Lu-ka 6
6
Lơh kaar knông nar sa-'bat
(Ma-thi-ơ 12:1-8; Mak 2:23-28)
1Laap nar sa-'bat, Brah Jê-sus han rloot srei ba, bơl jơrnơ Pang tôôch pal kao ba, pơih ti thôw thhei u sa. 2Geh pal du Pha-ri-si mor: “A hay bơl 'bei lơh ntil 'bưn kươt ch'bap lơh knông nar sa-'bat?” 3Brah Jê-sus ơh: “Bơl 'bei ndah chôôl teq u ntil snđach Đa-wit ja lơh khal bnih han pôl n'hai bu dol nh'hit laang? 4Bu mưt nhi Brah Ưn pơih nom piyơ thwaai sa u aan bơl bnih han tênh sa hih, paich nom nei dơơn yau thwaai mơ kươt ch'bap sa.” 5Ja nei Pang lah teq u bu: “Koon Bnih laa Brah nar sa-'bat ri.”
Brah tơmbah tanh knông nar sa-'bat
(Ma-thi-ơ 12:9-14; Mak 3:1-6)
6Di nar sa-'bat nday, Brah Jê-sus mưt u nhi pơrgum kne. Tu nei, geh di mbu dol kruôt ti mak ma. 7Bơl yau gưt jhai u bơl Pha-ri-si tênh miat mơq Pang geh tơmbah tanh knông nar sa-'bat pan jah wơng troong pnđing Pang. 8Pang gưt gơrninh bu mơ lah n'hai bnih kruôt ti laah: “Phrui ta yoong sot nggơl klung au.” Bnih nei ta yoong u han u nei. 9Brah Jê-sus lah n'hai bu: “Hei ôp bơl 'bei: Knông nar sa-'bat, kươt ch'bap lơh kaar l'ưt paich kaar đơơk, đoh bnih lah lưm bnih?” 10Di kươi mơq jôm bnih rlum nei, Pang lah n'hai bnih pơrtanh: “Phrui lơơk koon ti.” Bnih nei lơơk koon ti sot nei kươt baaq. 11Dôh bu hao nuih u pơrgênh tơrnang nơơm mơq awap lơh ơơn kươt teq u Brah Jê-sus.
Brah sach jmơt baar du jơt jơng
(Ma-thi-ơ 12:9-14; Mak 3:13-19)
12Knông pal nar nei, Brah Jê-sus hao lơ bnơm jah r'bon dan; Pang kah rngeh mang r'bon dan n'hai Brah Ưn. 13Tơt aang a ôi, Pang khuôl bơl jơrnơ lôh u sach jmơt baar du knông nak bơl bu, chôôl laa jơt jơng: 14Si-môn, Pang chôôl chhak laa Phi-e-rơ, u Anh-rê oh Phi-e-rơ; Ja-kơ u Jang; Phi-lip u Ba-thê-lê-mi; 15Ma-thi-ơ u Thô-ma; Ja-kơ, koon A-phê, u Si-môn chôôl laa Sê-lôt#6:15 Sê-lôt: Au lah bơ kaar bnih Jo-thai êch daak đat ir, ta wal kươi kan ttih La-ma.; 16Ju-đa, koon Ja-kơ, u Ju-đa Ich-ka-ri-ôt, a kươi but bah ndun lơơi Pang.
Pal baak kne nday
17Pang han jưr pôl n'hai bơl jơt jơng u ta yoong di ktôk teh dơng. Geh ơk jơrnơ Pang ri n'hai phung raih ơk đat lôh a jôm kwaal Ju-đê, poh Jê-ru-sa-lem, u kwaal bơr rmưt Ti-rơ n'hai Si-đôn; han tơt nei jah iat Pang kne u kươt tơmbah pơrtanh. 18Bơl bnih dol wêêng 'bưn jrah jơrloh kot kươt tơmbah. 19Leq phung raih kot wơng troong jah buut teq u Pang, đươm dang kmheng a Pang ksat u tơmbah jôm bnih.
Smlaang n'hai r'baak
(Ma-thi-ơ 5:1-12,38-48; 7:1a)
20Brah Jê-sus ngơơk mat mơq bơl jơrnơ u lah:
“Smlaang aan bơl 'bei laa bơl bnih l'ơơi pngot,
Đươm nggoor Brah Ưn pơơn teq u bơl 'bei.
21Smlaang aan bơl 'bei laa bơl bnih nh'hit bei au na,
Đươm a kươi kươt sơp hơơm.
