Vinsæl biblíuvers úr GÁLATAS 5

Deildu

Loꞌo xka ñaꞌan ngiꞌni Tyiꞌi Ndiose niꞌ kasiya ꞌñaan xa nu ndyaa ñaꞌan tianꞌ ꞌin Jesús: ngiꞌni Ni chaꞌ nchka tꞌnan tianꞌ ꞌin taꞌa ntean; kwiꞌ ngiꞌni Ni chaꞌ nka suꞌwe ka tiyean chaꞌ ꞌin Ni, ngiꞌni Ni chaꞌ tiin ti tyiꞌian, ngiꞌni Ni chaꞌ taloan ꞌin taꞌa ntean; ngiꞌni Ni chaꞌ ka suꞌwean loꞌo taꞌa ntean, chaꞌ tyiꞌin ñi neꞌ loꞌo taꞌa nten neꞌ; kwiꞌ ngwañaꞌan ngiꞌni Tyiꞌi Ndiose loꞌoan chaꞌ ja tnun ngiꞌnian ꞌñaan loꞌo taꞌa ntean, ngiꞌni Ni chaꞌ ka ꞌñaan kuꞌnian kwenta ꞌñaan, ti ykwiinꞌ tian bra kanꞌ. Ja ska ꞌa kiꞌya xtya Ndiose ꞌñaan, si kuꞌnian ngwañaꞌan.

Nde ndiya ska chaꞌ nu chkwiǐnꞌ loꞌo wan: Ta wan chabiyaꞌ chaꞌ ka Tyiꞌi Ndiose ndloo niꞌ kasiya ꞌwan seꞌen ndiꞌin wan; ja xitukwi ꞌa tiꞌ wan chaꞌ kuꞌni wan nchga chaꞌ kuxi nu ndiya tiꞌ wan, chaꞌ lka wan nten chalyuu.

Bra nu msñian chaꞌ ꞌin Krixtu ti kulo, kanꞌ mjwi chalyuu suꞌwe ꞌñaan nu nda Tyiꞌi Ndiose ꞌñaan bra kanꞌ. Loꞌo ni, suꞌwe la si taan chabiyaꞌ chaꞌ tyukwa loo Tyiꞌi Ndiose ꞌñaan xuꞌwian chalyuu.

Wa ngujwi Krixtu lo wsi chaꞌ katin kiꞌya nu ndukwian; kanꞌ chaꞌ wa yꞌni tyian nchga chaꞌ kuxi nu yuꞌwi niꞌ kasiya ꞌñaan sꞌni la; wa ngula yaanꞌ nchga chaꞌ kuxi nu mdiya tianꞌ sꞌni, wa mdyii nchga chaꞌ kanꞌ chunꞌ ndiꞌin chaꞌ ꞌñaan loꞌo Krixtu, wa yꞌni tyian ꞌin ran ñaꞌan tiꞌ si loꞌoan wa ngujwian lo wsi.

Nde ndiya chaꞌ kuxi nu ndiya la tiꞌ nten chalyuu, kwiꞌ nu ja nda chabiyaꞌ chaꞌ ka Tyiꞌi Ndiose ndloo niꞌ kasiya ꞌñaan: xkwiꞌ chaꞌ nsuꞌwi saꞌa neꞌ, xkwiꞌ ja luwi neꞌ, xaꞌan ꞌa ngiꞌni neꞌ loꞌo taꞌa nten neꞌ; kwiꞌ ngiꞌni tnun neꞌ ꞌin nkwin joꞌo; kwiꞌ ngiꞌni neꞌ chaꞌ taꞌá loꞌo taꞌa nten neꞌ, kwiꞌ tiꞌí tiꞌ neꞌ ꞌin taꞌa neꞌ, lye ꞌa nxuun neꞌ loꞌo taꞌa neꞌ; loꞌo xlyaa ꞌa neꞌ, kwiꞌ chinꞌ ti chaꞌ bra kasinꞌ tiꞌ neꞌ; kwiꞌ ja xlyaa neꞌ chaꞌ ka suꞌwe tiye neꞌ loꞌo taꞌa nten neꞌ, ska ta ti chaꞌ ꞌin neꞌ ndaꞌan tiye neꞌ; kwiꞌ ndiꞌin wsuun neꞌ loꞌo taꞌa kichen tyi neꞌ, kwiꞌ ndatsaa ꞌa neꞌ ꞌin taꞌa nten neꞌ chaꞌ ka tyun ta neꞌ; kwiꞌ ngwañaꞌan, xkwiꞌ nan ndlaa neꞌ nan nu nsuꞌwi ꞌin taꞌa nten neꞌ, kwiꞌ ndyujwi taꞌa neꞌ; xkwiꞌ nan kuꞌwi neꞌ, loꞌo ngwañaꞌan, ndiya nten nu kuweꞌ ꞌa nchku, chaꞌ kaꞌan ꞌa nan nchku neꞌ; loꞌo ti nsuꞌwi la tyun chaꞌ kuxi ngiꞌni neꞌ kanꞌ. Kanꞌ chaꞌ ñi ꞌa chkwiǐnꞌ loꞌo wan sa ñaꞌan nu ykwiǐnꞌ loꞌo wan nu ngwa sꞌni, chaꞌ ja ka ꞌa kalaan tloo Ndiose nde loo la, si kuꞌnian sa loo ti chaꞌ kuxi ngwañaꞌan.

