəɗha ŋgezle ma dagal a bəl maɗal zlən ataa madagal ataa maɗal kwakus aagi, hats a zlanə zləm bəza. 52Yesu zlap a zlapanə azha, iŋgaya: «Zhin ŋgezle ma dagal kwa ka a wəzli tə, ara ndə a ɗa, tiwtiw həji ma kalawaɗ abə ŋgezle aagi, ŋgezle watsa ma kadenehata.» 53Deŋ kwa ya, sa kula a tar Vana, anawatsə anawatsə, a azlənaka biri matəf tə aagi dəy aha wam aha gbak wəra? 54Ama azha andza ikwa səku ya, a sən a ɗa kəliy ana zlap ma ndza a Ɗerewal ma ghwaɗeɗe avaŋga? Tazlap iŋgaya: Aagi apew ikwa andza watsə. 55A tsutsa, Yesu zlap a zlapatana a ŋgaɓa həji aagi, iŋgaya: «Huni ndaha abə ŋgezle abə dambəy aagi, a mbəlaka andza ŋhil ara veme? Kala pish, sa kandza a jak kwakus aska a sərəkatana səkən a həji aagi, ama huni taji a mbəlakas. 56Ama tiwtiw a ɗal ikwa aska a kəliy, zlap ataa həji ma ɗaf ma ndə aa zlimazə ara Bizlaf ma ndza a Ɗerewal ma ghwaɗeɗe aagi.» Azha, a tsutsa magəli tə aagi, aa tsaa kashi ta tiwtiw, mbasl aa mbasl ka.
Yesu atama həji ma ndza ata la zla guma ma dagal
(Mrk 14.53-65; Luk 22.54-55, 63-71; Yhw 18.12-18)
57Həji ma mbəla Yesu aagi, jaɓ aa jaɓi a wata Kayafas, madagal maɗal kwakus. Ndə masərək ma ma garagar aagi abə həji ma shif shif ma ndza aha hayak aagi a tsutsa. 58Piyer, a diwzha Yesu, a kasəbarə abə gədək tə, a gwar ata biygi ataa madagal maɗal kwakus watsa. Tsaw a nda a gi ata biygi, azha ka a ndza tə ka abə mahəbar jak aagi, aska a gəra avaŋgəy abə kəɗaŋ tə. 59Magulakwakw maɗal kwakus aagi abə həji ma ndza ata la zla guma ma dagal aagi, aa gas la tək ma ata Yesu, aska aagi adzə ka a mci. 60Ama kwa aa tagəraɓa ma tə akas, kwa abə gaɗaɗaŋ ndə həji aagi zlə vərəm ata Yesu. Kəɗaŋ tə azha, həji aagi gbak, aa taa ta, 61azha aagi iŋgaya: «Ala watsə tazlap, iŋgaya: “Sa kula a ghurəm jak kwakus watsə ka, a wan mahkaɗ a diwzha, sa kula a zhin a ꞌunə,”» iy. 62Madagal maɗal kwakus, takaw a gar a wəzəm, zlap a zlapanə a Yesu, iŋgaya: «Ma ndə həji watsə aagi kazlapə ata hwa watsə aagi veme? Hwa kaji zhinha zlap səku?» 63Ama Yesu ɗekɗek a ndza tə ka. Madagal maɗal kwakus, dəba a azlapanə azha, iŋgaya: «Ata zləm Bizlaf ma ŋkula mca, sa ɗiwzahu, andza hwa ana Kərist, Mbə Bizlaf,» iy. 64Yesu zhin a zhinanə, iŋgaya: «Hwa ma zlap. Ama, sa zlapahuni: ꞌWa aka akacihwa, huni agəra Mbə həji ma dəgnak, a kandza ata guva zəm ataa Bizlaf ma ɓərɓər, zhana huni agəra, a kandaha ata gwazlavay ma ndza a wəzəm a wəzlaf.» 65Mbara azha, Madagal maɗal kwakus, ŋhwak a ŋhwak rəkuts tə aagi, iŋgaya: «Bizlaf ana ndə a rə! Həji ɗiw həji gas a gəra səkən ndə a ɗal aagi zhana ava! Huni tə, huni tazlima abə zləm kuni, ana dahalay ndə a ranə a Bizlaf. 66Deŋ kuni avaŋga?» Zhin a zhinanə: «A ɗa badaway, teete a dza ka a mci,» aagiy.