Smlaang aan bơl 'bei laa bơl bnih nhim ngliêng bei au na,
Đươm a kươi kươt broh gươm.
22Smlaang aan bơl 'bei đươm u Koon Bnih baah dol bu nday skiêr, prơh nduul, raak pơchanh, teq lơơi chhak bơl 'bei bei bah đơơk đaak. #I Phi 4:14. 23Knông nar nei, bơl 'bei phrui chham rơơn njroh s'bai, đươm tôw, griêng tkôm bơl 'bei ri a lơ trôôk laa ttih đat; đươm yau yi bu kot gôq dơq n'hai bơl grnưt noor bei nei.
24Dôh ji rngiêl aan bơl 'bei laa bơl bah khunh geh,
Đươm ja kươt nđum nđiêng hơơi!
25Ji rngiêl aan bơl 'bei laa bơl bnih au na kươt hơơm,
Đươm a kươi nh'hit!
Ji rngiêl aan bơl 'bei laa bơl bah gươm bei au na,
Đươm a kươi ji kôr u nhim ngliêng!
26Ji rngiêl aan bơl 'bei, tơt kươt jôm bnih tư wơơl,
Đươm yau yi bu kot gôq dơq n'hai bơl bah grnưt noor lhiat bei nei!
27Dôh Hei lah n'hai bơl 'bei laa bnih iat Hei: Phrui srlanh bơl kmang nơơm, lơh smlaang aan bơl a kiêr bơn, 28chak smlaang aan bơl raak daai bơn, u r'bon dan aan bơl đam điêl bơn. 29'Bơơn taap bơl 'bei bom mak au, phrui ndơơp broih bom mak tôw aan bu; mơq 'bơơn pơih ao agaih 'bei ri, kot khơơm pơrkhaang bu pơih broih ao klung. 30'Bơơn dan, phrui aan; 'bơơn pơih griêng grau bơl 'bei, khơơm a drơnan kươi. 31Bơl 'bei êch bu nday lơh aan 'bei bei êch, phrui lơh aan bu nday bei nei đêêl.#Mat 7:12. 32Mơq bơl 'bei êch srlanh bơl 'bơơn êch srlanh 'bei, nei geh sroong smlaang ơơn laang? Leq bơl dôih 'baap kot êch srlanh bơl 'bơơn êch srlanh nơơm bu. 33Mơq bơl 'bei lơh smlaang aan bnih lơh smlaang aan 'bei, nei geh sroong smlaang ơơn? Leq bơl dôih 'baap kot rêh bei nei laang. 34Mơq bơl 'bei aan 'bơơn waang baah ndưng bu kah lơơi, nei geh sroong smlaang ơơn? Leq bơl dôih 'baap kot aan bơl dôih 'baap waang, jah kươt pơih kươi sơp nak ơơm. 35Dôh bơl 'bei phrui srlanh bơl kmang nơơm, phrui lơh smlaang, u phrui aan waang baah khơơm ndưng kah lơơi. Bei nei, griêng tkôm bơl 'bei ri a kươi tih mơt, u bơl 'bei a kươi laa koon Yaang Prêh Huôih ri, đươm Pang pơih chưt bnih l'ưt kwaal bah a wich smlaang u bah ch'ươk ch'aak. 36Phrui gmaak bei Bươp bơl 'bei ja gmaak. 37Khơơm pơrkat 'bơơn nei bơl 'bei a kươi 'bưn geh dol pơrkat. Khơơm pnđing 'bơơn nei bơl 'bei a kươi 'bưn geh dol pnđing. Phrui ta krôih nei bơl 'bei a kươi kươt krôih. 38Phrui aan, bơl 'bei a kươi kươt aan lơơi; di loong ttih waal bêêng nei, sơl taan, ngich aan tơt jơl bêêng rlaai, a kươi kươt khut teq u bơr ao bơl 'bei; đươm bơl 'bei weh aan bu nday ggơr êch, nei bơl 'bei a kươi pơih lơơi ggơr nei.”
