Matiyu 3

Yohana batizimazhniyi zhni zokwo aba

1Dna ń anyipyei yi, Yohana Batizimazhniyi wa ɓe, woi zhni waazi dna n zhabwikawu Yahuda nya 2woi gna, “Fye yeabwi, ntuge əshebemi kwo la wo vyivyiwyi.” 3Əza nu nyi n a ɓə da əwo ɓo n sheɓəgwognayi Ishaya əgbe:

“Əza bəgye dnawyi lo ń zhabwikawu,

‘Zhni zokwo aba ga Dagayi,

la awogye tacé cewo ntu n əwo ɓo.’ ”

4A ɓə zhni Yohana aje n lakwnumi əyii nu, jesnu əwo əshnipanya ɓə zhni əpa nu. Əwo nyagyi ɓə zhni àɓo nu ɓədo əsugbmai. 5Aza ɓa kwnu n Urishelima n Yahudai vnyanya n Urudu əknyii, ɓa lo da wo. 6Ɓai da əɓa aleifyi, wa zhni ɓa batizima dna n Urudu əlà.

7Ama she wo ɓə gye Afarisiyi bəgyé ɓədo na Asadusiyii ɓai ɓe əwo batizima zhni aba, wa gna ɓa: “Əfye agbezhi aɓyi! Nyika nu na kwnù fye nge fye bwusi n Shekwoyi minagyi napyei n kwo ɓe lo nyi a? 8Fye wu alu abwiye nya. 9Jesnu fye to zhninubwo nge fye ɓa gna əfyehni, ‘Yi n Ibrahimii lo n zhni əyi dada m.’ Mi gna fye nge Shekwoyi ɓa myi wa kwu aɓyi kala zhi ga Ibrahim n akwuta ye. 10A la gbakwnu lu la tu ń ashnuwna gbegye, shnuwna dəhodəhoi ń kwo to ga gyigyi manai m, a ɓə znu kwo ya shi jesnu ai la kwo sheya dna n əná.

11“Mi zhni fye batizima n nuwnai nu ntu n abwiye ɓo. Ama ń əmi avnu əza ɓe lo n wo du mi lo n kalá, əwo abwada, mi to kwnuce lo ma shi m. Wo ɓə zhni fye batizima n Zafnu Gyigyiyii ɓədo ənái. 12Əwo fnyitala àpmana pyeya nya dnalo ń əwo akwnu, jesnu wo ɓə fnyi əwo əvye ya, woi ye əwo alikama fyi n dobwi jesnu woi dna əsní əná n ənái n kwo ta wnu m.”

Yeisu batizima zhni

13Nlonu Yeisu wa gbmiɓe n Gəlili wa lo Urudu nabai Yohana wo zhni wo batizima. 14Ama Yohana wa yì əwohni wa kpma wo ce, woi gna, “Əmi nu gwo ha zhni mi batizima, ho nyi ɓe da mi?”

15Yeisu wa dnaɓəgbe, “Fa kwaa zè nlonu nsaiye; kwo bmyalo nabai ya nú ɓəfyecezhni vnyanya.” Nlonu, Yohana waa ye.

16Shi a ɓə zè n Yeisu batizimazhniyi, wa gbmiɓe n nuwna. Nsayisayii, əshemi kwa gwuya, wa gye Shekwoyi Zafnu kwoi shnizhi ɓe ngye lukpe kwoi yatu n əwo. 17Njesnu bəgye kwa gbmi n əshemi kwoi gna, “Əmi Nugwnu nu nyi, n mi ye; ǹ woi nu n mi ɓwa bwugbada dəidəi.”

Valið núna:

Matiyu 3: OGNB

Áherslumerki

Deildu

Afrita

Want to have your highlights saved across all your devices? Sign up or sign in

Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi

Biblica® Open Gbagyi Contemporary Bible™, New Testament

‌

“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.

“Biblica” is a trademark registered in the United States Patent and Trademark Office by Biblica, Inc. Used with permission.

‌

See promoVersionInfo in metadata.xml for Creative Commons license.

Lærðu meira um Biblica® Open Gbagyi Nyizeyenya Baibwulu: Shekwoyi Ɓədagbma