Vinsæl biblíuvers úr हिब्रु 11

Deildu

खाङधुरि पालि दोअ्का चाहि, आस पाका काथाता ढुक्‍क हिलि कालाउ मातिङका काथाता पाक्का निसित ताअ्लि। केलाइको पुर्खागेलाइ इसिका खाङधुरि पाका हिघाहि, ओदोङ भाअ्सिङ परमेस्वर इम्बालाइ दोफा खुसि हिघाखे दोअ्का तिङपाहि।

वाकोता खाङधुरि हिनु खिनिङ द्‍याङ परमेस्वरहेङ लेङचापालि द्वाङ, हाइपालिपानु परमेस्वरकोता लोकालाइ खाङधुरि पालि गोइखे, कि परमेस्वर हि कालाउ जातिङको वासेहेङ भोकालाइहेङ वा इनाम प्याङ।

खाङधुरि पाहासो केलाइ बुझिनाखे कि, परमेस्वरको ताइको बचन पाहासो सुमिङ सिरजाइहि, कालाउ वा दोङ केलाइहेङ तिङलि दोका आमेने बानाइलिको भाअ्सिङ मातिङका आमेनेको प्रयोग पाहि।

खाङधुरि पाहासो आब्राहाम दोअ्का द्‍याङ परमेस्वर दोङ काइका बेला वाको आग्या केम्हि कालाउ हाने दोअ्का थामे भारि हानिहि, जेदोङ थामे परमेस्वर उत्तराधिकारको रुपता वासेहेङ न्हुसो पिधावा, कालाउ हिसो हानेलि थाहा मानिङसिङ वा ताइको सारभि लाअ्तेङ हानिहि। परमेस्वर प्रतिग्या पाका थामेता आब्राहाम एमि परदेसि कोनिङ भाइपा खोपारागेलाइ बानाइतेङ हि, कालाउ आब्राहाम दोफाङ वाको चान इसाहाक कालाउ वाको चु याकुब बुङ परमेस्वरसो ओदोङ प्रतिग्या निङहि कालाउ एन्साङ पातेङ खोपारा बानाइतेङ हि।

खाङधुरि पाहासो नुहा मिङ पाका द्‍याङ हेलाउ बुङ मातिङका बानेको बारेता परमेस्वरसो चेताउनि निङतेङ वाको आग्या केम्तेङ ताइको जाहानहेङ बान्चिपालि एनोङ बारका जाहाज बानाइहि। हाइपालिपानु नुहा खाङधुरि पाहि, वा आरु खाङधुरि मापाका द्‍याङगेलाइहेङ दुसिका थोहोरिहि, कालाउ खाङधुरि पाहासो परमेस्वर नुहाहेङ धर्मि बानाइहि।

हनोक मिङ हिका द्‍याङको खाङधुरि पाहासो परमेस्वर वासेहेङ सिन्हुकाङ हिलाउ स्वर्ग ह्रुता तोल्हेतेङ चुम्पुहि, कालाउ वा मासिहि कालाउ वासेहेङ हासु बुङ मानिङहि। हाइपालिपानु स्वर्गता तोल्हेतेङ चुम्पुलि खान्तेङ लाम्फा हनोक परमेस्वरहेङ लेङचापाका हिघाहि, एसापा धर्मसास्तरता लेखेका हि।

खाङधुरि पाहासो आदमको चान हाबिल परमेस्वरहेङ ताइको दादा कयिन खान्तेङ आझाइ ग्रहन योग्य भोग पिहि, कालाउ इङको भोग पाहासो दोङ परमेस्वर हाबिलहेङ धर्मि द्‍याङको रुपता ग्रहन पाहि, कालाउ हाबिलको चढाइका भोग पाहासो चाहि परमेस्वर खुसि जेङहि दोअ्तेङ तिङपाहि। कालाउ हाबिल सिलाउ बुङ परमेस्वरता खाङधुरि पाकाको बारेता एला बुङ वा केलाइहेङ धिरपाखे।

खाङधुरि दोङ पाहासो आब्राहामको बे सारा बुङ ताइको उमेर हानिलि दोअ्तेङ बुङ गान्धितेका सरबुङ निङहि, हाइपालिपानु परमेस्वर ताइको प्रतिग्या पुरा पाङ दोअ्तेङ आब्राहाम खाङधुरि पाका हिघाहि।