39Pang kot lah n'hai bu di pn'geh ruk: “Bnih tiah awap têêk bnih tiah kươt 'bưn? 'Bưn geh lah baar du klam pôl n'hai ttu laang?#Mat 15:14. 40Jơrnơ 'bưn huôih yau, dôh mơq jơrnơ riên kne sơp bêêng, nei a kươi bei yau nơơm.#Mat 10:24-25; Ja 13:16; 15:20. 41A hay 'bei sau pưn druih knông pi mat oh bi baah leet 'bưn sau tơơm pkaang knông pi mat nơơm? 42A hay 'bei leet mor n'hai oh bi laah: ‘Ơi bi, teq hei pơih pưn druih knông pi mat bi,’ nha 'bei, nei khah 'bưn sau tơơm pkaang knông pi mat nơơm? Ơi bơl pưl baar taap, noor leq phrui pơih tơơm pkaang knông pi mat bơn ơơi, ja nei mơ sau srlah baah pơih pưn druih rlach pi mat oh bi kươt. 43'Bưn geh tơơm l'ơh êch baah lôh play khih; 'bưn geh tơơm khih êch leet lôh play l'ơh; 44đươm mơq play nei gưt tơơm. 'Bưn 'bơơn pleh play lwi a ktôk pih look, paich laa pleh play nho ktôk pih pum.#Mat 12:33. 45Bnih klanh đươm chưt dơơm ntil klanh baah lôh ntil klanh; bơl ap đươm chưt dơơm ntil ap baah lôh sot ntil ap; đươm bêêng bơm knông chưt mơ wiêm sot mor.#Mat 12:34. 46A hay bơl 'bei khuôl Hei: ‘Brah, Brah!’ baah 'bưn lơh tênh baak Hei lah? 47Hei a kươi chong aan bơl 'bei gưt bnih êch lôh u Hei, iat baak Hei u lơh tênh nei bei 'bơơn. 48Bnih nei bei mbu bnih sun nhi, pông chhir jru ngan u dơih taakơơl lơ tuun tmau. Tơt daak loh lêng, n'hoor daak hoor dang thoom teq u nhi nei kot 'bưn lônh lngaanh kươt, đươm nhi ja sun jap ngan. 49Dôh 'bơơn iat baak Hei baah 'bưn lơh tênh nei bei mbu bnih tôw sun nhi lơ swich teh 'bưn geh taakơơl. Tơt n'hoor daak hoor dang thoom teq u nhi, nhi nei dol rlơm drơh u khuit khwait jjơk mơt.”
Valið núna:
Lu-ka 6: SBL2024
Áherslumerki
Deildu
Afrita
Want to have your highlights saved across all your devices? Sign up or sign in
© 2024 Bible Society Vietnam. All rights reserved.
Lu-ka 6
6
Lơh kaar knông nar sa-'bat
(Ma-thi-ơ 12:1-8; Mak 2:23-28)
1Laap nar sa-'bat, Brah Jê-sus han rloot srei ba, bơl jơrnơ Pang tôôch pal kao ba, pơih ti thôw thhei u sa. 2Geh pal du Pha-ri-si mor: “A hay bơl 'bei lơh ntil 'bưn kươt ch'bap lơh knông nar sa-'bat?” 3Brah Jê-sus ơh: “Bơl 'bei ndah chôôl teq u ntil snđach Đa-wit ja lơh khal bnih han pôl n'hai bu dol nh'hit laang? 4Bu mưt nhi Brah Ưn pơih nom piyơ thwaai sa u aan bơl bnih han tênh sa hih, paich nom nei dơơn yau thwaai mơ kươt ch'bap sa.” 5Ja nei Pang lah teq u bu: “Koon Bnih laa Brah nar sa-'bat ri.”
Brah tơmbah tanh knông nar sa-'bat
(Ma-thi-ơ 12:9-14; Mak 3:1-6)
6Di nar sa-'bat nday, Brah Jê-sus mưt u nhi pơrgum kne. Tu nei, geh di mbu dol kruôt ti mak ma. 7Bơl yau gưt jhai u bơl Pha-ri-si tênh miat mơq Pang geh tơmbah tanh knông nar sa-'bat pan jah wơng troong pnđing Pang. 8Pang gưt gơrninh bu mơ lah n'hai bnih kruôt ti laah: “Phrui ta yoong sot nggơl klung au.” Bnih nei ta yoong u han u nei. 9Brah Jê-sus lah n'hai bu: “Hei ôp bơl 'bei: Knông nar sa-'bat, kươt ch'bap lơh kaar l'ưt paich kaar đơơk, đoh bnih lah lưm bnih?” 10Di kươi mơq jôm bnih rlum nei, Pang lah n'hai bnih pơrtanh: “Phrui lơơk koon ti.” Bnih nei lơơk koon ti sot nei kươt baaq. 11Dôh bu hao nuih u pơrgênh tơrnang nơơm mơq awap lơh ơơn kươt teq u Brah Jê-sus.
