انجیلِ یوحنا 16

1«ای چییَلَه وَ ایشا گُتُم تا وَ ایمونِتون نَیُفتیت. 2ایشا نَه وَ کنیسِه‌یَل وِراییِن وَدَر وِ حتی زمونی ایرَسِه که هرکه ایشا نَه بِکِشِه، فِکر ایکِنِه خدا نَه خِذمت کِردِه. 3ای کارَلَه ایکِنِن، سی‌یِکِه نَه بُو نَه ایشناسِن، نَه مِنَه. 4اینگَلَه وَ ایشا گُتُم تا وختی وَ سَرِتون اومَه، وَ حوشِتون بیا که ایشا نَه آگا کِردَه بییُم. اینگَلَه وَ اَوَل وَتون نَگُتُم، سی‌یِکِه خُوم باتون بییُم.»

روحِ خدا چه ایکِنِه

5«ایسِه ایرَم طِی کسی که مِنَه بِسی کِردِه، وِ هیچ کویَکیتون نیپُرسیت، "کوچِه ایرِی؟" 6امّا وَ خاطِرِ اِشنُفتَنِ گَپَلُم، دلِتون غم وَبار وابی‌یِه. 7وا ای حال، مِ وَ ایشا راس ایگُم که رَتَنُم وَ نفعِتونِه. سی‌یِکِه اَر نَرَم، او یاوَر نیایِه طِیتون؛ امّا اَر بِرَم وِّ نَه بِسی ایکِنُم طِیتون. 8وختی وِّ بیا، دنیا نَه مجاب ایکِنِه که وَ خاطرِ گِنا وِ صالِح بییَن وِ داوری، تَخصیرکارِه. 9وَ خاطرِ گِنا، سی‌یِکِه وَ مِ ایمون نیارِن. 10وَ خاطرِصالح بییَن، سی‌یِکِه ایرَم طِی بُو وِ دَ مِنَه نیبینیت. 11وَ خاطرِ داوری، سی‌یِکِه حاکمِ ای دنیا محکوم وابی‌یِه.»

12«خیلی چییَلِ دَ دارُم که وَتون بِگُم، امّا ایسِه نیتَریت بِفَمیت. 13امّا وختی روحِ راستی بیا، ایشا نَه وَ تمومیِ حقیقت رهبری ایکِنِه؛ سی‌یِکِه وِّ وَ طرفِ خُوش گَپ نیزَنِه، بلکم اوچیئی نَه که ایشنِفِه ایگُ وُ وَ آیندَه بِی ایشا گَپ ایزَنِه. 14وِّ مِنَه جلال اییِه، سی‌یِکِه اوچیئی نَه که این مِنِه ایگِرِه، وَ ایشا اعلام ایکِنِه. 15هر چیئی که این بُو یَه، این مِنِه. سی هَمیِه گُتُم اوچیئی نَه که این مِنِه ایگِرِه، وَ ایشا اعلام ایکِنِه.»

عیسی شاگردَلَه دلداری اییِه

16«بعدَ یِچِی، دَ مِنَه نیبینیت وِ بعدَ یِچِی دَ، اُمبِلا مِنَه ایبینیت.» 17اوسِه یِه‌پاره‌ای وَ شاگردَلِش وَ یَک گُتِن: «منظورِش وَ ای گَپ چِنِه که، "بعدَ یِچِی، دَ مِنَه نیبینیت، وِ بعدَ یِچِی دَ، اُمبِلا مِنَه ایبینیت"؟ یا منظورِش چِنِه وَ یِکِه ایگُ "سی‌یِکِه ایرَم طِی بُو"؟» 18پَ وَ یَک ایگُتِن: «ای "یِچِی" که ایگُ، چِنِه؟ منظورِ وِّ نَه نیفَمیم؟» 19امّا عیسی که دونِس ایخوان وَش سئوال کِنِن؛ پَ وَشون گُت: «مَه درموردِ یِه بِی یَک بحث ایکِنیت که گُتُم، "بعدَ یِچِی، دَ مِنَه نیبینیت، وِ بعدَ یِچِی دَ، اُمبِلا مِنَه ایبینیت"؟ 20وراسی، وَ ایشا ایگُم، ایشا شیوَن وِ زاری ایکِنیت، امّا دنیا شایَمون ایابو؛ ایشا غَم وَبار ایابِیت، امّا غمِ ایشا اییَرگَردِه وَ شایی. 21زن وَ موقِی زِیمون درد ایکَشِه، سی‌یِکِه ساعتِ وِّ رَسییِه؛ امّا وختی بَچَش وَ دنیا اومَه، دردِ خِشَه دَ وَ یای نیارِه، سی‌یِکِه شایَمونِه وَ یِکِه آیَمی وَ دنیا اومَیِه. 22وَ هَمی صورت، ایشا هم ایسِه غَم وَباریت؛ امّا اُمبِلا ایشا نَه ایبینُم وِ دلِ ایشا شایَمون ایابو وِ هیشکَه نیتَرِه او شایی نَه وَتون بِسونِه. 23مِنِه او روز، دَ چیئی وَ خُوم نیخِیت. وراسی، وَ ایشا ایگُم، هر چه وَ نومِ مِ وَ بُو بِخِیت، وِه نَه وَتون اییِه. 24تا ایسِه وَ نومِ مِ چیئی نَخواسیتِه؛ بِخِیت تا بِجوریت وِ شاییتون کامل وابو.»

25«اینگَلَه بِی مَثَل سیتون گُتُم؛ امّا زمونی ایرَسِه که دَ ایطو باتون گَپ نیزَنُم، بلکم آشکارا درموردِ بُو وَتون ایگُم. 26مِنِه او روز، وَ نومِ مِ دَرخواس ایکِنیت. وُ وَتون نیگُم که مِ وَ طرفِ ایشا وَ بُو ایخوام، 27سی‌یِکِه بُو خُوش ایشا نَه دوس دارِه، سی‌یِکِه ایشا مِنَه دوس داریت وِ ایمون آوُردیتِه که وَ طِی خدا اومَمِه. 28مِ وَ طِی بُو اومَم، وِ اومَم مِنِه ای دنیا؛ وِ ایسِه ای دنیا نَه وِل ایکِنُم وِ ایرَم طِی بُو.»

29اوسِه شاگردَلِش گُتِن: «ایسِه آشکارا گَپ ایزَنی، نَه بِی مَثَل. 30ایسِه دَ دونیم که وَ هَمَه چی آگایِی وِ حتی اِتیاج نَیاری کسی وَت بِپُرسِه. سی هَمیو، باور داریم که وَ طِی خدا اومِی‌یِی.» 31عیسی وَشون گُت: «مَه ایسِه باور داریت؟ 32ایسِه زمونی ایرَسِه، وُ وَراسی که هَمیسِه رَسییِه، که پِشک ایابِیت وِ هَر کویَکیتون ایرِیت وَ حونۀ خِتون وِ مِنَه تِنا اینیت؛ امّا مِ نَه تِنایَم، سی‌یِکِه بُو بِی مِنِه. 33اینگَلَه وَ ایشا گُتُم تا مِنُم آرامش داشتَه بِیت. مِنِه دنیا سیتون زحمَت هِسی؛ امّا دلِتون قرص بو، سی‌یِکِه مِ وَ دنیا زور وابی‌یِمِه.»

Valið núna:

انجیلِ یوحنا 16: SLB

Áherslumerki

Deildu

Afrita