Warumi 7
7
Kuwa huru kuyawana na Sharia
1Nywinywi wandugu zangu Wayahud̯i muimanyiyeo hi *Sharia, munamba ntamudzi kwamba Sharia inamut̯awala muntu t̯u akiwa kwamba ka mojo? 2Kwa mufaano muke ahwaijwe, hi sharia ya kwamba ni mukaza muntu inamugija-gija t̯u ikiwa kwamba muumewe ka mojo. Ela muumewe akifwa, ḅasi hi sharia ya kwamba ni mukaza muntu ntaimugije-gije kawii. 3Ndookomu ikiwa kwamba muke kahwajwa ni muyume yungine na hali muumewe ka mojo, huyo anawa kakunjiani rangani. Ela muumewe akifwa anawa nkakufungwa ni sharia kawii, na akihwajwa ni muyume yungine nkawe kunjiani rangani. 4D̯ubva nanywi pia wandugu zangu, mwisakuwa huru kuyawana na hi Sharia kuchiiya na kwa hivi vya *Kirist̯o afwiyevyo hapfaḍe muhini mwa mpatsa. Muwekwa huru ili muweze kuwa wa muntu yungine. Yani muweze kuwa wa huyu afufwiijwe kuyawa kwa wafu, ili kwamba hwonse huweze kudziyavya wazima wazima kwa Muungu. 5Koro hwipfohukit̯awaligwa ni hu ubenaad̯amu wehu, hi Sharia ikiziyamusa hizi t̯amaa nzuka nzuka zizokuwa miini mwehu, na hwikidziyavya wazima wazima kwa mambo ya nabvise yeyonayeha kufwa. 6Kenge sasa hwisakuwa huru kuyawana na hi Sharia. Iwa ihuweka dza wafungwa, ela sasa hwaa huru na ntahukwakumuhumikiani Muungu kwa njia ya kuuḅa Sharia ya kworegwa pfantu dza d̯ura. Ela hwakumuhumikiani kwa njia mpya, yani kuchiiya kwa Ruhu jwa Muungu.
Sharia si nzuka ela nabvise ndiyo nzuka
7D̯ubva kwa avi nineneyevyo, wangine wenu wakuimukani dza kwamba nyakwambani ai Sharia ni nzuka? Moro sikwakunenani hivyo hat̯a! Ae sokwaa ai Sharia, ami nindemanya hat̯a ya kwamba nabvise ni kintu gani le? T̯ambere hi Sharia ntaindekwamba, “Nkudzomiiye mahe cha mwenziwo,” hat̯a sindeemanya ya kwamba katsi kumiiya mahe cha muntu ni nabvise. 8Ela hi nabvise iyo kuzimuni mwangu iitumia hi hii amuri na inijumuiya kula aina ya t̯amaa nzuka! Na hali t̯ambere ntaku Sharia, nabvise ntaindeewa na nguvu. 9Mimi mwenye nipfokuwa sidzaihambuya hi Sharia, nikidziona dza kwamba nyakuishini urembo. Ela nipfokudza ninkiimanya hi hii amuri, nabvise nayo ifufuka na iniyaga kiruhu. 10Ndookomu niona kwamba hi amuri iyehejweyo kunimpa maisha ya tsekea, ishinu ndiyo iningizieyo kufwani kafu. 11Koro nabvise iitumia hi amuri, iniḍyuurisa na iningiza kufwani.
12Ndookomu nichokunenani ni kwamba hi Sharia iyawa kwa Muungu. Na hi amuri nayo pia iyawa kwa Muungu, na inahukumu na hachi na ni nyema.
Sharia ntaipfonye muntu kuyawana na nabvise
13Mani d̯ubva kwa avi nineneyevyo mwakuniimukani dza kwamba nyakwambani achi chicho chema kiniyehea kufwa? Moro sikwakunenani hivyo hat̯a! Ela nyakunenani kwamba, nabvise ndiyo itumiiyeyo hichi hichi chicho chema, yani hi amuri, na yakuningizani kufwani. T̯ayowani namuna ya nabvise ivyo nzuka! Inatumia kintu chema kiyawiyecho kwa Muungu, na ikangiza wantu kufwani. 14Hwonse humanya kwamba hi Sharia nza mambo ya kiruhu, ela mimi ni mwanaad̯amu niyekut̯awaligwani ni mambo ya kimwii. Mimi nya dza muhumwa niguzijwee kuihumikia nabvise. 15Haya mambo niyonahenda, mimi mwenye sikae na kuyaimuka. Koro haya niyonatsaka kuyahenda siyahende, ishinu yayaḍe nisiyotsaka kuyahenda, ndiyo niyonayahenda. 16Na kwa kwamba nakaa na kuhenda haya nisiyotsaka kuyahenda, ḅasi vinayanga wazi kwamba nikuḅali kwamba hi Sharia ni nyema. 17Ndookomu kunena hiḍe ya hachi, sikwakuvihendani kwa kutsaka kwangu, ela hi nabvise iyo kuzimuni mwangu ndiyo iyokunihendezani nihende hivi hivi. 18Nimanya kwamba ntaku dzema ḍiḍeḍyonse ḍiḍyo kuzimuni mwangu kwa dzambo ḍya hu ubenaad̯amu wangu. Koro ingawa kuzimuni mwangu nakaa na kudzisikia kuhenda mema, inanga siyahende. 19Haya mema niyonakaa na kutsaka kuyahenda siyahende, ishinu nahenda haya mazuka nisiyotsaka kuyahenda. 20D̯ubva kwa kwamba nakaa na kuhenda haya nisiyotsaka kuyahenda, ḅasi ni kunena kwamba simi kawii niyenavihenda, ela ni hii nabvise iyo kuzimuni mwangu.
21Ndookomu naona kwamba vinikaiya dza sharia ya kwamba kula ninkitsaka kuhenda mema, haya mazuka ndiyo niyonatsana kuhenda. 22Humu mojoni mwangu nakaa nikitsekezwa ni hi Sharia ya Muungu. 23Ela nyakuonani kwamba kuna sharia ingine iyokuhendani kazi mwiini mwangu. Ni sharia iyokuipfingani hi sharia ya hi akili yangu ibarat̯iyeyo, na inakaa na kunihendeza mufungwa jwa hi sharia ya nabvise iyokuhendani kazi mwiini mwangu. 24E mimi nya d̯inani t̯i! Ni ga jwa kunipfonya na haya haya maisha ya kuningiza kufwani?#7:24 Haya matsoro ya Kiyunani yanakwamba: ni ga jwa kunipfonya na hu huu mwii wa kufwa? 25Ela namuyaviza ḍuḍa Muungu, koro ananipfonya kuchiiya na kwa Ḅwana jwehu Yesu Kirist̯o!
Ndookomu munaona namuna viivyo. Humu mojoni mwangu natsaka kuit̯ii hi Sharia ya Muungu, ela kwa dzambo ḍya hu ubenaad̯amu wangu, nigala muhumwa jwa hi sharia ya nabvise.
Valið núna:
Warumi 7: pkb
Áherslumerki
Deildu
Afrita
Want to have your highlights saved across all your devices? Sign up or sign in
© 2004, Bible Translation and Literacy