Brah sach jmơt baar du jơt jơng
(Ma-thi-ơ 12:9-14; Mak 3:13-19)
12Knông pal nar nei, Brah Jê-sus hao lơ bnơm jah r'bon dan; Pang kah rngeh mang r'bon dan n'hai Brah Ưn. 13Tơt aang a ôi, Pang khuôl bơl jơrnơ lôh u sach jmơt baar du knông nak bơl bu, chôôl laa jơt jơng: 14Si-môn, Pang chôôl chhak laa Phi-e-rơ, u Anh-rê oh Phi-e-rơ; Ja-kơ u Jang; Phi-lip u Ba-thê-lê-mi; 15Ma-thi-ơ u Thô-ma; Ja-kơ, koon A-phê, u Si-môn chôôl laa Sê-lôt#6:15 Sê-lôt: Au lah bơ kaar bnih Jo-thai êch daak đat ir, ta wal kươi kan ttih La-ma.; 16Ju-đa, koon Ja-kơ, u Ju-đa Ich-ka-ri-ôt, a kươi but bah ndun lơơi Pang.
Pal baak kne nday
17Pang han jưr pôl n'hai bơl jơt jơng u ta yoong di ktôk teh dơng. Geh ơk jơrnơ Pang ri n'hai phung raih ơk đat lôh a jôm kwaal Ju-đê, poh Jê-ru-sa-lem, u kwaal bơr rmưt Ti-rơ n'hai Si-đôn; han tơt nei jah iat Pang kne u kươt tơmbah pơrtanh. 18Bơl bnih dol wêêng 'bưn jrah jơrloh kot kươt tơmbah. 19Leq phung raih kot wơng troong jah buut teq u Pang, đươm dang kmheng a Pang ksat u tơmbah jôm bnih.
Smlaang n'hai r'baak
(Ma-thi-ơ 5:1-12,38-48; 7:1a)
20Brah Jê-sus ngơơk mat mơq bơl jơrnơ u lah:
“Smlaang aan bơl 'bei laa bơl bnih l'ơơi pngot,
Đươm nggoor Brah Ưn pơơn teq u bơl 'bei.
21Smlaang aan bơl 'bei laa bơl bnih nh'hit bei au na,
Đươm a kươi kươt sơp hơơm.
Smlaang aan bơl 'bei laa bơl bnih nhim ngliêng bei au na,
Đươm a kươi kươt broh gươm.
22Smlaang aan bơl 'bei đươm u Koon Bnih baah dol bu nday skiêr, prơh nduul, raak pơchanh, teq lơơi chhak bơl 'bei bei bah đơơk đaak. #I Phi 4:14. 23Knông nar nei, bơl 'bei phrui chham rơơn njroh s'bai, đươm tôw, griêng tkôm bơl 'bei ri a lơ trôôk laa ttih đat; đươm yau yi bu kot gôq dơq n'hai bơl grnưt noor bei nei.
24Dôh ji rngiêl aan bơl 'bei laa bơl bah khunh geh,
Đươm ja kươt nđum nđiêng hơơi!
25Ji rngiêl aan bơl 'bei laa bơl bnih au na kươt hơơm,
Đươm a kươi nh'hit!
Ji rngiêl aan bơl 'bei laa bơl bah gươm bei au na,
Đươm a kươi ji kôr u nhim ngliêng!
26Ji rngiêl aan bơl 'bei, tơt kươt jôm bnih tư wơơl,
Đươm yau yi bu kot gôq dơq n'hai bơl bah grnưt noor lhiat bei nei!
