Mapookyony 38

38
Yuda na Tamari
1Kyeeri kilya Yuda kasoka auka kwa vana va maye, kakooya nndu umwi Mwadullami evaangwa Hira, 2Yuda kalolya-fo mwana wa kyika wa nndu Nkanaani irina lyakwe ni Shua. Kamwipoo, kakaa nawe. 3Kakufinga, kaira mwana, kammbaanga Eri. 4Kakufinga lyingyi, kaira mwana kammbaanga Onani. 5Keengera nawe kaira mwana ungyi kammbaanga Shela. Nawe Yuda mmbo ekee kulya Kyesibu kyeeri kilya emwiira. 6Yuda kaalyikkya mwana ulya wakwe mmbee Eri nka, na irina lya nka eto ni Tamari. 7Nawe Eri, eto mmbee wa Yuda, kava nravi misony a Nndumi Iruva; na Nndumi Iruva kammbwaa. 8Yuda kavia Onani, “Anga kwa nka wa mwana-mau, kumwoore kuwonisye mwana mau ngyeeri.” 9Onani kamanya ngyeeri yeyo nshi yakwe-fo, kapusuya mbeu-si naambo nalaonisye mwana maye ngyeeri. 10Kindo ekyi alekitana kyikasukkya Nndumi Iruva, naasa Nndumi Iruva nawe kammbwaa.
11Yuda kavia mwalyi wakwe Tamari, “Enda kyeny kwa ndoo kundekaa kwiikee nka wa ding'u kutani mwana wakwa Shela ashevaa nndu ang'ana, mashika we aleamba naleshefwa sha vana va maye.” Naasa Tamari keenda kandekaa kyeny kwa ndeye. 12Naasa ikiira mikonu miingyi mfu wa Shua we nka wa Yuda kafwa. Yuda kandekaa kwa varundi veesema moonri akwe mafwaa kulya Timna naambo nandeimurisya-fo makusaro, keenda we na Hira Mwadulami. 13Tamari kashefitywa mbony kyeyaamba Ekato ndammi wafo ammeenda Timna, naambo nandesema moonri akwe mafwaa. 14Naasa kakwaammbwa soori ta nka wa ding'u, karaa soori ingyi kasikkya kisangu, kakaa mwaangony wa Enaimu, mbaaambaa ya shia ya yeenda Timna. Ni llya alelollya Shela ammeng'ana lyo nyalerambikywa nave nkaakwe-fo.
15Kyeeri Yuda eekeiira kallollya kakusara we ni nka washia, ni llya eekusikkye kisangu, 16kansora yoo mbai ya shia, kammbia, “Shakutereva shaange kwafo.” Mashika we nnyemanya sheelyi yeto mmwalyi wakwefo! Kammbesa, “Nkyokyi kushiniingaa kwammanga kwakwa?” 17Mmbo shikweengyee mburu yuuka efo ikambeny. Nawe kammbesa, “Nkyokyi kushiningaa shitire kutani kwayeende?” 18Kammbesa, “Shakuniingya-kyi ndesa?” Kandouwa, “Shiniinga nrashi yafo na kiwoye, na mbiiri yeyo kuirye efo wokony. Nawe kanningya, kaanga kwakwe, nawe kakufinga.” 19Kakupoo keenda, kakuuta soori tilya eree, karaa lyingyi tilya ta nka wa ding'u. 20Yuda karikya mbuya yakwe Mwadulami mburu ilya naambo nanrwaaye, naambo nambiirye findo filya etira we nka ulya, lyo keenda nalakinkooye. 21Kavesa vandu va ando alya kaamba, “A nka ulya wa shia aleva mwikaa mbai ya shia yaa Enaimu nkwi akai?” Vakammbia, “Nkwiifo nka wa shia alenkaa yaa-fo.” 22Kawuya kwa Yuda kammbia, “Nshallollya-fo, na vandu va ando yoo nawo mmbo valeshivia nkulekee-u nka wa ngaa eyo efo-fo.” 23Yuda kaamba, “Ra nayiipoo we, lulashesuka yese, mashika mmbo lwenrwaaya mburu yei lulankooye-u.”
24Kwikyisia miiri iraru Yuda kashefitywa mbony kyeamba, “Mwalyi wafo we Tamari, aletuusa, ekato mmbo akufinngye.” Yuda kaamba, “Nsomuteny narumato deny.” 25Kyeeri alesomutwa karuma vandu kwa ndammi kaamba, “Mmbo shikufinngye kyuuka na nndu eto muni findo efi.” Keengera yaamba, “manyaany, findo efi mfya vi, nrashi yei, kyoove ekyi na mbiiri yei.” 26Yuda kamanya findo filya kaamba, “We mmbo atiri usumanu ngota yeny mashika llya shilera shilannigya mwana wakwa we Shela. Nta numa ya yoo Yuda nnyekyikaa lyingyi nawe-fo.”
27Kyikava elyi kyeeri kyakwe kya iwona kyefika, Ate mmbo arye vana vavii. 28Naasa kyeeri ekeewona mwana, yeto umwi kasomuta-fo woko, nkyeku wa mwana kaipoo uruu ludodorye kamfinngya wokony llwakwe, kaamba, “Yeu mmbwe asonngwa iwonika.” 29Kyeeri aleviira woko, eto ungyi kasomuka. Nkyeku kaamba, “Niinda yewe kwasomuka na ntika deny? Mbony ta finya tikuwuiye.” Nkyo irina lyakwe lyikava Peresi. 30Yeto ungyi kasomuka numa eetiri uruu ludodorye wokony lwakwe; yeu kavaangwa Sera.

Valið núna:

Mapookyony 38: MAS2

Áherslumerki

Deildu

Afrita

None

Want to have your highlights saved across all your devices? Sign up or sign in