Ndandililo 31

Che Yakubu akwatila che Labani

1Nipele, ŵandu ŵasasile kuti ŵanache achalume ŵa che Labani ŵaliji nkudandaula ni kuti, “Che Yakubu ajigele indu yose ya atati ŵetu, yele ni yatite kuŵa ŵakusichila.” 2Che Yakubu ŵaimanyi kuti che Labani ngaakundendela mpela iŵandendelaga kuundanda. 3Nipele, Ambuje Akunnungu ŵansalile che Yakubu, “Mmujile ku chilambo cha achachekulu ŵenu ni kwa achalongo ŵenu, none chilongane pamo ni mmwe.”

4Kwayele che Yakubu ŵaalajisye ŵandu kuti akaŵilanje che Laheli ni che Lea, nombewo ŵajaulile kwikonde kuŵaliji alinkuchinga inyama. 5Che Yakubu ŵaasalile, “Nguwona atati ŵenu ngakundendela sooni mpela iŵandendelaga kuundanda. Nambo Akunnungu ŵa atati ŵangu ali pamo ni une. 6Ngati nkumanyilila kuti naatumichile atati ŵenu ni machili gangu gose. 7Nambo aanambwisye une ni kugagalausya malipilo gangu kakumi. Nambo Akunnungu nganaŵalechela atati ŵenu andendele une chindu changalumbana. 8Katema kose atati ŵenu paŵatite, ‘Inyama ya madomedome ni ichiiŵe malipilo genu,’ nipele mpingo wose waŵeleche ŵanache ŵakwete madomedome. Sooni paŵatite, ‘Inyama ya maŵalamaŵala ni ichiiŵe malipilo genu,’ nipele mpingo wose waŵeleche ŵanache ŵakwete maŵalamaŵala. 9Yele Akunnungu ni yatite kuijigala inyama ya atati ŵenu ni kuumba une.

10“Katema ka inyama kuŵelekana nasagamile sagamisi, mu jele sagamisi jo, najiweni mikambaku jose ja mbusi jijaliji nkukwela jaliji ni maŵalamaŵala, ni madomedome, ni misitalimisitali. 11Katumetume jwa kwinani jwa Akunnungu ŵakungulwiche ni une musagamisi, ŵamilasile une, ‘Che Yakubu,’ ni une najitiche, ‘Ndili apano!’ 12Nombewo ŵatite, ‘Nnole, mikambaku jose jajikukwela jikwete maŵalamaŵala, ni madomedome, ni misitalimisitali. Une ni jundesile yeleyi ligongo lolite yantesile che Labani. 13Une ni ŵeŵala Akunnungu juŵankopochele ku Beseli kula, pamalo pumwaliŵisile liganga liŵe chikumbuchisyo ni kulijitila mauta ni kuŵika nasili. Sambano ntyoche mu chilambo chino njaule kumangwenu mu chilambo chimpagwilwe.’ ”

14Che Laheli ni che Lea ŵanjanjile che Yakubu, “Uweji nganitukola sooni chipanje chachili chose chachisigele kutyochela kwa atati ŵetu chati chichiŵe chetu! 15Sooni atati ŵetu ŵa akutuwona mpela achalendo, pakuŵa amasile kutusumisya, ni mbiya silasila syapatile kwa kutusumisya uwe akulya jikape. 16Chipanje chose chiŵachijigele Akunnungu kutyochela kwa atati ŵetu chili chetu uwe pamo ni achiŵana ŵetu. Kwayele mpanganye yele yannajisye Akunnungu!”

17Nipele, che Yakubu ŵaliji chile kwaula ulendo, ŵakwesisye achiŵanagwe ni achiŵankwakwe pa inyama yaikuŵilanjikwa ngamia. 18Ŵajigele inyama yakwe yose pamo ni chipanje chose yapatile kweleko ku Padani Alamu, ni kutanda ulendo wa kuuja ku chilambo cha Kaanani kwa che Isaka atatigwe. 19Kele katema che Labani ŵaliji apite kukusikata manyunya ngondolo syakwe. Kwayele che Laheli ŵakwete lipesa lya kwiŵa inyago ya minungu ja atatigwe. 20Che Yakubu ŵanlambwisye che Labani mundu jwa kualamu, kwa kwaula ulendo pangalanga. 21Nipele, che Yakubu ŵaijigele ipanje yakwe yose iŵakwete, ni ŵatyosile kwa kutila. Paŵamasile komboka lusulo lwa Efulate, ŵajawile upande wa ku Gileadi chilambo cha matumbi.

