Matiu 25
25
Lepo nabadi salaghi ga'ase hnaghevalu
1Jisas ne lepo eu'ani, “Ka u naga'e leghu lahu ie, nauthoglu klia ie kaina jateula lepo nabadi ka salaghi ga'ase hnaghevalu te tei mala fadeidei ka mae mala toilaghi ie teu ia euwa. Re'e ne sopagna atha nodi hnalu'ire ne tei. 2Glimani ka salaghi ga'ase teure theome lalase, euwateuwe keha glimani re te lalase re. 3Glima ga'ase te theome lalase re atha nodi hnalu'ire, ni theome atha fabi'o karaseni maladi nodi hnalu'ire baludi. 4Ni glima ga'ase te lalasere ne atha nodi hnalu'ire ni keha kareseni lanauwa baludi. 5Uve, mae te mala toilaghi ie theome faghose mei lana. Eume, re'e tuku au baba'o lui ne thuru iho lana.
6“Agnoni farihotei bongi, kahe mae ne poapola fabi'o eu'ani, ‘Ghotore! Mae te mala toilaghi ie la mei hui! Dofra kaikaliti mala tei fadeidei ka magne!’
7“Re'e ne kafua dofra haghe ne tarabana nodi hnalu'ire. 8Agnoni, glima ga'ase te theome lalasere ne lepo eu'ani ka nani te lalasere, ‘Ghotore, gumei ba ka khata karaseni ka gheati. Gheati nomi hnalu'ire la peso la thatai leme hui lana.’
9“Ni ga'ase te lalasere ne lepo eu'ani ka re'e, ‘The'o. Kareseni gheatire theome thokada tati saplu. Tei sonighotolu ka nanoni te sabiri karaseni are mala saisabiri nomi kareseni thaimi.’
10“Agnoni, glima ga'ase te theome lalase re ne ghae ne tei mala saisabiri nodi kareseni. Ni kate tei te'au re'e re, mae te mala toilaghi gne ne mei. Euwateuwe, glima ga'ase teke kulu tarabana nodi fakelire ne tei ruma balugna magne ka suga mala ngamu faudugna thoilaghi ie. Agnoni, nathanga ie ne pige famaku.
11“Theome raugha ke leghugna igne, keha glima ga'asere neke pulo mei ne aku eu'ani ke kosigna suga ie, ‘Mae funei! Mae funei! Thotora nathanga ie mala ruma nomi gheati!’
12“Ni mae mala toilaghigne ne ho'ilepo eu'ani, ‘Tutu'ani lui rei te lepoza rei ka ghotolu ie. Rei theome laseghamu ghotolu.’ ”
13Agnoni, hui neu thuturi teugne, Jisas ne lepo eu'ani ka hatimare, “Eume, ghotolu kulu tarabana nomi koba. Eigna ghotolu theome laseza naga'e mala ke pulo meigu rei ie.”
Lepo nabadi tholumae gloku
(Luk 19:11-27)
14Jisas neke lepo eu'anini, “Ka u naga'e leghu lahu ie, nafnata puhi God te funei frunira noa nanonire kaina jateula lepo nabadi tholumae gloku ire euwa. Kahe fata, kahe mae funei tarabana mala jifla ke tei ka keha nau maghani. Ni ame ghae na magne teuwe, magne ne lepo ka tholu noa mae glokure mala koikofira noa gobigna goifatare kate tei te'au magne ie. 15Agnoni, magne gulao chuku nanugra ka tholumare leghura nodi glalase tholumare re. Magne gulao ka kahe mae gloku glima duduku nanugra. Ka keha mae gloku ie phalu duduku nanugra. Euwateuwe, ka fatolu mae gloku ie, magne ne gulao kahe duduku nanugra. Eune hui magne ne ghae kokoza nau ie ne tei. 16Agnoni, mae gloku teke atha glima duduku nanugra ie, ghoseni ne tei e'ei keha gloku tagna neke tooku lao keha glima duduku nanugra ke kliagna. 17Ni eulanauwa mae teke atha phalu duduku nanugra ie, tei ne e'ei keha gloku lanauwa neke tooku lao phalu duduku nanugra ke kliagna. 18Ni mae gloku teke atha kahe duduku nanugra ie, tei ne dokha kahe khora ka glose ie ni tifuni noa nanugra mae funei ie.
