انجیلِ یوحنا 14

مِ رَه وِ راستی وِ حیاتُم

1«دل ایشا پریشون نَبو. وَ خدا ایمون داشتَه بِیت؛ وَ مِ هم ایمون داشتَه بِیت. 2مِنِه حونۀ بُو آسمونیم تُو زیادِه، اَندِی مَه وَ ایشا ایگُتُم که ایرَم تا جِیی سیتون آمایَه کِنُم؟ 3وِ اوسِه که رَتُم وِ جِیی سیتون آمایَه کِردُم، اُمبِلا ایام وِ ایشا نَه ایبَرُم طِی خُوم، تا وُچِه که مِ هِسُم ایشا هم بِیت.. 4جِیئی که مِ ایرَم رَشَه دونیت.» 5توما وَش گُت: «آقا، ایما حتی نُونیم وَ کوچِه ایرِی، پَ چِطو ایتَریم رَه نَه بِیونیم؟» 6عیسی وَش گُت: «مِ رَه وِ راستی وِ حیاتُم؛ هیشکَه غیرَ وَ واسطۀ مو، نیایِه طِی بُو. 7اَر مِنَه ایشناختیت، بُو مِنَه هم ایشناختیت؛ امّا وَ یِه واپَس وِّ نَه ایشناسیت وُ وِّ نَه دییتِه.» 8فیلیپُس وَش گُت: «آقا، بُو نَه وَ ایما نِشون بییِه، که هَمیِه سی ایما بَسِه.» 9عیسی وَش گُت: «فیلیپُس، یِکِلی وَختِه بِی ایشانُم، وِ هَنی مِنَه نشناختی یِی؟ کسی که مِنَه دییِه، بُو نَه دییِه؛ پَ چطورِه که ایگِی "بُو نَه وَمون نِشون بییِه"؟ 10مَه باوَر نَیاری که مِ وَ بُویَم وِ بُو وَ مِنِه؟ گَپَلی که مِ وَ ایشا ایگُم نَه وَ خِمِه، بلکم وَ بُویی یَه که مِنُم سکونَت دارِه، وِّنِه که کارَلِ خِشَه اَنجوم اییِه. 11ای گَپِ مِنَه باوَر کِنیت که مو مِنِه بُویَم وِ بُو مِنِه مو؛ اَندِی سی او کارَلی که کِردُم مِنَه باوَر کِنیت.

12«وراسی، وَ ایشا ایگُم، هرکه وَ مِ ایمون داشتَه بو، وِّ هَم کارَلی نَه که مِ ایکِنُم، ایکِنِه، وِ حتی کارَلی گَپوتَر وَ وِه ایکِنِه، سی‌یِکِه مِ ایرَم طِی بُو. 13وِ هر چیئی که وَ نومِ مِ دَرخواس کِنیت، مِ وِه نَه اَنجوم اییُم، تا بُو مِنِه کُر جلال بِجورِه. 14اَر چیئی وَ نومِ مِ وَم بِخِیت، وِه نَه اَنجوم اییُم.

وعده روح‌‌القدس

15«اَر مِنَه دوس داریت، حُکمَلِ مِنَه وَجا ایاریت. 16وِ مِ وَ بُو ایخوام وُ وِّ یاوَری دَ وَتون اییِه که همیشَه باتون بو، 17یعنی روحِ راستی که دنیا نیتَرِه وِّ نَه قبول کِنِه، سی‌یِکِه نَه وِّ نَه ایبینِه وِ نَه وِّ نَه ایشناسِه؛ امّا ایشا وِّ نَه ایشناسیت، سی‌یِکِه طِی ایشا سکونت ایکِنِه وِ ایوِیسِه مِنِتون.

18«ایشا نَه بی‌کس نینُم؛ ایام طِیتون. 19یِچِی دَ دنیا مِنَه نیبینِه، امّا ایشا ایبینیت، وِ سی‌یِکِه مِ زِندَه یَم، ایشا هم زِندِیی ایکِنیت. 20مِنِه او روز، ایفَمیت که مو مِنِه بُویَم وِ ایشا مِنِه مو وِ مو مِنِه ایشا. 21وِه که حُکمَلِ مِنَه دارِه وُ وَشون اطاعت ایکِنِه، وِّ نِه که مِنَه دوس دارِه؛ وُ وِه که مِنَه دوس دارِه، بُوم وِّ نَه دوس دارِه وِ مِ هم وِّ نَه دوس دارُم وِ خِمَه وَش نِشون اییُم.»

22یهودا، نه اَسخَریوطی، وَش پُرسی: «آقا، چطورِه که ایخِی خِتَه وَمون نِشون بِیی، امّا نَه وَ ای دنیا؟» 23عیسی جواب دا: «اَر کسی مِنَه دوس داشتَه بو، کلامِ مِنَه وَجا ایارِه، وِ بُوم وِّ نَه دوس دارِه، وِ ایما ای‌یِیم طِیش وِ باش زِندِیی ایکِنیم. 24وِه که مِنَه دوس نَیارِه، کلامِ مِنَه وَجا نیارِه؛ وِ ای کلام که ایشنِفیت وَ مِ نی، بلکم وَ بُویی یَه که مِنَه بِسی کِردِه.

25«ای چییَلَه زمونی وَ ایشا گُتُم که هَنی بِی ایشایَم. 26امّا او یاور، یعنی روح‌القدس، که بُو وِّ نَه وَ نومِ مِ بِسی ایکِنِه، وِّ هَمَه چی نَه وَتون یای اییِه وِ هر چیئی که مِ وَتون گُتُم، وَ حوشِتون ایارِه. 27سی ایشا آرامش اینُم وَجا؛ آرامشِ خِمَه وَتون اییُم. اوچیئی که مِ وَتون اییُم، نَه مِی آرامشی یَه که دنیا وَتون اییِه. دلِ ایشا پریشون وِ هراسون نَبو. 28اِشنُفتیت که وَتون گُتُم، "مِ ایرَم، امّا اُمبِلا ایام طِیتون." اَر مِنَه دوس داشتیت، شایَمون ایابیئیت که ایرَم طِی بُو، سی‌یِکِه بُو وَ مِ گَوتَرِه. 29ایسو یِنَه نِهِی یِکِه اتّفاق بیُفته وَتون گُتُم، تا وختی اتّفاق اُفتا ایمون بیاریت. 30دَ بیشتَرَ یِه باتون گَپ نیزَنُم، سی‌یِکِه حاکم ای دنیا که شِیطونِه ایایِه. وِّ هیچ قدرتی وَ ری مِ نَیارِه؛ 31امّا مِ کارینَه ایکِنُم که بُو وَ مِ فِرمون دایِه، تا دنیا بِیونِه که بُو نَه دوس دارُم. ایسِه وَریسیت، بِرِیم.

Valið núna:

انجیلِ یوحنا 14: SLB

Áherslumerki

Deildu

Afrita