ႁပၵ်ႉၵုၵ်ႉ 1

1ပျႃႇတိၵ်ႈၸဝ်ႈ ဢၼ်ပရေႃးၽႅတ်ႈ ႁပၵ်ႉၵုၵ်ႉလႆႈၶၢမ်ႇဢဝ်ၼၼ်ႉၸမ်ႉ၊

ႁပၵ်ႉၵုၵ်ႉတိူင်ႇလွင်ႈဢၼ်ဢမ်ႇတြႃး

2ထႃႇဝရႃႉၽြႃးတီႈၶႃႈ၊ ၸဝ်ႈႁဝ်းယင်းဢမ်ႇငိၼ်းလႄႈ ၶႃႈၸဝ်ႈတၵ်းလႆႈႁွင်ႉသႅၼ်ႇယူႇ ၶိင်ႇၵႃႇလႃႉႁိုင်ၵႃႈႁိုဝ်တီႈၶႃႈ၊ ၸဝ်ႈႁဝ်းယင်းဢမ်ႇၵႄႇသႄႇၶျွတ်ႈဢဝ်လႄႈ ၶႃႈၸဝ်ႈတၵ်းလႆႈသႅၼ်ႇႁွင်ႉ လူၺ်ႈလွင်ႈ ဢမူႉဢႃႉထမ်ႇမႃႉယူႇ ၵႃႈတီႈၽၢႆႇၼႃႈၸဝ်ႈႁဝ်း ၶိင်ႇၵႃႇလႃႉႁိုင်ၵႃႈႁိုဝ်တီႈၶႃႈ၊- 3ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းဢဝ်လွင်ႈတၢင်းဢၼ်ဢမ်ႇတြႃး ၼႄပျႃးတီႈၶႃႈၸဝ်ႈလႄႈ ၸဝ်ႈႁဝ်းႁႂ်ႈၶႃႈၸဝ်ႈႁၼ် ဢမူႉဢႃႉထမ်ႇမႃႉ ယူႇၼင်ႇႁိုဝ်တီႈၶႃႈ၊ လွင်ႈတၢင်းဢၼ်ႁိမ်ဢဝ် ဢိၵ်ႇတင်း လွင်ႈတၢင်းဢၼ်ႁဵတ်းပႄႉႁဵတ်းၼႅင်ႇၼၼ်ႉ မီးယူႇသိုဝ်ႈၼႃႈတႂ်ႈတႃၶႃႈၸဝ်ႈတီႈၶႃႈဢေႃႈ။ မီးတၢင်းဢၼ်တွပ်ႇထဵင်လႄႈ တၢင်းဢၼ်ၽိတ်းၵၼ်ၼၼ်ႉၵေႃႈ ယုၵ်ႉယွင်ႈတူဝ်ၸဝ်ႈၵဝ်ႇယူႇ တီႈၶႃႈဢေႃႈ။- 4ပိူဝ်ႈဢၼ်ပဵၼ်ၼင်ႇၼၼ်လႄႈ တြႃးသုတ်ႈယွမ်းၵႂႃႇလႄႈ၊ တၢင်းဢၼ်ၸီႇယၢင်ႇတႅပ်းတတ်းၸွမ်းၼင်ႇတြႃးၼၼ်ႉ ဢမ်ႇပေႃႇဢမ်ႇဢွၵ်ႇလႃးလႃးတီႈၶႃႈ၊ ၵွပ်ႈပိူဝ်ႈဢၼ် ၶဝ်ၸိူဝ်းဢၼ်ဢမ်ႇတြႃးၼၼ်ႉ လွမ်ႉလဵပ်ႈႁွပ်ႈ ၶဝ်ၸိူဝ်းဢၼ်သိုဝ်ႈတေႃႇၼၼ်ႉဝႆႉလႄႈ တၢင်းဢၼ်ၸီႇယၢင်ႇ၊ တႅပ်းတတ်းတြႃးၼၼ်ႉ ပေႃႇဢွၵ်ႇပဵၼ်ဢၼ်ပိူင်ႈဢၼ်လွႆးၵူၺ်းတီႈၶႃႈဢေႃႈ။