67Azha dəba aagi aŋtif majignek a heɗe a wənək tə, aa karəgaɗə, ndiɓi aagi kaŋganə ra a zləm. 68Aagi iŋgaya: «Sən bəza, hwa ma ɗa Kərist, ghalani ala ma dzahu a taba cini azha vaya!» aagiy.
Piyer a kameɗ, a kasən Yesu səku.
(Mrk 14.66-72; Luk 22.56-62; Yhw 18.17)
69Azha Piyer tandza tə ka, a bəza ata varvara a biygi. Wala ma ɗal zlən minja, kərəɗ a kərəɗha abəra, iŋgaya: «Hwa yəm, huni va a ndza abə Yesu, ala ndə hayak Galili,» iy. 70Ama Piyer a meɗakənə atama həji aagi tiwtiw, iŋgaya: «Sa kasən ma ndə hwa kamay a zlap səku,» iy. 71A diwzha tə, tsaa kandaa tə aha bəza a majigjigi. Wala minja ma ɗal zlən zhana, gəra a gəra, dəba a azlapatana a həji ma ndza a tsutsa aagi, iŋgaya: «Ala watsə, aa va a ndzaha abə Yesu ndə Nasaratu.» 72Azha, tik Piyer i meɗ zhana, iŋgaya: «Sa meɗehu, sa kasən ala watsə səku,» iy. 73Kajik ikwa a tsutsa, həji ma ndza a tsutsa aagi, kərəɗ aa kərəɗha abəra Piyer, zlap aa zlapanə, aagi iŋgaya: «Ŋter, hwa yəm, hwa ɗa ala ta. Madedizh ma kwa, ma kaghal landaa kwa,» aagiy. 74Azha Piyer dəba a ameɗ, iŋgaya: «Bizlaf masaka yaka, andza sa zla gaɗaɗaŋ! Sa kameɗanə, sa kasən ala watsə səku!» A tsutsa a tsutsa, gwamzakw dəba a adza wəla. 75Dəba Piyer a adeŋ ata zlap ndə Yesu a zlapanə, iŋgaya: «Gwamzakw a nda dza wəla, hwa tameɗ zhin mahkaɗ, hwa kasənaka səku,» iy. Tsaw a ndaa tə a bəza, dəba a ahan.
Valið núna:
Mata 26: GOU
Áherslumerki
Deildu
Afrita
Want to have your highlights saved across all your devices? Sign up or sign in
Mata 26
26
Ma taŋtəv tə aska Yesu a mbəla
(Mrk 14.1-2; Luk 22.1-2; Yhw 11.45-53)
1Ndə Yesu a kəɗaŋ sərək ma tə bəza tiwtiw, zlap a zlapatana a magəli tə aagi, iŋgaya: 2«Huni kasənə, a finha vah gbak a gwaygwaya Paska a ɗal. Azha, Mbə həji ma dəgnak a vəla ka a ra həji aagi, a adar ka ata mpi ma gəzlaŋgarak, aska a dza ka a mci,» iy. 3Azha, magulakwakw maɗal kwakus aagi abə həji ma shif shif ma ndza aha Yahuda aagi, aa tadzam aka a wata ataa Kayafas, Madagal maɗal kwakus. 4Dəba aagi aji a gas wirwir abə ŋkwaɓ aska a mbəla Yesu a dzə ka a mci. 5A tsutsa, aa kazlap, aagi iŋgaya: «Həji ɗiw a mbələ vah gwaygwaya Paska səku, ara ndə, a kaadaaha həɗəw ha aka a taba həji aagi,» aagiy.
Wala minja taɗalanə mali a ha Yesu
(Mrk 14.3-9; Yhw 12.1-8)
6Ndə, Yesu a hayak Baytaniya a wata Simun ala fagwalakw, 7wala minja kərəɗ a kərəɗha abəra abə gambaram mali ma kanji fiŋfiŋ ndə dala dagala a heɗe, tiɗa ndə Yesu ata la zəm səkən, dəba a abəzanə mali watsa a ha Yesu. 8Ndə magəli tə aagi gəra ya, tikush a ghuɗek ta, azha, dəba aagi azlap: «A gəy mali watsə ara veme? 9Kadək aagi aberɓa mali watsə dala dagala, azha həji tsa kavəlatana dala tə a həji titikw aagi.» 10Ndə Yesu a sən bəza, dəba a azlapatana, iŋgaya: «Huni wərəzlanə zləm a wala watsə ara veme? Səkən ndə a ɗal mavəy sa, a ɗa zlən ma təwah ara sa. 11Ara ndə a ɗa, həji titikw aagi ndza abə kwa vepiy ara huni, ama sa, sa kaandza pal abə huni akas. 12A bəzaka mali watsə ata zlikusəm naka meni, aska nda naka a jiɓ. 13Sa zlapahuni, a ɗa ŋter: Kwa a vatəy, la ndə aa kaaghal Ma wiyə ma təwah watsə ata manahayak tiwtiw, aagi aghal zlən ndə wala watsə a ɗalə, azha, həji asənakənə a wala watsə.»