हाइपालिपानु वा जेलाउबुङको भाअ्सिङ हिका जगता बनिका सहरता हिलि ह्रुमतेङ हिघाहि, जाइहेङ बानाइका कालाउ सिरजाइ पाका परमेस्वर दोङ हि।

मिस्रो सारभिको राजा फारोहको चामिन्दि मोसाहेङ पोसेहि। जेलाउ मोसा बारातेङ धाना जेङहि, कालाउ ताइको खाङधुरि पाहासो दोङ वा माकिहि कि द्‍याङगेलाइ वासेहेङ राज कुमारिको चान दोअ्ताको दोअ्तेङ। एघिरिङको भाअ्सिङ पापको आनान्द भोगिलि खान्तेङ भरु मोसा परमेस्वरको द्‍याङगेलाइ दोफा दुख भोगिलि छाल्हि। मोसा मिस्रो सारभिको धन सम्पति खान्तेङ ख्रिस्टको भाअ्सिङ खाङलि माकिका जेङलि वा झन बार्का सम्पति थानिहि। हाइपालिपानु वा ताइको इनाम निङका दामा खाङतेङ हिघाहि। राजाको चेर दोफा माअ्थिसिङ खाङधुरि पाहासो दोङ वा मिस्रो सारभि लाअ्हि, हाइपालिपानु वासेहेङ थाहा जेङतेङ बुङ तिङलि मादोअ्का परमेस्वरहेङ तिङका कोनिङ भाइपा पाट्ताक्काइ न्हु माघुरिहि।

खाङधुरि पाहासो ताइको जाच जेङलाउ आब्राहाम ताइको चान इसाहाकहेङ भोग पिहि, जेलाउ कि परमेस्वर आब्राहामहेङ जेदोङ चानको प्रतिग्या पाका हिघाखे, कालाउ बुङ वा ताइको एमि खिनिङ चानहेङ भोग पिलि राजि जेङहि।

खाङधुरिकोङ भरता राहाब दोअ्का एमि बेस्या बुङ परमेस्वरको आग्या माकिकालाइ दोफा मानासाहि, हाइपालिपानु वा म्होतेङ यरिहो सहर खाङलि लोका इस्राएल सारभिको जासुसगेलाइहेङ स्‍वागत पाका हिघाहि।

कालाउ खाङधुरि पाहासो दोङ सेङका मिलिङ कोनिङ भाइपा तेतेङ मिस्रो सारभिको द्‍याङगेलाइ लाल समुन्द्रता तेतेङ पाराहि। कालाउ इस्राएल सारभिको द्‍याङगेलाइ चाहि एन्साङ पातेङ समुन्द्र पारालि भोलाउ चिता वाङतेङ सिहि।

इस्राएल सारभिको द्‍याङगेलाइ परमेस्वरता खाङधुरि पाका कारन दोङ न्हि दिना थेकापा यरिहो सहरको बेरेमहेङ ओबालाइ कोर्पाहाङ घुराइतेङ हि, कालाउ न्हुसो इङको बेरेम भापाहि।

खाङधुरि पाहासो दोङ मोसा इस्राएल सारभिको द्‍याङगेलाइहेङ फिनुता भोग पिकाको हिति सिरकाइतेङ निस्तार-पार्बा मानिलि आग्या पिहि, कालाउकि परमेस्वरको दिङगिल्का सेअ्का दुत इस्राएललिगेलाइको जेठा चानगेलाइहेङ माअ्सेताको।

खाङधुरि पाहासो योसेफ ताइमि सिलि तोम्लाउ धुक्क जेङतेङ इस्राएललिगेलाइ मिस्रो सारभि लाअ्का बारेता दोअ्का हिघाहि, कालाउ मिस्रो सारभि लाअ्तेङ हानिलाउ वा इम्बालाइहेङ ताइको हारा बुङ दोफाङ चुम्पुलिको भाअ्सिङ दोअ्का हिघाहि।

खाङधुरि पाहासोङ सिलि तोम्का बेलाता याकुब योसेफको न्हेमि चानहेङ आसिरबाद पिहि कालाउ ताइको लाठिता आडितेङ परमेस्वरको आराधाना पाहि।

खाङधुरि पाहासोङ इसाहाक ताइको न्हेमि चानगेलाइ याकुब कालाउ एसाबहेङ प्रतिग्या पाका भबिस्यको आसिसको बारेता आसिरबाद पिहि।