Proverbios 21
21
1Anu rey, chi kuu na kuinio in jichi nuu jika ndute,
te oo nuu ndaꞌa maa Jitoꞌo,
chi ndeka ña maa ya ndee ni nuu kuini ya.
2Ndiꞌi ni ja ka saꞌa maa ñayiu ka ndakani ini ja guaꞌa ka saꞌi.
Su maa Jitoꞌo, guaa jini ya nagua ka ndakani ini ja vi saꞌi.
3Ja saꞌa ndao vi saꞌa guaꞌo kuu ja junkuaan ini Jitoꞌo,
saa ja ka soko kiti nuu ya.
4Nduchi nuu ja saꞌa teyii, vi anu ja kuu vixin,
vi ja ndakani ini ñayiu kueꞌe ndevaꞌa kuu yika kuechi.
5Ñayiu ndakani guaꞌa ini, te saꞌi, chi kee guaꞌi.
Su ñayiu tu ndakani ini, te ñama saꞌi, chi kuaꞌin, te nduu ndaꞌui.
6Ja niꞌi ñayiu ja jinkonevaꞌi nuu xndaꞌui inka ñayiu,
kuu na kuinio in viko noꞌo ja ñama ndute, te saa ñama nduku ñayiu yun ja kui.
7Nuu ka suꞌu ndevaꞌa ñayiu kueꞌe, te yun vi naa mai,
chi tu ni ka kuini ja vi saꞌa ndai.
8Ichi nuu jika ñayiu kueꞌe ndevaꞌa kuu ichi yakua vi ichi ja tu jini.
Su ñayiu vii, chi saꞌa ndai.
9Guaꞌa ka kuu ja koo in yuveꞌe,
masu ja koo in veꞌe kaꞌnu jin in ñasiꞌi yachi ndevaꞌa ini.
10Ñayiu kueꞌe, chi maa ni jakueꞌe ndakani ini ja saꞌi,
te ni ja tu kundaꞌu ini in tnaꞌa kuikin.
11Nuu tniuyaꞌu ñayiu kuasun ini ja saꞌi, te kuu ndichi ñayiu tu jini naxa saꞌi,
te nuu ka kaxtnoꞌo nuu ñayiu ndichi naxa saꞌi, te kuu ndichi kai.
12Ndiaꞌa Dios, ia ndaa, veꞌe ñayiu kueꞌe,
te saꞌa ya ja vi naa ñayiu kueꞌe yun.
13Na in tu nini tnoꞌo kaꞌan ñayiu kundaꞌu nuu jikan taꞌui,
te suni tu na in konini tnoꞌo kaꞌin nuu jikan taꞌui.
14In ja kutaꞌu yuꞌu ñayiu saꞌa ja yaꞌa ini jin ja kiti ini,
te ja kutaꞌui nuu tu na in jini, kuu ja yaꞌa ini jin ja kiti ini ndevaꞌi.
15Ñayiu ndaa, chi ka kusii ini nuu ka jaꞌnde ndai kuechi.
Su ñayiu kueꞌe, chi vi nai.
16Ñayiu kujioo nuu ichi tnoꞌo ndichi,
te kiꞌin koi nuu ka oo ndiyi.
17Ñayiu jinkuaan ini ja kusii ini jin yiki kuñui, chi kokuu ndaꞌui,
te ñayiu jinkuaan ini vinu vi tatna xiko, chi ma jinkoo vaꞌi.
18Te ñayiu kueꞌe, chi tniuyaꞌui jin jakueꞌe kaꞌin ja saꞌi siki ñayiu ndaa,
te ñayiu skaꞌan inka ñayiu, suni tnaꞌi tnundoꞌo nuu tniuu ñayiu ndaa.
19Guaꞌa ka kuu ja koo nuu tu na ñayiu oo,
masu ja koo jin in ñasiꞌi yachi ini vi xeen ndevaꞌa.
20Veꞌe ñayiu ndichi, chi oo kuaꞌa ndatniuu vii vi tatna xiko,
su ñayiu vasa, chi ndiꞌi ni ja nevaꞌi xnai.
21Ñayiu nduku ja saꞌa ndai vi ja kundaꞌu ini ñayiu,
niꞌi ja kotekui vi jayiñuꞌu ja saꞌa ndai.
22Kundee ñayiu ndichi siki ñuu ñayiu ndakui,
te xnani ndiꞌi muro ja ka kukanu ini ñayiu yun ja ndesi guaꞌa ñui.
23Ñayiu jito vaꞌa yuꞌi na tnoꞌo kaꞌin,
te jito vaꞌi mai ja ma tnaꞌi tnoꞌo suchi ini.
24Seꞌe ja kuasun ini vi ja teyii vi ja ña kanoo,
konani ñayiu saꞌa teyii maa vi tu jini jakanoo.
25Ja ndioo ini ñayiu kuꞌndu kuu ja kaꞌni ña jin,
chi tu ka kuini ndaꞌi ja vi satniuu.
26Te ndiꞌi ni kiuu jioꞌi ja niꞌi.
Su ñayiu ndaa, chi jiñaꞌi, te tu kuxii.
27Skexiko Jitoꞌo ja ka soko ñayiu kueꞌe,
te viꞌi ka nuu ka ndakani kueꞌe ini, te ka sokoi.
28Testiu tnoꞌo, chi naa.
Su ñayiu jini konini tnoꞌo ndaa, chi siun ni koniꞌi na tnoꞌo kokaꞌin.
29Ñayiu kueꞌe, chi saꞌa ndei ini anui.
Su ñayiu ndaa, chi skinuu guaꞌi ichi jikai.
30Tu na tnoꞌo ndichi, ni ja jinkuiꞌnu ini,
ni tnoꞌo ja xteku ña nuu ja ndakoo ñayiu siki Jitoꞌo.
31Ka saꞌa tuaꞌa ñayiu kuai ja kiꞌinkuei nuu vi kaxin tnaꞌi.
Su maa Jitoꞌo kuu ia saꞌa ja ka kundei.
Valið núna:
Proverbios 21: xtnNTplus
Áherslumerki
Deildu
Afrita
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.