Yahuda a kamay a vəlatana Yesu aka aska ra a magulakwakw maɗal kwakus aagi
(Mrk 14.10-11; Luk 22.3-6)
14Azha, ala minja ŋtaguleŋ a taba magəli Yesu ma wam aha gbak aagi, ala ndə həji kayə Yahuda Iskariyut, tsaw a nda ara magulakwakw maɗal kwakus aagi. 15Azha, zlap a zlapatana, iŋgaya: «Səkən ndə huni kaavəlaka veme andza sa tavəlahuni Yesu?» iy. Həji watsa aagi, ŋgəɗ aa ŋgəɗ dala ramahkaɗ, pa aa vəlanə. 16ꞌWa aka a tsutsa azha, Yahuda a kaləm a gas təf avaŋgəy abə a beratana Yesu.
Tiw Yesu aa kazəm wəda gwaygwaya Paska abə magəli tə aagi
(Mrk 14.12-16; Luk 22.7-13)
17Vah mampər, diw gwaygwaya wəda ndə həji ŋkula ɗalə abə faŋtər a mən, magəli aagi tsaw aa ndaha aska a zlapanə a Yesu: «Hwa may a vata abə ni lamahu la ta zəm wəda gwaygwaya Paska?» aagiy. 18Yesu zlap a zlapatana, iŋgaya: «Huni nda a ŋge a hayak ma dzamadzam, kwa vaye ndə huni lima abə sha, huni zlapanə: “Madagal ma zlap: Wan naka huk, a wata kwa abə ni aɗal gwaygwaya Paska abə magəli naka aagi.”» 19Magəli tə aagi, aa tsaa nda a ɗalə andza ndə Yesu a ghalatana, azha, dəba aagi ada wəda gwaygwaya Paska.
Yesu a kazlap ata ala ma kaaberi
(Mrk 14.17-21; Luk 22.14; Yhw 13.21-30)
20Ndə ŋtsəɓahw a ɗal tə, Yesu abə magəli tə ma wam aha gbak watsa aagi kazəm səkən. 21Tiɗa ndə, aa kazəm səkən azha, dəba a azlap, iŋgaya: «Sa zlapahuni, a ɗa ŋter: ala minja ŋtaguleŋ a taba kuni a aɓin a beraka bəza.» 22Magəli tə aagi tiwtiw tadzatana zlikusəm aka ana ma watsə, kwa vaye a kaɗiwzə, ŋtaguleŋ, ŋtaguleŋ, aagi iŋgaya: «A ɗa sa vəw, sa Bay Madagal? A ɗa sa vəw, sa Bay Madagal?» 23Yesu zhin a zhinatana, iŋgaya: «Ala ndə ni katsa ra a tizhimzla abə sha watsə, sha ana ma kaaberaka. 24Mbə həji ma dəgnak a amca, andza zlap ma ŋtir ka a heɗe. Ama, dadawər tə azha me ata ala ma kaber Mbə həji ma dəgnak! Ataa ala watsa ya, galaɓa ndə a ŋkula mbəwha!» 25Yahuda, ala ma kaanda ber watsa, dəba a aɗiwzə, iŋgaya: «Sa vəw, Masərək?» iy. Yesu zhin a zhinanə, iŋgaya: «Andza ndə hwa zlap,» iy.