Wa ngulo suwi Ndiose ꞌwan chaꞌ ka tyiꞌin suꞌwe wan lo chalyuu. Sa kanꞌ ti chaꞌ, chaꞌ tiya ti tiꞌ wan xuꞌwi wan chalyuu; ja tyaꞌan naan wan chaꞌ kuxi nu kuꞌni wan laja nu ndiꞌin suꞌwe wan, chaꞌ siꞌi nan ndiꞌiin suꞌwean chaꞌ kuꞌniin ñuꞌuan ya ñaꞌan ti ꞌñaan, ti ykwiinꞌ tian. Ndiꞌin chaꞌ tayaanꞌ ꞌin taꞌa ntean bra nu suꞌwe nsuꞌwi tiyean loꞌo taꞌaan, kanꞌ chaꞌ ndiꞌiin suꞌwean lo chalyuu.

Chaꞌ xaꞌan nu ndiya ꞌa tianꞌ ni, nxuun ran loꞌo chaꞌ suꞌwe nu nda Tyiꞌi Ndiose chaꞌ xuꞌwi niꞌ kasiya ꞌñaan. Kwiꞌ ngwañaꞌan Tyiꞌi Ndiose ni, kanꞌ nu nxuun loꞌo chaꞌ xaꞌan nu ndiya tianꞌ kuꞌnian, chaꞌ lkaan nten chalyuu. Ja suꞌwa tyukwaa chaꞌ kanꞌ siyaꞌ ti; kanꞌ chaꞌ ja ka kuꞌni wan nchga chaꞌ kuxi nu ndiya tiꞌ wan, kwiꞌ sa ñaꞌan nu yꞌni wan nu ngwa sꞌni.

Bra kanꞌ ka kuꞌnian nchga tñan nu nchka tiꞌ Ndiose chaꞌ kuꞌnian, si kunaan ska ti chaꞌ tiya re: “Ndiꞌin chaꞌ chka tꞌnan tiꞌ wan ꞌin nchga nten, kwiꞌ sa ñaꞌan nu nchka tꞌnan tiꞌ wan ꞌwan, ti ykwiꞌ ti wan.”

Ti kwiꞌ ti chaꞌ, ja suꞌwe si chkwianꞌ chaꞌ siyeꞌ loꞌo taꞌa ntean, chaꞌ ngwañaꞌan kaꞌan ꞌa chaꞌ kusuun tyiꞌin ꞌñaan loꞌo taꞌa ntean chaꞌ nu siyeanꞌ bra kanꞌ. Kwiꞌ ngwañaꞌan, ja suꞌwe kuꞌniin liyeꞌ tianꞌ ꞌin taꞌaan.

Wa ngulaa Krixtu ꞌñaan, chaꞌ ka tyiꞌiin suꞌwean lo chalyuu bra kanꞌ. Kanꞌ chaꞌ ja ta wan chabiyaꞌ chaꞌ kulo xka ta nten tñan ꞌwan chaꞌ kuꞌni wan chaꞌ kuxi, ñaꞌan tiꞌ si lka wan msu nu wa msiꞌi nten, chaꞌ kuꞌni wan tñan ꞌin neꞌ bra kanꞌ.