Proverbios 27
27
1Ma kokuu teyii ron nagua saꞌa ron kiuu xtnee,
chi tu jini ron nagua kokuu.
2Ma ndakuantnoꞌo ron maa ron, kuandetu ja inka ñayiu na ndakuantnoꞌo ña.
Te na ndakuantnoꞌo ña inka ñayiu, masu ja vi maa ron ndakuantnoꞌo ron maa ron.
3Vee ndevaꞌa yuu vi vijin kuu ja kondiso ñuti.
Su vijin ka kuu ja kundee inio jin ja kiti ini ñayiu vasa, saa ndi nduu yun.
4Kueꞌe ndevaꞌa kuu ja kiti ini, te xeen ndevaꞌa kuu ja yachi ini,
¿su na in kundee ini jin tnoꞌo kuasun?
5Guaꞌa ka kuu ja vi xtuu ñayiu mai ja ka kuxein nuo,
masu ja ka kutoo yuꞌu ñai.
6Guaꞌa ka kukanu inio ñayiu ndeka tnaꞌa guaꞌa jion ja kuxein nuo,
masu ñayiu kaꞌan uꞌu ña ja chitui nuo.
7Ñayiu ñuꞌu chitu chii, chi vi ndee jioo nduxi skexikoi.
Su ñayiu kokin ndevaꞌa, chi vi ndee ja ugua jini vixin.
8Na kuinio tisala ja jiondita jika ti nuu oo taka ti,
saa kuu jin ñayiu nuu jiondita jikai nuu veꞌi.
9Tatna xiko kuu ja ndasaꞌa sii ini ña jin in ñayiu,
te tnoꞌo vii tnoꞌo vaꞌa ja xteku ña in ñayiu ndeka tnaꞌa guaꞌa jin, kuu ja ndakuñaꞌa tnoꞌo ndee ini nui.
10Ma xndoo ron ñayiu ndeka tnaꞌa guaꞌa jin ron,
ni ñayiu ndeka tnaꞌa guaꞌa jin tata ron.
Ni ma kiꞌin ron veꞌe ñani ron nuu tnaꞌa ron tnundoꞌo,
chi guaꞌa ka kuu in tnaꞌa yatni saa in ñani oo jika.
11Kondichi, vi seꞌe, te na kokuu sii ini rin jin ron,
saa nagua ja niꞌi rin tnoꞌo kaꞌan rin nuu ka kaneꞌe ña ñayiu jin rin.
12Ñayiu jini nagua kuu, chi nuu jini ja vaji jakueꞌe, te kujioi.
Su ñayiu tu jini naxa saꞌi, chi yaꞌi kuaꞌin, te tnaꞌi tnundoꞌo nuu jakueꞌe yun.
13Vi kindee saꞌun ñayiu tau yika ja jaꞌa ñayiu inka ñuu,
te na kava ndee saꞌuin nagua ja kuu vi kuñaꞌa nuu ron nuu ñasiꞌi ja tu ka jini ron.
14Masu vatuka kuu ja kana koꞌo in ñayiu jin inka ñayiu ndeka tnaꞌa guaꞌa jin nuu kuu tnoꞌo neꞌe, nuu kaꞌin “oo vaꞌa ni”,
chi kuu ndakani ini inka ñayiu yun nani kuinio ja kaneꞌe ñai.
15Ñasiꞌi ja junkuaan ini ja tee tnaꞌa
kuu na kuinio nuu jiꞌin ja chia jiꞌin te jiꞌin ni tiempu savi.
16Ñayiu nduku ja junkani ñasiꞌi yun
kuu na kuinio ñayiu nduku ja junkani tachi nuu yiꞌi,
axi junkani texeꞌen jin ndaꞌa kuaꞌi.
17Kaa, chi ndisa kaa maa ndasaꞌa xeen tnaꞌa,
te ñayiu, chi ndisa mai ka kaꞌin vi ka xteku tnaꞌi.
18Ñayiu jito tnu tichi iuu, chi kaa mai tichi iuu ja kuun yun,
te ñayiu jito vaꞌa ja nevaꞌa jitoꞌi, chi niꞌi jayiñuꞌu.
19Nagua xneꞌe ndute naxa jito ñayiu,
saa ni xneꞌe anu naxa oo maa ñayiu yun.
20Yau ñaña vi andeya, chi tu ndenuu ini jin ñayiu ka jiꞌi,
te saa ni nduchi nuu ñayiu, chi tu ndenuu ini jin ja ndiaꞌa.
21In nuu tijaꞌan ka xnduaꞌa plata ja ka jito tnuni,
te in nuu jitnu ka xnduaꞌa oro ja ka jito tnuni,
te ñayiu, chi ka jito tnuni mai jin jayiñuꞌu ja ka niꞌi.
22Ñayiu vasa, chi visi na vi kaxin vii ron jin,
nagua saꞌa ron ja jaxin ron triu,
suni ma ndondei jin ja tu jiniuꞌu ja saꞌi.
23Kondiaꞌa guaꞌa naxa ka oo ndikachi ron,
te koto guaꞌa ron kiti tata ron,
24chi ma kuxii ja kuika,
te ni jayiñuꞌu ma kuxii ja ndayaꞌa ndaꞌa in in tatatnoꞌo.
25Nuu teꞌnde yuku, te nduyute tinduꞌu,
te ka ndaxtutu yuku ja oo nuu yuku.
26Te jin ixi lelu ron, niꞌi ron saꞌun kuiꞌnu ron,
te jin ndixiꞌu ron, niꞌi ron xuꞌun ja ndakuaan ron ñundeꞌi ron.
27Te konevaꞌa kuaꞌa ron xikui ndixiꞌu ron
ja vi kokoꞌo ron jin ñayiu veꞌe ron,
vi ja vi kokoꞌo suchi siꞌi ja ka jinokuechi nuu ron.
Valið núna:
Proverbios 27: xtnNTplus
Áherslumerki
Deildu
Afrita
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.