ထႃႇဝရႃႉၽြႃးတွပ်ႇၶိုၼ်း

5ဢွၼ်ၵၼ်တူၺ်း ၵႃႈၼႂ်းၵူၼ်း တၢင်ႇၸိူဝ်ႉတၢင်ႇၶိူဝ်းတင်းလၢႆလႄႈ ၶႆႈၸႂ်ဝူၼ်ႉၸႂ်သေလႄႈ ဢၢမ်းၼႃႇလူင်လၢင်တႃႉ။ လွင်ႈမၼ်းၸမ်ႉ ၵဝ်တၵ်းႁဵတ်းလွင်ႈတၢင်းဢၼ် ပိၵ်ႉသမ်ႉပိူၼ်ႈ မွၵ်ႇလၢတ်ႈၼႄပျႃး တီႈသူသေၵေႃႈ သူဢမ်ႇယုမ်ႇၼၼ်ႉ ၼႂ်းၸူဝ်ႈၼႂ်းပၢၼ်သူဢေႃႈ။- 6တူၺ်းလူး။ ၵဝ်တၵ်းတိုၵ်းယူင်းမဵဝ်းၵူၼ်းၶႃႇလတေး ဢၼ်ၵျၢမ်းႁၢဝ်ႈ၊ၶၼ်ၽႂ်းၼႃႇလႄႈ ဢွၼ်ၵၼ်ၶီႇသိုၵ်းၵႂႃႇ ၵႃႈၼိူဝ်ၼႃႈလိၼ် တင်းသဵင်ႈတင်းမူတ်း ႁႂ်ႈလႆႈသိမ်းဢဝ်တီႈယူႇ ဢၼ်ၶဝ်ဢမ်ႇပိူင်ႇၼၼ်ႉၸိူဝ်းၼၼ်ႉဢေႃႈ။- 7ၶဝ်ၼၼ်ႉပဵၼ်ဢၼ် လီၵူဝ်လီႁႄ၊ လီတူၵ်းၸႂ်လႂ်တိုၼ်ႇဝႆႉလႄႈ တၢင်းဢၼ်ၶဝ်ၸီႇယၢင်ႇ၊တႅပ်းတတ်းတြႃး ဢိၵ်ႇတင်းၵုင်ႇသရေႇၶဝ်ၼၼ်ႉ ပေႃႇဢွၵ်ႇပဵၼ်မႃး ၵႃႈၼႂ်းၶဝ်ၵူၺ်းဢေႃႈ။- 8မႃႉၶဝ်ၼၼ်ႉၶၼ်ၽႂ်း လိူဝ်တွၼ်းၼႃႇသေ သိူဝ်ၸုမ်ႈလႄႈ ၵျၢမ်းႁၢဝ်ႈၼႃႇသေမႃထိူၼ်ႇဢၼ်လႄႇၶိင်ႇၵၢင်ၶိုၼ်း ၼၼ်ႉဢေႃႈ။ ၵူၼ်းၶီႇမႃႉၶဝ်ၸိူဝ်းၼၼ်ႉ တၵ်းဢွၼ်ၵၼ်ႁဵတ်းႁိၵ်ႈ၊ႁဵတ်းႁၢၼ်ႇသေလႄႈ ၶီႇမႃးဢေႃႈ။ ၵူၼ်းသိုၵ်းၶီႇမႃႉၶဝ်ၸိူဝ်းၼၼ်ႉ တၵ်းဢွၼ်ၵၼ်လုၵ်ႉသေၵႃႈတီႈ ဢၼ်ၵႆမႃးလႄႈ မိၼ်မႃးၸိူဝ်ႉၼင်ႇ လၢင်းတႃႉၶမ်း ဢၼ်ႁိပ်ႈၼႅတ်ႈ ႁႂ်ႈလႆႈသိတ်ႈၵိၼ်တူဝ် ၼၼ်ႉဢေႃႈ။- 9ၶဝ်တင်းသဵင်ႈတင်းလူင်ၼၼ်ႉ ဢွၼ်ၵၼ်မႃးႁႂ်ႈလႆႈ ၼိၵ်ႈၸၢၵ်ႈငႅၼ်းသႄးဢေႃႈ။ ၶဝ်ၼၼ်ႉ ပဵၼ်မုၵ်ႉပဵၼ်ၸိူဝ်း ဢၼ်ဝၢႆႇၼႃႈၶဝ်ယူႇ မၼ်ႈမၼ်ႈၶိူင်ႇၶိူင်ႇ မိူၼ်ၸိူဝ်ႉၼင်ႇလူမ်းတၢင်းဝၼ်းဢွၵ်ႇၼၼ်ႉလႄႈ ဢဝ်ၶဝ်ၸိူဝ်းဢၼ်တီႉလႆႈၼၼ်ႉ ၸူႉၵၼ်တုမ်ၵၼ်ဝႆႉ မိူၼ်ၸိူဝ်ႉၼင်ႇ မဵတ်ႉႁိၼ်မဵတ်ႉသၢႆးၼၼ်ႉဢေႃႈ။- 10ၶဝ်တၵ်းဢွၼ်ၵၼ်ႁဵတ်းဢမ်ႇပေႃးၼင်ႇႁိုဝ် တီႈၶုၼ်ႁေႃၶမ်းတင်းလၢႆလႄႈ ႁဵတ်းပျၢၵ်ႈႁဵတ်းၶူဝ်ၶုၼ်တင်းလၢႆဢေႃႈ။ ၶဝ်တၵ်းဢွၼ်ၵၼ်ႁဵတ်းပျၢၵ်ႈႁဵတ်းၶူဝ် တိူၵ်ႈတီႈတိုၵ်းသိုၵ်းၵႃႈမီးလႄႈ ဢဝ်မုၼ်ႈလိၼ်ၵေႃႇဝႆႉၵွင်ဝႆႉသေလႄႈတိုၵ်းဢဝ်ဢေႃႈ။- 11လိုၼ်းၼၼ်ႉ ၶဝ်ၼၼ်ႉတၵ်းပတ်ႉထူဝ်းမိူၼ်ၸိူဝ်ႉၼင်ႇလူမ်းၼၼ်ႉလႄႈ ပူၼ်ႉၵႂႃႇသေယဝ်ႉ၊ လႆႈၶၢမ်ႇဢပႅတ်ႈဢေႃႈ။ တၼ်းၶူဝ်းမၼ်းၼႆႉ လႆႈၵႃႈတီႈၽြႃးမၼ်းဢေႃႈ။