Che Labani akwakuya che Yakubu

22Pagapitile moŵa gatatu, ŵandu ŵaasalile che Labani kuti che Yakubu atisile. 23Nipele, che Labani ŵaajigele achalongo achinjakwe, ni ŵankuiye che Yakubu kwa moŵa saba, ŵaasimene ku Gileadi chilambo cha matumbi. 24Nambo, chilo Akunnungu ŵankopochele che Labani musagamisi, ŵansalile, “Nlilolechesye! Ngasimwasalila che Yakubu liloŵe lyalili lyose, lyambone pane lyangalimate.”

25Che Yakubu ŵaliji aŵisile chigono pa chilambo cha matumbi pa Gileadi, katema che Labani paŵaasime. Che Labani nombe, pamo ni achalongo achinjakwe, ŵaŵisile chigono kweleko. 26Pele che Labani ŵansalile che Yakubu, “Ntesile chichi? Kwachichi muunambwisye, mwajigele achiŵali ŵangu mpela ŵandu ŵakamwilwe kwa machili kungondo? 27Ana kwachichi mwatyosile kwa kutila, ni kuunambusya, natamuno nganimuusalila kuti ngombole kunlanga kwa kusengwa, ni nyimbo ni ngoma ni mabango? 28Kwachichi nganimumba lipesa lyakwakumbata kwa kwalanga achiŵali ŵangu ni isukulu yangu? Isyene ntesile mwakuloŵela! 29Une ngwete ulamusi wakuntenda yangalimate, nambo Akunnungu ŵa atati ŵenu ŵangopochele chilo cha lelo jino, ŵaasalile achitiji, ‘Nlilolechesye! Ngasimwasalila che Yakubu liloŵe lyalililyose, lyambone pane lyangalimate.’ 30Ngumanyilila kuti mwatyosile kwa kutila ligongo mwalajile kuuja kwa atati ŵenu. Nambo kwachichi mwajiŵile minungu jangu?” 31Che Yakubu ŵajanjile, “Najogwepe ligongo naganisisye kuti chimuusumule une achiŵali ŵenu. 32Nambo uchimunsimane ni inyago ya minungu jenu aulajikwe! Paujo pa achalongo achinjetu ŵa, nlosye chilichose chachili chenu, njigale.” Che Yakubu nganamanyililaga kuti che Laheli ŵaliji ajigele inyago ya minungu ja che Labani.

33Nipele, Che Labani ŵasosile inyago ya minungu mu lisakasa lya che Yakubu, ni lya che Lea ni lya ŵakutumichila ŵaŵili; nambo nganaiwona, npele ŵapite mu lisakasa lya che Lea ni kwinjila mu lisakasa lya che Laheli. 34Che Laheli ni ŵaŵajijigele minungu jo, ŵajisisile kuusi kwa chindu chakutamila pangongo wa ngamia. Che Labani ŵasosile mose mu lisakasa, nambo nganaiwona. 35Pelepo che Laheli ŵansalile atatigwe, “Choonde atati ngasimundumbilila une, pakuŵa ngangukombola kwima paujo penu ligongo ndili mmagono.” Nipele, che Labani ŵasosile minungu jakwe, nambo nganaiwona.