27Dôh Hei lah n'hai bơl 'bei laa bnih iat Hei: Phrui srlanh bơl kmang nơơm, lơh smlaang aan bơl a kiêr bơn, 28chak smlaang aan bơl raak daai bơn, u r'bon dan aan bơl đam điêl bơn. 29'Bơơn taap bơl 'bei bom mak au, phrui ndơơp broih bom mak tôw aan bu; mơq 'bơơn pơih ao agaih 'bei ri, kot khơơm pơrkhaang bu pơih broih ao klung. 30'Bơơn dan, phrui aan; 'bơơn pơih griêng grau bơl 'bei, khơơm a drơnan kươi. 31Bơl 'bei êch bu nday lơh aan 'bei bei êch, phrui lơh aan bu nday bei nei đêêl.#Mat 7:12. 32Mơq bơl 'bei êch srlanh bơl 'bơơn êch srlanh 'bei, nei geh sroong smlaang ơơn laang? Leq bơl dôih 'baap kot êch srlanh bơl 'bơơn êch srlanh nơơm bu. 33Mơq bơl 'bei lơh smlaang aan bnih lơh smlaang aan 'bei, nei geh sroong smlaang ơơn? Leq bơl dôih 'baap kot rêh bei nei laang. 34Mơq bơl 'bei aan 'bơơn waang baah ndưng bu kah lơơi, nei geh sroong smlaang ơơn? Leq bơl dôih 'baap kot aan bơl dôih 'baap waang, jah kươt pơih kươi sơp nak ơơm. 35Dôh bơl 'bei phrui srlanh bơl kmang nơơm, phrui lơh smlaang, u phrui aan waang baah khơơm ndưng kah lơơi. Bei nei, griêng tkôm bơl 'bei ri a kươi tih mơt, u bơl 'bei a kươi laa koon Yaang Prêh Huôih ri, đươm Pang pơih chưt bnih l'ưt kwaal bah a wich smlaang u bah ch'ươk ch'aak. 36Phrui gmaak bei Bươp bơl 'bei ja gmaak. 37Khơơm pơrkat 'bơơn nei bơl 'bei a kươi 'bưn geh dol pơrkat. Khơơm pnđing 'bơơn nei bơl 'bei a kươi 'bưn geh dol pnđing. Phrui ta krôih nei bơl 'bei a kươi kươt krôih. 38Phrui aan, bơl 'bei a kươi kươt aan lơơi; di loong ttih waal bêêng nei, sơl taan, ngich aan tơt jơl bêêng rlaai, a kươi kươt khut teq u bơr ao bơl 'bei; đươm bơl 'bei weh aan bu nday ggơr êch, nei bơl 'bei a kươi pơih lơơi ggơr nei.”
39Pang kot lah n'hai bu di pn'geh ruk: “Bnih tiah awap têêk bnih tiah kươt 'bưn? 'Bưn geh lah baar du klam pôl n'hai ttu laang?#Mat 15:14. 40Jơrnơ 'bưn huôih yau, dôh mơq jơrnơ riên kne sơp bêêng, nei a kươi bei yau nơơm.#Mat 10:24-25; Ja 13:16; 15:20. 41A hay 'bei sau pưn druih knông pi mat oh bi baah leet 'bưn sau tơơm pkaang knông pi mat nơơm? 42A hay 'bei leet mor n'hai oh bi laah: ‘Ơi bi, teq hei pơih pưn druih knông pi mat bi,’ nha 'bei, nei khah 'bưn sau tơơm pkaang knông pi mat nơơm? Ơi bơl pưl baar taap, noor leq phrui pơih tơơm pkaang knông pi mat bơn ơơi, ja nei mơ sau srlah baah pơih pưn druih rlach pi mat oh bi kươt. 43'Bưn geh tơơm l'ơh êch baah lôh play khih; 'bưn geh tơơm khih êch leet lôh play l'ơh; 44đươm mơq play nei gưt tơơm. 'Bưn 'bơơn pleh play lwi a ktôk pih look, paich laa pleh play nho ktôk pih pum.#Mat 12:33. 45Bnih klanh đươm chưt dơơm ntil klanh baah lôh ntil klanh; bơl ap đươm chưt dơơm ntil ap baah lôh sot ntil ap; đươm bêêng bơm knông chưt mơ wiêm sot mor.#Mat 12:34. 46A hay bơl 'bei khuôl Hei: ‘Brah, Brah!’ baah 'bưn lơh tênh baak Hei lah? 47Hei a kươi chong aan bơl 'bei gưt bnih êch lôh u Hei, iat baak Hei u lơh tênh nei bei 'bơơn. 48Bnih nei bei mbu bnih sun nhi, pông chhir jru ngan u dơih taakơơl lơ tuun tmau. Tơt daak loh lêng, n'hoor daak hoor dang thoom teq u nhi nei kot 'bưn lônh lngaanh kươt, đươm nhi ja sun jap ngan. 49Dôh 'bơơn iat baak Hei baah 'bưn lơh tênh nei bei mbu bnih tôw sun nhi lơ swich teh 'bưn geh taakơơl. Tơt n'hoor daak hoor dang thoom teq u nhi, nhi nei dol rlơm drơh u khuit khwait jjơk mơt.”
Valið núna:
:
Áherslumerki
Deildu
Afrita
Want to have your highlights saved across all your devices? Sign up or sign in
© 2024 Bible Society Vietnam. All rights reserved.