19“Agnoni, ke leghugna kahe finogha, mae funei ie neke pulo mei. Magne ne kilora noa mae glokure ne ghuhna eu'ani ka hatimare, ‘Ne fahneura ghotolu nogu nanugra rei ra?’ 20Agnoni, mae gloku teke atha glima duduku nanugra ie, atha ne mei balugna ka mae funei ie keha glima duduku nanugra. Magne ne lepo eu'ani ka mae funei ie, ‘Mae funei, kofu sonighoe! Ghoe neke gumei glima duduku nanugra ka rei mala koukofu rei. Euwateuwe, rei neke e'ei keha gloku ka nou nanugra ghoe re neke tooku lao keha glima duduku nanugrani ke kliagna.’
21“Mae funei ie ne lepo eu'ani ka noa mae gloku ie, ‘Ghoe kahe mae gloku keli lui! Ni ghoe eira koba hna te lepora rei re. Eigna te ghatho boheza ghoe nou gloku ie ka nanugra ichoni teke gu'ari rei ia, gignoa igne rei kaina gu'ari chuku goifata ke bi'odini ire mala koukofu ghoe. Mei ghoe mala hneahnegha balugu rei.’
22“Agnoni, mae teke atha phalu duduku nanugra ie ne mei ka mae funei ie. Magne ne lepo eu'ani, ‘Mae funei, kofu sonighoe! Ghoe neke gumei phalu duduku nanugra mala koukofu rei. Euwateuwe, rei neke e'ei keha gloku ka nou phalu duduku nanugra ghoe re ke tooku lao keha phalu duduku nanugrani ke kliagna.’
23“Agnoni, mae funei ie ne lepo eu'ani ka noa mae gloku ie, ‘Ghoe kahe mae gloku keli lui! Ni ghoe eira koba hna te lepora rei re. Eigna te ghatho boheza ghoe nou gloku ie ka nanugra ichoni teke gu'ari rei ia, gignoa igne rei kaina gu'ari chuku goifata ke bi'odini ire mala koukofu ghoe. Mei ghoe mala hneahnegha balugu rei.’
24“Agnoni, mae gloku teke atha kahe duduku nanugra ie ne mei lanauwa ka mae funei ie. Magne ne lepo eu'ani, ‘Mae funei, rei lasegho ghoe kahe mae tufuni ninigrana lui. Ni ghoe tangomana atha gano ka sinabo te hnuma keha nanonire. 25Eume, rei hmau nogugho lui ghoe tei ne tifuni nou nanugra ghoe re ke pari glose. Kofu sonighoe, ire te au lana nou nanugra ghoe re.’
26“Noa mae funei ie ne lepo eu'ani ka magne, ‘Ghoe kahe mae gloku tufuni di'a lui, ni mae tho'a euwa! Uve, te lepoza ghoe ie, ghoe laseghau hui rei te tangomana atha gano ka sinabo te hnuma keha nanonire. 27Ne fahneuwa ne theome nana'ani ghoe nogu nanugra rei re ka bangki? Eigna meu ghoe ie, kate pulo meigu rei gignoa igne, rei jame ke atha keha nanugra te kotu ni bruara eu ka nanugra teke gu'ari rei ka ghoe ie.’
28“Agnoni, mae funei ie ne lepo eu'ani ka mae noa gloku re, ‘Atha famaghani ka magne nanugra are ni ke gulao ka mae te au salaghi duduku nanugra ie euwa. 29Eume, mae ihei te loku fakeli ka hna te gulao hariza rei ie, rei kaina ke fabruara hariza magne. Ni ihei te theome loku fakeli ka hna teke gulao hariza rei ie, rei nake atha famaghani ka magne.’ 30Agnoni, mae funei ie ne lepo eu'ani, ‘Koko fakosiza mae gloku te the'o nafugna teuwae, mala au magne ka hnimoto te romo ae baludi keha nanoni te di'are. Hatimare kaina au paapara lui ka teuwae, tahngi fabi'o ni di'agnagnafa euwa.’ ”
Fate leghu lahu
31Agnoni, Jisas ne lepo eu'ani, “Ka naga'e kaina teke pulo meigu rei ie, rei kaina mei balu nogu noilaghi bi'o. Nogu thotoghei engjel rei re kaina mei balugu rei. Euwateuwe, rei mae Nafano ie kaina hokro ka sape noilaghi. 32Nanonidi gruru fate'o hia te hia ka nauthoglu gne kaina kafua krapu mei ke ulugu rei. Ni rei kaina fafatera nanonire ka phalu thotoghei, jateula mae koukofu sipsip te fafate famaghani sipsipre ka nanigotira euwa. 33Rei kaina fafatera nanoni te kohlo ka nathagna God re mala au ka phile matugu, euwateuwe nanoni te di'are ka phile merigu.
