Popular Bible Verses from Roca 17

Deildu

Nazapa pouaza Zeso uati tarrari: —Titemeza ticcanirri. “Rrehe, Deo oua tonanomiui parrireui” tezape tinomirraro −narrari Zeso.

Nazapa timecote ouaza rrehe narrari tiaza uaidirehe inanarraro. Zotode tiaza uimasiri inanapomarraro. Zotode naqui tiaza uaidirehe inanapomarraro. Nama zanaporaha pocca uimasiri rricani nattinipe poua atti tiaza: “Peperri, orrine tiaza bica terrerani. Rridapanape nema onapoma-rreranitoui” nazapa manaco pouaza tettipe: “Rrehe, peperriua, tiaza boque-onerrerani” tarri, onarraro. Uada orrarieza nama zanaporrari 7 nehe bacco taraha nema nehe pocca uimasiriza peperri tizanaporri, onarraro −narrari Zeso.

Nazapa orraria poua uapi tobicaui qqui tazapa dozonirrari. Uatizeza rrazirema: —Deopa bica taui, bica taui! −nanirrari. Zesoza bacco nanizapa —Rrehe bica tinani −nauiuarrine Zeso baccouarri poua pitoza uitta, tocatteza naza pano namiza bacco tarraro. Nazama arra madirra dozonirraripa zama Samariacca.

Parri! Tiadenipe tiadeni tecauemananissa tarri, uimasiri tinanemana-rreraniuarrine −narrari Zeso. —Nazama timecote ouaza rrehe narrari tiaza uimasiri inanezape manaco mouaraza poua uati ticanarro: “Ouaza tirrine uima bica terrerani” tana. Nazapa poua cacomerazapa: “Rrehe, tiaza nema onade. Orrine bica terrerani. Rridapanape nema onapoma-rreranitoui” nazapa manaco pouaza: “Rrehe, peperriua, tiaza ouadi-rrerani” tana, onarraro.

Nazapa Zeso uati tarrari: —Naraha arra madirra 10 quenarraripa tocanomire-rraraco? Tocanomireraha mota 9 quenarraridenipa nerrecouarri? −narrari Zeso.

Nazapa manaco ia Zozossede pouadeniza uati tarrari: —Ticcadeni rrehenirri bazira tehe pina mostada nocco bazira tarrarissa nehe ticarrimanezape ssamo tanicca tinanemananiuarrine tiparriremananitoui. Pina arrirraro auaza uati tiqueneza: “Aua, tia motta rreo tineza ueni imehi inidizana tia ppa tizana” tiquenezape aua tettideniza ibora tanitouiraha −narrari Zeso.

Madirrapa pocca madie Deoza acco taza arrirraro namiza madizanapouiuarrine touinira nazapa zoqqueuitoui. Zoqquezapa camittehe rriquerreranicca carri-rrarauitoui. Naraha madirrapa pocca madie Deoza eccorezape poua inanazoqque-manaraha camittehe rriquerreranicca carrizanapouitoui −narrari Zeso.

Nazapa Zeso pocca zozosse tabaqquiza uati tarrari: —Arri namiza timadimanarrarope uima tinanemananiuarrine carri tani. Parri, nema narraroza uimasiri tinanemana tani. Naraha madirrarrine uimasiri tinanemanezape pouaza uima denima oppina tanicca ssonarinitoui. Madirra nama narraripa Deona inarrizouitoui. Nazama madirra orrariarrine ouaza rrehe quenarrari uimasiri inanemanezape pouaza narrizoue oppina tanicca ssonarinitoui. Erredeni ouaza rrehe quenarrarideni naco madirra uimasiri mamariderrine uimasiri tocauatterazapa arra uimasiri mamaride pouaza narrizoue oppina tanicca ssonarinitoui. Pina arrirraro uimassa narraro: Siba ccanarrabote poua mattoza ssoque zaneza ueni imehiuarri rre tauiuarrine cco tozippazapa oppina taraha narrizoue denima oppina tanicca pouaza ssonarinitoui.

—Ouape Madirra Bedi orrarraroa niza occaronapomezape pina maittaccazama Noe madipoza ppani ccarronarrarocca uimassa nanitoui. Madirradenipa rrirripemana narrari, ze ze quenarrari, uena uena canarrari. Nama quequenanaporraria arra Noe pocca oza imenibote tocataboniuarrineccaza toqquezimauicca uada bacco tarraroparri. Naraha madirra motapa ssamoqquiri naza ppani bacco narronazapa bazima rre tocanireza rricarrari.