ႁပၵ်ႉၵုၵ်ႉတိူင်ႇလွင်ႈဢၼ်ဢမ်ႇတြႃးထႅင်ႈ

12ထႃႇဝရႃႉၽြႃး ၽြႃးပဵၼ်ၸဝ်ႈၵဝ်ၶႃႈ၊ ၽြႃးဢၼ်မူတ်းၸၢင်ႇၵဝ်ၶႃႈတီႈၶႃႈ၊ ၸဝ်ႈႁဝ်းတႄႇယူႇၼိၵ်ႈၸႃႉထႃႇဝရႃႉဢမ်ႇၸႂ်ႈတီႈၶႃႈႁိုဝ်။ ပေႃးၸႂ်ႈၸိူဝ်ႉၼင်ႇၼၼ်ၸိုင် ၶႃႈၸဝ်ႈႁဝ်းၶဝ်တၵ်းဢမ်ႇလႆႈတၢႆတီႈၶႃႈၵူၺ်ႉ။ ထႃႇဝရႃႉၽြႃးတီႈၶႃႈ၊ ၸဝ်ႈႁဝ်းၶၢၼ်းမၼ်းဝႆႉ ႁႂ်ႈလႆႈၸႅတ်ႈထၢမ် ၸႅတ်ႈတူၺ်းတီႈၶႃႈယဝ်ႉ။ မၢၵ်ႇႁိၼ်မၢၵ်ႇၽႃတီႈၶႃႈ၊ ၸဝ်ႈႁဝ်းၶျႃးတီႈယူႇပၼ်မၼ်း ႁႂ်ႈမၼ်းလႆႈသင်ႇသွၼ်သုင်းမႃႉ တီႈၶႃႈယဝ်ႉ။- 13ၸဝ်ႈႁဝ်းမီးတႃဢၼ်မူတ်းသႂ် ထၼ်ႈပေႃးဢမ်ႇလူဢမ်ႇတူၺ်းတူႉၸရိူၵ်ႈလႆႈတီႈၶႃႈဢေႃႈ။ ၸဝ်ႈႁဝ်းဢမ်ႇၸၢင်ႈလူ၊ ၸၢင်ႈတူၺ်း ဢမူႉဢႃႉထမ်ႇမႃႉသေလႄႈ ယူႇတီႈၶႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းလူတူၺ်းၶဝ်ၸိူဝ်းဢၼ် သဵတ်ႈၸႃႇလူႉၼၼ်ႉလႄႈ ယူႇသဵတ်ႇသဵတ်ႇယဵၼ်ယဵၼ်ယူႇ ၼႂ်းမိူဝ်ႈဢၼ်ၵေႃႉဢၼ်ႁၢႆႉ ဢၼ်မိူၵ်ႈၼၼ်ႉ ဢိုၼ်ၵိၼ်ၵေႃႉဢၼ်သိုဝ်ႈတေႃႇၼႃႇသေမၼ်းၼၼ်ႉ ၼင်ႇႁိုဝ်တီႈၶႃႈ၊- 14ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းႁႂ်ႈၵူၼ်းသတ်ႉတဝႃႇတင်းလၢႆ ပဵၼ်ၸိူဝ်ႉၼင်ႇ ပႃပၢင်ႇလၢႆႇ ဢိၵ်ႇတင်း ၸိူဝ်ႉၼင်ႇတူဝ်မူင်ႈတူဝ်မႅင်း ဢၼ်ဢမ်ႇမီးၶုၼ်ၼၼ်ႉ ၼင်ႇႁိုဝ်တီႈၶႃႈ၊- 15ရၢၼ်ႇသူႇၼၼ်ႉ ဢဝ်ၶေႃဝဵတ်း ဝဵတ်းဢဝ်ၶဝ်ၵႃႈမီးၼၼ်ႉယူႇ၊ ဢဝ်ၶႄႁူမ်ႇသုမ်ႇဝႆႉယူႇ၊ ဢဝ်ၼႅင်ႈ ၶင်ဝႆႉယူႇသေလႄႈ ၸၢင်ႈၸူမ်းသိူဝ်း သႂၢင်ႇၸႂ်တီႈၶႃႈဢေႃႈ။- 16ပိူဝ်ႈၼႆလႄႈ မၼ်းၸၢင်ႈပုၵ်ႈၸေႃႇတီႈၶႄမၼ်းလႄႈ ဢဝ်ၼၢမ်ႇသႃႇတုတ်ႇၽႆးတီႈၼႅင်ႈမၼ်းတီႈၶႃႈဢေႃႈ။ လွင်ႈမၼ်းၸမ်ႉ ၵွပ်ႈပိူဝ်ႈၶိူင်ႈပိူင်ၸိူဝ်းၼၼ်ႉလႄႈ ပုၼ်ႈမၼ်းတႃႇမၼ်းၼၼ်ႉ ပဵၼ်ၵွၼ်ႈၶႆ ၵွၼ်ႈမၼ်းလႄႈ တၢင်းၵိၼ်တၢင်းၶူပ်းမၼ်းပဵၼ်ၼိူဝ်ႉဢၼ်ပီးလီ မၼ်းလီၼၼ်ႉယူႇ တီႈၶႃႈဢေႃႈ။- 17ပိူဝ်ႈဢၼ်ပဵၼ်ၼင်ႇၼႆလႄႈ မၼ်းတၵ်းလႆႈဢဝ်ပႃ ၵႃႈၼႂ်းၶႄ ၼႂ်းၼႅင်ႈမၼ်းၼၼ်ႉ ဢွၵ်ႇပႅတ်ႈတီႈၶႃႈႁိုဝ်။ မၼ်းယင်းဢမ်ႇသေလၢႆၵူၼ်း ၵူႈၸိူဝ်ႉၵူႈမဵဝ်းၼၼ်ႉလႄႈ တၵ်းလႆႈဢဝ်တၢႆပႅတ်ႈ ၶႃႈပႅတ်ႈယူႇတႃႇသေႇတီႈၶႃႈႁိုဝ်။

Valið núna:

ႁပၵ်ႉၵုၵ်ႉ 1: CBMS

Áherslumerki

Deildu

Afrita