Popular Bible Verses from Romanos 12

Deildu

Qataq saishet da qoquiitague' da lataxac 'enauac na huetalec ana 'alhua. Nachaqrata da qanaralaxache' naua qarhuennataxacolli'. Qaq 'era da ishet da qauaỹachiñi maye ỹaỹamaxareeta Ñim Lo'onatac 'Enauacna, 'eeta': Cam 'onaxaic qataq cam qaỹaỹamaxareeta qataq cam nalochiguiñi.

Qaq ỹoqo'oye qami' ỹaqaỹarolqa, souaxat da lta'araic lqouagaxanaqtaic Ñim Lo'onatac 'Enauacna maye qami' ỹaaleguete, nache qami' ñachoxoreetoiguilo da ỹataqta imauec da qanachaalataxaqui da qaỹa'añiỹot da qauo'onataxañiỹot qataq qauo'oche cam ỹaỹamaxareeta Ñimaye. Qaq 'era qome da lataxac da qayo'oxonnataxanaxaqui.

Nagui da ñaq qauacheetaique Ñim Nataxala', nache qauachaxañi da qaramaicỹaxaqui. Qataq da huo'o ca qanque'eenaxaqui souaxat Ñim Nataxala', nache qauauo'oi ca qanhualaxaunaxaqui. Qataq da qanqouagaxauñiitacot Ñim Nataxala', nache qauachaxañi da nache qoquiito'ot da qanqouagaxaunaxaqui.

Saishet da 'aua'aqta'a da 'am loxonec ca qauem. Nachaqrata da 'oxonec ca qauem, qalaxaye 'arolec ca ỹaỹamaqchiguiñi.

Ñi 'oonolec ỹataqta ỹauotec ca lỹa 'eeta'am ca ỹoqta lqaỹa, qataq ñi 'oonolec huo'o naq 'enec naqa'en ca lỹa.

Ỹataqta 'eesa qanqa'eñi da qarsoxoyiqui, ñi 'oonolec ỹauotec ca lỹa. Qaumaqỹa'aguet 'enauac na qauem, qataq saishet da qoquiỹa'ai na ỹaỹamaqchiguiñipi.

Ỹataqta qanpogoxoiñiỹapegue' qome da qoviitaigui da nlagaxayec da qaualliquiitaigui na shiỹaxauapi ana 'alhua.

Qami' ỹaqaỹarolqa, saisheto' qome da qavi'enaxachiỹa'aguet ca qauem maye qami' qaỹo'oteque. Nachaqrato' qome da qauaqaita'a da Ñim Lo'onatac 'Enauacna maiche huapegue' da ỹauo'o ca nhuaxanaguec nam qauemaicpi. Cha'aye ana nere maye huetalec na la'aqtacpi Ñimaye nanettalec da la'aqtac, 'eeta': «Aỹem maye Nachaỹem so'ot ca nhuaxanaguec ca shiỹaxaua, Nachaỹem maye sami' cam 'itchiguiñi nhuaxanaguec ñi 'oonolec.»

Da qauo'onataxañiitac qalaq qanasapacheetac, saishet da qami' hualaiqa. Qauo'onataxañiitacot Ñim Lo'onatac 'Enauacna ỹataqta imauec da qarquiyaqteỹaxaqui.

Qaq Ñim Lo'onatac 'Enauacna ỹachegoxotchigui da lqouagaxanaqtaic da aỹem ỹanagui da lamaxashec Ñimaye, qaq ỹoqo'oye qami' shenapegalo da saishet qome da qauapagaqñiiteguec da qoñiitega qami' no'o'n. Nachaqrata da maiche qanloila't, maicheye cam nalotaua'a cam ỹami' Ñim Lo'onatac 'Enauacna ñi 'oonolec da qoñiita maye qoquiitague' So Cristo.

Da huo'o ca sa qami' iyacna'ape, nache saishet da qavi'eguelaxachiỹa'aguet da sa qauyacñiỹapec. Nachaqrata da qanpogoxoiñiỹapegue' da qauo'oche ca no'on, da talec 'enauac qanqa'eñi namayepi.

Qataq saishet da huo'o ca ỹoqtapegueuga da qoñiita. Qataq saishet da qami' ño'oxonnaxaiqa. Nachaqrata da qoñiita'am na shiỹaxauapi maye qaica ca la'amaqchec. Qataq saishet da qaupi'itaxañiitega da qanapacỹalec na laỹepi shiỹaxauapi da qoñiitega qami' ỹaanaxanaxaiqa.

Qataq nataqa'en 'eeta': «Ca 'am ipa'agueetac, da huo'otaq iqouat, qalaq 'auquia'axan. Qataq da huo'o na laquip, nache 'anỹomaxan. Cha'aye da nache qonetec de'era, nache camaye saishet da ỹe'eguelaxa da 'am ipa'agueetac.»

Qataq saishet da qauasaqailec ca qauem qara'aqtaqui nam saq qami' iyacna'ape. Nachaqrata da qauỹaxañiỹot Ñim Lo'onatac 'Enauacna, da yaqto' ỹanem ca no'on llecỹaxac namayepi. Da huo'o ca matapiguiñi, nache camaye qantonaxauai qome; qaq da huo'o ca daquicotac, nache nataqa'en qami' qaraquicoxouai camaye.

Qataq qautauañi ca qara'amqaanataxanaxauai da huo'o ca lhuenaxanaxa, qataq ỹataqta qauloỹeeguet ca camachaqca qanamaxasoxoiqui maye chegaqa'a ca qaỹoqta lỹa 'alhua.

Qauennachiỹa'a da lo'ocỹaxac ca shiỹaxaua da qalota na na'atta'a't logoxoshetpi, qalaxaye saishet da 'enauac namayepi da 'oonolec ca lo'onataxanaxac. Qaq shenaqta'am qomi' maye sa'amaqtenaqtac So Cristo, nache qomi' qalotoiguilo, qataq ña'araqtaua'a da lo'ocỹaxac So Cristo, qalaxaye ñi 'oonolec huo'o da maiche lo'onataxanaxac.