မီႉၶႃႇ 4

လွႆထႃႇဝရႃႉၽြႃး

(တူၺ်း၊ ဢီႉ 2:2-4)

1ၼႂ်းၶိင်ႇၵႃႇလႃႉ မိုဝ်ႉဝၼ်းလိုၼ်းလင်သုတ်းပုၼ်ႉ၊ လွႆတီႈဢၼ် တႄႇႁဵတ်းႁိူၼ်း ထႃႇဝရႃႉၽြႃးၼၼ်ႉ တၵ်းတႄႇယူႇ ၵႃႈၼိူဝ်ပၢႆၸိၵ်းလွႆလူင်တင်းလၢႆလႄႈ မီးတၢင်းဢၼ်ယုၵ်ႉယွင်ႈယူႇ ၵႃႈၼိူဝ်လွႆဢွၼ်ႇတင်းလၢႆ ဢေႃႈ။ မဵဝ်းၵူၼ်း တင်းလၢႆ တၵ်းမႃးၸူႉၵၼ်တုမ်ၵၼ် ၵႃႈတီႈလွႆၼၼ်ႉဢေႃႈ။- 2မဵဝ်းၵူၼ်းၼမ်ၼႃႇၵေႃႈ တၵ်းၵႂႃႇတၢင်းပႆတၢင်းယူႇ သေလႄႈ လၢတ်ႈၵၼ်လႄႈဝႃႈ မႃးမႃးဢိူၺ်း၊ ဢွၼ်ၵၼ်ၶိုၼ်ႈၸူး ၵႃႈတီႈလွႆထႃႇဝရႃႉၽြႃး ႁိူၼ်းၽြႃးပဵၼ်ၸဝ်ႈ မဵဝ်းယႃႇၵုပ်ႈၼၼ်ႉတႃႉႁဝ်း။ မၼ်းၸဝ်ႈ တၵ်းသင်ႇပၼ်သွၼ်ပၼ် သဵၼ်ႈတၢင်းမၼ်းၸဝ်ႈ ၸိူဝ်းၼၼ်ႉလႄႈ ႁဝ်းတၵ်းၸွမ်းႁွႆးတၢင်းမၼ်းၸဝ်ႈ ၸိူဝ်းၼၼ်ႉၵႂႃႇဢေႃႈ၊ ဝႃႈၼင်ႇၼႆဢေႃႈ။ တြႃးၸဝ်ႈ တၵ်းပေႃႇဢွၵ်ႇသေၵႃႈတီႈလွႆၸီႉဢုၼ်ႇမႃးလႄႈ ၼုၵ်ႈၵပၢတ်ႈတြႃးၸဝ်ႈ တၵ်းပေႃႇဢွၵ်ႇသေ ၵႃႈတီႈဝဵင်းယေႇရူႉသလႅမ်ႇမႃးဢေႃႈ။- 3မၼ်းၸဝ်ႈ တၵ်းၸီႇယၢင်ႇတြႃး ၼႂ်းမဵဝ်းၵူၼ်းၼမ်ၼႃႇလႄႈ သင်ႇသွၼ်သုင်းမႃႉ မဵဝ်းၵူၼ်းဢၼ် ႁႅင်းယႂ်ႇၼႃႇ ဢၼ်ယူႇၵႃႈတီႈ ဢၼ်ၵႆၼႃႇၸိူဝ်းၼၼ်ႉလႄႈ ၶဝ်ၼၼ်ႉတၵ်းဢွၼ်ၵၼ် ဢဝ်လၢၵ်ႈၼၢၵ်ႈ လၢပ်ႇလႅဝ်းၶဝ် တင်းလၢႆ ၶဵၼ်ႇႁဵတ်း သိၵ်ႈထိူၼ်ႇသိၵ်ႈၽိူဝ်လႄႈ ဢဝ်ႁွၵ်ႇၶဝ်တင်းလၢႆ ၶဵၼ်ႇႁဵတ်းၶဵဝ်းဢေႃႈ။ မိူင်းၼိုင်ႈ လႄႈ မိူင်းၼိုင်ႈ ၼင်ႇၵၼ်ၵၼ်တၵ်းဢမ်ႇယူၵ်ႉလၢပ်ႇယူၵ်ႉလႅဝ်း ၸူးၵၼ်။ ၵမ်းလိုၼ်း တၵ်းဢမ်ႇဢွၼ်ၵၼ် သွၼ်ဢဝ်တၢင်းဢၼ် ၸၢင်ႈမေႃတိုၵ်းသိုၵ်းတိုၵ်းသိူဝ်။- 4ၶဝ်တင်းသဵင်ႈတင်းလူင် တၵ်းၼင်ႈယူႇၵႃႈတႂ်ႈ တူၼ်ႈမၢၵ်ႇၸပိတ်ႈၶဝ် ဢိၵ်ႇတင်း ၵႃႈတႂ်ႈတူၼ်ႈမၢၵ်ႇလိူဝ်ႇသၢင်းၽေႃးၶဝ် ႁင်းၽႂ်ႁင်းမၼ်းဢေႃႈ။ တၵ်းဢမ်ႇမီးၵေႃႉဢၼ် ႁႂ်ႈၶဝ်လႆႈၵူဝ်လႆႈႁႄ သေၵေႃႉသေၵူၼ်း။ သူပ်းၸဝ်ႈ ပူဝ်ႇပႃႇၵၢင်ႁၢဝ် ထႃႇဝရႃႉၽြႃး ပူင်ဢမိင်ႉၸဝ်ႈ ဝႆႉယဝ်ႉ။- 5မဵဝ်းၵူၼ်းတင်းသဵင်ႈတင်းလူင် ၸၢင်ႈဢွၼ်ၵၼ် ဢိင်ၼႃႇမႃႉၸိုဝ်ႈသဵင် ၽြႃးၽႂ်ၽြႃးမၼ်း သေလႄႈ ၵႂႃႇမႃးယူႇဢေႃႈ။ ႁဝ်းၸမ်ႉ၊ တၵ်းဢွၼ်ၵၼ် ဢိင်ၼႃႇမႃႉၸိုဝ်ႈသဵင် ထႃႇဝရႃႉၽြႃး ၽြႃးပဵၼ်ၸဝ်ႈႁဝ်း သေလႄႈ ၵႂႃႇမႃးယူႇ တႃႇသေႇဢမ်ႇထၢတ်ႇဢေႃႈ။

