2. Mose 38
38
I sasterni chatchepaskri
1-2Un job kras i sasterni chatchepaskri#38:1-2a chatchepaskri altaro , kai wenna vieche o Debleske chatchedo. Job kras lat dran akatstikro kasht, dui-te-paash metarja lengsto un ninna jaake buchlo un jek-te-paash metari pral. Pral i tseli chatchepaskri was lolo saster dino. Ap haki pralstuni ekka was i shing#38:1-2b shing horno win. Kol shinga wan kerdo dran jek kotar kasht har i chatchepaskri. 3Un job kras kol tsele koola dran lolo saster, kolentsa budrenn le ap i sasterni chatchepaskri: i pirja, an kolende i jagakri tchik dren wella, bare roja, tchare, kai o rat dren wella, massengre forshette#38:3 forshette gable, jagakre tchare.
4Un job kras i netsa dran lolo saster, hoi was tella jaake an i sasterni chatchepaskri#38:4 sasterni chatchepaskri: sasterno altaro tchiddo, te djal li paash pre har i sasterni chatchepaskri. 5Ap lakre star rigja, kote, kai i rigja khetne wenna, tchiwas lo star gustria dran lolo saster, te wenn an lende lengste kashta tchiddo. 6Kolla kras lo dran akatstikro kasht, tchiwas lolo saster trul lende, 7un tchiwas len an i gustria jaake, te nai hidjrenn le koi sasterni chatchepaskri. An late his tchi dren.
O thopaskro tcharo
8Un job kras o thopaskro tcharo dran lolo saster un tchiwas les ap herja, hoi ninna dran lolo saster hi. Ko lolo saster las lo dran kol blendarja#38:8 blendarja spiegle, hoi dan les kol djuwja, kai pash o wudar glan o Debleskro plachteno kheer pengri budi kran.
I glanstuni platsa
9-10Un jon kran kol laintikre kotja dran latcho sorelo than, hoi wenn trul koi platsa pandlo, hoi hi glan o Debleskro kheer. Ninna kran le kol pesse kashta, mank kolende kol laintikre kotja pandlo wenna.
Ap koi rig, kai o kham pralstunes hi, hi koi platsa paash-sheel metarja baro. Kate rikrenn biish pesse kashta kol laintikre kotja. Kal pesse kashta wenn tardo ap biish herja dran lolo saster. I rikepangre un kol shelle, hoi rikrenn i laintikre kotja, kran le dran rup.
11Koi rig, kai o kham gar wella, hi jaake baro har koi rig, kai o kham pralstunes hi: paash-sheel metarja lengsto. Ninna kate rikrenn biish pesse kashta kol laintikre kotja. Kal pesse kashta wenn tardo ap biish herja dran lolo saster. I rikepangre un kol shelle, hoi rikrenn i laintikre kotja, kran le dran rup.
12Ap i rig, kai o kham tele djal, hi koi platsa biish-te-pantch metarja buchlo. Kote wenn i laintikre kotja ap deesh pesse kashta rikedo, hoi ap deesh herja tardo wenn. I rikepangre un i shelle, hoi rikrenn i laintikre kotja, kran le dran rup.
13Ninna glan o kheer, ap i rig, kai o kham pre djala, hi i platsa biish-te-pantch metarja buchlo. 14-15Mashkral hi i wudar. Ap koi jek rig hi efta-te-paash metarja: kote wenn triin pesse kashta tardo ap triin herja. Ap koi wawar rig hi ninna efta-te-paash metarja: Kote wenn ninna triin pesse kashta tardo ap triin herja. 16I tsele laintikre kotja his dran latcho sorelo laintikro than. 17Un i herja tel kol pesse kashta his dran lolo saster. Un i rikepangre un shelle, hoi rikrenn i laintikre kotja, his dran rup. Un i pesse kashta, len his shere, kai rup trul tchiddo his.
18Un koi bari plachta, hoi well pandlo an o wudar glan i glanstuni platsa kran le an shukar wastengri budi dran latcho sorelo laintikro than, kai ninna kutch bakrengro bal dren hi. Kowa his blaueto un lolo un lolo har jag. Koi plachta his deesh metarja lengsto un dui-te-paash metarja baro, jaake baro har ninna i wawar laintikre kotja hi, hoi trul i platsa pandlo wenn. 19Koi pashel kran le star pesse kashta un star herja dran lolo saster, ninna rupene rikepangre un rupene shelle, hoi rikrenn koi bari plachta. I pesse kashta, len hi shere, kai rup trul tchiddo his.