Wəda Bizlaf
(Mrk 14.22-25; Luk 22.15-20; 1Kr 11.23-26)
26Tiɗa ndə aa kazəm səkən, leŋ Yesu a ji wəda, a diwzha ndə a ɗalanə wasiy bəza a Bizlaf, teŋ a teŋ ka a mən, azha pa a vəlatana a magəli tə aagi, iŋgaya: «Huni ji, huni zəmə, watsə ana zlikusəm naka.» 27Zhana leŋ a ji zlərkuɗ mavə, a diwzha ndə a ɗalanə wasiy bəza a Bizlaf, pa a vəlatana a magəli tə aagi, iŋgaya: «Huni sə tiwtiw. 28Ara ndə a ɗa, watsə ana ampəs naka, ampəs ta dzəv ha, ma zahha aska həji aagi vərəm, aska pəl mpət ta aagi. 29Sa kazlapahuni: Sa kaazhin a sa mavə watsə abə huni zhana akas, a ɗa maɗ, a gwar ata vah ndə sa kaanda, a zhin a sa wiyə mavə zhana abə huni a wəzəm a la ndza bay Vana.»
Meɗ Piyer
(Mrk 14.26-31; Luk 22.33-34, 39; Yhw 13.37-38)
30A diwzha ndə aa ya dərəf gwaygwaya Jabura bəza azha, aa tsaa kanda ta a ha wəzəm Jaytun. 31Azha, Yesu zlap a zlapatana a magəli tə aagi, iŋgaya: «Akacihwa abə zaɗə watsə, huni tiwtiw, huni ambaslaka ka, ara ndə a ɗa, taŋtiraya andza watsə: Sa adza mbə njin bəza azha, ŋcimi ma ndza a biri aagi awiɗ kwa a vatəy.» 32Ama Yesu zhana, iŋgaya: «Ndə sa kaazhina naka a bəza a jiɓ, sa anda a tehahuni a Galili,» iy. 33Piyer leŋ a ji zlap, dəba a azlapanə, iŋgaya: «Kwa andza həji ndiɓi aagi tiwtiw tambaslahu ka, sa, sa kaambaslahu tep səku,» iy. 34Yesu zhin a zhinanə, iŋgaya: «Sa zlapahu, a ɗa ŋter: Abə zaɗə watsə, gədəkəs, gwamzakw a nda dza wəla, hwa tazlap bəza, zhin mahkaɗ, hwa kasənaka tep səku,» hwiy. 35Piyer zlap a zlapanə, iŋgaya: «Kwa, andza sa nda mca hwa, sa kaazlap tep, sa kasənahu səku, siy akas!» Azha, magəli tə ndiɓi aagi tiwtiw, a zlap andza sha.
Yesu a katarha a Gecemane
(Mrk 14.32-42; Luk 22.40-46)
36Azha, Yesu peteŋ taa tə abə magəli tə aagi ata la ndə həji kayə Gecemane, zlap a zlapatana, iŋgaya: «Huni ndza ka a ɗi, tiɗa ndə, sa kaanda naka tarha, a ŋge a ɗi,» iy. 37A diwzha tə, daŋ a ya Piyer aara abəra abə wəzhi Zebede ma gbak aagi, a tsutsa a kaghuɗek zhana, ꞌunəf tə a kazla. 38Zlap a zlapatana, iŋgaya: «ꞌunəf naka taghuɗek tə a kagas a dzaka ka, huni ndza ka a ɗi abəra sa, azha huni ɗiw a wan kuni səku.» 39Azha, a nda kajik ikwa atama ya, fak a fak ha tə ka ata hayak, wənək tə a hayak, dəba a atarha iŋgaya: «Vana, andza a kaɗal ci, kərəɗ zlərkuɗ yaka watsə bəza abəra sa. Ama abə may naka səku, maɗal andza may kwa,» iy. 40A diwzha, Yesu a zhinha ara magəli tə mahkaɗ watsa aagi, a ndaha a gərata aa tawan ta. Zlap a zlapanə a Piyer azha, iŋgaya: «Ikwa ya, huni kula a ndza abə nja kwa ler ŋtaguleŋ abə sa səku azha vəw? 41Huni ɗiw a wan kunis, huni tar Bizlaf ara ndə huni kandəv kuni ata vah təl həji aagi, huni may a ɗal zlən ma təwah ama ŋgalaŋ kuni akas.» 42Kərəɗ a kərəɗ tə bəza zhana a magbak tə, azha dəba a atarha andza watsə, iŋgaya: «Vana, andza zlərkuɗ yaka watsə, a kaakərəɗ bəza abəra sa səku, səy sa asə ci, maɗal andza may kwa,» iy. 43Zhana, a zhinha abəra magəli tə watsa aagi, a ndaha aa tawan ta wəruk, aa kula a wan abə nja səku. 44Yesu tsaw a nda tə bəza zhana abəra təmta, dəba a atarha a mamahkaɗ, a zlap andza ma ma ndza amcana aagi wəruk. 45Zhana, zhin a zhinha ara magəli tə aagi azha, zlap a zlapatana, iŋgaya: «Huni kawan kwagwa zhana, huni kanəp vəw? Anawatsə, vah tə taɗal tə, azha Mbə həji ma dəgnak a avəla tə aska ra a həji mpət aagi. 46Huni gar a wəzəm, kiyzaŋkwa! Tsakwa! Ala ma kaberaka taa tə,» iy.