34“Agnoni, rei mae Nafano ie kaina lepo eu'ani ka nanoni te keli te au ka phile matugure, ‘Mei ghotolu nanoni teke fablahighamu mae Magu ra, mala ruma ka noa nauthoglu valu magne teke kulu tarabana malami ghotolu teu ka fufunugna nauthoglu pari igne. 35Eigna kate rofo rei ie, ghotolu neke fangamughau rei. Kate roi ko'u rei ie, ghotolu neke fako'ughau rei. Ni kate the'o kahe hnimoto mala augu rei ie, ghotolu neke udi farumaghau rei ka sugamire. 36Kate soesole rei ie, ghotolu fapipichighau. Kate fogra rei ie, ghotolu koikofighau. Ni kate au rei ka suga sosolo ie, ghotolu mei sighoghau rei.’
37“Agnoni, nanoni te kohlo ka nathagna God re kaina lepo eu'ani ka rei, ‘Lod, ngiha ie gheati teke kofigho te rofo ni feigeu teuwe? Ni ngiha ie gheati teke kofigho te roi ko'u ni fako'ugho teuwe? 38Ngiha ie teke the'o suga mala aumu ghoe, ni faruma sugagho gheati teuwe? Ni ngiha ie gheati teke kofigho te soesole ghoe ni fapipichigho teuwe? 39Ni ngiha ie gheati teke kofigho te fogra ni kalitigho teuwe? Ni ngiha ie gheati teke kofigho te au ghoe ka suga sosolo ni ari sighogho teuwe?’
40“Ni rei mae Nafano ie kaina lepo eu'ani harira, ‘Tutu'ani lui, te lepoza rei ka ghotolu ie. Kate eiza ghotolu hariza kahe nogu nanoni rei te au parilahu ire, ghotolu eiza huila teugne ka rei!’
41“Ni ka nanoni te di'a te au ka phile merigu re, rei kaina lepo eu'ani tadi, ‘Tei nomi maghani! Eigna te lepoza God ie ghotolu mala tei ka fate! Ghotolu kaina ie na tei au ka kha'aghi te the'o ka huigna ie. Kha'aghi teugne neke kulu tarabana God malagna mae Satan ni noa thotoghei engjelre. 42Eigna kate rofo rei ie, ghotolu theome feigegu rei. Rei neke roi ko'u, ni ghotolu theome fako'ughau rei. 43Kate the'o kahe suga mala augu rei ie, ghotolu theome faruma sugaghau ka nomi sugare. Rei soesole, ni ghotolu neke theome fapipichighau. Rei fogra, ni ghotolu neke theome kalitighau. Rei au ka suga sosolo, ni ghotolu neke theome mei sighoghau.’
44“Hatimare kaina eulanauwa lepo eu'ani ka rei, ‘Lod, ngiha ie gheati teke kofigho ghoe te rofo, ba roi ko'u, ba the'o suga mala aumu, ba soesole, ba fogra, ba au ka suga sosolo, ni theome toghogho tekeu ie?’
45“Rei mae Nafano ie kaina lepo eu'ani ka hatimare, ‘Tutu'ani lui te lepoza rei ka ghotolu ie. Kate tho'anomi toghoza ghotolu kahe nogu nanoni rei te au parilahu ire, ghotolu tho'anomi toghoghau huila rei.’
46“Nanoni ire kaina tei au ka hnimoto mala au paapara bongi naga'e. Euwateuwe, nanoni te kohlo ka nathagna God re, kaina au ka u nakahra te the'o ka huigna.”
© 2025 SIL Solomon Islands