Popular Bible Verses from VAFILIPIYA 2

Deildu

Mi nga endli nchumu hi ku kanetana, hambi ku ri hi ku tidzunisa ka swahava, kambe un'wana ni un'wana hi ku titsongahata ka yena, a a anakanye leswaku van'wana va n'wi tlula hi vunene. Un'wana ni un'wana a nga tshuki a hlayisa leswi nga swa yena ntsena, kambe a a hlayise ni swa van'wana.

Mi va ni ku anakanya loku ngi ku ri ka Yesu Kriste

loyi hambi a ri ni xivumbeko xa Xikwembu, a nga anakanyanga ku tiyisa ku fana ka yena na Xikwembu; kambe u tithangurile hi ku teka xiyimo xa nandza, a tiendla la fanaka ni vanhu; kutani loko a kumiwe a fana ni munhu, a titsongahata, a va a tiendla la yingisaka ku yisa eku feni, ni le ku feni ka xihambano.

hikuva Xikwembu, hi xona lexi tirhaka eka n'wina ku rhandza ni ku endla hi ku tirhandzela ka xona.

Hikwalaho, Xikwembu xi n'wi tlakusile hi ku tlurisa, xi n'wi nyikile vito leri nga ehenhla ka mavito hinkwawo, leswaku hi vito ra Yesu, matsolo ya hinkwavo lava nga ematilweni ni la emisaveni ni le hansi ka misava, ma n'wi khinsamela, kutani tindzimi hinkwato ti vula leswaku Yesu Kriste i Hosi, ku ve ku dzuniseni ka Xikwembu Tatana.

Endlani hinkwaswo mi nga n'unun'uti ni ku kanetana, leswaku mi pfumala xisandzu ni xivati, mi va vana va Xikwembu lava nga solekiki exikarhi ka rixaka leri onhakeke, lero homboloka, rolero mi nga va ni ku vangama exikarhi ka rona, kukotisa mavoningo emisaveni, mi ri karhi mi tamela rito ra vutomi

Varhandziwa va nga, kukotisa loko mi yingisile hi masiku, ku nga ri loko ndzi ri eka n'wina ntsena, kambe ngopfungopfu loko ndzi nga ri kona, tirhelani ku hlayiseka ka n'wina hi nchavo ni ku rhurhumela