Mbəla Yesu
(Mrk 14.43-52; Luk 22.47-53; Yhw 18.2-11)
47Tiɗa ndə Yesu a kazlap ndza tə kwagwa, peteŋ Yahuda taa tə, ma ŋtaguleŋ a taba magəli tə ma wam aha gbak aagi. Aagi abə ŋgaɓa həji aagi, aagi abə səkən ghəm aagi, ŋgezle ma dagal abə dambəy aagi. Magulakwakw maɗal kwakus aagi abə mashifshif ma ndza a hayak aagi ma zlənata. 48Yahuda, ala ma kaber Yesu, a kaghalatana a həji watsa aagi, iŋgaya: «Ala ndə sa kaazlapzanə katkadək andza ŋgwanambə naka ya, sha, huni mbələ,» iy. 49A tsutsa a tsutsa, kərəɗ a kərəɗ abəra Yesu, i kəsha iŋgaya: «Aŋkwa Masərək,» azha dəba a azlapzanə katkadək. 50Yesu zhin a zhinanə, iŋgaya: «Ŋgwanambə naka, səkən ma daahu a ɗalə, vas a ɗalə bəza kahkah.» Azha, ŋgaɓa həji aagi kərəɗakənə, dəba aagi ambələ. 51Azha, tsakwa ŋtaguleŋ a taba magəli ataa Yesu aagi, fəh a dəɗha ŋgezle ma dagal a bəl maɗal zlən ataa madagal ataa maɗal kwakus aagi, hats a zlanə zləm bəza. 52Yesu zlap a zlapanə azha, iŋgaya: «Zhin ŋgezle ma dagal kwa ka a wəzli tə, ara ndə a ɗa, tiwtiw həji ma kalawaɗ abə ŋgezle aagi, ŋgezle watsa ma kadenehata.» 53Deŋ kwa ya, sa kula a tar Vana, anawatsə anawatsə, a azlənaka biri matəf tə aagi dəy aha wam aha gbak wəra? 54Ama azha andza ikwa səku ya, a sən a ɗa kəliy ana zlap ma ndza a Ɗerewal ma ghwaɗeɗe avaŋga? Tazlap iŋgaya: Aagi apew ikwa andza watsə. 55A tsutsa, Yesu zlap a zlapatana a ŋgaɓa həji aagi, iŋgaya: «Huni ndaha abə ŋgezle abə dambəy aagi, a mbəlaka andza ŋhil ara veme? Kala pish, sa kandza a jak kwakus aska a sərəkatana səkən a həji aagi, ama huni taji a mbəlakas. 56Ama tiwtiw a ɗal ikwa aska a kəliy, zlap ataa həji ma ɗaf ma ndə aa zlimazə ara Bizlaf ma ndza a Ɗerewal ma ghwaɗeɗe aagi.» Azha, a tsutsa magəli tə aagi, aa tsaa kashi ta tiwtiw, mbasl aa mbasl ka.
