Proverbios 25
25
Sava ka tnoꞌo jaꞌvi ja ni tee Salomón
1Suni tnoꞌo yaꞌa kuu tnoꞌo jaꞌvi ja ni tee rey Salomón, te ni ka ndatee tee ni ka ojinokuechi nuu Ezequías, rey Judá.
2Jayiñuꞌu kuu nuu ia Dios ja tayuꞌu ya nagua saꞌa ya.
Su jayiñuꞌu kuu nuu rey ja ndaxtuu de nagua oo yuꞌu.
3Nagua sukun andivi vi nagua kunu chii ñuꞌu,
suni saa oo ini anu rey, te ma kuu ja jinkuiꞌnu inio naxa oo.
4Xtajioo ja ni ndakuiso xeꞌe kaa kuu plata jian,
te na keneꞌe tee kani kaa in vasu vii.
5Vi xtajioo ñayiu kueꞌe nuu rey,
te na koo yutnu nuu tatnuni de ja saꞌa ndaa de.
6Ma saꞌa teyii ron maa ron nuu oo ron nuu rey,
te ma nduku ron ja kokuu inuu ron jin tee ka kuu naꞌnu.
7Chi guaꞌa ka kuu ja na kachi rey nuu ron: “Makaa yaꞌa”,
te masu ja kendoo ron jakanoo jin nuu tee ka kuu naꞌnu yun.
8Ma tnaa ñama ron in ñayiu nuu ndaꞌa tee ka netniuu,
kana saa sandiꞌi, te ma kuni ron nagua saꞌa ron,
te taa tnaꞌa kuikin ron jakanoo nuu ron.
9Sandaa kuechi tavi ron jin tnaꞌa kuikin ron,
su ma ndaxtuu ron inka ñayiu.
10Kana saa taa ñayiu nini yun jakanoo ron,
te ma kuu ka ja nduvaꞌa jakanoo ron yun.
11Tnoꞌo ja ka kaꞌan ñayiu mamaa ore
kuu na kuinio oro ja ni ndukutu jin plata.
12Na kuinio xeꞌe kuu oro axi ja ñuꞌu sukun ja kuu oro vii ndevaꞌa,
kuu tnoꞌo kaꞌan ñayiu ndichi nuu kuxein nuu ñayiu jantaꞌu tnoꞌo ja kaꞌin.
13Te na kuinio nuu saꞌa vijin ja kuun yuaꞌa yoo iꞌni,
saa kuu jin in tee ndaa ja kuaꞌan de majinkaxtnoꞌo de nuu tee ni tetniuu ña,
chi xndiko de anu lamu de.
14Te na kuinio nuu yiꞌi tachi vi in viko, su tu na sau kuun,
saa kuu jin in tee kaꞌan teyii ja kuñaꞌa de, su tu saꞌun nagua jiñaꞌa de.
15Te jin ja jandee jataa inio saꞌa ja yaꞌa ini tee tatnuni jin ja kiti ini de,
te yao, chi visi vita kuu, su jaꞌnu ña jin yiki.
16Nuu ja niꞌi ron nduxi, te kaa na kuaꞌa ndenuu ini ron,
chi kana saa kaa ndevaꞌa ron, te ndujan ron.
17Ma kiꞌin chito ron veꞌe ñayiu oo yatni jin ron,
kana saa tunini ñai jin ron, te skexiko ñai.
18Te na kuinio marru axi yuchi kani axi yutnu ndugua,
saa kuu tee kaꞌan tnoꞌo siki tnaꞌa kuikin de.
19Te na kuinio noꞌo ja ni tnaꞌnu axi siꞌi ja ni jiokoso,
saa kuu ja kukanu inio in tee ja tu skunkuu de tniuu ndee nuu de nuu ka tnaꞌo tnundoꞌo.
20Te ñayiu jita yaa nuu ñayiu kusuchi ini,
kuu na kuinio ñayiu tau saꞌuin yoo vijin
axi na kuinio ñayiu tnaa vinagre nuu ni tuji.
21Te nuu ja kokin ñayiu kaꞌan uꞌu ña jin ron, te kuñaꞌa ja na kai,
te nuu ja yichi, te kuñaꞌa ndute na koꞌi.
22Chi saa te saꞌa ron ja vi ndukuaꞌa tnui ja ndukanoi jin ja saꞌi,
te maa Jitoꞌo, guaa ndandioneꞌe ndandiotaa ya nuu ron.
23Tachi ja vaji ichi ndaꞌa kuaꞌo saꞌa ja kuun sau,
te yaa ja kaꞌan kueꞌe siki ñayiu saꞌa ja nduxeen nuu ñayiu yun.
24Guaꞌa ka kuu ja koo in yuveꞌe,
masu ja koo in veꞌe kaꞌnu jin in ñasiꞌi yachi ndevaꞌa ini.
25Na kuinio ndute vijin ja jiꞌi ñayiu yichi ndevaꞌa,
saa kuu jin tnoꞌo vii tnoꞌo vaꞌa ja vaji ndee in ñuu jika.
26Te na kuinio nuu ndute ni nduu ñuñuꞌu, vi poso ndute ja ni kutneꞌe,
saa kuu jin ñayiu ndaa ja kanakaui nuu ñayiu kueꞌe.
27Masu guaꞌa kuu ja kaa ndevaꞌo nduxi,
te ni tu na jayiñuꞌu oo nuu ndukuo jayiñuꞌu mao.
28Te na kuinio in ñuu kaꞌnu ja tu na muro ndesi, te vi ja oo ja naa,
saa kuu jin tee tu jini ja kaꞌnu niꞌnu maa.
Valið núna:
Proverbios 25: xtnNTplus
Áherslumerki
Deildu
Afrita
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.