36Pelepo che Yakubu ŵatumbile kwannope, ŵausisye che Labani achitiji, “Ana leŵile chichi? 37Mmasile kuwunukula misigo jose, ana nchiweni chichi chachili chenumwe? Mmiche pakuloleka paujo pa ŵandu ŵangu ni ŵandu ŵenu, kuti alamule ŵaani ŵakwete ulemwa pasikati jetu! 38Ndemi ni mmwe kwa yaka ishilini, ni yaka yose yo ngaŵa ngondolo syenu atamuno mbusi syenu nganisipolosya namose jimo. Une nganimwahi kulya ngondolo jankambako jajilijose ja mwachinga mwenu. 39Une nganinanyichisya ata kamo chinyama chachiulajikwe ni inyama ya mwikonde, nambo nanlipile hasala jo nansyene. Mwasachile ndende malipilo pangaikosya chinyama chijiŵikwe muusi pane chilo! 40Yelei ni inatamaga, muusi lyuŵa lyambutile ni chilo malili gambutile mpaka nginingombola kugona. 41Yele ni inatamaga kwa yaka ishilini mu nyuumba jenu. Nantumichile kwa yaka kumi na nne kwa ligongo lya achiŵali ŵenu ŵaŵili, ni yaka sita naliji nkuchinga ilango yenu. Nambo mmwe mwagalawisye malipilo gangu kakumi. 42Naga Akunnungu ŵa ambuje ŵangu che Ibulahimu, Akunnungu uŵantesile atati ŵangu che Isaka atetemele, ngakaŵe upande wangu, isyene nkaanesile nyaule makono pe. Nambo Akunnungu ŵakuweni kulaga kwangu ni masengo gimbangenye ni makono gangu, ŵankalipile mmwe chilo cha lelo jino.”

43Pelepo che Labani ŵanjanjile che Yakubu kuti, “Achiŵali ŵa ŵangu une, ni ŵanache ŵao ali ŵangu, ni inyama yi yangu une, ni yose inkwiwona pelepa ili yangu une. Nambo ana ngukombola kwatenda chichi achiŵali ŵangu ni ŵanache ŵao? 44Nipele, une ndili chile kuŵika lilangano ni mmwejo, kuti liŵe umboni pasikati jetu.”

45Pelepo che Yakubu ŵajigele liganga lyekulungwa ni ŵalijimiche kuti liŵe mpela luchanamila lwa chikumbusyo. 46Sooni che Yakubu ŵaasalile ŵandu ŵakwe, “Nlokotanye maganga ni kuwunjika liunjili limo.” Ni ŵanyawo ŵalokotenye maganga ni kuwunjika liunjili. Nipele che Yakubu ni che Labani ŵalile pamo yakulya mungulugulu liunjili lyo. 47Che Labani ŵaliŵilasile liunjili lya maganga lyo Yegali Sahaduta, nambo che Yakubu ŵaliŵilasile Galedi. 48Che Labani ŵatite, “Liunjili lya magangali chilitukumbusye malangano getu.” Kwayele che Labani pamalo po ŵapaŵilasile Galedi, 49ni liunjili lila ŵaliŵilasile sooni Misipa achitiji, “Ambuje Akunnungu atugose uwe pa katema kangatukuwonegana. 50Naga chimwalagasye achiŵali ŵangu, ni naga chinlombele achakongwe ŵane, nipele mmanyilile kuti ngapagwa jwali jwaumboni pasikati jetu nambo Akunnungu asyenepe.” 51Che Labani ŵansalile che Yakubu, “Nnole liunjili lya maganga giunjiche ni sooni pana liganga lyekulungwa linyimiche pasikati jenu ni une. 52Liunjili lya maganga ni luchanamila ili umboni kuti ngunyomboka liunjili li kwika kukumputa, ni mmwe nganjomboka liunjili ni luchanamila kwika kukuumbuta une. 53Akunnungu ŵa che Ibulahimu ni Akunnungu ŵa che Naholi, chalamule pasikati jetu.” Nipele, che Yakubu ŵalumbilile kwa Akunnungu juŵantesile che Isaka atati ŵao, atetemele. 54Iyoyo che Yakubu ŵatyosisye mbopesi ku chitumbi ni kwalalika ŵandu ŵao kulya chakulya. Paŵamasile kulya, ŵatemi kweleko chilo chosye.

55Che Labani ŵajimwiche kundaŵipe, ŵakumbete ŵanache ŵao ni isukulu, ni kwapa upile. Nipele ŵawusile kumangwao.

Valið núna:

Ndandililo 31: YBV

Áherslumerki

Deildu

Afrita