Yesu atama həji ma ndza ata la zla guma ma dagal
(Mrk 14.53-65; Luk 22.54-55, 63-71; Yhw 18.12-18)
57Həji ma mbəla Yesu aagi, jaɓ aa jaɓi a wata Kayafas, madagal maɗal kwakus. Ndə masərək ma ma garagar aagi abə həji ma shif shif ma ndza aha hayak aagi a tsutsa. 58Piyer, a diwzha Yesu, a kasəbarə abə gədək tə, a gwar ata biygi ataa madagal maɗal kwakus watsa. Tsaw a nda a gi ata biygi, azha ka a ndza tə ka abə mahəbar jak aagi, aska a gəra avaŋgəy abə kəɗaŋ tə. 59Magulakwakw maɗal kwakus aagi abə həji ma ndza ata la zla guma ma dagal aagi, aa gas la tək ma ata Yesu, aska aagi adzə ka a mci. 60Ama kwa aa tagəraɓa ma tə akas, kwa abə gaɗaɗaŋ ndə həji aagi zlə vərəm ata Yesu. Kəɗaŋ tə azha, həji aagi gbak, aa taa ta, 61azha aagi iŋgaya: «Ala watsə tazlap, iŋgaya: “Sa kula a ghurəm jak kwakus watsə ka, a wan mahkaɗ a diwzha, sa kula a zhin a ꞌunə,”» iy. 62Madagal maɗal kwakus, takaw a gar a wəzəm, zlap a zlapanə a Yesu, iŋgaya: «Ma ndə həji watsə aagi kazlapə ata hwa watsə aagi veme? Hwa kaji zhinha zlap səku?» 63Ama Yesu ɗekɗek a ndza tə ka. Madagal maɗal kwakus, dəba a azlapanə azha, iŋgaya: «Ata zləm Bizlaf ma ŋkula mca, sa ɗiwzahu, andza hwa ana Kərist, Mbə Bizlaf,» iy. 64Yesu zhin a zhinanə, iŋgaya: «Hwa ma zlap. Ama, sa zlapahuni: ꞌWa aka akacihwa, huni agəra Mbə həji ma dəgnak, a kandza ata guva zəm ataa Bizlaf ma ɓərɓər, zhana huni agəra, a kandaha ata gwazlavay ma ndza a wəzəm a wəzlaf.» 65Mbara azha, Madagal maɗal kwakus, ŋhwak a ŋhwak rəkuts tə aagi, iŋgaya: «Bizlaf ana ndə a rə! Həji ɗiw həji gas a gəra səkən ndə a ɗal aagi zhana ava! Huni tə, huni tazlima abə zləm kuni, ana dahalay ndə a ranə a Bizlaf. 66Deŋ kuni avaŋga?» Zhin a zhinanə: «A ɗa badaway, teete a dza ka a mci,» aagiy.
67Azha dəba aagi aŋtif majignek a heɗe a wənək tə, aa karəgaɗə, ndiɓi aagi kaŋganə ra a zləm. 68Aagi iŋgaya: «Sən bəza, hwa ma ɗa Kərist, ghalani ala ma dzahu a taba cini azha vaya!» aagiy.
Piyer a kameɗ, a kasən Yesu səku.
(Mrk 14.66-72; Luk 22.56-62; Yhw 18.17)
69Azha Piyer tandza tə ka, a bəza ata varvara a biygi. Wala ma ɗal zlən minja, kərəɗ a kərəɗha abəra, iŋgaya: «Hwa yəm, huni va a ndza abə Yesu, ala ndə hayak Galili,» iy. 70Ama Piyer a meɗakənə atama həji aagi tiwtiw, iŋgaya: «Sa kasən ma ndə hwa kamay a zlap səku,» iy. 71A diwzha tə, tsaa kandaa tə aha bəza a majigjigi. Wala minja ma ɗal zlən zhana, gəra a gəra, dəba a azlapatana a həji ma ndza a tsutsa aagi, iŋgaya: «Ala watsə, aa va a ndzaha abə Yesu ndə Nasaratu.» 72Azha, tik Piyer i meɗ zhana, iŋgaya: «Sa meɗehu, sa kasən ala watsə səku,» iy. 73Kajik ikwa a tsutsa, həji ma ndza a tsutsa aagi, kərəɗ aa kərəɗha abəra Piyer, zlap aa zlapanə, aagi iŋgaya: «Ŋter, hwa yəm, hwa ɗa ala ta. Madedizh ma kwa, ma kaghal landaa kwa,» aagiy. 74Azha Piyer dəba a ameɗ, iŋgaya: «Bizlaf masaka yaka, andza sa zla gaɗaɗaŋ! Sa kameɗanə, sa kasən ala watsə səku!» A tsutsa a tsutsa, gwamzakw dəba a adza wəla. 75Dəba Piyer a adeŋ ata zlap ndə Yesu a zlapanə, iŋgaya: «Gwamzakw a nda dza wəla, hwa tameɗ zhin mahkaɗ, hwa kasənaka səku,» iy. Tsaw a ndaa tə a bəza, dəba a ahan.
Valið núna:
:
Áherslumerki
Deildu
Afrita
Want to have your highlights saved across all your devices? Sign up or sign in