Matiyu 28

Yeisu əfyikalala

1N Sibyiwyi avnu, n fyegyi ɓwai ń nyipyei kpmisnuyi laadi yi nya, Mariyamwu Magadalayi n Mariyamwu dəyii ɓa lo ɓəə gye vnyigwo.

2Əknyi ashnaje yaakwo kwa laka ntuge maləka Dagayi nya ɓə shnizhi ɓe ń əshemi, wa lo vnyigwo, wa pmyi kwuta ya jesnu wa sasetu ń kwo. 3Əwo nayi ɓə wu ngye əgbmanabmya nu, jesnu əwo aje n wu bwuibwuii ngye əgbmakwuta. 4Əwo ədna kwa wo abagwuyi kwa zhni ɓa vnyi, ɓa kwu zè ngye azafyí.

5Maləka wa gna anyikwoza yi, “Ədna to wo fye m. Ntuge mi kpəlo ge fye zna Yeisu nu shni, n a ɓə znu wo du nyi.

6“Wo to dnalo ń ya m; wo la laka n ɓwasnu shi wo ɓə da nyi. Fye ɓe fya gye aba ń a ɓə n woi shi nyi.

7“Nlonu fye lo ń pyeepye fyei gna əwo amwutuyi: ‘Wo la laka ń əfyi jesnu wo gyilo ń fye abye woi lo Gəlili. N abaayi nu ń fye ɓəə gye wo əwye.’ Nsaiye, mi kwu gna fye.”

8Ntulonu anyikwoza yi, ɓa gaya ń pyeepye n vnyigwo aba, n ədnai, ama n nunui n agbmadai, jesnu ɓa bwusi lo ɓəə gna əwo amwutuyi. 9N əsagbmanyii Yeisu wa shegwnu ɓa. Wa gna “Sambəlika.” Ɓa ɓe da wo, ɓa shi wo ń apitabwada jesnu ɓa ga wo mwamwa. 10Ntulonu Yeisu wa gna ɓa, “Ədna to wo fye m. Fye lo fye gna əmi azaje nge ɓa lo Gəlili; n abaayi nu ń ɓa ɓəə gye mi əwye.”

Abagwuyi tnutnu ɓədokwu

11Shi anyikwoza yi ɓə yee lo n zokwo, abagwuyi hó ɓa lofyi ń əzhiyaakwo ɓa ga apirisiti atukwoda əɓa əɓədokwu ɓəhoɓəhoi ń kwo ɓə kwu zhni. 12She apirisiti atukwoda ɓə yezhi ɓədo n abyedai ɓa pakwúlu, ɓa ga abagwuyi gyiwye yaakwo, 13ɓai gna ɓa, “Fye da aza nge, ‘Əwo amwutuyi ɓəə ɓe n sukwoi ɓa wo wyi, yii kwu wnagye.’ 14N anabagyi ye ɓə ló gwomna tnubwa, yi kpe əɓo əye lo ń yi ɓə gna wo, ya kwnu fye ya ń azhnìgye.” 15Ntulonu abagwuyi ɓa gwo gyiwye, ɓa zhni shi a ɓə gna ɓa. Jesnu anabagyi ye ɓaa gnamyiya fyi ń Ayahudiyi, nya nyipyei ye.

Tnutnu yaakwo

16Nlonu amwutuyi awocei-gbmanyi ɓa lo Gəlili, ɓa lo əpe aba ń Yeisu ɓə gna ɓa nge ɓa lo nyi. 17She ɓa ɓə gye wo əwye, ɓa ga wo mwamwa; ama azaho ń ɓa, to ɓa ga gaiciya m. 18Nlonu Yeisu wa ɓe da ɓa wa gna, “A la ikwo ga mi vnyanya n əshemi ɓədo n anyìi. 19Ntucenu fye lo fye kwu aza zhni amwutuyi n anyì vnyanya, fyee zhni ɓa batizima dna ń Dada əye n Nugwnui n Zafnu Gyigyiyii, 20jesnu fyee wunya nge ɓa vyi aɓo vnyanya n mi ɓə tu fye əgbe nyi. Ɓəhnihni mi kwnusnu lo n fyei ciici, nya anyìzo sa.”

Valið núna:

Matiyu 28: OGNB

Áherslumerki

Deildu

Afrita

Want to have your highlights saved across all your devices? Sign up or sign in

Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi

Biblica® Open Gbagyi Contemporary Bible™, New Testament

‌

“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.

“Biblica” is a trademark registered in the United States Patent and Trademark Office by Biblica, Inc. Used with permission.

‌

See promoVersionInfo in metadata.xml for Creative Commons license.

Lærðu meira um Biblica® Open Gbagyi Nyizeyenya Baibwulu: Shekwoyi Ɓədagbma