20Ninna kol tikne kotja his dran lolo saster, hoi denn le an i phub, te well o plachteno kheer un i plachte trul i platsa soreles rikedo.
O tselo sonakai, rup un lolo saster, hoi i Israelitarja o Debleskro khereske dan
21-23O Bezalel, – leskro dad his o Uri un leskro papo o Hur, dran o kheer Juda – job kras koi tseli budi jaake, har o baro Dewel kowa o Moseske penas. Un o Oholiab, – leskro dad hi o Ahisamach, dran o kheer Dan – job was leske pash o wast. Un peskre wastentsa kras lo shukar koowa dran lolo saster, sonakai, rup un kasht. Ninna haiwas lo mishto latcho laintikro than te krell, un siwas shukar koowa dran kutch bakrengro bal dren, hoi blaueto, lolo un lolo har jag his.
O Mose penas ap o Itamar, ko tchawo o rashajestar Aron: “Pen ap i Levitarja, te tchinenn le lauter an i liil, hoi i Israelitarja khetne tchiwan, te krenn le o Debleskro kheer, – ko kheer, kai o Debleskre deesh laba dren hi.”
24Ko sonakai, hoi jon pendar dan, his budeder har 29 (biish-te-enja) zentnarja. Jek zentnari his jaake bud har jek zentnari an o Debleskro kheer pharo his.
25Ko rup, hoi was khetne, har an i liil tchinlo was, har bud mursha koi hi, ko rup his budeder har 100 (sheel) zentnarja. Jek zentnari his jaake bud har jek zentnari an o Debleskro kheer pharo his. 26I tsele mursha, kai phureder his har biish bersha, his 603.550 (shob-sheel-te-triin-serja-pantch-sheel-te-pantch-desha) mursha. Hakeno lendar das i paash rupeno kotar. Jek paash kotar rup his jaake bud har jek paash kotar rup an o Debleskro kheer pharo his.
27Sheel zentnarja rup lan le un kran lestar kol sheel herja, ap kolende i tchinle kashta tardo wenna, ninna kolla, kai rikrenn o wudar dran o kutch kotar than. Haki rupeni heri his jek zentnari pharo. 28Ko rup, hoi pral atchas, his jaake deesh-te-triin kilogramme. Kolestar kran le i gustria un i shelle, hoi i laintikre kotja rikrenna. Ninna tchiwan le les trul i shere kol pesse kashtendar.
29Ko lolo saster, hoi i menshe pendar dan, his budeder har efta-desha zentnarja. 30Kolestar mukas o Bezalel kol herja te krell, ap kolende i pesse kashta tardo hi, hoi hi serwes un tchatches pash o wudar. Ninna kran le kolestar koi sasterni chatchepaskri#38:30 sasterni chatchepaskri: sasterno altaro un koi sasterni netsa, hoi koi pashel hi, un i tsele koola, kolentsa i rashaja budrenna. 31Dran o lolo saster kran le ninna i herja, ap kolende i pesse kashta trul i glanstuni platsa tardo wenn, ninna i herja tel i pesse kashta pash o wudar glan i glanstuni platsa, un ninna i tsele tikne kotja, hoi wenn an i phub dino, te rikrenn le soreles ko kheer un kol laintikre kotja trul i glanstuni platsa.
Valið núna:
2. Mose 38: Sint2021
Áherslumerki
Deildu
Afrita
Want to have your highlights saved across all your devices? Sign up or sign in
© 2021 Romanes-Arbeit-Marburg e.V.
Erste Auflage
Alle Rechte vorbehalten
Die Lizenzvereinbarung erlaubt eine nicht-kommerzielle Nutzung des Textes. Änderungen des Textes sind jedoch untersagt. Der Rechteinhaber, Romanes-Arbeit-Marburg e.V., muss bei jeder Veröffentlichung erwähnt werden. Für jegliche kommerzielle Verbreitung muss ein Herausgeber beim Rechteinhaber eine schriftliche Genehmigung beantragen.
Herausgeber und Vertrieb: Romanes-Arbeit-Marburg e.V., Germany
info@romanes-arbeit-marburg.de
ISBN: 978-3-00-068366-4
Illustrationen von Louise Bass und Horace Knowles © The British amp Foreign Bible Society, 1954, 1967, 1972, 1994, 1995
Farbige Illustrationen mit Erlaubnis von Louise Bass
Kartenmaterial generiert mit Bible Mapper © 2005-2010 von David P. Barret
Alle Rechte an den Karten © 2021, Wycliffe Bible Translators, Inc.