ၵူၼ်းမဵဝ်းဢီႉသရေႇလႃႉတၵ်းလႆႈပွၵ်ႈၶိုၼ်းမႃးသေတၢင်းဢၼ်ၶၢမ်ႇတီႉသိမ်းဢဝ်ၵႂႃႇ

6ထႃႇဝရႃႉၽြႃး မီးဢမိင်ႉၸမ်ႉ၊ ၼႂ်းမိုဝ်ႉဝၼ်းၼၼ်ႉ ၵဝ်တၵ်းႁွင်ႉဢဝ် ၵေႃႉဢၼ်တိၼ်ၵႅင်ႉၼၼ်ႉ မႃးလႄႈ ႁႂ်ႈၵေႃႉဢၼ် လႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈ ဢိၵ်ႇတင်း ၵေႃႉဢၼ်ၵဝ်ယၢမ်ႈ ၼိၵ်ႈၸၢၵ်ႈငႅၼ်းသႄးၼၼ်ႉ မႃးၸူႉၵၼ်တုမ်ၵၼ်ဢေႃႈ။- 7ၵဝ်တၵ်းႁဵတ်းႁႂ်ႈ ၵေႃႉဢၼ်တိၼ်ၵႅင်ႉၼၼ်ႉ ပဵၼ်ဢၼ်ၵိုတ်း ဢၼ်ၵျၢၼ်ႇဝႆႉလႄႈ ႁႂ်ႈၵေႃႉဢၼ် လႆႈၶၢမ်ႇတၢင်းဢၼ် ႁေႃႈဢွၵ်ႇပႅတ်ႈ တီႈဢၼ်ၵႆၼၼ်ႉ ပဵၼ်မဵဝ်းၵူၼ်းဢၼ်ယႂ်ႇၼႃႇဢေႃႈ။ ထႃႇဝရႃႉၽြႃး တၵ်းဢုပ်ႉပိူင်ႇ ၸၢမ်ႇၸႃးၶဝ် ၵႃႈၼိူဝ်လွႆၸီႉဢုၼ်ႇၼၼ်ႉယူႇ၊ ဢဝ်ၸႃႉၸဵမ် မိူဝ်ႈလဵဝ်ၼႆႉၵႂႃႇ မိူဝ်းၼႃႈ တႃႇသေႇဢမ်ႇထၢတ်ႇဢေႃႈ။- 8ထဵင်လၢင်းဢေးတႃႇဢိူၺ်း၊ ၵုင်းတီႈယူႇ လုၵ်ႈယိင်းသၢဝ်ၸီႉဢုၼ်ႇဢိူၺ်း၊ တၵ်းႁွတ်ႈထိုင် ၵႃႈၼႂ်းမႂ်းဢေႃႈ။ ဢႃႇၼႃႇ ဢၼ်ယၢမ်ႈတႄႇ မိူဝ်ႈဢွၼ်တၢင်းၼၼ်ႉ ဢၼ်ဝႃႈသိုင်ႇၸိုင်ႈဝၢၼ်ႈမိူင်း လုၵ်ႈယိင်းသၢဝ် ဝဵင်းယေႇရူႉသလႅမ်ႇၼၼ်ႉ တၵ်းသမ်ႉၶိုၼ်းႁွတ်ႈထိုင် ၵႃႈၼႂ်းမိုဝ်းမႂ်းဢေႃႈ။- 9မိူဝ်ႈလဵဝ်ၼႆႉ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းႁဵတ်းတင်းသဵင်ဢၼ်ယႂ်ႇၼႃႇ သေလႄႈ ႁွင်ႉသႅၼ်ႇယူႇၼင်ႇႁိုဝ်။ ၵႃႈၼႂ်းမႂ်းဢမ်ႇမီး ၶုၼ်ႁေႃၶမ်း သေတူၼ် သေပႃးႁိုဝ်။ မူးမၢတ်ႈၽွင်းမိူင်း ဢၼ်ပၼ်တၢင်းၵျၢမ်ႇတၢင်းပွင် ၸိူဝ်းၼၼ်ႉ လူႉႁၢႆၵႂႃႇယဝ်ႉႁိုဝ်။ မႂ်းလႆႈၶၢမ်ႇ ဝူၺ်ႇတၼႃႇ မိူၼ်ၸိူဝ်ႉၼင်ႇ မႄႈယိင်းဢၼ်ၵိူတ်ႇလဵင်ႉလုၵ်ႈ ၼၼ်ႉယဝ်ႉလူင်ပႄႇ။- 10လုၵ်ႈယိင်းသၢဝ် ၸီႉဢုၼ်ႇဢိူၺ်း၊ ၶၢမ်ႇဝူၺ်ႇတၼႃႇ သေလႄႈ ဢဝ်ႁႅင်းဢွၵ်ႇ ႁႂ်ႈလႆႈၵိူတ်ႇလဵင်ႉလုၵ်ႈ မိူၼ်ၸိူဝ်ႉၼင်ႇ မႄႈယိင်းဢၼ်ၵိူတ်ႇလဵင်ႉလုၵ်ႈ ၼၼ်ႉတႃႉ။ မိူဝ်ႈလဵဝ်ၼႆႉ မႂ်းတၵ်းလႆႈဢွၵ်ႇသေ ၵႃႈၼႂ်းဝဵင်းၵႂႃႇလႄႈ ယူႇၵႃႈၼႂ်းပၢင်ႇတူင်ႈႁႆႊတူင်ႈၼႃးဢေႃႈ။ မႂ်းတၵ်းလႆႈၵႂႃႇ တေႃႇထိုင်ႁွတ်ႈ ဝဵင်းပႃႇပူႉလုၼ်ႇလႄႈ လႆႈၵၢင်းလႆႈလွတ်ႈ ၵႃႈတီႈဝဵင်းၼၼ်ႉဢေႃႈ။ ထႃႇဝရႃႉၽြႃး တၵ်းထုတ်ႇၼုၵ်ႈဢဝ်မႂ်း သေၵႃႈၼႂ်း မိုဝ်းရၢၼ်ႇသူႇမႂ်းတင်းလၢႆ ၵႃႈတီႈဝဵင်းၼၼ်ႉဢေႃႈ။- 11မိူဝ်ႈလဵဝ်ၼႆႉၸိုင်၊ ၵူၼ်းတၢင်ႇၸိူဝ်ႉ တၢင်ႇမဵဝ်းၼမ်ၼႃႇ ၸူႉၵၼ်တုမ်ၵၼ် ယူႇၽၢႆႇၼိုင်ႈတင်းမႂ်းလႄႈ ဢွၼ်ၵၼ်လၢတ်ႈလႄႈဝႃႈ၊ ႁႂ်ႈဝဵင်းၸီႉဢုၼ်ႇပဵၼ်ဢၼ် ၵူဝ်ႈၵိူၵ်ႇ သေၵမ်းလူၺ်ႈ။ ႁႂ်ႈမၢၵ်ႇတႃႁဝ်း လႆႈႁၼ်ဢလူဝ်ႇႁဝ်း တီႈမၼ်းသေၵမ်းလူၺ်ႈ၊ ဝႃႈၼင်ႇၼႆဢေႃႈ။- 12ၵူၺ်းၵႃႈ ၶဝ်ဢမ်ႇႁူႉၸႂ် ထႃႇဝရႃႉၽြႃး၊ ၶဝ်ဢမ်ႇႁူႉၸႅင်ႈ တၢင်းၵျၢမ်ႇတၢင်းပွင်မၼ်းၸဝ်ႈ။ မၼ်းၸဝ်ႈဢဝ်ၶဝ်ၼၼ်ႉ ၸူႉၵၼ်တုမ်ၵၼ်ဝႆႉ မိူၼ်ၸိူဝ်ႉၼင်ႇဢၼ်ဢဝ် လိုၼ်ႈၶဝ်ႈ ၸူႉၵၼ်တုမ်ၵၼ်ဝႆႉ ၵႃႈတီႈတလၢင်းယဵပ်ႇၶဝ်ႈၼၼ်ႉ ဢေႃႈ။- 13လုၵ်ႈယိင်းၸီႉဢုၼ်ႇဢိူၺ်း၊ လုၵ်ႉလႄႈယဵပ်ႇၼူတ်ႈတႃႉ။ ၵဝ်တၵ်းႁႂ်ႈ ၶဝ်လႅမ်မႂ်းယဝ်ႉတူဝ်ႈလူၺ်ႈလဵၵ်းလႄႈ ႁႂ်ႈၵိပ်ႇမႂ်းယဝ်ႉတူဝ်ႈ လူၺ်ႈတွင်းလိူင်ဢေႃႈ။ မႂ်းတၵ်းလႆႈထုၵ်းထူ မဵဝ်းၵူၼ်းၼမ်ၼႃႇ ဢွၼ်ႇဢွၼ်ႇလႅဝ်လႅဝ်ဢေႃႈ။ မႂ်းတၵ်းလႆႈဢဝ် ၵႃႈဢၼ်လႆႈၵႃႈတီႈၶဝ်ၼၼ်ႉ ပုၵ်ႈၸေႃႇတီႈ ထႃႇဝရႃႉၽြႃး ဢိၵ်ႇတင်း ၸေးၸိမ်ႇဢုၵ်ႉၸႃႇၶဝ်ၼၼ်ႉ ပုၵ်ႈၸေႃႇတီႈၸဝ်ႈဢၼ် ဢုပ်ႉပိူင်ႇၼႃႈလိၼ်မိူင်း တင်းၼႃႈဢေႃႈ။

Valið núna:

မီႉၶႃႇ 4: CBMS

Áherslumerki

Deildu

Afrita

Want to have your highlights saved across all your devices? Sign up or sign in

Lærðu meira um သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး